ედემის ბაღში ცხოვრობდნენ პირველი ადამიანები?

წარმოიდგინეთ თქვენი თავი დიდ ულამაზეს ბაღში. ხელს არაფერი გიშლით, არ გაწუხებთ ქალაქის ხმაური, სიმშვიდესა და მყუდროებას არაფერი გირღვევთ. რაც მთავარია, თქვენი გონება არ არის მოცული მშფოთვარე ფიქრებით. არ გაწუხებთ არანაირი დაავადება, ალერგია ან ტკივილი. აქ ყველა პირობაა შექმნილი საიმისოდ, რომ სრულფასოვნად აღიქვათ გარემო.

თვალს ვერ წყვეტთ ლამაზ ფერებად აყვავებულ ხეებს, კამკამა ნაკადულს, ირგვლივ არსებულ სიმწვანეს, რომელსაც ხან მზე დასთამაშებს, ხან ჩრდილი. კანზე ნაზი სიო გელამუნებათ და მონაბერი ტკბილი სურნელით გათრობთ. გესმით ფოთლების შრიალი, წყლის შხეფების ხმა, ჩიტების გალობა და მოფუსფუსე მწერების ბზუილი. ვინ არ ისურვებდა ასეთ გარემოში ყოფნას?!

მთელ მსოფლიოში სჯერათ, რომ თავდაპირველად ადამიანი ამის მსგავს ბაღში ცხოვრობდა. საუკუნეებია, რაც იუდაიზმის, ქრისტიანობისა და ისლამის მიმდევრებს ასწავლიან, რომ ღმერთმა ადამი და ევა ედემის ბაღში დაასახლა. ბიბლია გვამცნობს, რომ ისინი იქ მშვიდად და ბედნიერად ცხოვრობდნენ — მშვიდობიანი ურთიერთობა ჰქონდათ ერთმანეთთან, ცხოველებთან და ღმერთთან, რომელიც მათ ასეთ არაჩვეულებრივ პირობებში მარადიულად ცხოვრებას დაჰპირდა (დაბადება 2:15—24).

ინდუსებსაც თავისებური წარმოდგენები აქვთ ედემის ბაღზე. ბუდისტებს სწამთ, რომ დიდი სულიერი ლიდერები ანუ ბუდები მსოფლიოს ოქროს ხანაში ევლინებიან, მაშინ როცა დედამიწაზე სამოთხისებური პირობებია. უამრავ აფრიკულ რელიგიაში გავრცელებულია მონათხრობები, რომლებიც ძალიან ჰგავს ადამისა და ევას ისტორიას.

ფაქტია, რომ თავდაპირველი სამოთხის შესახებ იდეა ბევრ რელიგიასა და ტრადიციაში არსებობს. ისტორიკოსი ჟან დელუმო თავის წიგნში წერს: „ბევრ ცივილიზაციას სწამდა პირვანდელი სამოთხის არსებობა, სადაც სრულყოფილება, თავისუფლება, მშვიდობა, ბედნიერება და ყველაფრის სიუხვე იყო. იქ არ იყო ძალადობა, დაძაბულობა და კონფლიქტი . . . ასეთმა რწმენამ საზოგადოების ცნობიერებაში წარმოშვა დაკარგულის, მაგრამ არა დავიწყებულის ძლიერი ნოსტალგია და მისი დაბრუნების დაუოკებელი სურვილი“.

საერთო წყაროდან ხომ არ მომდინარეობს ედემის ბაღის შესახებ წარმოდგენები? კაცობრიობის ცნობიერებაში რეალურად არსებულის კვალი ხომ არ აღიბეჭდა? მართლა არსებობდა შორეულ წარსულში ედემის ბაღი და ნამდვილად ცხოვრობდნენ ადამი და ევა?

სკეპტიკოსები ამ მოსაზრებას ცინიკურად უყურებენ. ჩვენს მეცნიერულ ეპოქაში ბევრი ფიქრობს, რომ ედემის ბაღის ისტორია მხოლოდ და მხოლოდ ლეგენდაა და მითი. რაოდენ საკვირველიც უნდა იყოს, ასე მხოლოდ საერო პირები არ ფიქრობენ. ბევრი სასულიერო პირიც აცხადებს, რომ ედემის ბაღს არასოდეს უარსებია. მათი აზრით, ედემის ბაღი გამოგონილი ამბავი, ალეგორია, მითი ან იგავია.

რასაკვირველია, ბიბლია ბევრ იგავს შეიცავს. თავად იესომ ცნობილი იგავები წარმოთქვა. მაგრამ ბიბლია სამოთხის ბაღზე საუბრობს არა როგორც იგავზე, არამედ როგორც შეულამაზებელ და მარტივად გადმოცემულ ისტორიულ ფაქტზე. და მაინც, თუ წიგნ „დაბადებაში“ ედემის ბაღზე მოთხრობილი ისტორია სინამდვილეს არ შეესაბამება, როგორღა უნდა ვენდოთ ბიბლიის სხვა წიგნებს? გავიგოთ, რატომ უყურებს ზოგი სკეპტიკურად ედემის ბაღის არსებობას და რამდენად მყარია მათი არგუმენტები. შემდეგ განვიხილოთ, რატომ უნდა ვიცოდეთ, ის რაც ედემში მოხდა.

მართლა არსებობდა ედემის ბაღი?

გსმენიათ ადამსა და ევაზე ან ედემის ბაღზე? მათ შესახებ მთელ მსოფლიოში მრავალს სმენია. შეგიძლიათ წაიკითხოთ ისტორია, რომელიც დაბადების 1:26—3:24-შია ჩაწერილი. მისი მოკლე შინაარსი ასეთია:

იეჰოვა ღმერთმაa მიწის მტვრისგან კაცი შექმნა და ადამი დაარქვა. ის ბაღში დაასახლა, რომელსაც ედემი უწოდა. ბაღი თავად ღმერთმა გააშენა და ის კარგად ირწყვებოდა; იქ უხვად იყო ნაყოფის მომცემი ლამაზი ხეები. ბაღის შუაგულში იდგა „სიკეთისა და ბოროტების შეცნობის ხე“. ღმერთმა ადამს აუკრძალა ამ ხის ნაყოფის ჭამა და გააფრთხილა, რომ დაუმორჩილებლობის შემთხვევაში მოკვდებოდა. შემდეგ ადამს მისი ერთ-ერთი ნეკნისგან ცხოვრების თანამგზავრი, ქალი შეუქმნა, რომელსაც ევა დაარქვა. ღმერთმა მათ დავალება მისცა — მოევლოთ ბაღისთვის, გამრავლებულიყვნენ და აევსოთ დედამიწა.

როცა ევა მარტო იყო, გველი დაელაპარაკა. ის ცდილობდა, ეცდუნებინა ევა და მისთვის აკრძალული ნაყოფი ეჭმევინებინა. გველმა უთხრა, რომ ღმერთი ატყუებდა და უმალავდა რაღაც კარგს, რაც მას ღმერთივით გახდიდა. ევა დაჰყვა სატანის ნებას და აკრძალული ნაყოფი შეჭამა. მოგვიანებით ღვთის გაფრთხილება არც ადამმა იღო ყურად. იეჰოვამ ადამს, ევასა და გველს განაჩენი გამოუტანა, პირველი წყვილი სამოთხის ბაღიდან გააძევა და შესასვლელში მცველებად ანგელოზები დააყენა.

ერთ დროს ბევრი მეცნიერი, ინტელექტუალი და ისტორიკოსი ეთანხმებოდა იმ აზრს, რომ ბიბლიის წიგნ „დაბადებაში“ ჩაწერილი ინფორმაცია უტყუარი და ისტორიულად დადასტურებული იყო. მაგრამ ბოლო დროს ამ ინფორმაციას სულ უფრო მეტი ადამიანი უყურებს სკეპტიკურად. რა უდევს საფუძვლად მათ ეჭვებს? ვიმსჯელოთ ოთხ გავრცელებულ მოსაზრებაზე.

1. რეალური ადგილი იყო ედემის ბაღი?

რატომ იწვევს ეჭვს ეს საკითხი? ამაში გარკვეული წვლილი ფილოსოფოსებს მიუძღვით. საუკუნეების მანძილზე თეოლოგები ფიქრობდნენ, რომ ღვთის ბაღი სადღაც არსებობდა. მაგრამ ისეთმა ბერძენმა ფილოსოფოსებმა, როგორებიც იყვნენ პლატონი და არისტოტელე, გავლენა მოახდინეს ეკლესიაზე. ისინი ამტკიცებდნენ, რომ დედამიწაზე სრულყოფილი არაფერი იყო. სრულყოფილება მხოლოდ ზეცაში შეიძლებოდა ყოფილიყო. აქედან გამომდინარე, თეოლოგებმა დაასკვნეს, რომ თავდაპირველი სამოთხე სადღაც ზეცასთან ახლოს იყო.b ზოგის თქმით, ბაღი ძალიან მაღალი მთის წვერზე, ჩვენი დეგრადირებული პლანეტიდან საკმაოდ შორს იყო. სხვების აზრით, ბაღი ჩრდილოეთ ან სამხრეთ პოლუსზე მდებარეობდა. ზოგი კი მიიჩნევდა, რომ ის მთვარეზე ან იქვე ახლოს იყო. გასაკვირი არ არის, რომ ედემის ბაღის შესახებ იდეა, საერთო ჯამში, ზღაპარს დაემსგავსა. ზოგი თანამედროვე მეცნიერი სისულელედ მიიჩნევს ედემის ბაღის ადგილმდებარეობაზე მსჯელობას, რადგან ფიქრობს, რომ ასეთ ადგილს არასოდეს უარსებია.

მაგრამ ბიბლია ედემის ბაღზე სულ სხვაგვარ წარმოდგენას გვიქმნის. წიგნ „დაბადების“ 2:8—14-დან ვიგებთ ამ ბაღის ზოგიერთ თავისებურებაზე: იგი მდებარეობდა ედემის აღმოსავლეთით და ირწყვებოდა მდინარით, რომელიც ოთხ ნაკადად იყოფოდა. თითოეულ მათგანს თავისი სახელი ჰქონდა. აგრეთვე, ვიგებთ იმას, თუ საით მიედინებოდნენ ისინი. ეს დეტალები დიდი ხნის მანძილზე საგონებელში აგდებდა იმ მეცნიერებს, რომელთა უმეტესობა უძველესი ბაღის ადგილმდებარეობის დადგენას ამ მუხლების მეშვეობით ცდილობდა. მაგრამ ისინი არაერთ ურთიერთგამომრიცხავ აზრს შეეჯახნენ. ნიშნავს ეს იმას, რომ ედემის, მისი ბაღის ან მისი მდინარეების ფიზიკური აღწერილობა სიცრუე ან მითია?

დაფიქრდით: ის, რაც ედემის ბაღში მოხდა დაახლოებით 6 000 წელს ითვლის. ეს მოვლენები მოსემ აღწერა, რომელიც შესაძლოა ზეპირგადმოცემებს ან მანამდე არსებულ დოკუმენტებს ეყრდნობოდა. უნდა აღინიშნოს, რომ მოსემ ეს ყველაფერი დაწერა ამ მოვლენებიდან დაახლოებით 2 500 წლის შემდეგ, როცა ედემი უკვე შორეული ისტორიის კუთვნილება იყო. შესაძლებელია, რომ საუკუნეების შემდეგ მდინარეებს მიმართულება შეეცვალათ? დედამიწის ქანები მუდმივად მოძრაობს. ის მხარე, სადაც სავარაუდოდ ედემი მდებარეობდა, სეისმური ზონაა. მსოფლიოს უძლიერესი მიწისძვრების დაახლოებით 17 პროცენტი ამ ტერიტორიაზე მოხდა. ასეთ ადგილებში დედამიწის შრეების ცვლილება ჩვეულებრივი მოვლენაა. ისიც უნდა აღინიშნოს, რომ ნოეს დროს მომხდარმა წარღვნამ შესაძლოა იმდენად შეცვალა ტოპოგრაფია, რომ დღეს შეუძლებელია მაშინდელი გეოგრაფიული ადგილების ზუსტად დადგენა.c

სამაგიეროდ ჩვენთვის ცნობილია რამდენიმე ფაქტი: წიგნი „დაბადება“ ედემის ბაღს რეალურ ადგილად მოიხსენიებს. მასში მოხსენიებული ოთხი მდინარიდან ორი — ევფრატი და ტიგროსი, იგივე ხიდეკელი, დღემდე არსებობს და მათი სათავეები ერთმანეთთან ახლო-ახლოა. ბიბლიაში იმ ქვეყნების სახელებიც არის ნახსენები, სადაც ეს მდინარეები მიედინებოდა და ის სასარგებლო წიაღისეულიც, რითაც ეს ქვეყნები იყო ცნობილი. ძველ ისრაელში მცხოვრებთათვის ამ დეტალების ცოდნა ძალიან მნიშვნელოვანი იყო.

ვხვდებით ასეთ დეტალებს მითებსა და ზღაპრებში? არა, რადგან დეტალების გადამოწმება და სიმართლის დადგენა ადვილი იქნებოდა. როგორც წესი, ზღაპრები ასე იწყება: „იყო და არა იყო რა . . . ცხრა მთას იქით ცხოვრობდა . . .“. ზღაპრებისგან განსხვავებით, ისტორია შეიცავს მნიშვნელოვან დეტალებს და ასეთი დეტალები ედემის ბაღის ისტორიაშიც გვხვდება.

2. რამდენად სარწმუნოა, რომ ღმერთმა ადამი მიწის მტვრისგან შექმნა, ევა კი — მისი ნეკნისგან?

თანამედროვე მეცნიერებამ დაამტკიცა, რომ ადამიანის სხეული შედგება ყველა იმ ელემენტისგან, რომელიც მიწაში მოიპოვება, მაგალითად, წყალბადის, ჟანგბადისა და ნახშირბადისგან. მაგრამ როგორ მოიყარა თავი ყველა ამ ელემენტმა ცოცხალ ქმნილებაში?

ბევრი მეცნიერის თეორიის თანახმად, სიცოცხლე თავისით წარმოიშვა. სიცოცხლის უმარტივესი ფორმები თანდათანობით, მილიონობით წლის განმავლობაში რთულ ფორმებად გარდაიქმნა. მაგრამ სიტყვა „მარტივის“ გამოყენება ცოცხალ ორგანიზმთან მიმართებით შეცდომაში შემყვანია, რადგან თვით ერთუჯრედიანი ორგანიზმებიც კი საოცრად რთული აგებულებისაა. არ არსებობს რაიმე მტკიცებულება იმისა, რომ სიცოცხლის რომელიმე ფორმა შემთხვევით გაჩნდა ან საერთოდ შესაძლებელია, რომ გაჩნდეს. პირიქით, ყველა ცოცხალი ორგანიზმის არსებობა იმას ადასტურებს, რომ მას ჰყავს გონიერი შემოქმედი, რომლის ინტელექტი ბევრად აღემატება ადამიანის ინტელექტს (რომაელები 1:20).d

განა შეიძლება ადამიანი შესანიშნავ სიმფონიას უსმენდეს, ბრწყინვალე ნახატს ათვალიერებდეს, თანამედროვე ტექნოლოგიური მიღწევებით იყოს განცვიფრებული და ამბობდეს, რომ ეს ყველაფერი თავისით შეიქმნა? ნამდვილად არა! ასეთი შედევრები ვერც კი შეედრება ადამიანის სხეულს თავისი სილამაზით, რთული აგებულებითა თუ ორიგინალურობით. როგორ შეიძლება ვიფიქროთ, რომ ადამიანის სხეულს შემოქმედი არა ჰყავს? გარდა ამისა, წიგნი „დაბადება“ გვიხსნის, რომ დედამიწაზე არსებული ყველა ცოცხალი ქმნილებიდან მხოლოდ ადამიანია ღვთის ანარეკლად შექმნილი (დაბადება 1:26). შესაბამისად, მიწიერი ქმნილებებიდან მხოლოდ ადამიანს შეუძლია აირეკლოს ღვთის შემოქმედებითი უნარი და შექმნას შედევრები მუსიკაში, ხელოვნებასა და ტექნოლოგიაში. განა გასაკვირია, რომ ღვთის შემოქმედებითი უნარი გაცილებით აღემატება ჩვენსას?

ნუთუ გაუჭირდებოდა ღმერთს კაცის ნეკნისგან ქალის შექმნა?e ღმერთს შეეძლო ევას შესაქმნელად სხვა საშუალება გამოეყენებინა, მაგრამ კაცის ნეკნისგან ქალის შექმნას, ღრმა მნიშვნელობა ჰქონდა. ღმერთს სურდა, რომ კაცი და ქალი შეუღლებულიყვნენ და „ერთი ხორცი“ ყოფილიყვნენ ანუ მტკიცე კავშირი ჰქონოდათ (დაბადება 2:24). განა შემოქმედის სიბრძნესა და სიყვარულზე არ მეტყველებს ის, რომ კაცი და ქალი ერთმანეთის შემავსებლები არიან, ქმნიან მტკიცე კავშირს და ერთმანეთზე ზრუნავენ?

გარდა ამისა, დღეს გენეტიკოსები აღიარებენ, რომ ყველა ადამიანს ერთი წინაპარი ჰყავს. ყოველივე აქედან გამომდინარე, შეიძლება „დაბადებაში“ მოთხრობილ ამბავს გამოგონილი ვუწოდოთ?

3. სიკეთისა და ბოროტების შეცნობის ხისა და სიცოცხლის ხის შესახებ მონათხრობი მითს ჰგავს.

სინამდვილეში, წიგნ „დაბადებაში“ ნათქვამი არ არის, რომ ამ ხეებს რაღაც განსაკუთრებული ან ზებუნებრივი ძალა ჰქონდა. ეს იყო ჩვეულებრივი ხეები, რომელთაც იეჰოვამ სიმბოლური მნიშვნელობა მიანიჭა.

განა იმავეს არ აკეთებენ ზოგჯერ ადამიანები? მაგალითად, როცა ხალხს ეროვნული დროშის პატივისცემისკენ მოუწოდებენ, ყველასთვის ნათელია, რომ პატივი სახელმწიფოს ეროვნულ სიმბოლოს უნდა მიაგონ და არა ქსოვილს. ამასთანავე, ძალაუფლების სიმბოლოდ არაერთი მონარქი იყენებს კვერთხსა და გვირგვინს.

რისი სიმბოლო იყო ეს ორი ხე? ამის თაობაზე მრავალი რთული თეორია არსებობს, მაგრამ სინამდვილეში, პასუხი მარტივი და საკმაოდ დამაკმაყოფილებელია. სიკეთისა და ბოროტების შეცნობის ხე არის იმის სიმბოლო, რომ მხოლოდ და მხოლოდ ღმერთს აქვს უფლება, განსაზღვროს, რა არის კარგი და რა — ცუდი (იერემია 10:23). აქედან გამომდინარე, გასაკვირი არ არის, რატომ იყო ხიდან ნაყოფის მოწყვეტა ქურდობა. რაც შეეხება სიცოცხლის ხეს, ის წარმოადგენდა ძღვენს, მარადიულ სიცოცხლეს, რომლის მოცემაც მხოლოდ იეჰოვას შეეძლო (რომაელები 6:23).

4. მოლაპარაკე გველი ზღაპრის გმირს ჰგავს.

რასაკვირველია, „დაბადებაში“ მოხსენიებული გველის ლაპარაკი შეიძლება დაუჯერებელი ჩანდეს, განსაკუთრებით თუ მხედველობაში არ მივიღებთ ბიბლიის სხვა წიგნებს. მაგრამ წმინდა წერილების კითხვისას ამ საიდუმლოს თანდათანობით ეფინება ნათელი.

ვინ ან რამ აალაპარაკა გველი? ძველად ისრაელებისთვის ცნობილი იყო სხვა ფაქტები, რომლებიც ნათელს ჰფენდა ამ საკითხს. მაგალითად, მათ იცოდნენ რომ, მართალია, ცხოველები არ ლაპარაკობდნენ, მაგრამ სულიერ ქმნილებას შეეძლო მათი ალაპარაკება. მოსემ დაწერა, რომ ღმერთმა ანგელოზი გაგზავნა, რათა ბალაამის ვირს კაცივით ელაპარაკა (რიცხვები 22:26—31; 2 პეტრე 2:15, 16).

შეუძლიათ სხვა სულიერ ქმნილებებს, თუნდაც ღვთის მტრებს, სასწაულების მოხდენა? მოსემ საკუთარი თვალით ნახა, როგორ გაიმეორეს ეგვიპტის გრძნეულმა ქურუმებმა ღვთის ზოგი ისეთი სასწაული, როგორიც მაგალითად, ჯოხის გველად გადაქცევა იყო. ასეთი სასწაულის მოხდენის ძალა მხოლოდ ზეცაში მყოფ ღვთის მტრებს შეეძლოთ (გამოსვლა 7:8—12).

უდავოა, რომ წიგნ „იობის“ დამწერიც მოსე იყო. ამ წიგნიდან ბევრი რამის გაგება შეიძლება ღვთის მთავარ მტერზე, სატანაზე, რომელმაც ეჭვქვეშ დააყენა იეჰოვას ყველა მსახურის ერთგულება (იობი 1:6—11; 2:4, 5). იცოდნენ ისრაელებმა, რომ ედემის ბაღში გველს სატანა მართავდა და ალაპარაკებდა, რათა მოეტყუებინა ევა და ღვთისადმი უმწიკვლობა დაეკარგვინებინა? როგორც ჩანს, იცოდნენ.

სატანა იდგა გველის უკან? იესომ სატანაზე თქვა, რომ ის „ცრუა და სიცრუის მამაა“ (იოანე 8:44). გამოდის, რომ პირველი უდიდესი ტყუილი „სიცრუის მამას“ ეკუთვნის. პირველი ტყუილი კი ის იყო, რაც გველმა ევას უთხრა. ღმერთმა ადამი და ევა გააფრთხილა, რომ თუ აკრძალულ ნაყოფს შეჭამდნენ, დაიხოცებოდნენ. ამის საპირისპიროდ, გველმა თქვა: „არა, არ მოკვდებით“ (დაბადება 3:4). უდავოდ, იესომ იცოდა, რომ გველს სატანა მართავდა. გამოცხადება, რომელიც იესომ იოანე მოციქულს მისცა, ნათელს ჰფენს ამ საკითხს და სატანას „ძველ გველს“ უწოდებს (გამოცხადება 1:1; 12:9).

მართლა ძნელი დასაჯერებელია, რომ ძლიერ სულიერ ქმნილებას შეეძლო გველის მანიპულირება და ალაპარაკება? არა, რადგან ადამიანებსაც კი, რომლებიც სულიერ ქმნილებებზე გაცილებით ნაკლებ ძალას ფლობენ, შეუძლიათ მუცლით მეზღაპრეობა და სპეცეფექტების შექმნა.

ყველაზე სარწმუნო მტკიცებულება

როგორც ვხედავთ, არანაირი მიზეზი არ გვაქვს, რომ „დაბადებაში“ ჩაწერილ ინფორმაციას სკეპტიკურად ვუყუროთ. უფრო მეტიც, არსებობს ყველაზე სარწმუნო მტკიცებულება იმისა, რომ ბიბლიის ეს მონაკვეთი ნამდვილ ისტორიას შეიცავს.

მაგალითად, ბიბლიაში იესო ქრისტეს „ერთგული და ჭეშმარიტი მოწმე“ ეწოდება (გამოცხადება 3:14). იესო სრულყოფილი იყო, რომელსაც არც ტყუილი უთქვამს ოდესმე და არც ჭეშმარიტება დაუმახინჯებია. ის ამბობდა, რომ განკაცებამდე დიდი ხნით ადრე ცხოვრობდა და თავისი მამის, იეჰოვას, გვერდით იყო „ქვეყნიერების შექმნამდე“ (იოანე 17:5). ამგვარად, სანამ დედამიწაზე სიცოცხლე გაჩნდებოდა, იესო უკვე არსებობდა. რას ამბობს ყველაზე სანდო მოწმე?

იესო ადამსა და ევაზე ისე საუბრობდა, როგორც რეალურ ადამიანებზე. როცა მონოგამიასთან დაკავშირებულ ღვთის პრინციპზე საუბრობდა, იესომ ადამისა და ევას ცოლქმრული კავშირი მოიხსენია (მათე 19:3—6). თუ ადამსა და ევას არასოდეს უცხოვრიათ და ედემის ბაღს არ უარსებია, გამოდის, რომ იესო მატყუარა იყო ან თავად იყო მოტყუებული. მაგრამ ასეთი დასკვნის გაკეთება შეუძლებელია. იესო ზეციდან ადევნებდა თვალყურს ედემის ბაღში დატრიალებულ ტრაგედიას. ამაზე დიდი არგუმენტი რა უნდა იყოს?!

სინამდვილეში, „დაბადების“ წიგნში მოთხრობილი ისტორიის უარყოფა, იესოს უარყოფის ტოლფასია, და შეუძლებელს ხდის ბიბლიის სხვა მნიშვნელოვანი საკითხებისა და ღვთის დაპირებების გაგებას. გავიგოთ, რატომ არის ეს ასე.

[სქოლიოები]

რატომ უნდა ვიცოდეთ ის, რაც ედემში მოხდა?

ედემის ბაღთან დაკავშირებით მეცნიერების მიერ გამოთქმულ საწინააღმდეგო აზრებს შორის ყველაზე დიდ გაკვირვებას იწვევს განაცხადი იმის შესახებ, რომ წიგნ „დაბადების“ გარდა ბიბლიის დანარჩენ წიგნებში ედემის ბაღი არსადაა მოხსენიებული. მაგალითად, რელიგიათმცოდნე პროფესორი პოლ მორისი წერს: „დანარჩენ ბიბლიაში ედემის ისტორია პირდაპირ არსად არის ნახსენები“. ამ პროფესორის შეხედულებას შეიძლება ბევრი „ექსპერტი“ დაეთანხმოს, მაგრამ ფაქტები საპირისპიროზე მეტყველებს.

სინამდვილეში, ბიბლია არაერთხელ ახსენებს ედემის ბაღს, ადამს, ევასა და გველს.a მაგრამ ამ მეცნიერების მიერ დაშვებული შეცდომები არაფერია იმასთან შედარებით, რასაც რელიგიური ბელადები და ბიბლიის კრიტიკოსები უშვებენ. ვინაიდან როცა ეს უკანასკნელნი საჯაროდ ამბობენ, რომ „დაბადებაში“ ედემის ბაღის შესახებ ჩანაწერები საეჭვოა, ფაქტობრივად, ამით მთლიან ბიბლიას უწევენ დისკრედიტაციას. ვნახოთ, როგორ.

მთლიანი ბიბლიის გასაგებად აუცილებელია, ვიცოდეთ, რა მოხდა ედემის ბაღში. ღვთის სიტყვის დახმარებით შეგვიძლია მივიღოთ ზოგადსაკაცობრიო კითხვებზე პასუხი. ეს კითხვები ისევ და ისევ ედემში მომხდარ მოვლენებს უკავშირდება. განვიხილოთ ამ კითხვებიდან ზოგიერთი.

● რატომ ვბერდებით და ვკვდებით? ადამი და ევა მარადიულად იცხოვრებდნენ, თუ იეჰოვას დაემორჩილებოდნენ. ისინი მხოლოდ დაუმორჩილებლობის შემთხვევაში დაიხოცებოდნენ. მართლაც, რა დღესაც ისინი ღმერთს ეურჩნენ, იმ დღიდან სიკვდილს დაექვემდებარნენ (დაბადება 2:16, 17; 3:19). მათ დაკარგეს სრულყოფილება და თავიანთ შთამომავლებს ცოდვა და არასრულყოფილება გადასცეს. ბიბლიაში ვკითხულობთ: „როგორც ერთი ადამიანის მეშვეობით შემოვიდა ცოდვა ქვეყნიერებაში და ცოდვის მეშვეობით — სიკვდილი, ამგვარად სიკვდილი გავრცელდა ყველა ადამიანზე, რადგან ყველამ შესცოდა“ (რომაელები 5:12).

● რატომ უშვებს ღმერთი ბოროტებას? ედემის ბაღში სატანამ ღმერთი მატყუარა გამოიყვანა, თითქოს ის თავის ქმნილებებს რაღაც კარგს უმალავდა (დაბადება 3:3—5). მან ეჭვქვეშ დააყენა იეჰოვას მმართველობის სამართლიანობა. ადამი და ევა სატანის კვალს გაჰყვნენ, უარყვეს იეჰოვა, როგორც უზენაესი ხელისუფალი და არჩიეს თავად დაედგინათ, რა იყო კარგი და რა — ცუდი. იეჰოვამ, რომელიც სრულყოფილად სამართლიანი და ბრძენი ღმერთია, იცოდა, რომ ამ საკამათო საკითხს მხოლოდ და მხოლოდ დრო გადაჭრიდა. მან ადამიანებს დრო მისცა, თავიანთი სურვილისამებრ, საკუთარი თავის ბატონ-პატრონები ყოფილიყვნენ. სატანის ხელშეწყობით დედამიწაზე ბოროტება მომძლავრდა და შედეგად ნელ-ნელა გამოაშკარავდა უდიდესი ჭეშმარიტება: ადამიანს არ შეუძლია ღვთისგან დამოუკიდებლად ცხოვრება (იერემია 10:23).

● რა განიზრახა ღმერთმა დედამიწისთვის? დედამიწაზე ედემის ბაღი იეჰოვამ სილამაზის ეტალონად შექმნა. ღმერთმა ადამსა და ევას დაავალა, ის თავიანთი შთამომავლებით აევსოთ და ‘დაპატრონებოდნენ’ მას, რათა მთელი პლანეტა ედემის ბაღივით ლამაზი ყოფილიყო (დაბადება 1:28). აქედან გამომდინარე, ღვთის განზრახვაა, დედამიწის სამოთხედ გადაქცევა, სადაც ერთ ოჯახად იცხოვრებენ ადამისა და ევას სრულყოფილი შთამომავლები. ბიბლიის უდიდესი ნაწილი ეთმობა იმას, თუ რა საშუალებებს იყენებს ღმერთი თავისი პირვანდელი განზრახვის განსახორციელებლად.

● რატომ მოევლინა იესო ქვეყნიერებას? ადამისა და ევას დაუმორჩილებლობამ სიკვდილი მოუტანა როგორც მათ, ისე მათ შთამომავლებს, მაგრამ მოსიყვარულე ღმერთს უიმედოდ არ დავუტოვებივართ. ღმერთმა დედამიწაზე თავისი ძე გამოგზავნა, რათა მას, როგორც ბიბლია ამბობს, გამოსასყიდი გაეღო (მათე 20:28). რას ნიშნავს ეს? იესო იყო „უკანასკნელი ადამი“. მას ადამისგან განსხვავებით არ შეუცოდავს. განკაცებული იესო იეჰოვას მორჩილი იყო და სრულყოფილება შეინარჩუნა. შემდეგ მან ნებაყოფლობით გაიღო თავისი სიცოცხლე მსხვერპლად ანუ გამოსასყიდად, რათა ღვთის ყველა ერთგულ ადამიანს ცოდვების პატიება მიეღო და საბოლოოდ ისეთი ცხოვრება ჰქონოდა, როგორიც ადამსა და ევას ჰქონდათ ედემის ბაღში შეცოდებამდე (1 კორინთელები 15:22, 45; იოანე 3:16). მაშასადამე, იესოს მსხვერპლი იმის გარანტიაა, რომ იეჰოვა თავის განზრახვას შეასრულებს და ჩვენს დედამიწას ედემის მსგავს სამოთხედ აქცევს.b

ღვთის განზრახვა არ არის ბუნდოვანი; ის არც აბსტრაქტულ თეოლოგიურ კონცეფციას ჰგავს. ის რეალურია. ედემის ბაღი რეალურად არსებობდა დედამიწაზე, სადაც ნამდვილად ცხოვრობდნენ ცხოველები და ადამიანები. მსგავსად ამისა, ღვთის დაპირება მომავალში რეალობად იქცევა. როგორი იქნება თქვენი მომავალი? ეს უმეტესწილად თქვენზეა დამოკიდებული. ღმერთს სურს, რომ ყველას ჰქონდეს ბედნიერი მომავალი, მათაც კი, ვინც გზასაცდენილია (1 ტიმოთე 2:3, 4).

ძელზე გაკრული იესო ელაპარაკა კაცს, რომლის ცხოვრებაც უკუღმართად წარიმართა. ეს კაცი ბოროტმოქმედი იყო. მან იცოდა, რომ სიკვდილს იმსახურებდა, მაგრამ ნუგეშის მისაღებად იესოს მიმართა. რა უპასუხა იესომ? „ჩემთან ერთად იქნები სამოთხეში“ (ლუკა 23:43). თუკი იესოს უნდა, რომ ამ ყოფილმა ბოროტმოქმედმა აღდგომის შემდეგ ედემის მსგავს სამოთხის ბაღში მარადიულად იცხოვროს, განა თქვენთვისაც იგივეს არ მოისურვებს? რა თქმა უნდა! ეს იესოს მამასაც სურს. თუ გინდათ, რომ გქონდეთ ასეთი მომავალი, ყველანაირად შეეცადეთ, მეტი გაიგოთ იმ ღმერთის შესახებ, რომელმაც ედემის ბაღი გააშენა.

[სქოლიოები]

[ჩარჩო⁄სურათები 10 გვერდზე]

წინასწარმეტყველება, რომელიც მთელ ბიბლიას აერთიანებს

„მტრობას ჩამოვაგდებ შენსა [გველს] და ქალს შორის, შენს შთამომავლობასა და მის შთამომავლობას შორის. ის თავს გაგიჭეჭყავს, შენ კი ქუსლს დაუგესლავ“ (დაბადება 3:15).

ეს არის პირველი ბიბლიური წინასწარმეტყველება, რომელიც ღმერთმა ედემში წარმოთქვა. ვინ არის ქალი და მისი შთამომავლობა ან გველი და მისი შთამომავლობა? რა მტრობას უნდა ეარსება მათ შორის?

გველი

სატანა ეშმაკი (გამოცხადება 12:9).

ქალი

ზეციერი ქმნილებებისგან შემდგარი იეჰოვას ორგანიზაცია (გალატელები 4:26, 27). ესაიამ „ქალზე“ იწინასწარმეტყველა, რომ მას უნდა ეშვა მომავალი სულიერი ერი (ესაია 54:1; 66:8).

გველის შთამომავლობა

ისინი, ვინც სატანის ნებას ასრულებენ (იოანე 8:44).

ქალის შთამომავლობა

უპირველესად იესო ქრისტე, რომელიც იეჰოვას ზეციერმა ორგანიზაციამ შობა. შთამომავლობაში შედიან აგრეთვე ქრისტეს სულიერი ძმები, რომლებიც მასთან ერთად მმართველობენ ზეცაში. ეს ცხებული ქრისტიანები შეადგენენ სულიერ ერს, ანუ „ღვთის ისრაელს“ (გალატელები 3:16, 29; 6:16; დაბადება 22:18).

ქუსლში დაგესვლა

მესიისთვის მიყენებული მტკივნეული დარტყმა, მაგრამ არა სამუდამო. სატანამ გამოიწვია იესოს სიკვდილი დედამიწაზე, მაგრამ ღმერთმა ის აღადგინა.

თავის გაჭეჭყვა

სატანისთვის მიყენებული სასიკვდილო დარტყმა. იესო სამუდამოდ მოსპობს სატანას. მანამდე კი ის აღმოფხვრის იმ ბოროტებას, რომელსაც ედემის ბაღში სატანამ მისცა დასაბამი (1 იოანე 3:8; გამოცხადება 20:10).

თუ გსურთ მოკლე ინფორმაციის მიღება ბიბლიის მთავარი თემის შესახებ, გაეცანით ბროშურას „რას გვამცნობს ბიბლია?“. გამოცემულია იეჰოვას მოწმეების მიერ.

[სურათი 11 გვერდზე]

ადამმა და ევამ ცოდვის საშინელი ნაყოფი მოიმკეს