„შესაფერისად და წესიერად“ ორგანიზებულნი
1 საოლქო კონგრესი წარმატებით რომ ჩატარდეს, ამისათვის დიდი ძალისხმევაა საჭირო. კონგრესის ადმინისტრაცია კონგრესის ჩასატარებლად და საცხოვრებლად შესაფერისი ადგილის მოძებნას ცდილობს. ცალკეული პირები და ოჯახები ჩამოსვლას და დაბინავებას გეგმავენ. კრებები ორგანიზებას უწევენ კონგრესის ჩასატარებლად მრავალი განყოფილებისათვის საჭირო მოხალისეთა ჯგუფების დაკომპლექტებას. მიზანი კი ისაა, რომ „ყველაფერი შესაფერისად და წესიერად ხდებოდეს“ (1 კორ. 14:40).
2 როდესაც თანამშრომლობ კონგრესის ორგანიზატორებთან, გახსოვდეს, რომ მოსამზადებლად თვეები, ხანდახან კი წლებია საჭირო. ასობით ძმამ დიდი დრო მოანდომა ყველაფრის მოწესრიგებას. ამაში შედის შენობების დაქირავება, მოწყობილობების დამონტაჟება და მომუშავეების შერჩევა. ამ წინასწარ მზადებას ყველასთვის სულიერი კურთხევები მოაქვს. რის გაკეთება შეგვიძლია დასახმარებლად?
3 ითანამშრომლე დაბინავების მხრივ. მნიშვნელოვანია, ყოველმა ჩვენგანმა ვითანამშრომლოთ კონგრესის ნებისმიერ ღონისძიებასთან დაკავშირებით. ეს განსაკუთრებით აუცილებელია მაშინ, როცა საქმე ჩვენი დაბინავების საკითხს ეხება. ფაქტობრივად, თითოეული კონგრესისთვის ასობით ოთახია საჭირო. ჩვენი ძმების უმეტესობა ფინანსურადაა შეზღუდული და იაფფასიან ოთახებს უნდა დასჯერდნენ. დიდი ძალისხმევა დასჭირდა იმას, რომ საერთო საცხოვრებლებისა და სხვა შენობების ხელმძღვანელობასთან ხელსაყრელ ფასზე შეთანხმებულიყვნენ. სიყვარულით უნდა გავითვალისწინოთ სხვების მოთხოვნილებები და ‘თითოეულმა მარტო საკუთარ თავზე კი არ ვიზრუნოთ, არამედ სხვებზეც’ (ფილ. 2:4).
4 თუ კონგრესის დროს ზუსტად მივყვებით მითითებებს დაბინავებასთან დაკავშირებით, ეს სარგებლობას მოიტანს ყველასთვის, ვისაც ეს ეხება. ამ მითითებების უგულებელყოფა ზედმეტ პრობლემებს იწვევს. როგორ? როდესაც ამ მითითებებს ვემორჩილებით, სასტუმროში წინასწარ იციან, თუ რამდენი ოთახია დაჯავშნილი და, ამგვარად, რამდენი სტუმარი იქნება. ეს სასტუმროს პერსონალს მომზადებაში ეხმარება, და შემდგომი წლებისთვის შეიძლება ოთახებზე კიდევ უფრო მეტი ფასდაკლებაც მოხდეს. თუ ბევრი ჩვენგანი აუქმებს შეკვეთილ ადგილს ან სხვაგან აპირებს დარჩენას, ეს სირთულეებს უქმნის საერთო საცხოვრებლებისა და სხვა შენობების ადმინისტრაციას, აგრეთვე ჩვენს და-ძმებს, რომელთაც, შესაძლოა, ამავე შენობაში სურდათ დარჩენა. სასტუმროს ადმინისტრაციამ შეიძლება მომავალი კონგრესებისთვის ნაკლები ოთახები გამოგვიყოს, რადგან ჩათვლის, რომ ჩვენ არ შევასრულებთ ჩვენს პირობას. რამდენად უკეთესია, როცა ჩვენი სიტყვა სანდოა და ‘ჰო — ჰოს’ ნიშნავს! (მათ. 5:37).
5 ყურადღება მიაქციე ამ კარგ შედეგებს. ერთი კონგრესის შემდეგ იმ შენობის დირექტორმა და გამგემ, რომელშიც კონგრესის დელეგატები ცხოვრობდნენ, აღნიშნეს: „მოხარული ვიქნებით, მომავალ წელს კვლავაც მიგიღოთ. თქვენ სრულ ნდობას იმსახურებთ. მზად ვართ, ყველა ოთახი დაგითმოთ“. სასადილოში ერთმა მომუშავემ აღნიშნა: „ეს წარმოუდგენელია, თქვენ განსაკუთრებული ხალხი ხართ; ასობით ადამიანი ვახშმობს, საზამთროს მიირთმევენ და ამის შემდეგ იდეალურ სისუფთავეს ტოვებენ!“. რა შესანიშნავი დამოწმებაა!
6 შენობის ადმინისტრაციის წერილი: «ადმინისტრაცია აღნიშნავს „იეჰოვას მოწმეთა“ ორგანიზაციის იმ წევრების კარგ ორგანიზებულობას, რომლებიც ჩვენთან ცხოვრობდნენ. მათი აქ ცხოვრების სამი დღის განმავლობაში იდეალური წესრიგი იყო შენარჩუნებული. თქვენი ორგანიზაციის წევრებმა დახმარება გაგვიწიეს (კვლებისა და ნაკვეთის გამარგვლა). ადმინისტრაცია მოხარული იქნება, კვლავაც ითანამშრომლოს თქვენს ორგანიზაციასთან». ერთხელ ერთ რეგიონში არსებული სასტუმროების გამგემ აღნიშნა: „არ შემიძლია გავიხსენო სხვა რომელიმე ასეთი დიდი ჯგუფი, რომელიც თავისი მაგალითით ასე ამტკიცებდეს თავის რწმენას, როგორც იეჰოვას მოწმეები. ვიმედოვნებთ, რომ კვლავაც გვესტუმრებით“. ეს გამონათქვამები იმის მაჩვენებელია, რომ კარგი ყოფაქცევა არა მარტო ჩვენთვის არის წამახალისებელი, არამედ მრავალი ადამიანისთვის, რომლებიც ჩვენ გვაკვირდებიან.
7 თანამშრომლობის ძირითადი საშუალებები. ბევრი არაფერი მოგვეთხოვება იმისათვის, რომ კონგრესის დროს ვითანამშრომლოთ დაბინავებასთან დაკავშირბით. 1) ნუ შეუკვეთავ იმაზე მეტ ოთახს, რამდენის გამოყენებასაც აპირებ, 2) დროულად გამოგზავნეთ თქვენი ბლანკები დაბინავებასთან დაკავშირებით; ნუ გადასცემთ მათ ტელეფონით. 3) მაშინვე აცნობეთ დაბინავების განყოფილებას, თუ აუქმებთ დაბინავებასთან დაკავშირებულ თქვენს შეკვეთას. 4) გახსოვდეთ, რომ საერთო საცხოვრებლისა და საკუთარი სახლების მფლობელები სამართლიანად მოელიან ჩვენგან თავიანთი წესებისადმი მორჩილებას.
8 რადგან იეჰოვა ღმერთის მსახურები ვართ, შესაძლებლობა გვაქვს, მისი პიროვნული თვისებები ავირეკლოთ ყველაფერში, რასაც ვაკეთებთ. ამაში შედის ის, რომ წინასწარ მოვემზადოთ ღვთის სახელთან დაკავშირებულ კონგრესზე დასასწრებად. გახსოვდეს, რომ „ღმერთი უწესრიგობის კი არ არის, არამედ მშვიდობისაა“ (1 კორ. 14:33). ამიტომ, დაე მტკიცედ გვქონდეს გადაწყვეტილი, რომ სხვებმა ჩვენი ყოფაქცევით დაინახონ იეჰოვას ეს თვისება, როდესაც დავესწრებით საოლქო კონგრესს „ღვთის სიტყვის მასწავლებლები“. დაე გულწრფელი ადამიანები მიხვდნენ, რომ იეჰოვას კრებული „შესაფერისად და წესიერად“ არის ორგანიზებული (ფსალმ. 67:27).