თავი 4

სად არის ზღვარი?

სწორია თუ არასწორი . . .

შეყვარებულები საერთოდ არ უნდა შეეხონ ერთმანეთს.

□ სწორია

□ არასწორია

ბიჭმა და გოგომ შეიძლება შესცოდონ იმისდა მიუხედავად, ექნებათ თუ არა სქესობრივი კავშირი.

□ სწორია

□ არასწორია

ნამდვილი სიყვარულისთვის აუცილებელია ალერსი და ხვევნა-კოცნა.

□ სწორია

□ არასწორია

ამ თემაზე, ალბათ, ბევრი გიფიქრია. თუ შეყვარებული გყავს, შეიძლება ხანდახან ძნელი იყოს იმის განსაზღვრა, თუ სად არის ზღვარი, რომელსაც არ უნდა გადააბიჯო სიყვარულის გამოხატვის დროს. ახლა შევეხოთ ზემოთ მოხსენიებულ სამ საკითხს და ბიბლიის დახმარებით ერთად გავცეთ პასუხი კითხვას: სად არის ზღვარი?

● შეყვარებულები საერთოდ არ უნდა შეეხონ ერთმანეთს.

არასწორია. ბიბლია არ კრძალავს სიყვარულის სათანადოდ გამოხატვას. მასში მოთხრობილია ერთი შეყვარებული წყვილის, შულამელი გოგოსა და მწყემსი ბიჭის ისტორია. მათ იცოდნენ, სად იყო ზღვარი. თუმცა, როგორც ჩანს, დაქორწინებამდე ისინი ზომიერების ფარგლებში ეალერსებოდნენ ერთმანეთს (ქებათა ქება 1:2; 2:6; 8:5). დღესაც ზოგისთვის მისაღებია გარკვეულ ფარგლებში სიყვარულის ალერსით გამოხატვა იმ შემთხვევაში, თუ სერიოზულად ფიქრობენ დაქორწინებაზეa.

თუმცა შეყვარებულებმა განსაკუთრებული წინდახედულობა უნდა გამოიჩინონ. კოცნა, ჩახუტება და მსგავსი აღმგზნები მოქმედება ადვილად შეიძლება გადაიზარდოს სქესობრივ უზნეობაში. იმ შემთხვევაშიც კი, თუ შეყვარებულებს წმინდა გრძნობები აქვთ, ისინი შეიძლება აჰყვნენ სურვილებს და უზნეობამდე მივიდნენ (კოლოსელები 3:5).

● ბიჭმა და გოგომ შეიძლება შესცოდონ იმისდა მიუხედავად, ექნებათ თუ არა სქესობრივი კავშირი.

სწორია. „სიძვად“ ნათარგმნ ბერძნულ სიტყვას („პორნია“) საკმაოდ ფართო მნიშვნელობა აქვს. მასში იგულისხმება დაუქორწინებლებს შორის ყოველგვარი სქესობრივი ურთიერთობა, რომლის დროსაც ხდება სასქესო ორგანოებზე ზემოქმედება. ასე რომ, „სიძვა“ მარტო სქესობრივი კავშირი არაა და მოიცავს პარტნიორის მასტურბაციას, ორალურ და ანალურ სექსს.

ბიბლია მარტო სიძვას არ გმობს. პავლე ამბობს: „ხორცის საქმეები აშკარაა. ეს არის: სიძვა, უწმინდურება, თავაშვებულობა“. ის დასძენს: „ასე მოქმედნი ღვთის სამეფოს ვერ დაიმკვიდრებენ“ (გალატელები 5:19—21).

რა არის „უწმინდურება“? ბერძნული სიტყვა, რომელიც „უწმინდურებად“ არის ნათარგმნი, გულისხმობს ყოველგვარ უხამსობას, რაც შეიძლება მეტყველებასა თუ საქციელში გამოვლინდეს. უდავოდ უწმინდურებაა სხვისი ტანსაცმლის ქვეშ ხელის შეცურება, სხვისი გაშიშვლება ან ინტიმური ადგილების, მაგალითად მკერდის, ალერსი. ბიბლია მკერდის ფერებას მხოლოდ მეუღლეთა ურთიერთობის კონტექსტში მოიხსენიებს (იგავები 5:18, 19). ზოგი ახალგაზრდა მოურიდებლად არღვევს ღვთის ნორმებს. ისინი შეგნებულად გადადიან ზღვარს ან თავიანთი ვნებების დაკმაყოფილებას სხვადასხვა პარტნიორთან ცდილობენ.

ასეთი ახალგაზრდები შეიძლება მივიდნენ იქამდე, რასაც პავლემ „თავაშვებულობა“ უწოდა. „თავაშვებულობად“ ნათარგმნი ბერძნული სიტყვა ნიშნავს აღმაშფოთებელ და ზღვარგადასულ საქციელს, უსირცხვილობას, აღვირახსნილობას. გინდა, რომ შენც მიეკუთვნებოდე „ყველანაირად ზნედაცემულ“ ადამიანთა რიცხვს, რომლებიც ‘თავაშვებულობას ეძლევიან, რათა უწმინდურება ჩაიდინონ ყოველგვარი გაუმაძღრობით’? (ეფესოელები 4:17—19).

● ნამდვილი სიყვარულისთვის აუცილებელია ალერსი და ხვევნა-კოცნა.

არასწორია. შეიძლება ზოგს განსხვავებული აზრი ჰქონდეს, მაგრამ ურთიერთობის განმტკიცება ნამდვილად არ არის დამოკიდებული ზღვარგადასულ ალერსსა და ხვევნა-კოცნაზე. პირიქით, ამან შეიძლება შეყვარებულებს ერთმანეთის ნდობა და პატივისცემა დააკარგვინოს. ლორა იხსენებს: „ერთხელ, როცა დედაჩემი სახლში არ იყო, ჩემმა შეყვარებულმა შემომიარა, ვითომ ტელევიზორის ყურება უნდოდა. თავიდან ხელზე მომკიდა ხელი. მერე ხელების ფათური დამიწყო. ვერაფერი ვუთხარი იმის შიშით, რომ გაბრაზდებოდა და დამტოვებდა“.

შენი აზრით, ლორაზე უფრო ფიქრობდა ის ბიჭი თუ თავისი სურვილების დაკმაყოფილებაზე? თუ ადამიანი უწმინდური საქციელისკენ გიბიძგებს, შეიძლება ამას ნამდვილი სიყვარული დაარქვა?

როცა ბიჭი გოგოს ქრისტიანული ნორმების წინააღმდეგ წასვლას აიძულებს, ის არღვევს ღვთის კანონს და ფასს უკარგავს ყველაფერს, რაც სიყვარულის დასამტკიცებლად აქვს ნათქვამი. თუ გოგო უარს არ ეუბნება, მას იმის ნებას რთავს, რომ როგორც უნდა, ისე გამოიყენოს. რაც უფრო სამწუხაროა, ამგვარად ის უწმინდურებამდე და, შესაძლოა, სიძვამდეც კი მიდისb (1 კორინთელები 6:9, 10).

დაადგინეთ ზღვარი, რომელსაც არ გადახვალთ

თუ შეყვარებული გყავს, რა უნდა გააკეთო, რომ გრძნობების გამოვლენისას მეტისმეტი არ მოგივიდეს? წინასწარ დაადგინეთ ზღვარი, რომელსაც არ გადახვალთ. იგავების 13:10-ში ნათქვამია: „მოთათბირეებთან . . . სიბრძნეა“. ესაუბრე შეყვარებულს იმაზე, თუ რა იქნება მისაღები და რა — არა. სახლში სახანძრო სიგნალიზაცია მანამდე უნდა დააყენო, სანამ ხანძარი გაჩნდება. ამ საკითხზეც მანამ უნდა ისაუბროთ, ვიდრე ცდუნების წინაშე აღმოჩნდებით.

ასეთ დელიკატურ თემაზე საუბარი შეიძლება რთული და ძალიან უხერხულიც კი იყოს, განსაკუთრებით მაშინ, თუ ურთიერთობა ახალი დაწყებული გაქვთ. მაგრამ საზღვრების დადგენა თავიდან აგაცილებთ სერიოზულ პრობლემებს, რადგან საჭირო დროს „სიგნალიზაცია“ ჩაირთვება. ასეთ საკითხებზე საუბარი შეიძლება იმის მაჩვენებელიც იყოს, თუ როგორი მომავალი ექნება თქვენს ურთიერთობას. თავშეკავება, მოთმინება და ერთმანეთის ინტერესებზე ზრუნვა შეყვარებულებს ამზადებს საიმისოდ, რომ დაქორწინების შემდეგ მათ სრული ჰარმონია ჰქონდეთ ინტიმურ ურთიერთობაში (1 კორინთელები 7:3, 4).

ფაქტია, რომ ღვთის ნორმების დაცვა არ არის იოლი. მაგრამ ენდე იეჰოვას რჩევებს. ესაიას 48:17-ში ის გეუბნება: „მე გასწავლი შენ სასიკეთოდ და გატარებ იმ გზით, რომლითაც უნდა იარო!“. იეჰოვას შენთვის მხოლოდ კარგი უნდა!

წაიკითხე დამატებითი მასალა პირველი ტომის 24-ე თავში.

[სქოლიოები]

საკვანძო ბიბლიური მუხლი

„სიყვარული . . . უწესოდ არ იქცევა“ (1 კორინთელები 13:4, 5).

რჩევა

ერთმანეთს მეგობრების წრეში შეხვდით ან სთხოვეთ ვინმეს, რომ თქვენთან ერთად იყოს. ნუ გარისკავთ და ნუ განმარტოვდებით, მაგალითად გაჩერებულ მანქანაში ან სახლში.

იცოდი, რომ . . . ?

თუ დანიშნულები ხართ, საჭიროა ზოგიერთ ინტიმურ საკითხზე საუბარი. მაგრამ შეყვარებულის აღსაგზნებად გამიზნული საუბარი უწმინდურებაა, თუნდაც ეს ტელეფონით ან SMS-ებით ხდებოდეს.

რა უნდა გავაკეთო

უზნეობამდე რომ არ მივიდე ․․․․․

თუ შეყვარებული უწმინდურებისკენ მიბიძგებს ․․․․․

რა ვკითხო მშობლებს ამ საკითხზე? ․․․․․

როგორ ფიქრობ?

● შეყვარებულთან ურთიერთობაში რა იქნება შენთვის მისაღები და რა — არა?

● რა განსხვავებაა სიძვას, უწმინდურებასა და თავაშვებულობას შორის?

[ჩანართი 46 გვერდზე]

„მე და ჩემი საქმრო ზნეობრივ სიწმინდეზე ბიბლიურ სტატიებს ვკითხულობთ. ეს გვეხმარება სუფთა სინდისის შენარჩუნებაში“ (ლეტიცია).

[ჩარჩო 44 გვერდზე]

როგორ მოვიქცე, თუ ზღვარს გადავედით?

როგორ უნდა მოიქცე, თუ არასწორ საქციელამდე მიხვედით? ნუ მოიტყუებ თავს და ნუ იფიქრებ, რომ პრობლემას მარტო გაუმკლავდები. ერთი ახალგაზრდა იხსენებს: „ვლოცულობდი, რომ ეს მეტჯერ აღარ მოგვსვლოდა. მაგრამ ერთი-ორჯერ მაინც ზედმეტი მოგვივიდა“. ასე რომ, დაელაპარაკე მშობლებს. გარდა ამისა, ბიბლია გვირჩევს, რომ ‘მოვუხმოთ კრების უხუცესებს’ (იაკობი 5:14). ეს გამოცდილი ქრისტიანები პრაქტიკულ რჩევებს მოგცემენ და დაგეხმარებიან, რომ დაიბრუნო ღმერთთან კარგი ურთიერთობა.

[სურათები 47 გვერდზე]

სახანძრო სიგნალიზაცია მანამდე უნდა დააყენო, სანამ ხანძარი გაჩნდება. გრძნობების გამოხატვას წინასწარ უნდა დაუდგინოთ ზღვარი, ვიდრე ცდუნების წინაშე აღმოჩნდებით.

თავი 5

რატომ ღირს სექსზე უარის თქმა ქორწინებამდე?

„სულ იმას მეუბნებიან, რომ მეც უნდა მქონდეს ვინმესთან სექსი“ (კელი).

„ზოგჯერ თავს უხერხულად ვგრძნობ იმის გამო, რომ ჯერ სექსი არავისთან მქონია“ (ჯორდონი).

„არავისთან ყოფილხარ ჯერ?“ — ამ კითხვაზე შეიძლება ცივმა ოფლმა დაგასხას. ბიჭს ან გოგოს, რომელსაც არავისთან ჰქონია სექსი, ბევრგან უცნაურად და „გოიმად“ თვლიან. ამიტომ ბევრი თინეიჯერობაშივე „ასწრებს“ ყველაფერს.

ცალკე სურვილი, ცალკე თანატოლები

თუ ქრისტიანი ხარ, ბიბლიიდან გეცოდინება, რომ უნდა ‘მოერიდო სიძვას’ (1 თესალონიკელები 4:3). მიუხედავად ამისა, ზოგჯერ შეიძლება გაგიჭირდეს თავის გაკონტროლება. პოლი გულახდილად ამბობს: „ზოგჯერ ჩემდა უნებურად ვიწყებ სექსზე ფიქრს“. როგორც წესი, ასეთი რამ უჩვეულო არ არის.

ძნელი ასატანია, როცა მუდმივად დაგცინიან და სხვა თვალით გიყურებენ იმის გამო, რომ არავისთან ხარ ნამყოფი. მაგალითად, შეიძლება თანატოლები გეუბნებიან, რომ ჩამორჩენილი ხარ, თუ სექსი არავისთან გქონია. ელენი ამბობს: „სხვებს რომ უსმინო, სექსზე სასიამოვნო არაფერია. მაგარი გოგო მაშინ ხარ, თუ ყველას ჩაუწვები ლოგინში“.

მაგრამ შენი თანატოლები შეიძლება ზოგიერთ საკითხზე საუბარს გაურბიან. მაგალითად, მარია იხსენებს, რას გრძნობდა თავის შეყვარებულთან გატარებული ღამის შემდეგ: „საშინლად მრცხვენოდა. საკუთარი თავიც შემძულდა და ის ბიჭიც“. ასეთი რამ უფრო ხშირად ხდება, ვიდრე ბევრ ახალგაზრდას ჰგონია. სინამდვილეში, ქორწინებამდელი სექსი უმეტესწილად ემოციურ ტკივილს აყენებს ადამიანს, რასაც შეიძლება მძიმე შედეგები მოჰყვეს.

თუმცა ზოგიერთ ახალგაზრდას, მაგალითად შანდას, აინტერესებს: „თუ ქორწინებამდე არ შეიძლება სქესობრივი ურთიერთობა, რატომღა მოგვცა ღმერთმა ამის მოთხოვნილება?“. კარგი კითხვაა. მოდი, დავფიქრდეთ:

მხოლოდ სქესობრივ ლტოლვას განიცდის ადამიანი? არა. იეჰოვა ღმერთმა ისე შეგვქმნა, რომ მრავალი სურვილი და ემოცია გვქონოდა.

მაშინვე აჰყვები ნებისმიერ სურვილს, რაც გაგიჩნდება? ცხადია, არა. ღმერთმა შენ საკუთარი თავის გაკონტროლების უნარიც მოგცა.

ასე რომ, სურვილი შეიძლება შენდა უნებურად გაგიჩნდეს, მაგრამ შენზეა დამოკიდებული, აჰყვები თუ არა მას. თუ ვინმეზე გაბრაზდი, ეს არ ნიშნავს იმას, რომ აუცილებლად უნდა დაარტყა. იმავეს თქმა შეგვიძლია სქესობრივ ლტოლვაზეც. შეიძლება გქონდეს სურვილი, მაგრამ ეს არ ნიშნავს იმას, რომ მაინცდამაინც მის დაკმაყოფილებაზე უნდა იფიქრო.

ღმერთს არ სურდა, რომ ადამიანს სასქესო ორგანოები არასწორი მიზნისთვის გამოეყენებინა. ბიბლიაში წერია: „ყოველმა თქვენგანმა იცოდეს თავისი ჭურჭლის ფლობა სიწმინდითა და პატივით“ (1 თესალონიკელები 4:4). არსებობს „სიყვარულის დრო და სიძულვილის დრო“. მსგავსად ამისა, სქესობრივი მოთხოვნილებების დაკმაყოფილებასაც თავისი დრო აქვს და ამისგან თავის შეკავებასაც (ეკლესიასტე 3:1—8). შენი სურვილები შენვე უნდა აკონტროლო.

როგორ უნდა მოიქცე, თუ ვინმე დაცინვით გეუბნება: „შენ რა, მართლა არავისთან ყოფილხარ?“. თუ ამას დასამცირებლად გეუბნება, შეგიძლია უთხრა: „მერე რა, რომ არ ვყოფილვარ, სულაც არ მრცხვენია ამის“. ან შეგეძლო ასეთი რამ გეთქვა: „ეს ჩემი საქმეა და ამ საკითხზე არ ვაპირებ სხვებთან ლაპარაკს“a (იგავები 26:4; კოლოსელები 4:6). თუმცა მსგავსი კითხვა ვინმემ შეიძლება ინტერესის გამო დაგისვას. ასეთ შემთხვევაში შეიძლება ღირდეს მასთან შენს შეხედულებებზე საუბარი.

კიდევ რა შეგიძლია უთხრა მას, ვინც გეკითხება: „შენ რა, მართლა არავისთან ყოფილხარ?“. ქვემოთ დაწერე, თუ გაქვს რამე აზრი.

․․․․․

ძვირფასი საჩუქარი

რას ფიქრობს ღმერთი, როცა გოგოს და ბიჭს ქორწინებამდე აქვთ სქესობრივი ურთიერთობა? წარმოიდგინე, რომ მეგობარს საჩუქარი უყიდე. მაგრამ ვიდრე მისცემდი, შემთხვევით ნახა ის შენთან, ცნობისმოყვარეობამ სძლია და გახსნა. მოგეწონება მისი საქციელი? ღვთის თვალში შენც ამ მეგობარს დაემსგავსები, თუ დაქორწინებამდე ვინმესთან გექნება სექსი. ღმერთს არ მოეწონება, თუ „საჩუქარს“, რომელსაც ქორწინებისთვის გიმზადებს, დროზე ადრე „გახსნი“ (დაბადება 1:28).

და მაინც, სექსუალურ სურვილებს ვერსად გაექცევი. როგორ უნდა მოიქცე? ისწავლე მათი მართვა. ეს შენს ძალებს არ აღემატება. ილოცე და სთხოვე იეჰოვას დახმარება. მისი სული დაგეხმარება თავშეკავების უფრო მეტად გამოვლენაში (გალატელები 5:22, 23). გახსოვდეს, რომ „იეჰოვა კარგს არ დაუკავებს უბიწოდ მავალთ“ (ფსალმუნი 84:11). გორდონი ამბობს: „ხანდახან თავში გამიელვებს ხოლმე, რომ ქორწინებამდელ სექსში ცუდი არაფერია. ამ დროს მაშინვე ვიწყებ ფიქრს იმაზე, რაც ამას მოჰყვება და ვხვდები, რომ ნამდვილად არ ღირს იეჰოვასთან ურთიერთობის გაფუჭება“.

უცნაური და არანორმალური არაფერია იმაში, თუ არავისთან გქონია სქესობრივი ურთიერთობა. სასირცხვილო, დამამცირებელი და საზიანო უზნეობაა და არაა უზნეობაზე უარის თქმა. ნუ მოექცევი ქვეყნიური აზროვნების ყალიბში და ნუ იფიქრებ, თითქოს ბიბლიური ნორმებით ცხოვრება უაზრობაა. ამის წყალობით გაუფრთხილდები საკუთარ ჯანმრთელობას, ემოციურ მდგომარეობას და, რაც მთავარია, ღმერთთან ურთიერთობას.

[სქოლიო]

საკვანძო ბიბლიური მუხლი

„ვინც . . . დაუქორწინებლობა [სქესობრივი ურთიერთობისგან თავშეკავება] გადაწყვიტა გულში, კარგად იქცევა“ (1 კორინთელები 7:37).

რჩევა

მოერიდე მათთან — თუნდაც იმ თანამორწმუნეებთან — მეგობრობას, ვინც ზერელედ ეკიდება ზნეობრივ ნორმებს.

იცოდი, რომ . . . ?

ვინც ქორწინებამდე არ ამბობს უარს სხვადასხვა პარტნიორთან ურთიერთობაზე, საეჭვოა, რომ დაქორწინების შემდეგ შეიცვალოს. ხოლო ვინც ქორწინებამდეც იცავს ღვთის ნორმებს, ხშირ შემთხვევაში, მეუღლის ერთგულია.

რა უნდა გავაკეთო

დაქორწინებამდე თავი რომ შევიკავო სქესობრივი ურთიერთობისგან ․․․․․

თუ ვინმე მიბიძგებს ამ გადაწყვეტილების შეცვლისკენ ․․․․․

რა ვკითხო მშობლებს ამ საკითხზე?

როგორ ფიქრობ?

● რატომ დასცინის ზოგი მათ, ვინც ქორწინებამდე თავს იკავებს სქესობრივი ურთიერთობისგან?

● რატომ არის რთული სექსზე უარის თქმა დაქორწინებამდე?

● რატომ ღირს ქორწინებამდე სექსისგან თავის შეკავება?

● როგორ აუხსნიდი შენს უმცროს დას ან ძმას, რატომ ღირს ქორწინებამდე სექსისგან თავის შეკავება?

წაიკითხე დამატებითი მასალა პირველი ტომის 24-ე თავში.

[ჩანართი 51 გვერდზე]

„ცდუნებას რომ გავუძლო, ყოველთვის ვფიქრობ იმაზე, რომ ‘არც მეძავს, არც უწმინდურს არა აქვს მემკვიდრეობა ღვთის სამეფოში’“ (ეფესოელები 5:5) (ლიდია).

[ჩარჩო 49 გვერდზე]

სამუშაო გვერდი

რა მოხდება სინამდვილეში შემდეგ?

ხშირად ახალგაზრდები არ საუბრობენ ქორწინებამდელი სექსის უარყოფით შედეგებზე. პოპულარულ გასართობ საშუალებებშიც შენიღბულია რეალობა. ქვემოთ აღწერილია სამი სიტუაცია. დაფიქრდი, სინამდვილეში რა შეიძლება მოხდეს შემდეგ.

● შენი კლასელი ტრაბახობს, რომ ბევრ გოგოსთან ჰქონდა სექსი. როგორც თვითონ ამბობს, მაგარ დროს ატარებს და თანაც არავინ არაფერს კარგავს. მაგრამ რა ხდება ხოლმე სინამდვილეში შემდეგ?

● ფილმი მთავრდება სცენით, რომელშიც დაუქორწინებელი მოზარდები სიყვარულის ნიშნად სქესობრივ კავშირს ამყარებენ. რა შეიძლება მოხდეს შემდეგ რეალურ ცხოვრებაში?

● სიმპათიური ბიჭი სექსს გთავაზობს და გეუბნება, რომ ამას ვერავინ გაიგებს. თუ დათანხმდები და ამის დამალვას შეეცდები, სინამდვილეში რა მოხდება შემდეგ?

[სურათი 54 გვერდზე]

თუ დაქორწინებამდე გექნება ვინმესთან სექსი, დაემსგავსები ადამიანს, რომელიც დროზე ადრე ხსნის მისთვის განკუთვნილ საჩუქარს.