შეთავაზებები სამქადაგებლო მსახურებისთვის

შენიშვნა: ვიდრე გადავწყვეტთ, თუ როგორ დავიწყებთ საუბარს სამქადაგებლო მსახურებაში, უნდა გავითვალისწინოთ სამი რამ: 1) ჩვენ ვაუწყებთ „სასიხარულო ცნობას სამეფოს შესახებ“ (მათ. 24:14). თუნდაც უშუალოდ არ ვეხებოდეთ სასიხარულო ცნობას, ჩვენი მიზანია, ხალხს დავეხმაროთ მისი მნიშვნელოვნების დანახვაში და უარყოფითი თვალსაზრისის შეცვლაში, რაც შეიძლება ხელს უშლიდეს მათ ამ ცნობის მოსმენაში. 2) თუ იესოს მსგავსად გულწრფელად გვაღელვებს ადამიანების მდგომარეობა, მათ გაუადვილდებათ მოსმენილის გულთან ახლოს მიტანა (მარ. 6:34). გულწრფელი ინტერესის მაჩვენებელი იქნება თბილი ღიმილი, მეგობრული დამოკიდებულება, ყურადღებით მოსმენა, შესაბამისი პასუხების გაცემა და ისეთი კითხვების დასმა, რომლებიც მათ საკუთარი აზრის გამოთქმის საშუალებას მისცემს, ჩვენ კი მათი თვალსაზრისის უკეთ გაგებაში დაგვეხმარება. 1 კორინთელების 9:19—23-დან ჩანს, რომ პავლე მოციქული სასიხარულო ცნობის ქადაგებისას ითვალისწინებდა მსმენელთა მდგომარეობას. 3) ზოგ ქვეყანაში მასპინძელი უცხო ადამიანისგან ელის გარკვეული ფორმალობის დაცვას, ვიდრე მისი მისვლის მიზეზს გაიგებს. ზოგან კი მალევე ჯობს სტუმრობის მიზნის ახსნა (შეადარე ლუკას 10:5).

ქვემოთ მოცემულია შეთავაზებები, რომლებსაც ბევრი გამოცდილი იეჰოვას მოწმე იყენებს საუბრის დასაწყებად. თუ შენი შეთავაზებები ნაკლებად ეფექტურია, შეგიძლია გამოიყენო აქ მოცემული ზოგიერთი რჩევა. ეცადე, შეთავაზებები შენი სიტყვებით გააკეთო. შეგიძლია კრებაში რჩევისთვის მიმართო იმ მაუწყებლებსაც, რომლებსაც კარგად გამოსდით საუბრის დაწყება სამქადაგებლო მსახურებაში.

არმაგედონი

● «ბევრს აშინებს სიტყვა „არმაგედონი“. მათთვის ეს სიტყვა ბირთვულ ომთან ასოცირდება. თქვენი აზრით, რა არის არმაგედონი? . . ეს სიტყვა ბიბლიაში გვხვდება და სულაც არ ნიშნავს იმას, რაც უმრავლესობას ჰგონია (გამოცხ. 16:14, 16). ბიბლიაში ისიც წერია, თუ რის გაკეთება შეგვიძლია გადასარჩენად» (სოფ. 2:2, 3) (იხილე აგრეთვე გვერდები 36—40, „არმაგედონი“).

ბიბლია/ღმერთი

● „გამარჯობათ. დიდ დროს არ წაგართმევთ. მინდა ერთი მნიშვნელოვანი აზრი გაგიზიაროთ. ნახეთ, რა წერია ბიბლიაში (წაუკითხე, მაგალითად, გამოცხადების 21:3, 4). რას ფიქრობთ ამის შესახებ? იტყოდით უარს ასეთ ცხოვრებაზე?“

● „ჩვენ ვსაუბრობთ იმის თაობაზე, თუ როგორ შეიძლება ცხოვრებისეულ პრობლემებთან გამკლავება. ადრე ბევრი ადამიანი ბიბლიაში ეძებდა რჩევებს. მაგრამ დღეს ხალხი სხვანაირად ფიქრობს. პირადად თქვენ, რა აზრის ხართ? როგორ ფიქრობთ, ბიბლია ღვთის სიტყვაა თუ, უბრალოდ, ჭკვიანი ადამიანების დაწერილი წიგნია? . . როგორ უნდა დარწმუნდეს ადამიანი იმაში, რომ ეს წიგნი ნამდვილად ღვთისგანაა?“ (იხილე გვერდები 63—73, „ბიბლია“).

● „კარგია, სახლში რომ დამხვდით. მინდა, ბიბლიიდან ერთი საინტერესო აზრი გაგიზიაროთ. როგორ ფიქრობთ . . .“ (დაუსვი კითხვა იმ საკითხზე, რომელზეც აპირებ მსჯელობას).

● „ჩვენ ყველას ვურჩევთ, იკითხონ ბიბლია. ბევრი გაკვირვებული რჩება, როცა მნიშვნელოვან კითხვებზე პასუხს ბიბლიიდან იგებს. მაგალითად . . .“ (ფსალმ. 104:5; დან. 2:44 ან სხვა).

● „თქვენს სამეზობლოში ყველასთან გვსურს მოკლედ გასაუბრება. ბევრს, ვისაც ვესაუბრებით, სწამს ღმერთის. ზოგს უჭირს იმის დაჯერება, რომ ღმერთი არსებობს. თქვენ რას ფიქრობთ? . . როგორც ბიბლიიდან ვიგებთ, მატერიალური სამყარო უნდა დაგვეხმაროს სწორი დასკვნის გაკეთებაში (ფსალმ. 19:1). მას, ვინც კანონები დაუდგინა ციურ სხეულებს, არ გაუჭირდება ჩვენთვის პრაქტიკული რჩევების მოცემა“ (ფსალმ. 19:7—9) (იხილე აგრეთვე გვერდები 378—384 [„ღმერთი“] და 391—395 [„შემოქმედება“]).

ბიბლიის შესწავლა

● „მსურს შემოგთავაზოთ ბიბლიის შესწავლა უსასყიდლოდ. თუ ნებას დამრთავთ, რამდენიმე წუთში გაჩვენებთ, როგორ ხდება ბიბლიურ თემებზე მსჯელობა მთელ მსოფლიოში. განხილვისთვის შეგვიძლია ნებისმიერი თემა შევარჩიოთ (აჩვენე სარჩევი ბიბლიის შესწავლისთვის განკუთვნილ სახელმძღვანელოში). რომელი საკითხია თქვენთვის უფრო საინტერესო?“

● „გვინდა გაჩვენოთ ბიბლიის შესწავლისთვის განკუთვნილი ეს სახელმძღვანელო (აჩვენე). გინახავთ ასეთი წიგნი? . . თუ გაქვთ რამდენიმე წუთი, გაჩვენებთ, როგორ ხდება ბიბლიაზე მსჯელობა ამ წიგნის დახმარებით“.

ბოლო დღეები

● „ჩვენ ვსაუბრობთ იმაზე, თუ რაზე მეტყველებს მსოფლიოში არსებული მდგომარეობა. დღეს ბევრმა დაივიწყა ღმერთი და მისი ნორმები, რომლებიც ბიბლიაშია ჩაწერილი. ამის გამო ხალხი ძალიან შეიცვალა. როგორ ფიქრობთ, არიან თქვენ გარშემო ასეთი ადამიანები? . . (წაუკითხე 2 ტიმოთეს 3:1—5). უნდა გვქონდეს მდგომარეობის გამოსწორების იმედი?“ (2 პეტ. 3:13).

● «დღეს ბევრი ფიქრობს, რომ ეს მსოფლიო დიდხანს ვეღარ იარსებებს და ჩვენს დროს „ბოლო დღეებს“ უწოდებენ. ბიბლია გვეუბნება, თუ რა არის საჭირო იმისთვის, რომ გადავურჩეთ ამ ქვეყნიერების განადგურებას და ვიცხოვროთ დედამიწაზე სამოთხისებურ პირობებში» (სოფ. 2:2, 3) (იხილე აგრეთვე გვერდები 74—82, „ბოლო დღეები“).

სხვა შეთავაზებებისთვის იხილე აგრეთვე „მიმდინარე მოვლენები“.

დამნაშავეობა/უსაფრთხოება

● „გამარჯობათ. დღეს ჩვენ გარშემო ბევრი დანაშაული ხდება. როგორ ფიქრობთ, დადგება ისეთი დრო, როცა აღარ შეგვეშინდება ქუჩაში ღამით გასვლა? . . (ან: თქვენი აზრით, შეძლებს ვინმე ამ პრობლემის გადაჭრას? . .)“ (იგავ. 15:3; ფსალმ. 37:10, 11).

● „მე მქვია —— . მე აქვე ახლოს ვცხოვრობ. ამ დილით, რომ მოვდიოდი, ყველა ლაპარაკობდა . . . (მოიხსენიე ახლახან მომხდარი დანაშაული ან სხვა რამ, რაც ხალხს აღელვებს). თქვენ რას ფიქრობთ ამაზე? . . თქვენი აზრით, რის გაკეთება შეიძლება იმისათვის, რომ უფრო უსაფრთხოდ ვიცხოვროთ? . .“ (იგავ. 1:33; 3:5, 6).

მიმდინარე მოვლენები

● «საღამო მშვიდობისა. მე მქვია —— . მე აქვე ვცხოვრობ (უთხარი ქუჩა ან უბანი). უყურეთ გუშინ ახალ ამბებს? . . (მოიხსენიე რომელიმე არასასიამოვნო ამბავი) რას ფიქრობთ ამაზე? . . დღეს ბევრი შიშით უყურებს ხვალინდელ დღეს. იეჰოვას მოწმეებს გვჯერა, რომ ვცხოვრობთ ბიბლიაში ნაწინასწარმეტყველებ „ბოლო დღეებში“. ნახეთ, რა არის ნათქვამი 2 ტიმოთეს 3:1—5-ში» (იხილე აგრეთვე გვერდები 74—82).

● „წაიკითხეთ ეს სტატია? (აჩვენე ამონაჭერი მიმდინარე კვირის გაზეთიდან) რას ფიქრობთ ამაზე? . .“

● „მინდა ერთი შეკითხვა დაგისვათ. თქვენი ნება რომ იყოს, პირველ რიგში რომელ პრობლემას მოაგვარებდით?“ (საუბარი იმის მიხედვით გააგრძელე, რასაც გეტყვის).

მომავალი

● „დილა მშვიდობისა. ჩვენ ხალხს უკეთესი მომავლის შესახებ ვესაუბრებით. პირადად თქვენ გაქვთ მომავლის იმედი? . . ზოგჯერ ხომ არ გიჭირთ იმის დაჯერება, რომ უკეთესი მომავალი გვექნება? . . ბიბლიაში პირდაპირ წერია ის, რაც დღეს ჩვენ თვალწინ ხდება. თუმცა ბიბლია იმასაც გვიხსნის, თუ რატომ ხდება ეს და რით დამთავრდება ყოველივე“ (ლუკ. 21:10, 11, 31).

● „გამარჯობა. მე მქვია —— . შენი სახელი? . . ახალგაზრდებს იმის შესახებ ვესაუბრები, თუ როგორ მომავალს გვპირდება ბიბლია და მინდა, შენც გაჩვენო ერთი აზრი (წაუკითხე, მაგალითად, გამოცხადების 21:3, 4). იტყოდი უარს ასეთ ცხოვრებაზე?“

ომები/მშვიდობა

● „დღეს ბევრს აშინებს ბირთვული ომის (ან ტერორისტული თავდასხმის) საფრთხე. თქვენი აზრით, იქნება დედამიწაზე ოდესმე ნამდვილი მშვიდობა? . .“ (ფსალმ. 46:8, 9; ეს. 9:6, 7).

● „ყველას გვსურს ცხოვრება ისეთ მსოფლიოში, სადაც ომი აღარ იქნება. მარტო გასულ საუკუნეში ასობით ომი მოხდა, მათ შორის ორი მსოფლიო ომი. დღეს ბევრს აშინებს იმაზე ფიქრი, რომ რომელიმე სახელმწიფომ შეიძლება ბირთვული იარაღი გამოიყენოს (ან ტერაქტების საფრთხე). რა უნდა გაკეთდეს ამის თავიდან ასაცილებლად? . . ვის შეუძლია მთელ მსოფლიოში მშვიდობის დამყარება? . .“ (მიქ. 4:2—4).

● „მშვიდობა ყველას სურს, ვისაც არ უნდა ჰკითხო. პოლიტიკოსთა უმრავლესობაც ამ აზრისაა. მაშ, რატომ ვერ მყარდება მშვიდობა მსოფლიოში? . .“ (გამოცხ. 12:7—12).

ოჯახი/ბავშვები

● „ჩვენ იმის შესახებ ვსაუბრობთ, თუ როგორ შეიძლება ოჯახური პრობლემების მოგვარება. ჩვენი ოჯახებისთვის ყველაფერს ვაკეთებთ და, ცხადია, უარს არ ვიტყვით იმაზე, რაც უფრო მეტად შეუწყობს ხელს ოჯახის ბედნიერებას . . . (კოლ. 3:12, 18—21). გარდა ამისა, ბიბლია ბედნიერი მომავლის იმედს გვაძლევს“ (გამოცხ. 21:3, 4).

● „ყველას გვსურს, რომ ჩვენი შვილები ბედნიერები იყვნენ. თუ გავითვალისწინებთ დღევანდელ მდგომარეობას, როგორ ფიქრობთ, ექნებათ მათ ბედნიერი მომავალი? . . როგორი იქნება მსოფლიო, როცა ჩვენი შვილები გაიზრდებიან? . . ბიბლიაში წერია, რომ ღმერთი მალე დედამიწაზე შესანიშნავ პირობებს შექმნის (ფსალმ. 37:10, 11). მაგრამ მნიშვნელოვანწილად ჩვენზეა დამოკიდებული, ექნებათ თუ არა ჩვენს შვილებს ასეთი მომავალი“ (კან. 30:19).

სამეფო

● „დღეს ბევრს სურს, რომ ხელისუფლებამ რეალურად გადაჭრას ისეთი სერიოზული პრობლემები, როგორიცაა დამნაშავეობა და ფასების ზრდა (ან სხვა პრობლემა, რომელიც ხალხს აწუხებს). ალბათ, თქვენც გექნებათ ამის სურვილი . . . შეძლებს რომელიმე ხელისუფლება ამის გაკეთებას? . . ბევრი ლოცულობს ასეთი ხელისუფლებისთვის, შესაძლოა თქვენც გილოციათ. თუმცა ამას ზოგი ისე აკეთებს, რომ მხედველობაში არა აქვს ხელისუფლება“ (დან. 2:44; ფსალმ. 67:6, 7; მიქ. 4:4) (იხილე აგრეთვე გვერდები 291—299 [„სამეფო“] და 418—423 [„ხელისუფლება“]).

● «თქვენს სამეზობლოში ადამიანებს ერთი კითხვით მივმართავთ. საინტერესოა თქვენი აზრიც. ალბათ, გახსოვთ იესოს ლოცვა: „მოვიდეს სუფევა შენი, იყოს ნება შენი, როგორც ცაში, ისე ქვეყანაზე“. თქვენი აზრით, შეისმენს ღმერთი ოდესმე ამ ლოცვას და შესრულდება მისი ნება დედამიწაზე? . .» (ეს. 55:10, 11; გამოცხ. 21:3—5).

● „თქვენთან გვინდოდა გვესაუბრა ერთ საკითხზე, რომელიც ყველას გვეხება: ადამიანთა მმართველობა გვირჩევნია თუ ღვთის მმართველობა? მსოფლიოში შექმნილ მდგომარეობას თუ გავითვალისწინებთ, როგორ ფიქრობთ, გვჭირდება ღვთის დახმარება? . .“ (მათ. 6:9, 10; ფსალმ. 146:3—5).

სამუშაო/საცხოვრებელი

● „დღეს ბევრს არა აქვს სამუშაო და ნორმალური საცხოვრებელი პირობები. თქვენს მეზობლებს ვესაუბრებოდით იმაზე, თუ რის გაკეთება შეიძლება ამ პრობლემის მოსაგვარებლად. გჯერათ, რომ რომელიმე მთავრობა შეძლებს მდგომარეობის გამოსწორებას? . . ჩვენმა შემოქმედმა იცის, როგორ გადაჭრას ეს პრობლემა“ (ეს. 65:21—23).

● „ალბათ, ყველას სურს ისეთი ხელისუფლების არსებობა, რომელიც არ იქნება კორუმპირებული და ყველას უზრუნველყოფს სამუშაოთი და კარგი საცხოვრებლით. თქვენი აზრით, შეძლებს რომელიმე ხელისუფლება ამას? . .“ (ფსალმ. 97:1, 2; ეს. 65:21—23) (იხილე აგრეთვე გვერდები 418—423, „ხელისუფლება“).

სიბერე/სიკვდილი

● „როგორ ფიქრობთ, რატომ ბერდება და კვდება ადამიანი? ზოგიერთი სახეობის ზღვის კუ ასობით წელი ცოცხლობს, ზოგი ხე — ათასობით წელი, ადამიანის სიცოცხლის ხანგრძლივობა კი 70-80 წელია. თქვენი აზრით, რა არის ამის მიზეზი? . . (რომ. 5:12). ყოველთვის ასე იქნება? . .“ (გამოცხ. 21:3, 4).

● „როგორ ფიქრობთ, მთავრდება სიკვდილით ყველაფერი? . . სიკვდილთან დაკავშირებულ კითხვებზე ბიბლია ნათელ პასუხს გვაძლევს (ეკლ. 9:5, 10). ბიბლიაში აგრეთვე წერია, თუ რა იმედი უნდა ჰქონდეთ მორწმუნეებს“ (იოან. 11:25) (იხილე აგრეთვე გვერდები 98, 99 [„გამხნევება“] და 313—319 [სიკვდილი]).

სიყვარული/სიკეთე

● „ბევრი წუხს იმის გამო, რომ ხალხმა სიყვარული დაკარგა. თქვენ რას ფიქრობთ ამაზე? . . რატომ ხდება ასე? . . იცით, რომ ეს ნაწინასწარმეტყველები იყო ბიბლიაში? (2 ტიმ. 3:1—4). ბიბლიაში ისიც წერია, თუ რა არის ამის მიზეზი“ (1 იოან. 4:8).

● „მე მქვია —— . თქვენს სამეზობლოში მსურს ყველას მოკლედ ვესაუბრო იმაზე, რაც პირადად მე ძალიან მაღელვებს და დარწმუნებული ვარ, თქვენც გაწუხებთ. დღეს ცოტა თუ ფიქრობს სხვებისთვის სიკეთის გაკეთებაზე მიუხედავად იმისა, რომ ეს რთული არაა. გიფიქრიათ, თუ რატომ ხდება ასე? . .“ (მათ. 24:12; 1 იოან. 4:8).

სიცოცხლე/ბედნიერება

● „ჩვენ გვსურს ისეთ ადამიანებთან საუბარი, ვისაც აინტერესებს, რა არის სიცოცხლის აზრი. მიუხედავად იმისა, რომ უმრავლესობა თავს მეტ-ნაკლებად ბედნიერად თვლის, მათ მაინც ბევრი პრობლემა აქვთ. ასაკის მატებასთან ერთად ვხედავთ, რომ სიცოცხლე ძალიან ხანმოკლეა. ნუთუ ყველაფერი ამით მთავრდება? თქვენ რას ფიქრობთ? . .“ (უთხარი, რა განზრახვა ჰქონდა ღმერთს თავდაპირველად. შემდეგ იმსჯელე იოანეს 17:3-სა და გამოცხადების 21:3, 4-ზე) (იხილე აგრეთვე გვერდები 325—330, „სიცოცხლე“).

● «თქვენი აზრით, რას გულისხმობს ბიბლია ფრაზაში „საუკუნო სიცოცხლე“ (ან „მარადიული სიცოცხლე“). ღირს ამაზე დაფიქრება, რადგან ბიბლიაში ეს ფრაზა დაახლოებით 40-ჯერ გვხვდება. როგორ წარმოგიდგენიათ მარადიული სიცოცხლე? . . რა არის საჭირო მარადიული სიცოცხლის მისაღებად?» (იოან. 17:3; გამოცხ. 21:4).

● „ბევრი უკმაყოფილოა დღევანდელი ცხოვრებით. ცოცხლები რომ ვართ, ეს უკვე ბევრს ნიშნავს. მაგრამ შესაძლებელია, რომ ადამიანი ნამდვილად იყოს ბედნიერი? რას ფიქრობთ ამ საკითხზე? . . თქვენი აზრით, ყველაზე მეტად რა უშლის ხელს ადამიანთა ბედნიერებას? . .“ (ფსალმ. 1:1, 2; აგრეთვე სხვა მუხლები, რომლებიც ეხება მობინადრის პრობლემებს).

უსამართლობა/ტანჯვა

● „როგორ ფიქრობთ, სულერთია ღმერთისთვის ის, რომ ამდენი უსამართლობა და ტანჯვაა ჩვენ გარშემო? . .“ (ეკლ. 4:1; ფსალმ. 72:12—14) (იხილე აგრეთვე „ტანჯვა“ და „გამხნევება“).

როცა ბევრი ამბობს: „მე ჩემი რწმენა მაქვს“

● „დილა მშვიდობისა. ბევრს, ვისაც თქვენს სამეზობლოში ვესაუბრეთ, თავისი რწმენა აქვს. ალბათ, თქვენც მორწმუნე ხართ . . . რა რწმენაც არ უნდა გვქონდეს, ყველას გვაწუხებს ისეთი პრობლემები, როგორიცაა ფასების ზრდა, დამნაშავეობა და ავადმყოფობა. ასე არ არის? . . როგორ ფიქრობთ, არსებობს რეალური გამოსავალი? . .“ (2 პეტ. 3:13 ან სხვა მუხლი).

როცა ბევრი ამბობს: „არ მცალია“

● „გამარჯობათ. თქვენს სამეზობლოში ყველასთან მივდივართ და გვინდა, ერთი საინტერესო რამ გითხრათ. ალბათ, დაკავებული იქნებით და დიდ დროს არ წაგართმევთ“.

● „გამარჯობათ. მე მქვია —— . მსურდა მეთქვა, თუ რას გააკეთებს მალე ღვთის სამეფო და როგორ იმოქმედებს ეს ჩვენზე. მაგრამ ვხედავ, რომ დაკავებული ხართ (ან სახლიდან გასვლას აპირებთ). მხოლოდ ერთ აზრს გეტყვით მოკლედ“.

ხშირად დამუშავებულ უბანზე

● „კარგია, სახლში რომ დაგვხვდით. დღეს გვინდოდა კიდევ ერთ საკითხზე გაგსაუბრებოდით, კერძოდ იმაზე, თუ რას გააკეთებს ღვთის სამეფო ადამიანებისთვის“.

● „გამარჯობათ. როგორ ბრძანდებით? . . ოჯახის წევრები ხომ კარგად არიან? . . ერთი საინტერესო აზრის სათქმელად შემოგიარეთ . . .“

● „დილა მშვიდობისა. როგორ ბრძანდებით? . . მინდოდა თქვენთან კიდევ ერთხელ საუბარი (უთხარი, რაზე აპირებ მსჯელობას)“.