„მზად იყავით“
1 თავის ცნობილ წინასწარმეტყველებაში, რომელიც ამ სისტემის დასასრულს ეხება, იესო გვაფრთხილებს, რომ არ გვშთანთქას ცხოვრებისეულმა საზრუნავმა (მათ. 24:36—39; ლუკ. 21:34, 35). დიდი გასაჭირი შეიძლება ნებისმიერ დროს დაიწყოს; ამიტომ, აუცილებელია მივყვეთ იესო ქრისტეს შეგონებას: „მზად იყავით, ვინაიდან, რომელ საათსაც არ ფიქრობთ, მაშინ მოვა ძე კაცისა“ (მათ. 24:44). რა დაგვეხმარება ამაში?
2 საზრუნავი და გართობა. ერთ-ერთი სულიერი მახე, რომელსაც უნდა შევეწინააღმდეგოთ, „ცხოვრებისეული საზრუნავია“ (ლუკ. 21:34, აქ). ზოგ ქვეყანაში სიღარიბის, უმუშევრობისა და მაღალი ფასების გამო რთულია ცხოვრებისთვის აუცილებლის შეძენა. სხვა ქვეყნებში კი სულ უფრო და უფრო მეტის შეძენისკენ ისწრაფვის ხალხი. ასეა თუ ისე, ძირითადად თუ მატერიალურ საკითხებზე ვფიქრობთ, იმის საშიშროების წინაშე ვდგავართ, რომ სამეფოს საქმე უმთავრესი აღარ იქნება ჩვენს ცხოვრებაში (მათ. 6:19—24, 31—33). ქრისტიანული შეხვედრები გვეხმარება, რომ სამეფოს ინტერესები პირველ ადგილზე დავაყენოთ. გაქვს მიზნად დასახული, რომ ყველა შეხვედრას დაესწრო? (ებრ. 10:24, 25).
3 დღესდღეობით ქვეყნიერება ბევრ გასართობ საშუალებას გვთავაზობს, რითაც შეუძლია ადვილად წაგვართვას ძვირფასი დრო. კომპიუტერი შეიძლება მახედ გვექცეს, თუ უამრავ დროს გვახარჯვინებს ინტერნეტის გამოყენებაში, ელ-ფოსტის კითხვასა და გაგზავნაში, ან კომპიუტერულ თამაშებში. აგრეთვე ძალიან დიდი დრო შეიძლება წაიღოს ტელეგადაცემებისა და ფილმების ყურებამ, საყვარელმა გასართობმა საქმემ, ქვეყნიურმა ლიტერატურამ, სპორტმა და შეიძლება მცირე დრო და ძალები დაგვრჩეს სულიერი საკითხებისთვის. თუმცა დასვენებასა და გართობას დროებითი სარგებლობა მოაქვს, ბიბლიის პირადი და ოჯახური შესწავლა მარადიულ სარგებლობას მოგიტანს (1 ტიმ. 4:7, 8). გამოისყიდი დროს, რომ ყოველდღე იფიქრო ღვთის სიტყვაზე? (ეფეს. 5:15—17).
4 რა მადლიერები ვართ იეჰოვას ორგანიზაციის, რომელიც სულიერი სწავლების პროგრამას გვიმზადებს, რომ შევძლოთ „ყოველგვარ ამ მოსახდენთაგან თავის დაღწევა და წარდგომა კაცის ძის წინაშე“ (ლუკ. 21:36). სრულად ვისარგებლოთ სულიერი ღონისძიებებით და ‘მზად ვიყოთ’, რომ ჩვენი რწმენა „ქების, დიდებისა და პატივის მიზეზი იყოს იესო ქრისტეს გამოცხადებისას“ (1 პეტ. 1:7, აქ).