გამოავლინე სიფრთხილე მსახურების დროს
1. რატომ არის აუცილებელი მსახურების დროს სიფრთხილის გამოვლენა?
1 როგორც „ცხვრები მგლებში“, ისე ქადაგებენ ღვთის მსახურები „უსინდისო და უკუღმართ თაობაში“ (მათ. 10:16; ფილ. 2:15). დღეს სამოქალაქო არეულობა, მასობრივი ძალადობა და ადამიანების გატაცება ჩვეულებრივ რამედ იქცა. ყველაფერი ეს იმაზე მოწმობს, რომ ბოროტი ადამიანები „უფრო უარესად“ იქცევიან (2 ტიმ. 3:13). რომელი ბიბლიური პრინციპები დაგვეხმარება, რომ მსახურებისას „ვიყოთ ფრთხილნი“? (მათ. 10:16).
2. რა ვითარებების გამო არის გონივრული ტერიტორიის დატოვება და სხვაგან ქადაგება?
2 იყავი წინდახედული. იგავების 22:3 აღნიშნავს, რომ უბედურების დროს გონივრულია დამალვა. არ მოადუნო ყურადღება! იქაც კი, სადაც ჩვეულებრივ, უსაფრთხოა ყოფნა, მდგომარეობა შეიძლება მოულოდნელად შეიცვალოს. შესაძლოა, პოლიციელების განსაკუთრებულ აქტიურობას ამჩნევ ან ქუჩაში ხალხის ნაკადი მატულობს. ზოგჯერ გულისხმიერმა მობინადრემაც შეიძლება გაგვაფრთხილოს. ცნობისმოყვარეობის გამო შეყოვნების ნაცვლად, გონივრულია, დაუყოვნებლივ დატოვო იქაურობა და მსახურება სხვაგან განაგრძო (იგავ. 17:14; იოან. 8:59; 1 თეს. 4:11).
3. როგორ გამოვიყენოთ ეკლესიასტეს 4:9-ში მოცემული პრინციპი მსახურებისას?
3 არ იმსახურო მარტო. „ორის ერთად ყოფნა სჯობს მარტო ყოფნას“, — ამბობს ეკლესიასტეს 4:9. შეიძლება მიჩვეული ხარ მარტო მსახურებას და არც არაფერი შეგმთხვევია, მაგრამ არის ახლა ეს უსაფრთხო? ზოგან ეს ასეა. მაგრამ სხვაგან არაგონივრულია, დამ ან ახალგაზრდა მაუწყებელმა მარტომ იქადაგოს კარდაკარ, განსაკუთრებით კი შებინდებისას. გამოცდილებამ აჩვენა, რომ გვერდით მყოფი ყურადღებიანი პარტნიორი მართლაც ფასდაუდებელია (ეკლ. 4:10, 12). ფხიზლად იყავი ჯგუფური ქადაგებისას და იფიქრე ჯგუფის წევრების უსაფრთხოებაზე. ჩვევად გაიხადე, შეატყობინო ჯგუფის წევრებს, რომ ტოვებ ტერიტორიას.
4. როგორ შეგვიძლია ვიზრუნოთ კრების ყველა წევრის უსაფრთხოებაზე?
4 უხუცესები პასუხისმგებელნი არიან, ადგილობრივი მდგომარეობიდან გამომდინარე, მოგვაწოდონ პრაქტიკული ხელმძღვანელობა, ვინაიდან ისინი „ფხიზლობენ ჩვენს სულებზე“ (ებრ. 13:17). იეჰოვა უხვად გვაკურთხებს, თუ ვავლენთ ქრისტიანულ მოკრძალებას და სრულად ვთანამშრომლობთ მათთან (მიქ. 6:8; 1 კორ. 10:12). დაე, ღვთის ყველა მსახურმა ეფექტურად ვიქადაგოთ ჩვენს ტერიტორიაზე და, ამავდროულად, გამოვავლინოთ სიფრთხილე.