სრულად მივიღოთ მონაწილეობა მკაში

¹ იეჰოვას ძველ დროში მცხოვრები წინასწარმეტყველები, აგრეთვე იესო ქრისტე, შეკრების საქმიანობაზე ლაპარაკობდნენ (ეს. 56:8; ეზეკ. 34:11; იოან. 10:16). სამეფოს შესახებ კეთილი ცნობის მთელი მსოფლიოს მასშტაბით ქადაგებით ახლა სრულდება ეს საქმიანობა (მათ. 24:14). მათ შორის სხვაობა, ვინც ღმერთს ემსახურება და ვინც — არა, თვალნათელი ხდება (მალ. 3:18). რას ნიშნავს ეს ჩვენთვის?

² პირადი პასუხისმგებლობა. შეგვიძლია ვისწავლოთ პავლესგან, რომელიც სრულად იღებდა მონაწილეობას ქრისტიანულ მსახურებაში. ის ქადაგების ვალდებულებას გრძნობდა, რათა ყველა ადამიანს მისცემოდა კეთილი ცნობის მოსმენისა და გადარჩენის საშუალება. ამან აღძრა ის, მათ სასარგებლოდ გამუდმებით ეღვაწა (რომ. 1:14—17). თუ მხედველობაში მივიღებთ იმ სახიფათო მდგომარეობას, რომელშიც კაცობრიობა დღესდღეობით იმყოფება, ნუთუ უფრო მეტი პასუხისმგებლობა არ უნდა ვიგრძნოთ, რომ ვუქადაგოთ ჩვენს ტერიტორიაზე მცხოვრებ ხალხს? (1 კორ. 9:16).

³ გადაუდებელი მოქმედების დრო. სამქადაგებლო საქმიანობა შეიძლება შევადაროთ სამძებრო-სამაშველო საქმიანობას. სანამ ჯერ კიდევ ძალიან გვიანი არ არის, უნდა მოვძებნოთ ადამიანები და დავეხმაროთ უსაფრთხო ადგილის პოვნაში. დრო შეზღუდულია. უამრავი ადამიანის სიცოცხლე ბეწვზე ჰკიდია! გასაკვირი არაა, რატომ მოუწოდებდა იესო თავის მოციქულებს: „ევედრეთ სამკლის უფალს, რომ წარმოგზავნოს მუშაკნი თავის სამკალში“ (მათ. 9:38).

⁴ რადგან შეგნებული აქვთ დღევანდელი დროის გადაუდებლობა, სამეფოს მრავალი მაუწყებელი უფრო მეტად იღებს მონაწილეობას ამ სიცოცხლის გადამრჩენ საქმიანობაში. მოზარდი, სახელად ჰიროჰისა, მარტოხელა მშობლის ოჯახში ცხოვრობდა ოთხ უმცროს და-ძმასთან ერთად. ოჯახს მატერიალურად რომ დახმარებოდა, დილის სამ საათზე დგებოდა გაზეთების დასარიგებლად. მიუხედავად ამისა, ჰიროჰისას უფრო მეტის გაკეთება სურდა მსახურებაში, ამიტომ მან პიონერობა დაიწყო. არსებობს ამ განუმეორებელ საქმიანობაში უფრო მეტი მონაწილეობის საშუალებები?

⁵ „ჟამი იწურება“ (1 კორ. 7:29). ამიტომ დაე ჩვენი შესაძლებლობისამებრ ყველაფერი გავაკეთოთ, რათა შევასრულოთ ეს ყველაზე მნიშვნელოვანი საქმიანობა მთელ დედამიწაზე — ვიქადაგოთ სამეფოს შესახებ კეთილი ცნობა და მოვამზადოთ მოწაფეები. იესომ ეს მსახურება მკას შეადარა (მათ. 9:35—38). მკაში სრული მონაწილეობით, დაე ჩვენი შრომის ნაყოფი იყოს ის, რომ დავეხმაროთ სხვებს, გახდნენ გამოცხადების 7:9, 10-ში აღწერილი თაყვანისმცემელი უამრავი ხალხის ნაწილი.