მომსახურეები დიდ სამსახურს უწევენ კრებას

პავლე მოციქულმა ფილიპეს კრებას მისწერა: „პავლესა და ტიმოთესგან, ქრისტე იესოს მონებისგან, ქრისტე იესოსთან ერთობაში მყოფ წმინდებს ფილიპეში, მათ შორის ზედამხედველებსა და მომსახურეებს“ (ფილ. 1:1). აღსანიშნავია, რომ მისალმებისას პავლემ მომსახურეებიც მოიხსენია. ისინი, როგორც ჩანს, კრებაში დიდ დახმარებას უწევდნენ უხუცესებს. მომსახურეები კრებებში დღესაც მნიშვნელოვან დავალებებს ასრულებენ, რითაც ზედამხედველებს მხარში უდგანან და თავიანთი წვლილი შეაქვთ იმაში, რომ კრებაში ყველაფერი ორგანიზებულად კეთდებოდეს.

² იცი, ვინ არიან მომსახურეები შენს კრებაში, რა დავალებებს ასრულებენ ისინი და რით არის ეს კრებისთვის სასიკეთო? იეჰოვა აფასებს მათ ძალისხმევას. პავლემ დაწერა: „ვინც კარგად მსახურობს, ის კარგ სახელს იძენს და შეუძლია თამამად ილაპარაკოს ქრისტე იესოსადმი რწმენაზე“ (1 ტიმ. 3:13).

ბიბლიური მოთხოვნები მომსახურეებისთვის

³ მომსახურეები ზნეობრივად სუფთა და პასუხისმგებლობის გრძნობის მქონე ძმები უნდა იყვნენ, რომლებსაც დაკისრებული დავალებების სათანადოდ შესრულება შეუძლიათ. ეს კარგად ჩანს პავლეს მიერ ტიმოთესადმი მიწერილი წერილიდან, სადაც მან ჩამოთვალა, რა მოთხოვნებს უნდა აკმაყოფილებდნენ მომსახურეები: „მომსახურეც სერიოზული უნდა იყოს, არ უნდა იყოს ორპირი, ღვინოს მიძალებული, ანგარებიანი და ფულს დახარბებული, სუფთა სინდისით უნდა უერთგულოს რწმენას, ამ წმინდა საიდუმლოს. გარდა ამისა, ჯერ უნდა გამოიცადოს, გამოდგება თუ არა ამგვარი მსახურებისთვის, და თუ ბრალდაუდებელი აღმოჩნდება, იმსახუროს . . . მომსახურეს უნდა ჰყავდეს მხოლოდ ერთი ცოლი და კარგად უძღვებოდეს შვილებსა და ოჯახს“ (1 ტიმ. 3:8—12). თუ მომსახურეები ზედმიწევნით დაიცავენ მათთვის დაწესებულ მაღალზნეობრივ ნორმებს, ვერავინ იტყვის, რომ კრებაში საპასუხისმგებლო დავალებები შეუფერებელ ძმებს აქვთ მინდობილი.

⁴ როგორც ახალგაზრდა, ისე უფროსი ასაკის მომსახურეები ყოველთვე აქტიურად უნდა მონაწილეობდნენ მსახურებაში. ისინი იესოს უნდა ჰბაძავდნენ და გულმოდგინედ მსახურობდნენ, რაც ცხადყოფს, რომ იეჰოვას მსგავსად, მათაც სურთ ადამიანთა გადარჩენა (ეს. 9:7).

⁵ მომსახურეების ჩაცმულობა, გარეგნობა, საუბარი, აზროვნება და ყოფაქცევა სანიმუშო უნდა იყოს. ისინი საღი აზროვნებით უნდა გამოირჩეოდნენ, რითაც სხვების პატივისცემას დაიმსახურებენ. ეს ძმები სერიოზულად უნდა მოეკიდონ იეჰოვასთან ურთიერთობას და კრებაში დაკისრებული დავალებები გულმოდგინედ შეასრულონ (ტიტ. 2:2, 6—8).

⁶ ძმები, რომლებიც მომსახურეებად მსახურობენ, გამოიცადნენ, შეძლებდნენ თუ არა ამგვარ მსახურებას. მათ ჯერ კიდევ მომსახურედ დანიშვნამდე დაამტკიცეს თავიანთი ერთგულება. ისინი თავიანთი ცხოვრებით ცხადყოფენ, რომ სამეფოს საქმეს პირველ ადგილზე აყენებენ და მზად არიან ნებისმიერი დავალების შესასრულებლად. ეს ძმები კრებაში ყველას მისაბაძ მაგალითს აძლევენ (1 ტიმ. 3:10).

რა დავალებებს ასრულებენ მომსახურეები

⁷ მომსახურეები კრებაში სხვადასხვა დავალებას ასრულებენ. ამის წყალობით ზედამხედველებს მეტი დრო რჩებათ, რომ ძირითადი ყურადღება სწავლებასა და მწყემსვაზე გადაიტანონ. უხუცესთა საბჭო მომსახურეებისთვის დავალებების განაწილებისას მხედველობაში იღებს თითოეული მათგანის შესაძლებლობებს და კრების საჭიროებებს.

⁸ ვისაუბროთ ზოგიერთ დავალებაზე, რომელსაც მომსახურეები ასრულებენ. ერთ მომსახურეს შეიძლება კრების ლიტერატურა ჩააბარონ, რათა მაუწყებლებს ჰქონდეთ პუბლიკაციები როგორც მსახურებისთვის, ისე საკითხავად. სხვა მომსახურეებს შეიძლება დაევალოთ საფინანსო ანგარიშებისა თუ სამქადაგებლო უბნების მონაცემების აღრიცხვა, მიკროფონებით მომსახურება ან ხმის აპარატურის მართვა. ისინი აგრეთვე მსახურობენ კრებაში მომწესრიგებლებად და უხუცესებს სხვადასხვა საქმეში ეხმარებიან. მომსახურეებს თავიანთი წვლილი შეაქვთ იეჰოვას მოწმეთა დარბაზის მოვლა-პატრონობაში და სისუფთავის დაცვაში.

⁹ ზოგიერთ კრებაში შეიძლება საკმარისად იყვნენ მომსახურეები და დავალებები სხვადასხვა მომსახურეს მიეცეს. ზოგ კრებაში შეიძლება ერთი მომსახურე რამდენიმე დავალებას ასრულებდეს, ზოგან კი ერთი და იგივე დავალება შეიძლება ერთზე მეტ მომსახურეს მიეცეს. როდესაც კრებაში საკმარისად არ არიან მომსახურეები, უხუცესთა საბჭოს შეუძლია ესა თუ ის საქმე სხვა სამაგალითო მონათლულ ძმებს დაავალოს. შეძენილი გამოცდილება დიდ დახმარებას გაუწევს მათ, როცა მომსახურეებად დაინიშნებიან. იმ შემთხვევაში კი, როდესაც მონათლული ძმები არ არიან, ზოგიერთ საქმეში დახმარების გაწევა შეიძლება სამაგალითო დებს დაევალოთ, მიუხედავად იმისა, რომ ისინი მომსახურეებად არ ინიშნებიან. სამაგალითოდ ითვლება ის, ვისი საქციელი და მსახურებაც მისაბაძია. ასეთი ქრისტიანი ყველას კარგ მაგალითს უნდა აძლევდეს კრების შეხვედრებზე დასწრებაში, მსახურებაში, ოჯახურ ცხოვრებაში, გართობის არჩევაში, ჩაცმულობასა თუ გარეგნობაში.

¹⁰ თუ კრებაში უხუცესების ნაკლებობაა, მონათვლის მსურველებთან ბიბლიის ძირითადი სწავლებების შესახებ კითხვების განხილვა შეიძლება შესაფერის მომსახურეებს დაევალოთ. ეს საკითხები მოცემულია ამავე წიგნის დანართის 1-ლ ნაწილში „ქრისტიანული მრწამსი“. ვინაიდან დანართის მე-2 ნაწილში, „ქრისტიანული ცხოვრება“, მოცემულია პირადი ხასიათის კითხვები, ეს ნაწილი მონათვლის მსურველთან მხოლოდ უხუცესმა უნდა განიხილოს.

¹¹ ზოგ შემთხვევაში შესაძლოა უხუცესთა საბჭომ საჭიროდ ჩათვალოს, რომ მომსახურეებს დავალებები პერიოდულად შეეცვალოთ. თუმცა უმჯობესია, თუ ეს ძმები გარკვეული ხნის მანძილზე ერთსა და იმავე დავალებებს შეასრულებენ, რაც მათ გამოცდილებას შესძენთ.

¹² ადგილობრივი სიტუაციიდან გამომდინარე, მომსახურეებს, რომელთა სულიერი წარმატებაც ყველასთვის ცხადია, შეიძლება სხვა დავალებებიც მიეცეთ (1 ტიმ. 4:15). თუ კრებაში უხუცესები საკმარისად არ არიან, ჯგუფის ზედამხედველის დამხმარეებად ან ჯგუფის მსახურებად შეიძლება მომსახურეები დაინიშნონ, თუმცა ისინი ამ დავალებებს უხუცესების ზედამხედველობით შეასრულებენ. მომსახურეები აგრეთვე შეიძლება გამოვიდნენ დავალებებით შეხვედრაზე „ჩვენი ქრისტიანული ცხოვრება და მსახურება“. საჭიროების შემთხვევაში მათ შეიძლება დაევალოთ კრების ბიბლიის შესწავლის ჩატარება ან საჯარო მოხსენებით გამოსვლა. მომსახურეებს, თუ სათანადო მოთხოვნებს შეესაბამებიან, შეიძლება სხვა პასუხისმგებლობებიც მიეცეთ (1 პეტ. 4:10). ისინი უხუცესებს ხალისით უნდა ეხმარებოდნენ.

¹³ მართალია, მომსახურეების მოვალეობები უხუცესების მოვალეობებისგან განსხვავდება, მაგრამ მათი საქმიანობა არანაკლებ მნიშვნელოვანია ღვთის წმინდა მსახურებაში, რადგან ქრისტიანული კრების სათანადოდ ფუნქციონირებას უწყობს ხელს. თუ მომსახურეები კარგად ასრულებენ თავიანთ მოვალეობებს და აკმაყოფილებენ მოთხოვნებს მწყემსებად და მასწავლებლებად მსახურებისთვის, დროთა განმავლობაში მათ შესაძლოა რეკომენდაცია გაეწიოთ, რომ უხუცესად იმსახურონ.

¹⁴ არასრულწლოვანმა თუ ახალმონათლულმა ძმებმაც უნდა ისწრაფონ მომსახურედ მსახურებისკენ (1 ტიმ. 3:1). ყოველწლიურად მრავალი ადამიანი უერთდება იეჰოვას მოწმეთა რიგებს, ამიტომ სულ უფრო იზრდება მოწიფული ძმების საჭიროება. მომსახურედ რომ დაინიშნო, სხვების დახმარების სურვილი უნდა გქონდეს. იფიქრე, როგორ ეხმარებოდა იესო სხვებს (მათ. 20:28; იოან. 4:6, 7; 13:4, 5). სხვების დახმარების სურვილი უფრო გაგიძლიერდება, როდესაც საკუთარ თავზე გამოსცდი გაცემით გამოწვეულ სიხარულს (საქ. 20:35). გამოიჩინე ინიციატივა და დაეხმარე და-ძმებს; მონაწილეობა მიიღე იეჰოვას მოწმეთა დარბაზის მოვლაში, აგრეთვე მზად იყავი, შეხვედრაზე „ჩვენი ქრისტიანული ცხოვრება და მსახურება“ საჭიროების შემთხვევაში ჩაანაცვლო გამომსვლელი. გარდა ამისა, მომსახურედ რომ დაინიშნო, უნდა განივითარო სულის ნაყოფი, რაც კარგი პირადი შესწავლით მიიღწევა (ფსალმ. 1:1, 2; გალ. 5:22, 23). თუ მომსახურეობისკენ ისწრაფვი, ერთგულად და გულმოდგინედ უნდა ასრულებდე კრებაში მიღებულ დავალებებს (1 კორ. 4:2).

¹⁵ მომსახურეები წმინდა სულით ინიშნებიან, რათა კრებაზე იზრუნონ. და-ძმები მომსახურეებისადმი მადლიერებას გამოავლენენ, თუ ითანამშრომლებენ მათთან. ამგვარად ისინი იეჰოვას მიმართ გამოხატავენ მადლიერებას, რადგან სწორედ ის ზრუნავს კრებაში წესრიგის შენარჩუნებაზე (გალ. 6:10).