დაიხვეწე, როგორც სასიხარულო ცნობის მქადაგებელი

1. რომელი მაგალითებიდან ვიგებთ, რომ უნდა დავიხვეწოთ როგორც მქადაგებლები?

¹ ქრისტიანები უნდა დაიხვეწონ როგორც სასიხარულო ცნობის მქადაგებლები. სწორედ ამ მიზნით მისცა იესო ქრისტემ მითითებები თავის მსახურებს (ლუკ. 9:1—5; 10:1—11). აკვილამ და პრისკილამ თავიანთთან წაიყვანეს აპოლოსი და „უფრო ზუსტად აუხსნეს ღვთის გზა“ (საქ. 18:24—26). პავლე მოუწოდებდა გამოცდილ მახარობელ ტიმოთეს, რომ თავადაც ყოველთვის გამოეყენებინა ის, რასაც ხალხს ასწავლიდა და ამგვარად, ყველასთვის ცხადი გაეხადა თავისი წარმატება (1 ტიმ. 4:13—15). იმისდა მიუხედავად, თუ რამდენი ხანია, რაც უფალს ვემსახურებით როგორც მონები და სასიხარულო ცნობის მქადაგებლები, ჩვენ გვმართებს, კვლავაც დავიხვეწოთ როგორც მქადაგებლები.

2. როგორ შეგვიძლია ვისწავლოთ თანაქრისტიანებისგან?

² ისწავლე თანაქრისტიანებისგან. მსახურებაში დასახვეწად ერთ-ერთი საშუალება თანაქრისტიანებზე დაკვირვებაა (იგავ. 27:17). ამიტომ ყურადღებით უსმინე შენს პარტნიორს, როცა ის შეთავაზებას აკეთებს. სთხოვე გამოცდილ მაუწყებელს, რომ კონკრეტული რჩევები მოგცეს, რაც დაგეხმარება, დაიხვეწო როგორც მქადაგებელი (იგავ. 1:5). ხომ არ გიჭირს განმეორებითი მონახულების გაკეთება, ბიბლიის შესწავლის დაწყება ან მსახურების ამა თუ იმ სფეროში მონაწილეობა? გამოავლინე ინიციატივა და სთხოვე შენი სამქადაგებლო ჯგუფის ზედამხედველს ან რომელიმე გამოცდილ მაუწყებელს, რომ დაგეხმაროს. გახსოვდეს ისიც, რომ იეჰოვას სულს შეუძლია, ყოველმხრივ დაგხვეწოს; ამიტომ გამუდმებით სთხოვე მას წმინდა სული ლოცვაში (ლუკ. 11:13).

3. რა რეაქცია უნდა გვქონდეს, თუ ვთვლით, რომ რჩევა ჩვენ არ გვეხება?

³ თუ თანაქრისტიანი რჩევას გაძლევს, რათა დაიხვეწო როგორც მქადაგებელი, ნუ გაღიზიანდები იმ შემთხვევაშიც კი, თუ ფიქრობ, რომ ეს რჩევა შენ არ გეხება (ეკლ. 7:9). აპოლოსის მსგავსად, შენც თავმდაბლობითა და მადლიერი გულით მიიღე რჩევა თანაქრისტიანისგან. ეს სიბრძნის მაჩვენებელია (იგავ. 12:15).

4. რა მიზეზზე საუბრობდა იესო, რის გამოც ღირს, რომ დავიხვეწოთ როგორც მქადაგებლები?

⁴ ჩვენი წარმატება ღმერთს განადიდებს. მაგალითების საშუალებით იესო თავის მიმდევრებს ეხმარებოდა, რომ დახვეწილიყვნენ როგორც მქადაგებლები. მან საკუთარი თავი ვაზს შეადარა, ხოლო ცხებული მიმდევრები — ლერწებს. იესომ თქვა, რომ მამა ყოველ ნაყოფიერ ლერწს ასუფთავებს, „რათა მეტი ნაყოფი გამოიღოს“ (იოან. 15:2). როგორც მევენახეს სურს, რომ მისი ვაზის ლერწებმა მეტი მოისხას, ასევე იეჰოვა ღმერთსაც სურს, რომ ყოველმხრივ დავიხვეწოთ, რათა „გამოვიღოთ“ უფრო მეტი „ბაგეთა ნაყოფი“ (ებრ. 13:15). რა იქნება შედეგი, თუ დავიხვეწებით როგორც მახარობლები? იესომ თქვა: „მამაჩემისთვის იმას მოაქვს დიდება, რომ ბევრი ნაყოფი გამოგაქვთ“ (იოან. 15:8).