თავი 10
მსახურების გაფართოება
იესომ საქადაგებლად გაგზავნამდე მოწაფეებს უთხრა: „სამკალი ბევრია, მომკელები კი ცოტანი არიან“. საქმე მართლაც ბევრი იყო, ამიტომ იესომ მათ მოუწოდა: „ევედრეთ სამკლის ბატონს, რომ მომკელები გამოგზავნოს თავის სამკალში“ (მათ. 9:37, 38). ქრისტემ მოწაფეებს ისიც ასწავლა, როგორ ექადაგათ. ეს საქმე რომ გადაუდებელი იყო, მისი სიტყვებიდანაც ჩანს: „კაცის ძის მოსვლამდე ვერ მოასწრებთ ისრაელის ქალაქების შემოვლას“ (მათ. 10:23).
2 სამქადაგებლო საქმეში დღესაც ბევრი გვაქვს გასაკეთებელი. სამეფოს შესახებ სასიხარულო ცნობა აღსასრულის დადგომამდე უნდა იქნეს ნაქადაგები; იქამდე კი დრო ცოტაღა დარჩა (მარ. 13:10). ჩვენც იესოსა და მისი მოწაფეების მსგავსად ვქადაგებთ, თუმცა ჩვენ ბევრად მეტი საქმე გვაქვს გასაკეთებელი, ვინაიდან სამკალი მთელ მსოფლიოს მოიცავს. დედამიწის მოსახლეობასთან შედარებით, რომელიც მილიარდებს ითვლის, ჩვენ არც ისე ბევრნი ვართ, მაგრამ ეჭვი არ გვეპარება, რომ იეჰოვას დახმარებით სასიხარულო ცნობა მთელ მსოფლიოში იქნება ნაქადაგები, და აღსასრული იეჰოვას მიერ დანიშნულ დროს დადგება. კარგი იქნება, დავფიქრდეთ: ვუთმობთ ღვთის სამეფოს პირველ ადგილს ჩვენს ცხოვრებაში და სრულად ვიხარჯებით ღვთის საქმეში? რა მიზნების დასახვა შეგვიძლია მსახურების გასაფართოებლად?
3 იესომ ხაზგასმით აღნიშნა, თუ რას მოითხოვს იეჰოვა თავისი თითოეული მსახურისგან. მან თქვა: „გიყვარდეს იეჰოვა, შენი ღმერთი, მთელი გულით, მთელი სულით, მთელი გონებით და მთელი ძალით“ (მარ. 12:30). ჩვენ ღმერთს სულითა და გულით უნდა ვემსახუროთ. ეს იმას ნიშნავს, რომ იეჰოვასადმი მსახურებაში მაქსიმალურად დავიხარჯოთ და ამგვარად ცხადვყოთ, რომ მას მთელი გულით მივუძღვენით თავი და კვლავაც მისი ერთგულები ვართ (2 ტიმ. 2:15). მდგომარეობისა თუ უნარის მიხედვით, თითოეულ ჩვენგანს მსახურების სხვადასხვა შესაძლებლობა გვეძლევა. ქვემოთ განვიხილავთ ზოგიერთ მათგანს. დაფიქრდი, შენ რომელი მიზნის დასახვა შეგიძლია.
მაუწყებლად მსახურება
4 ყველას, ვინც ჭეშმარიტება მიიღო, სასიხარულო ცნობის გაცხადების შესაძლებლობა აქვს. ეს არის ძირითადი საქმე, რომლის შესრულებაც იესომ თავის მოწაფეებს დაავალა (მათ. 24:14; 28:19, 20). როგორც წესი, ქრისტეს მოწაფეობა სასიხარულო ცნობის გაზიარებით იწყება. ასე იყო ანდრიას, ფილიპეს, კორნელიუსისა და სხვა მოწაფეების შემთხვევაშიც (იოან. 1:40, 41, 43—45; საქ. 10:1, 2, 24; 16:14, 15, 25—34). ნიშნავს ეს იმას, რომ ადამიანს ნათლობამდეც შეუძლია სასიხარულო ცნობა ქადაგება? რა თქმა უნდა! როცა ბიბლიის შემსწავლელი მოუნათლავ მაუწყებლად მსახურების მოთხოვნებს დააკმაყოფილებს, მას შეეძლება კარდაკარ იქადაგოს. უნარისა და მდგომარეობის გათვალისწინებით, მას ქრისტიანული მსახურების სხვა სფეროებშიც შეეძლება მონაწილეობის მიღება.
5 მაუწყებელს, რომელიც ინათლება, ცხადია, სურვილი ექნება, ყველაფერი გააკეთოს იმისათვის, რომ ხალხს სასიხარულო ცნობა უქადაგოს. ქადაგება ყველას შეუძლია. სამეფოს საქმეში თუნდაც პატარა წვლილის შეტანა ნამდვილად განსაკუთრებული პატივია. ყველა, ვინც მსახურებას გააფართოებს, სიხარულს იგრძნობს.
მსახურება იქ, სადაც მეტი საჭიროებაა
6 შეიძლება შენი კრების ტერიტორია ხშირად მუშავდება და მაუწყებლებიც გულმოდგინედ ქადაგებენ. თუ ასეა, შეგიძლია მსახურება გააფართოო და იქ გადახვიდე, სადაც მეტი საჭიროებაა (საქ. 16:9). თუ უხუცესი ან მომსახურე ხარ, მზად ხარ, გადახვიდე იმ კრებაში, რომელსაც დახმარება სჭირდება? შენს სარაიონო ზედამხედველს შეუძლია გირჩიოს, შენივე რაიონის რომელ კრებაში გადახვიდე. თუ შენი ქვეყნის სხვა მხარეში გსურს მსახურება, ფილიალს შეუძლია საჭირო ინფორმაცია მოგაწოდოს.
7 თუ სხვა ქვეყანაში მსახურება გსურს, გადასვლამდე კარგად უნდა დაფიქრდე. ამის შესახებ შენი კრების უხუცესებს დაელაპარაკე. სხვაგან გადასვლა არც შენთვის იქნება ადვილი და არც მისთვის, ვინც შენთან ერთად წამოვა (ლუკ. 14:28). ამიტომ, თუ იქ დიდხანს დარჩენას არ აპირებ, შეიძლება უკეთესი იყოს, შენივე ქვეყნის სხვა მხარეში იმსახურო.
8 ზოგ ქვეყანაში ადგილობრივი ზედამხედველი ძმები დიდი ხნის მონათლულები არ არიან. ისინი თავმდაბლობას ავლენენ და მზად არიან, კრების ხელმძღვანელობა მათ კრებაში გადასულ შედარებით გამოცდილ უხუცესებს მიანდონ. თუ უხუცესი ხარ და სხვა ქვეყანაში გადასვლაზე ფიქრობ, გახსოვდეს, რომ შენი მიზანი ადგილობრივი ძმების ჩანაცვლება კი არა, მათ მხარდამხარ მსახურებაა. დაეხმარე მათ, რომ კრებაში მეტი პასუხისმგებლობა აიღონ (1 ტიმ. 3:1). მოთმინება დაგჭირდება, თუ ყველაფერი ისე არ გაკეთდება, როგორც შენს ქვეყანაში კეთდებოდა. შენი გამოცდილება ძმების დასახმარებლად გამოიყენე. იმ შემთხვევაში, თუ შენს ქვეყანაში მოგიწევს დაბრუნება, ადგილობრივი უხუცესები უკეთ შეძლებენ კრებისთვის ხელმძღვანელობის გაწევას.
9 ვიდრე შესაბამისი ქვეყნის ფილიალისგან შეიტყობ, რომელ კრებებს სჭირდება შენი დახმარება, შენი კრების სამსახურებრივმა კომიტეტმა მას სარეკომენდაციო წერილი უნდა გაუგზავნოს. ამ წერილის გაგზავნა ნებისმიერ შემთხვევაში საჭიროა, არ აქვს მნიშვნელობა, უხუცესად მსახურობ, მომსახურედ, პიონერად თუ მაუწყებლად. სამსახურებრივი კომიტეტი სარეკომენდაციო წერილს შენს თხოვნასთან ერთად იმ ქვეყნის ფილიალს გაუგზავნის, რომლის ტერიტორიაზეც გსურს მსახურება.
უცხო ენაზე ქადაგება
10 მსახურების გასაფართოებლად შეგიძლია უცხო ენა ან ჟესტური ენა შეისწავლო. თუ მიზნად დაისახე ქადაგების მიზნით უცხო ენის შესწავლა, ამის შესახებ შეგიძლია გაესაუბრო უხუცესებს და სარაიონო ზედამხედველს. ისინი საჭირო რჩევებს მოგცემენ და წაგახალისებენ. ფილიალის ზედამხედველობით ზოგი რაიონი ორგანიზებას უწევს ენის შემსწავლელ კურსებს, რათა უნარიანმა მაუწყებლებმა და პიონერებმა უცხო ენაზე ქადაგება შეძლონ.
პიონერად მსახურება
11 ყველა მაუწყებელმა უნდა იცოდეს, რა მოთხოვნები არსებობს დამხმარე პიონერებისთვის, პიონერებისთვის, სპეციალური პიონერებისა და სხვა სრული დროით მსახურებისთვის. დამხმარე პიონერად, პიონერად ან სპეციალურ პიონერად მსახურება შეუძლია სამაგალითო მონათლულ ქრისტიანს, რომელსაც მდგომარეობა საშუალებას აძლევს, რომ სასიხარულო ცნობის ქადაგებას განსაზღვრული რაოდენობის საათები დაუთმოს. დამხმარე პიონერებსა და პიონერებს კრების სამსახურებრივი კომიტეტი ნიშნავს, სპეციალურ პიონერებს კი — ფილიალი.
12 მაუწყებელი დამხმარე პიონერად შეიძლება დაინიშნოს, სულ მცირე, ერთი თვით, ზედიზედ რამდენიმე თვით ან განუსაზღვრელი დროით. ბევრი მაუწყებელი მსახურობს დამხმარე პიონერად, მაგალითად, უფლის გახსენების საღამოს პერიოდში, სარაიონო ზედამხედველის მონახულების თვეში ან შვებულების დროს. სკოლის ასაკის მონათლულ მაუწყებლებს შეუძლიათ დამხმარე პიონერად არდადეგების დროს იმსახურონ. მაუწყებლებს დამხმარე პიონერად მსახურება შეუძლიათ მარტში, აპრილში და სარაიონო ზედამხედველის მონახულების თვეში, როცა შესასრულებელი საათების ნორმა შედარებით მცირეა. თუ მაუწყებელი ზნეობრივ სიწმინდეს ინარჩუნებს, მზად არის, თვის განმავლობაში განსაზღვრული რაოდენობის საათები დაუთმოს ქადაგებას, და დარწმუნებულია, რომ ერთ თვეს ან მეტხანს შეძლებს დამხმარე პიონერად მსახურებას, უხუცესები განიხილავენ მის განცხადებას დამხმარე პიონერად მსახურებასთან დაკავშირებით.
13 პიონერად რომ იმსახურო, საათების წლიური ნორმა უნდა შეასრულო. თუ პიონერი ხარ, შენს კრებასთან ყოველთვის მჭიდროდ უნდა ითანამშრომლო. კარგია, როცა კრებაში გულმოდგინე პიონერები არიან. მათი ენთუზიაზმი გადამდებია და მათი შემხედვარე ზოგი თავადაც იწყებს პიონერად მსახურებას. პიონერად მსახურების განცხადება რომ შეავსო, სულ მცირე, ექვსი თვის მონათლული სამაგალითო მაუწყებელი უნდა იყო.
14 სპეციალურ პიონერებად ის პიონერები ინიშნებიან, რომლებიც ნაყოფიერად მსახურობენ და მზად არიან, იქ იქადაგონ, სადაც მათ ფილიალი დანიშნავს. ხშირად ისინი დაშორებულ ტერიტორიაზე ინიშნებიან, სადაც მეტი მაუწყებელია საჭირო და სადაც ახალი კრებების ჩამოყალიბების პოტენციალია. ზოგჯერ სპეციალურ პიონერებს იმ კრებებში ნიშნავენ, რომლებსაც სამქადაგებლო ტერიტორიის დამუშავებაში დახმარება სჭირდებათ. ზოგი სპეციალური პიონერი, რომელიც უხუცესადაც მსახურობს, პატარა კრებებისთვის დახმარების გასაწევად ინიშნება მაშინაც, თუ მქადაგებლებზე განსაკუთრებული საჭიროება არ არის. სპეციალურ პიონერებს პირადი ხარჯების დასაფარავად მცირე შემწეობა ეძლევათ. ზოგიც დროებით სპეციალურ პიონერად ინიშნება.
მისიონერები
15 მისიონერებს ხელმძღვანელი საბჭოს სამსახურებრივი კომიტეტი ნიშნავს, რის შემდეგაც მათ ადგილობრივი ფილიალის კომიტეტი მჭიდროდ დასახლებულ ტერიტორიაზე გზავნის. მისიონერებს მნიშვნელოვანი წვლილი შეაქვთ სამქადაგებლო საქმის წინსვლასა და კრების განმტკიცებაში. როგორც წესი, მათ დამთავრებული აქვთ სამეფოს მახარობელთა სკოლა. მისიონერები უზრუნველყოფილნი არიან საცხოვრებლითა და მცირე შემწეობით პირადი ხარჯების დასაფარავად.
სარაიონო მსახურება
16 ვიდრე ხელმძღვანელი საბჭო ძმებს სარაიონო ზედამხედველებად დანიშნავს, ისინი ჯერ სარაიონო ზედამხედველების დამხმარეებად მსახურობენ, რითაც სათანადო გამოცდილებას იძენენ. ისინი გამოირჩევიან მსახურებისა და თანაქრისტიანების სიყვარულით, არიან გულმოდგინე პიონერები და ბიბლიის მკვლევრები, კარგი მომხსენებლები და მასწავლებლები. ეს ძმები ავლენენ სულის ნაყოფს და გამოირჩევიან ისეთი თვისებებით, როგორიცაა გაწონასწორებულობა, გონიერება და გამჭრიახობა. სარაიონო ზედამხედველის ცოლი კარგ მაგალითს უნდა აძლევდეს და-ძმებს თავისი ქცევითა და სხვებთან ურთიერთობით. გარდა ამისა, ის კარგი მქადაგებელი უნდა იყოს. მას უნდა ესმოდეს თავისი, როგორც მორჩილი ქრისტიანი ცოლის, როლი, რომელიც არ საუბრობს თავისი ქმრის ნაცვლად და სხვებს საუბარს აცდის. ვინაიდან სარაიონო ზედამხედველსა და მის მეუღლეს დატვირთული განრიგი აქვთ, მათ ვისაც ასეთი სახის მსახურება სურთ, კარგი ჯანმრთელობა უნდა ჰქონდეთ. პიონერები, ვისაც სარაიონო მსახურება სურთ, ბლანკს არ ავსებენ; ისინი ამის შესახებ თავიანთ სარაიონო ზედამხედველს შეატყობინებენ, რომელიც მათ სათანადო რჩევებს მისცემს.
თეოკრატიული სკოლები
17 სამეფოს მახარობელთა სკოლა: დაშორებულ ტერიტორიებზე საქადაგებლად და კრებისთვის სულიერი დახმარების გასაწევად სულ უფრო მეტი სამეფოს მახარობელია საჭირო. სწორედ ამიტომ, დაუქორწინებელ და-ძმებს, აგრეთვე ცოლ-ქმარს, შეუძლიათ გაიარონ სპეციალური სწავლების კურსი „სამეფოს მახარობელთა სკოლაში“. სკოლის დამთავრების შემდეგ კურსდამთავრებულები პიონერებად თავიანთ ქვეყანაში იმ ტერიტორიაზე ინიშნებიან, სადაც მეტი მქადაგებელია საჭირო. თუმცა ზოგს შეიძლება სხვა პასუხისმგებლობებიც მიანდონ როგორც თავის ქვეყანაში, ისე საზღვარგარეთ. ზოგიც შეიძლება სპეციალურ პიონერად ან დროებით სპეციალურ პიონერად დაინიშნოს. პიონერებს, რომლებსაც ამ სკოლის გავლა სურთ, შეუძლიათ დაესწრონ სპეციალურ შეხვედრას და გაეცნონ ამ სკოლაში სწავლისთვის საჭირო მოთხოვნებს. ეს შეხვედრა რეგიონულ კონგრესზე ტარდება.
18 „საგუშაგო კოშკის“ ბიბლიური სკოლა „გალაადი“: ამ სკოლაში სწავლა შეუძლიათ ცოლ-ქმარს და დაუქორწინებელ და-ძმებს, რომლებიც სპეციალური სრული დროით მსახურები არიან და იციან ინგლისური ენა. მათ თავიანთი წვლილი უნდა შეჰქონდეთ სამქადაგებლო თუ ფილიალის საქმიანობაში. ამ და-ძმების ცხოვრებიდან უნდა ჩანდეს, რომ სიამოვნებით იხარჯებიან თანამორწმუნეებისთვის. ისინი მზადყოფნით უნდა ეხმარებოდნენ სხვებს ბიბლიური თუ თეოკრატიული მითითებების გათვალისწინებაში. ფილიალის კომიტეტი შესაფერის და-ძმებს სთხოვს, რომ ამ სკოლაში სასწავლებლად სპეციალური ბლანკი შეავსონ. ამ სკოლის კურსდამთავრებულები ინიშნებიან თავიანთი ქვეყნისა თუ უცხო ქვეყნის ფილიალში ან ფილიალს გარეთ მსახურებისთვის.
ბეთელში მსახურება
19 ბეთელში მსახურება განსაკუთრებული პატივია. სიტყვა ბეთელი „ღვთის სახლს“ ნიშნავს და ეს ნამდვილად შესაფერისი სახელწოდებაა, რადგან ბეთელი თეოკრატიული საქმიანობის ცენტრია. ბეთელში მომსახურე და-ძმები მნიშვნელოვან საქმეს ასრულებენ — თარგმნიან, გამოსცემენ და ანაწილებენ ბიბლიურ ლიტერატურას. ამ და-ძმების შრომას ძალიან აფასებს ხელმძღვანელი საბჭო, რომელიც ზედამხედველობას უწევს კრებებს მთელ დედამიწაზე. ბევრი მთარგმნელი იმ ქვეყნის ფილიალის ტერიტორიაზე მსახურობს, სადაც მოსახლეობა იმ ენაზე ლაპარაკობს, რომელზეც პუბლიკაციებს თარგმნიან. ამგვარად, მთარგმნელებს ყოველდღიურად ესმით სალაპარაკო ენა. ისინი იმასაც ხედავენ, რამდენად კარგად ესმის ხალხს ის, რაც ნათარგმნ პუბლიკაციებში იწერება.
20 ბეთელში მძიმე სამუშაოებიც სრულდება. ამიტომ იქ იწვევენ ახალგაზრდა, ჯანმრთელ და ფიზიკურად ძლიერ ძმებს, რომლებიც მიძღვნილი და მონათლული მსახურები არიან. თუ გსურს იმ ფილიალში მსახურება, რომელიც შენს ქვეყანას უწევს ზედამხედველობას, დაელაპარაკე შენი კრების უხუცესებს და გაიგე, რა მოთხოვნებს უნდა აკმაყოფილებდე ბეთელში მსახურებისთვის.
მშენებლობაზე მსახურება
21 სოლომონის ტაძრის აგება წმინდა მსახურება იყო. იმავეს თქმა შეგვიძლია თეოკრატიული მიზნისთვის განკუთვნილი შენობების აგებაზეც (1 მეფ. 8:13—18). მრავალი და-ძმა გულმოდგინებას იჩენს და ამ საქმის შესასრულებლად ნებაყოფლობით იღებს საკუთარ დროსა თუ სახსრებს.
22 შენც ხომ არ გსურს სამშენებლო საქმეში მონაწილეობის მიღება? თუ სამაგალითო მონათლული მაუწყებელი ხარ, მშენებლობის ზედამხედველი ძმები თანახმანი იქნებიან, რომ დაეხმარო. სამშენებლო საქმეში დიდი გამოცდილება რომც არ გქონდეს, ისინი შეგასწავლიან ამ საქმეს. თავდაპირველად შეგიძლია ადგილობრივ უხუცესებს უთხრა, რომ გსურს მშენებლობაში მონაწილეობის მიღება. ზოგ მონათლულ მაუწყებელს სხვა ქვეყანაშიც შეუძლია თეოკრატიული მიზნისთვის განკუთვნილი შენობების მშენებლობაზე მოხალისედ მსახურება.
23 მშენებლობაში მონაწილეობის მიღების არაერთი შესაძლებლობა არსებობს. სამშენებლო გამოცდილების მქონე სამაგალითო მონათლულ მაუწყებლებს, რომლებსაც შეუძლიათ თავიანთი საცხოვრებელი ადგილიდან არც ისე შორს მიმდინარე სამშენებლო პროექტში მონაწილეობის მიღება, შესაძლებლობა ეძლევათ, რომ იმსახურონ ადგილობრივი საპროექტო-სამშენებლო პროგრამაში მონაწილე მოხალისეებად. ვისაც შეუძლია განსაზღვრული დროით შედარებით შორს მიმდინარე სამშენებლო პროექტებში მონაწილეობა, ფილიალი მათ ორი კვირიდან სამ თვემდე მოხალისე მშენებლებად დანიშნავს. ვინც მშენებლობაზე ხანგრძლივი დროით ინიშნება, მშენებლობის მსახური ეწოდება, ხოლო მშენებლობის მსახურს, რომელიც უცხოეთში მიმდინარე მშენებლობაზე ინიშნება, საზღვარგარეთ მომსახურე მშენებელი ჰქვია. სამშენებლო ჯგუფი შედგება მშენებლობის მსახურებისა და მოხალისე მშენებლებისგან, რომლებიც სამშენებლო საქმეს ხელმძღვანელობენ. მათ ეხმარებიან ადგილობრივ საპროექტო-სამშენებლო პროგრამაში მონაწილე მოხალისეები და და-ძმები ამ პროექტში ჩართული კრებებიდან. სამშენებლო ჯგუფი ერთი პროექტის დასრულების შემდეგ ფილიალის ტერიტორიაზე მიმდინარე სხვა პროექტზე გადადის.
სულიერი მიზნები
24 ვინაიდან სიცოცხლე იეჰოვას მიუძღვენი, ეს იმაზე მეტყველებს, რომ გინდა, მას მარადიულად ემსახურო. მაგრამ რა სულიერ მიზნებს დაისახავ? სულიერი მიზნები დაგეხმარება, შენი ენერგია თუ სახსრები ღვთისმოსაწონად გამოიყენო (1 კორ. 9:26). თუ ასეთ მიზნებს დაისახავ, სულიერად გაიზრდები, მსახურებას გააფართოებ და დაინახავ, „რა უფრო მნიშვნელოვანია“ (ფილ. 1:10; 1 ტიმ. 4:15, 16).
25 პავლე მოციქულმა ღვთისმსახურებაში მისაბაძი მაგალითი დაგვიტოვა (1 კორ. 11:1). ის ღვთის საქმეში ძალ-ღონეს არ იშურებდა. მას ესმოდა, რომ იეჰოვა მსახურების არაერთ შესაძლებლობას აძლევდა. კორინთელ ძმებს პავლემ მისწერა: „მსახურებისთვის ფართოდ გამეხსნა კარი“. ეს ჩვენს შემთხვევაშიც ასეა. კრებასთან ერთად იეჰოვას მსახურების მართლაც მრავალი შესაძლებლობა გვაქვს, მათ შორის და-ძმებთან ერთად სასიხარულო ცნობის ქადაგება. მაგრამ, როგორც პავლეს, ისე ჩვენს შემთხვევაშიც, მსახურების გაფართოება არაერთი წინააღმდეგობის გადალახვას მოითხოვს (1 კორ. 16:9). პავლე გამუდმებით მუშაობდა საკუთარ თავზე. მან თქვა: „ვცემ და ვიმონებ ჩემს სხეულს“ (1 კორ. 9:24—27). ვბაძავთ პავლე მოციქულს?
სულიერი მიზნები დაგეხმარება, შენი ენერგია თუ სახსრები ღვთისმოსაწონად გამოიყენო.
26 თითოეულმა ის თეოკრატიული მიზნები უნდა დაისახოს, რომლის მიღწევასაც შეძლებს. დღეს ბევრი იმიტომ მსახურობს სრული დროით, რომ ახალგაზრდობიდანვე დაისახეს სულიერი მიზნები. მშობლებმა თუ თანაქრისტიანებმა ისინი ამ მიზნების დასახვისკენ ჯერ კიდევ ბავშვობაში წაახალისეს. დღეს ისინი სიხარულით ემსახურებიან იეჰოვას და მიღებულ გადაწყვეტილებას არ ნანობენ (იგავ. 10:22). შეგიძლია აგრეთვე მიზნად დაისახო სამქადაგებლო მსახურებაში ყოველკვირეულად მონაწილეობა, ბიბლიის შესწავლის დაწყება და კრების შეხვედრებისთვის მოსამზადებლად მეტი დროის გამოყოფა. მოდი სიმტკიცე შევინარჩუნოთ და სრულად დავიხარჯოთ ღვთის საქმეში. თუ ასე მოვიქცევით, პატივს მივაგებთ ღმერთს და მივაღწევთ ჩვენს მთავარ მიზანს — მარადიულად ვემსახუროთ იეჰოვას (ლუკა 13:24; 1 ტიმ. 4:7ბ, 8).