იყავით გონიერები აღსასრულის მოახლოებისას

¹ ღვთის სიტყვა არაერთხელ აღგვიწერს, რომ იეჰოვას დღე მოვა, როგორც „ქურდი“, ანუ ეს მოხდება მოულოდნელად, უეცრად (1 თეს. 5:2; მათ. 24:43; 2 პეტ. 3:10; გამოცხ. 3:3; 16:15). „ამიტომ . . . რომელ საათსაც არ ფიქრობთ, მაშინ მოვა ძე კაცისა“, — თქვა იესომ (მათე 24:44). როგორ შევინარჩუნოთ სულიერი სიფხიზლე აღსასრულის მოახლოებისას? ამის გასაღებს ვპოულობთ ღვთის მიერ შთაგონებულ სიტყვებში: „იყავით გონიერნი“ (1 პეტ. 4:7).

² გონიერება იმას გულისხმობს, რომ ყველაფერს იეჰოვას თვალსაზრისით ვუყუროთ (ეფეს. 5:17). ის გვეხმარება, რომ ამ წუთისოფელში ჩვენს თავს შევხედოთ, როგორც „ხიზნებსა და მწირებს“ (1 პეტ. 2:11). გონიერების საშუალებით შეგვიძლია გავერკვეთ, თუ რა არის უფრო მნიშვნელოვანი. ეს კი, თავის მხრივ, სწორი გადაწყვეტილებების მიღებასა და პრიორიტეტების დადგენაში დაგვეხმარება (ფილ. 1:10).

³ დაისახე სულიერი მიზნები. სულიერი მიზნების დასახვა და მათი მიღწევა გვეხმარება, ვიყოთ გონიერები. გაქვს დასახული სულიერი მიზნები? ცდილობ, რომ ყოველდღიურად იკითხო ბიბლია? ყოველთვის ესწრები ქრისტიანულ შეხვედრებს? კითხულობ „საგუშაგო კოშკისა“ და „გამოიღვიძეთ!“-ის ყოველ ნომერს? ან ცდილობ, უფრო მეტად მიიღო მონაწილეობა სამქადაგებლო მსახურებაში? თუ დაისახავ შენთვის საჭირო მიზნებს, გულმოდგინედ ეცადე მათ მიღწევას. სთხოვე იეჰოვას, აკურთხოს შენი მცდელობა და თვითონ გაოცდები შედეგებით.

⁴ ერთხელ ერთმა უხუცესმა ჰკითხა ახალგაზრდა ცოლ-ქმარს მათი სულიერი მიზნების შესახებ. მისმა კითხვამ დააფიქრა ისინი, რომ თუ ცხოვრებას გაიმარტივებდნენ და გადაიხდიდნენ ვალებს, შეძლებდნენ პიონერებად მსახურებას. მათ მიიღეს გადაწყვეტილება, რომ ეს მიზნად დაესახათ. მთელი ძალა მოახმარეს ვალების გადახდას და გათავისუფლდნენ ზედმეტი საქმეებისგან, რომლებიც მათ ბევრ ენერგიასა და დროს ართმევდა. ზუსტად ერთ წელში მიაღწიეს კიდეც დასახულ მიზანს. რა შედეგით? ქმარი გვიამბობს: „მიზნის გარეშე ვერ ვიქნებოდით პიონერები. ახლა უფრო ბედნიერები ვართ. ჩვენი ცხოვრება უფრო მშვიდი და უკეთესი გახდა. მან შეიძინა ნამდვილი აზრი და მიზანი“.

⁵ იეჰოვას დღის მოლოდინში, მოდი შევინარჩუნოთ მზადყოფნა გონივრულად ცხოვრებითა და ღვთის ნების შესრულებაზე კონცენტრირებით (ტიტ. 2:11—13).