მიბაძეთ იეჰოვას სამართლიანობასა და სიმართლეში
„უფალი ვარ, წყალობის, სამართლისა და სიმართლის მოქმედი ამ ქვეყანაზე, რადგან ეს მახარებს მე“ (იერემია 9:23).
1. რა დიდებულ პერსპექტივას გვთავაზობს იეჰოვა?
იეჰოვას დაპირების თანახმად, დადგება დღე, როდესაც ყველა ადამიანი შეიცნობს მას. თავისი წინასწარმეტყველის, ესაიას, მეშვეობით მან თქვა: „არავინ იბოროტებს და არავინ იბილწებს მთელ ჩემ წმიდა მთაზე, რადგან აივსება მიწა უფლის ცოდნით, როგორც ზღვა არის წყლებით დაფარული“ (ესაია 11:9). რა დიდებული პერსპექტივაა!
2. რას ნიშნავს იცნობდე იეჰოვას? რატომ?
2 მაგრამ რას ნიშნავს იცნობდე იეჰოვას? იეჰოვამ იერემიას ყველაზე მნიშვნელოვანი რამ გაუმჟღავნა: „გონიერია და მიცნობს, რომ უფალი ვარ, წყალობის, სამართლისა და სიმართლის მოქმედი ამ ქვეყანაზე, რადგან ეს მახარებს მე“ (იერემია 9:23). ამგვარად, იცნობდე იეჰოვას იმასაც ნიშნავს, რომ იცოდე, როგორ ამჟღავნებს ის სამართლიანობასა და სიმართლეს. თუ ჩვენც გამოვამჟღავნებთ ამ თვისებებს, გავახარებთ მას. როგორ შეგვიძლია ამის გაკეთება? თავის სიტყვაში, ბიბლიაში, იეჰოვამ შემოინახა ცნობები, თუ საუკუნეების მანძილზე როგორ ეპყრობოდა არასრულყოფილ ადამიანებს. მათი შესწავლით შეგვიძლია მეტი გავიგოთ იეჰოვას სამართლიანობისა და სიმართლის შესახებ და მივბაძოთ მას (რომაელთა 15:4).
სამართლიანი და, ამავე დროს, თანამგრძნობი
3, 4. რატომ იყო იეჰოვას მიერ სოდომისა და გომორის განადგურება სამართლიანი?
3 ღვთის მიერ სოდომისა და გომორისთვის გამოტანილი განაჩენი საუკეთესოდ ცხადყოფს იეჰოვას სამართლიანობის რამდენიმე მხარეს. იეჰოვამ მართებულად დასაჯა დამნაშავეები, მაგრამ, ამავე დროს, გადაარჩინა ისინი, ვინც ამას იმსახურებდა. სამართლიანი იყო იმ ქალაქების განადგურება? აბრაამი, რომელმაც, როგორც ჩანს, ცოტა რამ იცოდა სოდომელების ბოროტების შესახებ, პირველად ასე არ ფიქრობდა. იეჰოვამ აბრაამს უთხრა, რომ ათი მართალი კაცი მაინც თუ აღმოჩნდებოდა იქ, დაინდობდა ქალაქს. ნათელია, რომ იეჰოვა სამართლიანობას ნაჩქარევად და დაუნდობლად არ ამჟღავნებს (დაბადება 18:20–32).
4 ორი ანგელოზის შემთხვევამ აშკარად დაამტკიცა სოდომელების უზნეობა. როდესაც სოდომელმა კაცებმა, ‘ჭაბუკებმა თუ მოხუცებმა’, შეიტყვეს, რომ ლოტს ორი მამაკაცი ესტუმრა, ლოტის სახლში შეჭრას ცდილობდნენ, რომ მათთან ჯგუფური ჰომოსექსუალური კავშირი დაემყარებინათ. ისინი მართლაც ზნედაცემულები იყვნენ! იეჰოვას მიერ ამ ქალაქისთვის გამოტანილი განაჩენი უეჭველად სამართლიანი იყო (დაბადება 19:1–5, 24, 25).
5. როგორ გამოიყვანა იეჰოვამ ლოტი და მისი ოჯახი სოდომიდან?
5 მოციქულმა პეტრემ სოდომისა და გომორის განადგურება მოიხსენია როგორც გასათვალისწინებელი მაგალითი და აღნიშნა: „იცის ღმერთმა, როგორ იხსნას განსაცდელისაგან ღვთისმოსავნი“ (2 პეტრე 2:6–9). სამართლიანი არ იქნებოდა, თუ მართალი ლოტი და მისი ოჯახი სოდომში მცხოვრებ უღვთო ხალხთან ერთად დაიღუპებოდნენ. ამგვარად, იეჰოვას ანგელოზებმა გააფრთხილეს ლოტი კარს მომდგარი განადგურების შესახებ. როდესაც ლოტი ფეხს ითრევდა, ანგელოზებმა ხელი ჩასჭიდეს მას, მის ცოლსა და ქალიშვილებს და ქალაქიდან გაიყვანეს, „რადგან უფალმა დაინდო“ ისინი (დაბადება 19:12–16). შეგვიძლია დარწმუნებული ვიყოთ, რომ იეჰოვა მსგავსად მოექცევა მართალ ადამიანებს ამ ბოროტი სისტემის მოახლოებული განადგურების დროს.
6. რატომ არ უნდა გვაღელვებდეს მეტისმეტად ამ ბოროტი სისტემის მოახლოებული განადგურება?
6 თუმცა ამ სისტემის აღსასრული „შურისგების“ დრო იქნება, არ გვაქვს იმის საფუძველი, რომ მეტისმეტად გვაღელვებდეს ეს (ლუკა 21:22). ღვთის მიერ არმაგედონში გამოტანილი განაჩენი ‘ერთობ მართალი’ იქნება (ფსალმუნი 18:10). როგორც აბრაამმა დაინახა, შეგვიძლია მივენდოთ იეჰოვას სამართლიანობას, რომელიც ბევრად აღემატება ჩვენ მიერ გამომჟღავნებულ სამართლიანობას. აბრაამმა თქვა: „არ იქნება, რომ მთელი ქვეყნიერების მსაჯულმა სამართლიანად არ განსაჯოს“ (დაბადება 18:25; შეადარეთ იობი 34:10). ესაიამაც მართებულად აღნიშნა: „ვინ ასწავლის [იეჰოვას] სიმართლის გზას?“ (ესაია 40:14, აქ).
სამართლიანობის გამომჟღავნება კაცობრიობის სახსნელად
7. რა კავშირია ღვთის სამართლიანობასა და ღვთის გულმოწყალებას შორის?
7 ღვთის სამართლიანობა მხოლოდ ბოროტმოქმედთა დასჯაში არ გამოიხატება. იეჰოვამ თავის შესახებ თქვა, რომ ის არის «მართალი ღმერთი და მაცხოვარი [„გადამრჩენი“, აქ]» (ესაია 45:21). თვალნათლივ ჩანს, რომ მჭიდრო კავშირია ღვთის სიმართლეს ანუ სამართლიანობასა და მის სურვილს შორის, რომ კაცობრიობა ცოდვის შედეგებისგან იხსნას. ამ მუხლის შესახებ ერთ ენციკლოპედიაში ნათქვამია, რომ „სამართლიანობა აღძრავს ღმერთს, გამოავლინოს გულმოწყალება და გადაარჩინოს ადამიანები“ (The International Standard Bible Encyclopedia, 1982 წლის გამოცემა). ღვთის სამართლიანობა არ საჭიროებს გულმოწყალებით შერბილებას, რადგან სამართლიანობაში თავისთავად იგულისხმება გულმოწყალება. ის ფაქტი, რომ ღმერთმა კაცობრიობის გამოსყიდვაზე იზრუნა, განსაკუთრებულად ცხადყოფს ღვთის სამართლიანობის ამ მხარეს.
8, 9. ა) რა არის ბიბლიაში აღწერილი, როგორც ‘სიმართლე’? რატომ? ბ) რას მოითხოვს იეჰოვა ჩვენგან?
8 გამოსასყიდს — ღვთის მხოლოდშობილი ძის, იესო ქრისტეს, ძვირფას სიცოცხლეს — უდიდესი მნიშვნელობა ჰქონდა, რადგანაც იეჰოვას საყოველთაო ნორმები აქვს, რომლებსაც თვითონაც იცავს (მათე 20:28). ადამმა დაკარგა სრულყოფილი სიცოცხლე, ამიტომაც სრულყოფილი სიცოცხლე იყო საჭირო ადამის შთამომავლობის სიცოცხლის გამოსასყიდად (რომაელთა 5:19–21). მოციქული პავლე იესოს უმწიკვლოებასა და მის გამოსასყიდს აღწერს როგორც ‘სიმართლეს’ (რომაელთა 5:18). რატომ? რადგანაც იეჰოვას თვალსაზრისით, კაცობრიობის გამოსყიდვა სწორი და სამართლიანი იყო, მიუხედავად იმისა, რომ მას ამისთვის დიდი მსხვერპლი უნდა გაეღო. ადამის შთამომავლობა „გადატეხილ ლერწამს“ ჰგავდა, რომლის დალეწვაც ღმერთს არ სურდა, ან „მბჟუტავ პატრუქს“, რომლის ჩაქრობაც ღმერთს არ უნდოდა (მათე 12:20). ღმერთი დარწმუნებული იყო, რომ ადამის მრავალი შთამომავალი გამოიჩენდა ერთგულებას (შეადარეთ მათე 25:34).
9 როგორ უნდა გამოვეხმაუროთ ამ უდიდეს სიყვარულსა და სამართლიანობას? ერთ-ერთი, რასაც იეჰოვა მოითხოვს ჩვენგან, არის ‘სიმართლის ქმნა’ (მიქა 6:8). როგორ შეგვიძლია ამის გაკეთება?
ეძიეთ სამართალი, მისდიეთ სიმართლეს
10. ა) რა მხრივ შეგვიძლია გამოვავლინოთ სამართლიანობა? ბ) როგორ უნდა ვეძიოთ უწინარეს ღვთის სიმართლე?
10 პირველ რიგში, ჩვენ ღვთის ზნეობრივ ნორმებს უნდა ვემორჩილებოდეთ. რადგანაც ღვთის ნორმები სამართლიანია, მათთან შეთანხმებულად ცხოვრებით სამართლიანობას ვამჟღავნებთ. ამას მოითხოვს იეჰოვა თავისი ხალხისგან. „სიკეთის ქმნა ისწავლეთ, ეძიეთ სამართალი“, — უთხრა იეჰოვამ ისრაელებს (ესაია 1:17). მთაზე ქადაგებისას იესომაც ასეთი რჩევა მისცა თავის მსმენელებს, როდესაც არიგებდა, რომ ‘უწინარესად სასუფეველი და ღვთის სიმართლე ეძიათ’ (მათე 6:33). პავლე ტიმოთეს მოუწოდებდა, რომ ‘სიმართლეს მიჰყოლოდა’ (1 ტიმოთე 6:11). ღვთის ნორმებთან შეთანხმებულად ცხოვრებით და ახალ კაცად შემოსვით, ჭეშმარიტ სამართალსა და სიმართლეს მივყვებით (ეფესელთა 4:23, 24). ესე იგი ვეძიებთ სამართალს, როდესაც იმას ვაკეთებთ, რაც ღვთის თვალშია სწორი.
11. რატომ და როგორ უნდა გავუწიოთ წინააღმდეგობა ცოდვის ბატონობას?
11 ყველამ კარგად ვიცით, რომ არასრულყოფილი ადამიანისთვის ყოველთვის ადვილი არაა სამართლიანად და სწორად მოქცევა (რომაელთა 7:14–20). პავლე რომაელ ქრისტიანებს მოუწოდებდა, წინააღმდეგობა გაეწიათ ცოდვის ბატონობისთვის, რათა თავი ღვთისთვის „სიმართლის იარაღად“ მიეძღვნათ და გამოსადეგნი ყოფილიყვნენ მისი განზრახვის აღმსრულებლებად (რომაელთა 6:12–14). ასევე ღვთის სიტყვის რეგულარული შესწავლითა და გამოყენებით, მივიღებთ იეჰოვას ‘დარიგებას’ და ‘სიმართლით ვიქნებით დარიგებული’ (ეფესელთა 6:4; 2 ტიმოთე 3:16, 17).
12. რას უნდა მოვერიდოთ, რომ ისე მოვეპყროთ ადამიანებს, როგორც ჩვენ გვინდა რომ ღმერთი მოგვეპყროს?
12 მეორე, სამართლიანობას ვამჟღავნებთ, როდესაც ადამიანებს ისე ვეპყრობით, როგორც გვსურს რომ ღმერთი მოგვეპყროს. ადვილი შესაძლებელია, გვქონდეს გაორებული ნორმები — შემწყნარებელი ჩვენთვის, ხოლო მკაცრი სხვებისთვის. საკუთარ თავს ადვილად ვპატიობთ ცოდვებს, მაშინ როცა სხვებს სწრაფად ვაკრიტიკებთ შეცდომებისთვის, რომლებიც შეიძლება უმნიშვნელო იყო ჩვენს შეცდომებთან შედარებით. იესო მართებულად სვამს შეკითხვას: „რად უყურებ ბეწვს შენი ძმის თვალში, ხოლო საკუთარ თვალში დირესაც კი არ ამჩნევ?“ (მათე 7:1–3). არასდროს უნდა დაგვავიწყდეს, რომ ვერც ერთი ვერ გავმართლდებოდით, იეჰოვას რომ კრიტიკულად განვესაჯეთ ცოდვებისთვის (ფსალმუნი 129:3, 4). თუ იეჰოვა, თავისი სამართლიდან გამომდინარე, ყურადღებას არ აქცევს ჩვენი ძმების სუსტ მხარეებს, ვინ ვართ ჩვენ, რომ მკაცრად განვსაჯოთ ისინი? (რომაელთა 14:4, 10).
13. რატომ გრძნობს მართალი ადამიანი სამეფოს შესახებ კეთილი ცნობის ქადაგების პასუხისმგებლობას?
13 მესამე, ღვთის თვალში სამართლიანობას ვამჟღავნებთ, როდესაც მთელი გულით ვმონაწილეობთ სამქადაგებლო საქმიანობაში. „ნუ დაუკავებ, ვინც ღირსია, კეთილ საქმეს, თუკი შეგიძლია ამის გაკეთება“, — გვირჩევს იეჰოვა (იგავნი 3:27). არასწორი იქნებოდა, საიდუმლოდ შეგვენახა სიცოცხლის მომცემი შემეცნება, რომელიც ღმერთმა მთელი გულით გვიბოძა. მართალია, მრავალი უარყოფს ჩვენს ცნობას, მაგრამ ვიდრე იეჰოვა გულმოწყალებას იჩენს მათ მიმართ, მზად უნდა ვიყოთ, დავანახვოთ ‘მოსანანიებლად მისვლის’ შესაძლებლობა (2 პეტრე 3:9). იესოს მსგავსად, ჩვენც გვიხარია, როდესაც ვეხმარებით ადამიანებს სამართლიანობისა და სიმართლისკენ შემობრუნებაში (ლუკა 15:7). სწორედ ახლაა ‘სიმართლის თესვის’ დრო (ოსია 10:12).
‘სამართლიანი მთავრები’
14. რა პასუხისმგებლობა აკისრიათ უხუცესებს სამართლიანობასთან დაკავშირებით?
14 ყველა ჩვენგანმა სიმართლის ბილიკით უნდა იაროს, მაგრამ ამ მხრივ განსაკუთრებული პასუხისმგებლობა ქრისტიანული კრების უხუცესებს ეკისრებათ. იესოს, როგორც მეფის, მმართველობა ‘სამართალში და სიმართლეშია გაძლიერებული’. ამიტომაც, უხუცესებსაც მოეთხოვებათ ღვთის სამართლით ხელმძღვანელობა (ესაია 9:6). ისინი არ ივიწყებენ ესაიას 32:1-ში ჩაწერილ წინასწარმეტყველურ სიტყვებს: „აჰა, სიმართლით იმეფებს მეფე და მთავრები სამართლიანად იმთავრებენ“. როგორც სულიწმიდით დანიშნულმა ზედამხედველებმა ანუ ‘ღვთის განმგებლებმა’, უხუცესებმა ის უნდა აკეთონ, რაც ღვთის თვალშია სწორი (ტიტე 1:7).
15, 16. ა) როგორ ბაძავენ უხუცესები იესოს იგავში მოხსენიებულ ერთგულ მწყემსს? ბ) როგორ ეპყრობიან უხუცესები სულიერად გზააბნეულებს?
15 იესომ ნათელი გახადა, რომ იეჰოვას სამართალი თანაგრძნობის, გულმოწყალებისა და კეთილგონივრულობის გამომჟღავნებას ნიშნავდა. გარდა ამისა, ის ცდილობდა დახმარებოდა გასაჭირში მყოფ ადამიანებს და ‘მოეძებნა და ეხსნა დაკარგული’ (ლუკა 19:10). როგორც იესოს იგავში მწყემსი დაუღალავად ეძებდა დაკარგულ ცხვარს სანამ არ იპოვა, უხუცესებიც ეძებენ სულიერად გზააბნეულებს და ეხმარებიან ფარაში დასაბრუნებელი გზის პოვნაში (მათე 18:12, 13).
16 უხუცესები ბრალს კი არ სდებენ მათ, ვინც სერიოზულ ცოდვას სჩადის, არამედ ცდილობენ, დახმარება აღმოუჩინონ, რათა შემცოდველმა მოინანიოს, თუ ეს შესაძლებელია. ისინი ხარობენ, როდესაც ეხმარებიან გზააბნეულ პიროვნებას. მაგრამ სწუხან, როდესაც ცოდვის ჩამდენი არ ინანიებს. ამ შემთხვევაში, ღვთის სამართლიანი ნორმებიდან გამომდინარე, მათ უნდა გარიცხონ ასეთი პიროვნება. ამ შემთხვევაშიც, იმ მამის მსგავსად, რომელსაც გზასაცდენილი შვილი ჰყავდა, უხუცესები იმედოვნებენ, რომ ცოდვის ჩამდენი ერთ დღესაც ‘გონს მოეგება’ (ლუკა 15:17, 18). ამ იმედით, უხუცესები ინახულებენ ზოგ გარიცხულ პიროვნებას, რომ შეახსენონ, თუ როგორ შეუძლიათ იეჰოვას ორგანიზაციაში დაბრუნებაa.
17. რა მიზნით განიხილავენ უხუცესები შემცოდველის საქმეს და რა თვისება დაეხმარება მათ ამ მიზნის მიღწევაში?
17 უხუცესებს განსაკუთრებულად ესაჭიროებათ იეჰოვას მიბაძონ სამართლიანობაში, როდესაც შემცოდველის საქმეს განიხილავენ. ცოდვილები ‘უახლოვდებოდნენ’ იესოს, რადგანაც გრძნობდნენ, რომ ის თანაუგრძნობდა და დაეხმარებოდა მათ (ლუკა 15:1; მათე 9:12, 13). რა თქმა უნდა, იესო თვალს არ ხუჭავდა დანაშაულზე. იესოსთან მხოლოდ ერთხელ სადილობამ ზაქე, რომელიც ცნობილი იყო, როგორც გამომძალველი, აღძრა მოენანიებინა და ხალხისთვის აენაზღაურებინა მიყენებული ზარალი (ლუკა 19:8–10). უხუცესებსაც იგივე მიზანი აქვთ სამართლებრივი საქმეების განხილვისას — დაეხმარონ შემცოდველებს, რომ მოინანიონ. თუ უხუცესებიც, იესოს მსგავსად, გულისხმიერებას ამჟღავნებენ, მრავალ შემცოდველს უფრო გაუადვილდება, რომ დახმრებისთვის მათ მიმართოს.
18. რა დაეხმარება უხუცესებს, იყვნენ „საფარი ქარში“?
18 თანამგრძნობი გული უხუცესებს დაეხმარება, მიყვნენ ღვთის სამართალს, რაც არ ნიშნავს სიმკაცრესა და უგრძნობლობას. საინტერესოა, რომ ეზრამ საკუთარი გული მოამზადა და არა მხოლოდ გონება, რომ ისრაელებისთვის სამართლის მიყოლა ესწავლებინა (პირველი ეზრა 7:10). თანამგრძნობი გული უხუცესებს დაეხმარება, რომ სათანადო ბიბლიური პრინციპები გამოიყენონ და მხედველობაში მიიღონ თითოეული პიროვნების მდგომარეობა. როდესაც იესომ სისხლის დენით დაავადებული ქალი განკურნა, მან ცხადყო, რომ ღვთის სამართალი არა მხოლოდ რჯულის კანონების ზუსტად ცოდნას, არამედ მათი მნიშვნელობის აღქმასაც ნიშნავს (ლუკა 8:43–48). უხუცესები, რომლებიც სამართლიანობას თანაგრძნობით ამჟღავნებენ, შეიძლება შევადაროთ ‘საფარს ქარში’ მათთვის, ვინც ებრძვის საკუთარ სისუსტეებსა თუ ამ ბოროტ სისტემას, რომელშიც ვცხოვრობთ (ესაია 32:2).
19. როგორ გამოეხმაურა ერთი და ღვთის სამართალს?
19 ერთმა დამ, რომელმაც სერიოზული ცოდვა ჩაიდინა, საკუთარი შემთხვევიდან დაინახა ღვთის სამართალი. „გულახდილად რომ ვთქვა, მეშინოდა უხუცესებთან მისვლა, — აღიარებს ის. — მაგრამ მათ თანაგრძნობა გამოამჟღავნეს და გულთბილად მომეპყრნენ. უხუცესები მამებს უფრო ჰგავდნენ, ვიდრე მკაცრ მოსამართლეებს. ისინი იმის გაგებაში დამეხმარნენ, რომ იეჰოვა ზურგს არ შემაქცევდა, თუ შეცდომის გამოსწორებას შევეცდებოდი. საკუთარ თავზე გამოვცადე, რომ ის მოსიყვარულე მამასავით გვსჯის. მე შევძელი გული გამეხსნა იეჰოვასთვის და დარწმუნებული ვიყავი, რომ შეისმენდა ჩემს მუდარას. დღეს მე გულწრფელად შემიძლია იმის თქმა, რომ უხუცესებთან შვიდი წლის წინ შემდგარი შეხვედრა მართლაც იეჰოვას კურთხევა იყო. მას შემდეგ იეჰოვასთან უფრო მჭიდრო ურთიერთობა მაქვს“.
მისდიე სამართალს და ჰქმენი სიმართლე
20. რა სარგებლობა მოაქვს სამართლისა და სიმართლის ცოდნასა და გამომჟღავნებას?
20 საბედნიეროდ, ღვთის სამართალი უფრო მეტს ნიშნავს, ვიდრე მხოლოდ იმას, რომ ვინც რას იმსახურებს, ის მიიღოს. საკუთარი სამართლიდან გამომდინარე იეჰოვა აღძრულია, მარადიული სიცოცხლე უბოძოს მორწმუნეებს (ფსალმუნი 102:10; რომაელთა 5:15, 18). ღმერთი ამგვარად გვეპყრობა, რადგანაც მისი სამართალი ითვალისწინებს ჩვენს მდგომარეობას და ბრალს კი არ გვდებს, არამედ გვეხმარება. მართლაც, რაც უფრო მეტს ვიგებთ იეჰოვას სამართლის შესახებ, მით უფრო ვუახლოვდებით მას. და თუ ვეცდებით რომ ამ მხრივ მას მივბაძოთ, როგორც ჩვენი, ისე სხვა ადამიანების ცხოვრება უხვად იქნება კურთხეული. თუ სამართლიანობას გამოვამჟღავნებთ, ჩვენს ზეციერ მამას ეს შეუმჩნეველი არ დარჩება. იეჰოვა გვპირდება: „შეინახეთ რჯული და ქმენით სამართალი, რადგან სადაც არის, მოვა ჩემი ხსნა და ჩემი სამართალი გაცხადდება. ნეტარია ის კაცი, ვინც აკეთებს ამას“ (ესაია 56:1, 2).
[სქოლიო]
a იხილეთ 1991 წლის 15 აპრილის „საგუშაგო კოშკი“, გვერდები 21–23 (რუს.).
გახსოვთ თუ არა?
◻ რას ვსწავლობთ სოდომისა და გომორის განადგურებიდან იეჰოვას სამართლის შესახებ?
◻ რატომ არის გამოსყიდვა ღვთის სამართლიანობისა და სიყვარულის გამომჟღავნების განსაკუთრებული მაგალითი?
◻ სამართლიანობის გამომჟღავნების რომელი სამი საშუალება არსებობს?
◻ რა მხრივ შეუძლიათ უხუცესებს სამართლიანობაში ღმერთს მიბაძონ?
[სურათები 15 გვერდზე]
სამქადაგებლო საქმიანობით ღვთის სამართალს მივყვებით.
[სურათი 16 გვერდზე]
როდესაც უხუცესები სამართლიანობაში ღმერთს ბაძავენ, ადვილია პრობლემების დროს დახმარებისთვის მათ მიმართონ.