იყავით გაერთიანებულნი და გქონდეთ ურთიერთშორის შეთანხმებულობა
1 განა ხშირად არ გაოცებთ ის, თუ როგორ საოცრად არის შექმნილი ჩვენი სხეული? (ფსალმ. 138:14). სხეულის ყოველი ნაწილი ურთიერთშეთანხმებულად მუშაობს. ღვთის სიტყვა ქრისტიანულ კრებას ადარებს სხეულს, რომლის ნაწილებიც ურთიერთშეთანხმებულად მოქმედებენ. კრების ყველა წევრი კრების თავის, ქრისტეს, ხელმძღვანელობით ‘შენაწევრებული და შემტკიცებულია ყოველნაირი მაცოცხლებელი კავშირების საშუალებით’ (ეფეს. 4:16ა). ამგვარად იყენებს იეჰოვა თავის გაერთიანებულ ხალხს გასაოცარი საქმეების შესასრულებლად.
2 პირველი საუკუნის კრების წევრები „ერთსულოვნად“ ზრუნავდნენ ერთიმეორის სულიერ და ფიზიკურ მოთხოვნილებებზე (საქ. 2:44—47). იეჰოვას მხარდაჭერით მათ ერთობლივად სასტიკ წინააღმდეგობასაც კი სძლიეს (საქ. 4:24—31). სადაც უნდა წასულიყვნენ, ყველგან აცხადებდნენ ცნობას სამეფოს შესახებ და ამგვარად, სასიხარულო ცნობა ემცნო იმ დროისთვის ცნობილ მსოფლიოს (კოლ. 1:23). ჩვენს დროში კი ქრისტიანთა კრებები ერთობლივად ახორციელებენ იმავე დავალებას, ოღონდ გაცილებით ფართო მასშტაბით. რა უწყობს ამ ერთიანობას ხელს?
3 ღვთიური სწავლებით გაერთიანებულნი. მთელ მსოფლიოში ჩვენ ჩვენი თაყვანისმცემლობა გვაერთიანებს. როგორ? ჩვენ ვაღიარებთ იმ ხილულ არხს, რომლის მეშვეობითაც იეჰოვა სულიერ ‘საზრდოს დროულად’ გვაწვდის (მათ. 24:45). აგრეთვე ვაფასებთ იეჰოვას მიერ ბოძებულ ‘ძღვენს ადამიანების სახით’, რომლებიც გვმოძღვრავენ კრებებში. თუ მორჩილად ვიღებთ ყველაფერს, რასაც იეჰოვა სულიერი კვებისთვის გვაწვდის, ღვთის სიტყვას უფრო და უფრო კარგად გავიგებთ; ეს კი იმის სურვილს აღგვიძრავს, რომ ჩვენ, იესოს მოწაფეებმა, მივბაძოთ ჩვენს მოძღვარს. ამიტომ უნდა განვაგრძოთ ღვთის სიტყვის შესწავლა და გულმოდგინედ ვეცადოთ, ‘მივაღწიოთ რწმენის ერთიანობას’ (ეფეს. 4:8, 11—13). კითხულობ ყოველდღიურად ბიბლიას და შეგაქვს ამით შენი წვლილი სულიერ ერთიანობაში?
4 ქრისტიანული ურთიერთობით გაერთიანებულნი. ქრისტიანულ შეხვედრებზე სიყვარული გვაერთიანებს და ერთმანეთთან გვაახლოებს. ამ შეხვედრებზე ‘ყურადღებით ვეკიდებით ერთმანეთს’ (ებრ. 10:24, 25). ამაში ისიც იგულისხმება, რომ მხოლოდ გარეგნული ფაქტორებით არ შევაფასოთ ძმები, არამედ კარგად გავიცნოთ ისინი, რათა მათში ჩვენც ისეთივე ძვირფასი ადამიანები დავინახოთ, როგორებიც ისინი იეჰოვას თვალში არიან (ანგ. 2:7, აქ-ს სქოლიო). როდესაც მათი რწმენის მაჩვენებელ სიტყვებს ვისმენთ, მათდამი სიყვარული გვიღრმავდება და ერთიანობაც მტკიცდება. ხარ თუ არა შენც ერთ-ერთი იმათგანი, ვინც რეგულარულად ესწრება კრების შეხვედრებს?
5 თანამშრომელნი სამქადაგებლო მსახურებაში. თანამორწმუნეებთან ერთად სასიხარულო ცნობის ქადაგება ღვთის ნების შესრულებაში გვაერთიანებს. მოციქული პავლე ‘ღვთის სასუფევლისთვის თანამშრომელთა’ მადლიერი იყო (კოლ. 4:11). მსახურებაში ერთმანეთისთვის გამოცდილების გაზიარება და ერთიმეორის დახმარება ქრისტიანული დავალების შესრულების საშუალებას გვაძლევს და ჩვენს ერთიანობას განამტკიცებს (კოლ. 3:14).
6 სულიწმიდით გაერთიანებულნი. იეჰოვა თავის სულს გვაძლევს, თუ გულმოდგინედ ვასრულებთ მის ნებას. ეს გვეხმარება, სწრაფად მოვაგვაროთ გაუგებრობები და ვიცხოვროთ ერთად და გაერთიანებულად (ფსალმ. 132:1). აღგვძრავს იმისკენ, რომ ‘მშვიდობის საკვრელით სულის ერთობა შევინარჩუნოთ’ (ეფეს. 4:3). ყოველ ჩვენგანს შეუძლია სხვებთან ურთიერთობისას სულის ნაყოფის გამოვლენით თავისი წვლილი შეიტანოს ღვთის ხალხს შორის არსებულ ურთიერთშეთანხმებულობაში (გალ. 5:22, 23).
7 ქრისტეს მეთაურობით გაერთიანებულად მსახურების შედეგად „სხეული. . . იზრდება, რათა თავისი თავი აღაშენოს სიყვარულით“ (ეფეს. 4:16ბ, სსგ). გარდა ამისა, ეს „მშვიდობის ღმერთს“, იეჰოვას, განადიდებს (რომ. 16:20).