თავი 16

ოთხი მხედარი ჯირითობს

ხილვა 3 გამოცხადება 6:1—17

თემა: ოთხი მხედრის ჯირითი, წამებული მოწმეები სამსხვერპლოს ძირთან და დიდი რისხვის დღე.

შესრულების დრო: 1914 წლიდან ამ ქვეყნიერების განადგურებამდე.

1. როგორ უცხადებს იეჰოვა იოანეს იმ უჩვეულო გრაგნილის შინაარსს, რომელსაც იესო ხსნის?

დღევანდელ კრიტიკულ დროს განსაკუთრებით გვაინტერესებს ის, „რაც უნდა მოხდეს მალე“, რადგან ეს ჩვენ გვეხება. ამიტომ, მოდი, იოანესთან ერთად ვნახოთ, როგორ გახსნის იესო ამ უჩვეულო გრაგნილს. იოანე არ კითხულობს გრაგნილს, მის შინაარსს „ნიშნებით“ ანუ ცოცხალი სცენებით იგებს (გამოცხადება 1:1, 10).

2. ა) რას ხედავს და რას ისმენს იოანე და რაზე მეტყველებს ქერუბიმის ლომისმაგვარი სახე? ბ) ვის მიმართავს პირველი ქერუბიმი და საიდან ვიცით ეს?

² აი რას მოგვითხრობს იოანე, როცა გრაგნილს იესო პირველ ბეჭედს ხსნის: «დავინახე, რომ კრავმა ახსნა შვიდი ბეჭდიდან ერთი, და გავიგონე, რომ ოთხიდან ერთმა ცოცხალმა არსებამ თითქოს ქუხილის ხმით თქვა: „მოდი!“ » (გამოცხადება 6:1). ამას პირველი ქერუბიმი ამბობს, რომელსაც სახე ლომისას მიუგავს. ეს იმაზე მეტყველებს, რომ იეჰოვას ორგანიზაცია ღვთის ყველა სამართლიან განაჩენს გაბედულად აღასრულებს. ვის მიმართავს ეს ქერუბიმი? ალბათ, იოანეს არა, რადგან იოანე უკვე იქ არის, რათა იხილოს ეს წინასწარმეტყველური ხილვები (გამოცხადება 4:1). ქერუბიმი „ქუხილის ხმით“ ხილვის პირველი მოქმედების სხვა მონაწილეებს მიმართავს.

თეთრ ცხენზე ამხედრებული სახელოვანი მხედარი

3. ა) რას აღწერს იოანე? ბ) რისი სიმბოლოა თეთრი ცხენი?

³ იოანეს მსგავსად იოანეს ერთგული კლასი და მათი თანამოაზრეებიც თვალს ადევნებენ მოქმედების სწრაფ განვითარებას. იოანე მოგვითხრობს: „გავიხედე და, აი, თეთრი ცხენი. მასზე მჯდომს მშვილდი ჰქონდა. მას გვირგვინი მიეცა, გამოვიდა და იპყრობდა, რათა სრულად დაეპყრო“ (გამოცხადება 6:2). მჭექარე მოწოდებას — „მოდი!“ — თეთრი ცხენის გამოსვლა მოჰყვება. ბიბლიაში ცხენი ხშირად ომის სიმბოლოა (ფსალმუნი 20:7; იგავები 21:31; ესაია 31:1). როგორც იოანე აღნიშნავს, ეს ცხენი, მშვენიერი რაში, თეთრია, რაც შეუბღალავი სიწმინდის მაჩვენებელია (შეადარეთ გამოცხადების 1:14; 4:4; 7:9; 20:11). ეს მართლაც შესაფერისი აღწერილობა იეჰოვას თვალში სამართლიანსა და წმინდა ომს განასახიერებს! (იხილეთ გამოცხადების 19:11, 14).

4. ვინ არის თეთრ ცხენზე მჯდომი მხედარი? ახსენით.

⁴ თეთრ ცხენზე მჯდომ მხედარს ხელში საომარი იარაღი, მშვილდი უჭირავს და თავზე გვირგვინი ადგას. უფლის დღეს გვირგვინები მხოლოდ მართლებს ადგათ, იესოსა და 24 უხუცესით წარმოდგენილ კლასს (დანიელი 7:13, 14, 27; ლუკა 1:31—33; გამოცხადება 4:4, 10; 14:14)a. საეჭვოა, რომ ეს მხედარი 24 უხუცესიდან ერთ-ერთი ყოფილიყო, რადგან ისინი გვირგვინს საკუთარი დამსახურებით ვერ მიიღებდნენ. აქედან გამომდინარე, მხედარი მხოლოდ იესო ქრისტე თუ იქნება. იოანე იესო ქრისტეს ხედავს და 1914 წელს მომხდარი ისტორიული მოვლენის მომსწრე ხდება, როცა იეჰოვა აცხადებს: „მე, მე დავაყენე ჩემი მეფე“. იეჰოვა იესოს გამეფების მიზანსაც ეუბნება: „რომ მოგცე ხალხები მემკვიდრეობად“ (ფსალმუნი 2:6—8)b. პირველი ბეჭდის ახსნით იესო, ახლად გამეფებული მეფე, გვიმხელს, როგორ გაიჭრება საომრად ღვთის მიერ დანიშნულ დროს.

5. რა საერთო აქვს ფსალმუნის 45:4—7-ს გამოცხადების 6:2-თან?

⁵ ფსალმუნის 45:4—7-შიც მსგავსი სიტყვებით მიმართავს იეჰოვა გამეფებულ იესოს: „წარმატებისკენ ისწრაფე შენი სიდიადით; ჭეშმარიტების, თავმდაბლობისა და სიმართლის გულისთვის ამხედრდი და შენი მარჯვენა გასწავლის შიშის მომგვრელ საქმეებს. შენი ბასრი ისრები მეფის მტრებს გულში ესობა; შენ ფეხქვეშ ეცემიან ხალხები. ღმერთია შენი ტახტი სამარადისოდ, სამუდამოდ. შენი სამეფოს კვერთხი სამართლიანობის კვერთხია. შენ გიყვარს სიმართლე და გძულს ბოროტება. ამიტომაც დიდი სიხარულის ზეთით გცხო ღმერთმა, შენმა ღმერთმა, შენს მოზიარეებზე მეტად“. იოანეს ეცოდინებოდა ეს წინასწარმეტყველება და დარწმუნებული იქნებოდა, რომ ეს სიტყვები იესოს მეფობას ეხებოდა (შეადარეთ ებრაელების 1:1, 2, 8, 9).

წინ, დასაპყრობად!

6. ა) რატომ გამოდის მხედარი გასამარჯვებლად? ბ) რა პერიოდში განაგრძობდა ბრძოლას იესო?

⁶ რატომ გამოვიდა საომრად ახალგამეფებული მეფე? იეჰოვას მთავარი მტერი, სატანა ეშმაკი და ისინი, ვინც შეგნებულად თუ შეუგნებლად სატანის მიზნებს ემსახურებიან, მისი გამეფების წინააღმდეგნი იყვნენ. მათი წინააღმდეგობის მიუხედავად ზეცაში სამეფო მაინც დამყარდა, რასაც დიდი ომი მოჰყვა. მიქაელის [ნიშნავს: „ვინ არის ღვთის მსგავსი?“] სახელით მებრძოლმა იესომ დაამარცხა სატანა და მისი დემონები და ისინი დედამიწაზე გადმოყარა (გამოცხადება 12:7—12). უფლის დღის დადგომიდან მოყოლებული პირველი ათწლეულების განმავლობაში იესო განაგრძობს ბრძოლას. სწორედ ამ ათწლეულების განმავლობაში გროვდება ცხვრისმაგვარი ხალხი. მართალია, მთელი ქვეყნიერება „ბოროტის ხელშია“, მაგრამ იესო კვლავაც სიყვარულით მწყემსავს თავის ცხებულ ძმებსა და მათ თანამოაზრეებს და ეხმარება მათ, რომ გაიმარჯვონ რწმენის ბრძოლაში (1 იოანე 5:19).

7. რა ბრძოლებში გაიმარჯვა იესომ დედამიწაზე უფლის დღის პირველ ათწლეულებში, და რისი გაკეთება გვმართებს ჩვენ?

⁷ უფლის დღის დადგომიდან 90 წელზე მეტი გავიდა. კიდევ რა ბრძოლებში გაიმარჯვა იესომ ამ ხნის განმავლობაში? მთელ მსოფლიოში, როგორც იეჰოვას ცალკეულ მსახურებს, ისე კრებებს, ბევრჯერ მოუწიათ ისეთი სირთულეების, შევიწროებისა და დევნის ატანა, როგორიც პავლე მოციქულმა გადაიტანა (2 კორინთელები 11:23—28). იეჰოვას მოწმეებს განსაცდელების გადასატანად სჭირდებათ „ძალა, რომელიც ჩვეულებრივს აღემატება“, განსაკუთრებით კი იმ ქვეყნებში, სადაც ომი და ძალადობა მძვინვარებს (2 კორინთელები 4:7). ყველაზე რთულ მდგომარეობაშიც კი ერთგულ მოწმეებს შეეძლოთ, გაემეორებინათ პავლეს სიტყვები: „უფალი მედგა გვერდში და მაძლიერებდა, რათა ჩემი მეშვეობით ბოლომდე შესრულებულიყო ქადაგების საქმე“ (2 ტიმოთე 4:17). იესომ მათ საკეთილდღეოდ გაიმარჯვა ქვეყნიერებაზე. ის ჩვენ საკეთილდღეოდაც გაიმარჯვებს, თუ მზად ვართ, ჩვენც ბოლომდე ვიბრძოლოთ რწმენისთვის და გავიმარჯვოთ (1 იოანე 5:4).

8, 9. ა) რა გამარჯვებები მოიპოვა იეჰოვას მოწმეთა კრებამ მთელ მსოფლიოში? ბ) რომელ ქვეყნებში შეიმჩნეოდა განსაკუთრებული ზრდა?

⁸ გამარჯვებული მეფის წყალობით იეჰოვას მოწმეთა მსოფლიო კრებამ მრავალი გამარჯვება მოიპოვა. 1918 წელს მან დაიცვა ბიბლიის მკვლევარები, რათა მათ, სატანის პოლიტიკური ორგანიზაციის მიერ „დაპყრობილებს“, არსებობა არ შეეწყვიტათ. 1919 წელს მეფემ ციხის ურდულები დალეწა, გაათავისუფლა და გამოაცოცხლა ისინი, რათა „დედამიწის კიდით კიდემდე“ ექადაგათ სასიხარულო ცნობა (გამოცხადება 13:7; საქმეები 1:8).

⁹ მეორე მსოფლიო ომამდე და ომის დროს „ღერძი ბერლინი-რომის“ დიქტატორული სახელმწიფოები ცდილობდნენ იეჰოვას მოწმეების განადგურებას მრავალ ქვეყანაში, იქ, სადაც რელიგიური წინამძღოლები, განსაკუთრებით კი რომის კათოლიკური ეკლესიის წარმომადგენლები, აშკარად ან ფარულად უჭერდნენ მხარს აგრესიულ დიქტატორებს. მაგრამ იეჰოვას მოწმეთა რიცხვი მაინც იზრდებოდა. 1939 წელს, როდესაც ომი დაიწყო, 71 509 იეჰოვას მოწმე ქადაგებდა, 1945 წელს კი, ომის დამთავრებისას, მათი რიცხვი 141 606-მდე გაიზარდა, მიუხედავად იმისა, რომ 10 000-ზე მეტმა მოწმემ არაერთი წელი გაატარა ციხეებსა და საკონცენტრაციო ბანაკებში, ხოლო 2 000-მდე მოწმე მოკლეს. დღეს აქტიური მოწმეების რიცხვმა მთელ მსოფლიოში ექვს მილიონს გადააჭარბა. არაჩვეულებრივი ზრდა შეინიშნებოდა კათოლიკურ ქვეყნებში და იმ ქვეყნებშიც, სადაც მოწმეებს განსაკუთრებული სისასტიკით დევნიდნენ, მაგალითად, გერმანიაში, იტალიასა და იაპონიაში. ამჟამად ამ ქვეყნებში სამქადაგებლო მსახურებაში 600 000-ზე მეტი აქტიური მოწმე მონაწილეობს (ესაია 54:17; იერემია 1:17—19).

10. რა გამარჯვებებით აკურთხა მებრძოლმა მეფემ თავისი ხალხი სასიხარულო ცნობის დასაცავად და კანონით განსამტკიცებლად?

¹⁰ მებრძოლმა მეფემ თავისი გულმოდგინე ხალხი სასიხარულო ცნობის დასაცავად და კანონით განსამტკიცებლად სასამართლოებში და ხელისუფლების წინაშე მრავალი გამარჯვებით აკურთხა (ფილიპელები 1:7; მათე 10:18; 24:9). ასე ხდება ყველგან — ავსტრალიაში, არგენტინაში, თურქეთში, ინდოეთში, კანადაში, საბერძნეთში, სვაზილენდში, შვეიცარიასა და სხვა ქვეყნებში. შეერთებული შტატების უზენაეს სასამართლოში იეჰოვას მოწმეების მიერ მოპოვებული 50 გამარჯვებიდან ზოგიერთი სასიხარულო ცნობის „სახალხოდ და კარდაკარ“ ქადაგების უფლებას იცავდა. გარდა ამისა, მოწმეებს კერპთაყვანისმცემლურ, პატრიოტულ ცერემონიებში მონაწილეობისგან ათავისუფლებდა (საქმეები 5:42; 20:20; 1 კორინთელები 10:14). ამგვარად, მსოფლიო სამქადაგებლო საქმიანობის გაფართოებისთვის კარი კვლავ ღია იყო.

11. ა) როგორ ‘დაიპყრობს სრულად’ მხედარი? ბ) როგორ უნდა იმოქმედოს ჩვენზე მეორე, მესამე და მეოთხე ბეჭდების ახსნამ?

¹¹ როგორ ‘დაიპყრობს სრულად’c იესო? როგორც დავინახავთ, იესო მოსპობს ცრუ რელიგიას, ხოლო მათ, ვინც სატანის ხილულ ორგანიზაციაში რჩება, გასანადგურებლად „ცეცხლის ტბაში“ ჩაყრის, რომ დაამტკიცოს იეჰოვას უზენაესობა. ჩვენ მოუთმენლად ველით იმ დღეს, როცა არმაგედონში ჩვენი „მეფეთ მეფე“ საბოლოოდ გაიმარჯვებს სატანის ძალაუფლებაში მყოფ მჩაგვრელ პოლიტიკურ ორგანიზაციაზე (გამოცხადება 16:16; 17:14; 19:2, 14—21; ეზეკიელი 25:17). ამჟამად კი თეთრ ცხენზე ამხედრებული უძლეველი დამპყრობი წინ მიიწევს და იეჰოვა გულწრფელ ადამიანებს სძენს თავის მართალ ერს დედამიწაზე (ესაია 26:2; 60:22). თქვენც მონაწილეობთ იოანეს კლასთან ერთად სამეფოს სასიხარულო საქმის წინსვლაში? მაშინ ის, რასაც იოანე მოციქული მომდევნო სამი ბეჭდის ახსნისას ხედავს, უდავოდ აღგძრავთ, უფრო მეტი აკეთოთ იეჰოვას საქმეში.

აი, ალისფერი ცხენი!

12. იესოს სიტყვების თანახმად რა მოვლენები მოჰყვებოდა მის გამეფებას?

¹² როდესაც დედამიწაზე იესოს მსახურების დასასრული ახლოვდებოდა, მოწაფეებმა სხვებისგან განცალკევებით ჰკითხეს მას: „რა იქნება შენი მოსვლისა და ქვეყნიერების აღსასრულის ნიშანი?“ მაშინ იესომ იწინასწარმეტყველა იმ უბედურებათა შესახებ, რომლებიც „მშობიარობის ტკივილების დასაწყისი“ იქნებოდა. იესომ თქვა: „ერი ერის წინააღმდეგ აღსდგება და სამეფო სამეფოს წინააღმდეგ, იქნება დიდი მიწისძვრები, ეპიდემიები და საკვების უკმარისობა ხან ერთ და ხან მეორე ადგილას. იქნება საზარელი მოვლენები და დიდი ნიშნები ციდან“ (მათე 24:3, 7, 8; ლუკა 21:10, 11). იესოს წინასწარმეტყველება საოცრად ჰგავს იმას, რასაც იოანე ხედავს გრაგნილის დანარჩენი ბეჭდების ახსნისას. ვნახოთ, რა მოხდება, როცა იესო მეორე ბეჭედს ახსნის.

13. რას იხილავს იოანე?

¹³ «როცა მეორე ბეჭედი ახსნა, გავიგონე, რომ მეორე ცოცხალმა არსებამ თქვა: „მოდი!“ » (გამოცხადება 6:3). ამას ამბობს მეორე ქერუბიმი, რომელიც მოზვერს ჰგავს. ამ შემთხვევაში მოზვერი სამართლიანად გამოყენებული ძალის სიმბოლოა. მალე იოანე სრულიად საპირისპიროს — საზარელი, მომაკვდინებელი ძალის გამოვლენას იხილავს.

14. როგორ ცხენსა და მხედარს ხედავს იოანე, და რას აღწერს ეს ხილვა?

¹⁴ რა ხდება მას შემდეგ, რაც მოწოდება — „მოდი!“ — მეორედ ისმის? „გამოვიდა მეორე, ალისფერი ცხენი. მასზე მჯდომს ნება მიეცა, მშვიდობა წაეღო დედამიწიდან, რათა ადამიანებს ერთმანეთი დაეხოცათ, და მიეცა მას დიდი მახვილი“ (გამოცხადება 6:4). ეს შიშის მომგვრელი ხილვა ომს აღწერს. ეს არის არა იეჰოვას გამარჯვებული მეფის მიერ წარმოებული სამართლიანი ომი, რომელიც გამარჯვებით დაგვირგვინდება, არამედ მსოფლიოში მიმდინარე სასტიკი ომები, რომლებსაც უაზრო სისხლის ღვრა და ტანჯვა მოჰყვება. მართლაც შესაფერისი სიმბოლოა ალისფერ ცხენზე ამხედრებული მხედარი!

15. რატომ არ გვსურს, გვქონდეს საერთო მეორე მხედართან?

¹⁵ აშკარაა, რომ იოანეს სურს, საერთო არაფერი ჰქონდეს მოჯირითე მხედართან, რადგან ღვთის ხალხის შესახებ ნაწინასწარმეტყველები იყო, რომ ‘აღარ ისწავლიდნენ ომს’ (ესაია 2:4). მართალია, იოანე ქვეყნიერებაში ცხოვრობდა, მაგრამ „ქვეყნიერების ნაწილი“ არ ყოფილა; იმავეს თქმა შეიძლება იოანეს კლასსა და უამრავ ხალხზე, რომლებსაც ამ სისხლისმღვრელ ქვეყნიერებაში უწევთ ცხოვრება. ჩვენ საერთო არაფერი გვაქვს სისხლისმღვრელ ომთან, ჩვენი იარაღი სულიერია, მას „ღვთისგან აქვს მიცემული ძალა“, რათა გულმოდგინედ ვაცხადებდეთ ჭეშმარიტებას (იოანე 17:11, 14; 2 კორინთელები 10:3, 4).

16. როდიდან და რა გაგებით იბრძვის „დიდი მახვილით“ ალისფერი ცხენის მხედარი?

¹⁶ თეთრი ცხენის მხედრის ტახტზე ასვლამდე, 1914 წლამდე, არაერთი ომი გამართულა, მაგრამ ამჯერად ალისფერი ცხენის მხედარი „დიდი მახვილით“ იბრძვის. რას ნიშნავს ეს? პირველი მსოფლიო ომიდან მოყოლებული ომებმა განსაკუთრებით სისხლისმღვრელი და დამანგრეველი ხასიათი მიიღო. 1914—1918 წლების ხოცვა-ჟლეტის დროს პირველად და უპრეცედენტო მასშტაბით გამოიყენეს ტანკები, მომწამლავი აირები, თვითმფრინავები, წყალქვეშა ნავები, მძიმე არტილერია და ავტომატური იარაღი. დაახლოებით 28 ქვეყნის თითქმის მთელი მოსახლეობა სამხედროებთან ერთად იძულებით ჩააბეს საომარ მოქმედებებში. ამ ომმა უამრავი ადამიანის სიცოცხლე შეიწირა. ცხრა მილიონზე მეტი ჯარისკაცი დაიღუპა, მშვიდობიან მოსახლეობას შორის კი დაღუპულთა რაოდენობამ ასტრონომიულ რიცხვს მიაღწია. ომი დამთავრდა, მაგრამ მშვიდობა არ აღდგენილა დედამიწაზე. ომის დამთავრებიდან 50 წელზე მეტი ხნის შემდეგ გერმანიის სახელმწიფო მოღვაწემ კონრად ადენაუერმა აღნიშნა: „1914 წლიდან კაცობრიობას დაკარგული აქვს უსაფრთხოება და სიმშვიდე“. ალისფერი ცხენის მხედარს დედამიწიდან მართლაც მშვიდობის წაღების ნება აქვს მიცემული!

17. როგორ დაიხოცა ხალხი პირველი მსოფლიო ომის შემდეგ „დიდი მახვილით“?

¹⁷ შემდეგ წითელ ცხენზე მჯდომმა სისხლსმოწყურებულმა მხედარმა მეორე მსოფლიო ომი გააჩაღა. გამანადგურებელი იარაღი უფრო დაიხვეწა, ხოლო დაღუპულთა რიცხვმა ოთხჯერ გადააჭარბა პირველი მსოფლიო ომის დროს დაღუპულთა რიცხვს. 1945 წელს ორი ატომური ბომბი ჩამოაგდეს იაპონიაში; თითოეულმა ათი ათასობით ადამიანს მოუსწრაფა სიცოცხლე. მეორე მსოფლიო ომის დროს წითელ ცხენზე მჯდომმა მხედარმა თითქმის 55 მილიონი ადამიანი იმსხვერპლა და მაინც ვერ დაკმაყოფილდა. ერთ-ერთი სანდო წყაროს თანახმად მეორე მსოფლიო ომის შემდეგ „დიდი მახვილით“ 20 მილიონზე მეტი ადამიანი კიდევ დაეცა.

18, 19. ა) რაზე მოწმობს მეორე მსოფლიო ომით დაწყებული ხოცვა-ჟლეტა, რასაც სამხედრო ტექნიკის ტრიუმფს ნამდვილად ვერ ვუწოდებთ? ბ) რა საფრთხე ემუქრება კაცობრიობას, და რას მოიმოქმედებს თეთრ ცხენზე მჯდომი მხედარი?

¹⁸ ამას ნამდვილად ვერ ვუწოდებთ სამხედრო ტექნიკის უდიდეს მიღწევებს. პირიქით, ეს იმის მაჩვენებელია, რომ წითელ ცხენზე მჯდომი ულმობელი მხედარი კვლავ ჯირითობს. რით დამთავრდება წითელი ცხენის ჯირითი? ზოგიერთი მეცნიერი არ გამორიცხავს ბირთვული ომის მოულოდნელად დაწყების შესაძლებლობას, რომ აღარაფერი ვთქვათ ბირთვული იარაღის წინასწარ დაგეგმილ გამოყენებაზე. საბედნიეროდ, თეთრ ცხენზე ამხედრებული დამპყრობი სხვაგვარად ფიქრობს.

¹⁹ ეროვნული სიამაყითა და სიძულვილით გაჟღენთილი კაცობრიობა დენთის კასრზე ზის ბირთვული კატასტროფის მოლოდინში. მოსალოდნელი საშიშროების თავიდან ასაცილებლად ქვეყნებმა რომც გაანადგურონ მთელი ბირთვული არსენალი, მისი შექმნის მეთოდებს მაინც ვერ დაივიწყებენ. მათ არ გაუჭირდებათ მოკლე ხანში გამანადგურებელი ბირთვული იარაღის ხელახლა წარმოება, რის გამოც ნებისმიერი ომი შეიძლება მსოფლიო კატასტროფით დასრულდეს. მსოფლიოში გაბატონებული სიამაყე და სიძულვილი კაცობრიობას თვითგანადგურებამდე მიიყვანს, თუ თეთრ ცხენზე მჯდომი მხედარი არ შეაჩერებს ალისფერი ცხენის თავაწყვეტილ ჯირითს. შეგვიძლია დარწმუნებულები ვიყოთ, რომ გამეფებული ქრისტე სრულ გამარჯვებას მოიპოვებს სატანის ქვეყნიერებაზე და დედამიწაზე ღვთისა და მოყვასის სიყვარულით გაერთიანებულ ახალ საზოგადოებას შექმნის. სწორედ ასეთი სიყვარულია მშვიდობის გარანტია და არა ის ატომური იარაღი, რომელიც ამ შეშლილ მსოფლიოში ბირთვული საშიშროების თავიდან ასაცილებლად არსებობს (ფსალმუნი 37:9—11; მარკოზი 12:29—31; გამოცხადება 21:1—5).

შავი ცხენის ჯირითი

20. რატომ ვართ დარწმუნებული, რომ თეთრ ცხენზე მჯდომი მხედარი ნებისმიერ უბედურებას მოსპობს?

²⁰ იესო ახლა მესამე ბეჭედს ხსნის! რას ვხედავთ? «როცა მესამე ბეჭედი ახსნა, გავიგონე, რომ მესამე ცოცხალმა არსებამ თქვა: „მოდი!“ » (გამოცხადება 6:5ა). მესამე ქერუბიმს ადამიანის სახე აქვს, რაც სიყვარულის სიმბოლოა. ღვთის ახალ ქვეყნიერებაში სიყვარული გამეფდება, რაც დღესაც სუფევს იეჰოვას ორგანიზაციაში (გამოცხადება 4:7; 1 იოანე 4:16). შეგვიძლია დარწმუნებული ვიყოთ, რომ თეთრ ცხენზე მჯდომი მხედარი, რომელმაც „უნდა იმეფოს, სანამ ღმერთი მის ფეხქვეშ არ მოაქცევს ყველა მტერს“, ბოლოს მოუღებს უბედურებას, რომელსაც ახლა იოანეს დაკვირვებული თვალი იხილავს (1 კორინთელები 15:25).

21. ა) რას განასახიერებენ შავი ცხენი და მისი მხედარი? ბ) რა ამტკიცებს, რომ შავი ცხენი კვლავ ჯირითობს?

²¹ რას ხედავს იოანე, როდესაც ისმის მესამე მოწოდება — „მოდი!“? „გავიხედე და, აი, შავი ცხენი. მასზე მჯდომს ხელში სასწორი ეჭირა“ (გამოცხადება 6:5ბ). ეს წინასწარმეტყველება დიდი შიმშილობის მაუწყებელია, რაც უფლის დღის დადგომისთანავე დაიწყებოდა, როცა საკვები წონით განაწილდებოდა. 1914 წლიდან მოყოლებული შიმშილობა გადაუჭრელ მსოფლიო პრობლემად იქცა. დღეს ომები კიდევ უფრო ამწვავებს შიმშილობის პრობლემას, რადგან ის სახსრები, რაც ადამიანთა გამოკვებას უნდა ხმარდებოდეს, ხშირად საომარი იარაღის წარმოებას ხმარდება. გლეხები ჯარში მიჰყავთ, მინდვრები კი საომარი მოქმედებებისა და მიწის გადაწვის სტრატეგიის შედეგად გაუდაბურებულია, რის გამოც საგრძნობლად მცირდება მოსავლის რაოდენობა. ეს ასე იყო პირველი მსოფლიო ომის დროსაც, როდესაც მილიონობით ადამიანი შიმშილობდა და კვდებოდა კიდეც. მაგრამ შავ ცხენზე მჯდომი მხედარი, რომელიც შიმშილობას იწვევდა, ომის დამთავრების შემდეგაც ულმობელი დარჩა. XX საუკუნის 30-იან წლებში შიმშილობამ მარტო უკრაინაში ხუთი მილიონი ადამიანის სიცოცხლე შეიწირა. მეორე მსოფლიო ომს უფრო დიდი მასშტაბით მოჰყვა საკვების უკმარისობა და შიმშილობა. შავ ცხენზე მჯდომი მხედარი კვლავ ჯირითობს. როგორც „მსოფლიო სურსათის საბჭო“ იუწყება, ცუდი კვება ყოველწლიურად 5 მილიონზე მეტი ბავშვის სიკვდილის მიზეზი ხდება.

22. ა) რას აცხადებს ერთხმად ოთხი ქერუბიმი? ბ) რას ვიგებთ ერთი კილო ხორბლისა და სამი კილო ქერის ღირებულებიდან?

²² იოანე უფრო მეტს მოგვითხრობს: «გავიგონე ხმა, თითქოს ოთხ ცოცხალ არსებას შორის, რომელიც ამბობდა: „ერთი კილო ხორბალი დინარად და სამი კილო ქერი დინარად, ნუ გამოლევ ზეითუნის ზეთსა და ღვინოს“ » (გამოცხადება 6:6). ოთხი ქერუბიმი ერთხმად აცხადებს, რომ ხალხმა საკვები ეკონომიურად გამოიყენოს, ისევე როგორც ძვ. წ. 607 წელს იერუსალიმის განადგურებამდე ხალხს ‘წონითა და სიმწრით უნდა ეჭამა პური’ (ეზეკიელი 4:16). იოანეს დროს ერთი კილო ხორბალი ჯარისკაცის დღიურ ულუფად ითვლებოდა. რა ღირდა ეს ერთი ულუფა? ერთი დინარი — მთელი დღის გასამრჯელო (მათე 20:2)d. რას იყიდდა ოჯახის პატრონი? სამ კილო ქერს, რაც მხოლოდ პატარა ოჯახს გამოკვებავდა, არადა ქერი ხორბალზე დაბალხარისხოვან მარცვლეულად ითვლებოდა.

23. რა იგულისხმება ფრაზაში „ნუ გამოლევ ზეითუნის ზეთსა და ღვინოს“?

²³ რა იგულისხმება ფრაზაში „ნუ გამოლევ ზეითუნის ზეთსა და ღვინოს“? ზოგიერთის აზრით, საკვების დეფიციტისა და შიმშილობის მიუხედავად, მდიდრები არ დაზარალდებოდნენ. ახლო აღმოსავლეთში თუ ადამიანს ზეთი და ღვინო ჰქონდა, ეს სიმდიდრის მაჩვენებელი არ იყო. ბიბლიურ დროში პური, ზეთი და ღვინო ძირითადი პროდუქტები იყო (შეადარეთ დაბადების 14:18; ფსალმუნის 104:14, 15). ისრაელში ყოველთვის არ ჰქონდათ სუფთა წყალი, ამიტომ ხშირად ღვინოს სვამდნენ, მას სამკურნალოდაც იყენებდნენ (1 ტიმოთე 5:23). ზეთი კი ელიას დროს, ერთ სარეფთელ ქვრივს სიღარიბის მიუხედავად მაინც ჰქონდა, საჭმელი რომ მოემზადებინა დარჩენილი ფქვილით (1 მეფეები 17:12). მაშასადამე, რჩევა „ნუ გამოლევ ზეითუნის ზეთსა და ღვინოს“ ძირითადი საკვები პროდუქტების დასაზოგად იყო ნათქვამი, რათა შიმშილობის დამთავრებამდე ხალხს საკვები არ გამოლეოდა.

24. რატომ ვერ გასტანს დიდხანს შავი ცხენის ჯირითი?

²⁴ მალე თეთრი ცხენის მხედარი შეაჩერებს შავი ცხენის მხედარს, ვინაიდან აი რას გააკეთებს ის ახალ ქვეყნიერებაში: „მის დროს აყვავდება მართალი და იქნება დიდი მშვიდობა, ვიდრე მთვარე არსებობს. უხვად იქნება მარცვლეული დედამიწაზე, მთის მწვერვალებზეც უხვად იქნება“ (ფსალმუნი 72:7, 16; იხილეთ აგრეთვე ესაიას 25:6—8).

ფერმიხდილი ცხენი და მისი მხედარი

25. ვისი ხმა ესმის იოანეს იესოს მიერ მეოთხე ბეჭდის ახსნისას და რისი მაჩვენებელია ეს?

²⁵ იოანეს ამით არ დაუსრულებია თხრობა. იგი გვიყვება, რა მოჰყვება შედეგად იესოს მიერ მეოთხე ბეჭდის ახსნას: «როცა მეოთხე ბეჭედი ახსნა, გავიგონე მეოთხე ცოცხალი არსების ხმა, რომელმაც თქვა: „მოდი!“ » (გამოცხადება 6:7). ეს მოწოდება იმ ქერუბიმისგან ისმის, რომელიც არწივს ჰგავს. არწივი შორსმჭვრეტელობის სიმბოლოა. ხილვაში აღწერილისამებრ იოანესგან, იოანეს კლასისა და ღვთის მიწიერი მსახურებისგან მართლაც შორსმჭვრეტელობა მოითხოვება. ასე მოქმედება გარკვეულწილად დაგვიცავს იმ უბედურებისგან, რაც თავს ატყდება ქვეყნიერების ბრძენთა ამაყ და უზნეო საზოგადოებას (1 კორინთელები 1:20, 21).

26. ა) ვინ არის მეოთხე მხედარი და რატომ არ არის გასაკვირი, რომ მისი ცხენი ფერმიხდილია? ბ) ვინ მისდევს მეოთხე მხედარს და რა ემართება მის მსხვერპლთ?

²⁶ კიდევ რა უბედურება ხდება მას შემდეგ, რაც მეოთხე მხედარი ეხმაურება მოწოდებას? იოანე განაგრძობს: „გავიხედე და, აი, ფერმიხდილი ცხენი. მასზე მჯდომს სიკვდილი ერქვა. მას სამარე მოჰყვებოდა“ (გამოცხადება 6:8ა). მეოთხე ცხენის მხედრის სახელი სიკვდილია. „გამოცხადებაში“ მოხსენიებულ ოთხ მხედართა შორის პირდაპირ მხოლოდ ის ამხელს თავის ვინაობას. გასაკვირი არ არის, რატომაა სიკვდილი ფერმიხდილ ცხენზე ამხედრებული, რადგან „ფერმიხდილად“ ნათარგმნი ბერძნული სიტყვა ქლოროს ბერძნულ ლიტერატურაში ფერდაკარგული, ავადმყოფის სახის აღსაწერად გამოიყენება. არც ისაა გასაკვირი, რომ სიკვდილს ფეხდაფეხ სამარე მისდევს (არ არის აღწერილი როგორ), რადგან მეოთხე მხედრის მსხვერპლნი სამარეში ხვდებიან; საბედნიეროდ, ისინი მკვდრეთით აღდგებიან, როცა ‘სიკვდილი და სამარე მისცემს მათში მყოფ მკვდრებს’ (გამოცხადება 20:13). როგორღა ეწირებიან ადამიანები მხედარს, რომელსაც სიკვდილი ჰქვია?

27. ა) როგორ ანადგურებს ხალხს მხედარი, რომელსაც სიკვდილი ჰქვია? ბ) რა იგულისხმება „დედამიწის მეოთხედ ნაწილში“, რომელზეც სიკვდილს აქვს ძალაუფლება?

²⁷ იოანეს ხილვაში აღწერილია, თუ რითი იხოცება ხალხი: „მათ მიცემული ჰქონდათ ძალაუფლება დედამიწის მეოთხედ ნაწილზე, რათა დაეხოცათ დიდი მახვილით, შიმშილით, სასიკვდილო ჭირითა და დედამიწის მხეცებით“ (გამოცხადება 6:8ბ). ეს მაინცდამაინც იმას არ ნიშნავს, რომ მხედარი პირდაპირი გაგებით დედამიწის მოსახლეობის მეოთხედს შეიწირავდა. ამაში ის უნდა ყოფილიყო ნაგულისხმები, რომ მხედარი დედამიწის მოსახლეობის დიდ ნაწილს მოსპობდა. ის ანადგურებს მათ, ვინც მეორე მხედრის დიდ მახვილსა და მესამე მხედრის გამოწვეულ შიმშილობასა თუ საკვების უკმარისობას ეწირება. ის სასიკვდილო ჭირითა და მიწისძვრებით იმკის მოსავალს, რაზეც ლუკას 21:10, 11-შიც არის საუბარი.

28. ა) როგორ სრულდება წინასწარმეტყველება სასიკვდილო ჭირის შესახებ? ბ) როგორ არის დაცული დღეს იეჰოვას ხალხი მრავალი დაავადებისგან?

²⁸ „სასიკვდილო ჭირის“ თემა დღესაც აქტუალურია. 1918—1919 წლებში, სისხლისმღვრელი პირველი მსოფლიო ომის შემდეგ, ესპანურმა გრიპმა სულ რამდენიმე თვეში ოც მილიონზე მეტი ადამიანი იმსხვერპლა. ამ უბედურებას მთელ დედამიწაზე მხოლოდ წმინდა ელენეს პატარა კუნძული გადაურჩა. ეპიდემიის მსხვერპლთა გვამებს ერთად აგროვებდნენ და წვავდნენ. დღეს შემაშფოთებელ მასშტაბებს მიაღწია გულ-სისხლძარღვთა და ონკოლოგიურმა დაავადებებმა, რომელთა გამომწვევი მიზეზიც ხშირად თამბაქოს წევაა. XX საუკუნის 80-იან წლებში, ეგრეთ წოდებულ „საზარელ ათწლეულში“, ბიბლიის თვალსაზრისით უზნეო ცხოვრების წესის შედეგად ‘სასიკვდილო ჭირს’ შიდს—იც დაემატა. როგორც იუწყებიან, 2000 წელს შეერთებული შტატების ჯანდაცვის სამსახურის მთავარმა ექიმმა შიდს—ი „კაცობრიობის ისტორიაში ყველაზე საშინელ ეპიდემიად“ მოიხსენია. მან ახსენა, რომ მთელ მსოფლიოში აივ-ის ვირუსით ინფიცირებული 52 მილიონი ადამიანიდან 20 მილიონი უკვე მკვდარი იყო. იეჰოვას ხალხი ბედნიერია, რომ ღვთის სიტყვიდან ბრძნული რჩევების წყალობით საერთო არაფერი აქვს მრუშობასთან და სისხლის არასწორად გამოყენებასთან, რის შედეგადაც ბევრი დაავადება ერთი ადამიანიდან მეორეზე გადადის (საქმეები 15:28, 29; შეადარეთ 1 კორინთელების 6:9—11).

29, 30. ა) როგორ შეიძლება დავუკავშიროთ დღევანდელობას ეზეკიელის 14:21-ში მოხსენიებული ოთხი მკაცრი სასჯელი? ბ) რას შეიძლება გულისხმობდეს გამოცხადების 6:8-ში მოხსენიებული მხეცები? გ) როგორც ჩანს, რა არის ამ წინასწარმეტყველური სურათის მთავარი აზრი?

²⁹ იოანეს ხილვაში მოხსენიებული იყო უდროო სიკვდილის მეოთხე მიზეზი — მხეცები. მეოთხე ბეჭდის ახსნისას მოხსენიებული ომი, შიმშილი, დაავადებები და მხეცები ძველად უდროო სიკვდილის მთავარი მიზეზები იყო. ისინი დღესაც იწვევენ უდროო სიკვდილს. ეს იეჰოვას მიერ ისრაელისთვის მიცემულ გაფრთხილებას ჰგავს: „იგივე მოხდება, როცა ოთხ მკაცრ სასჯელს — მახვილს, შიმშილს, მძვინვარე მხეცებსა და ჭირს — მოვუვლენ იერუსალიმს ადამიანისა და პირუტყვის მოსასპობად“ (ეზეკიელი 14:21).

³⁰ დღეს ახალ ამბებში იშვიათად თუ მოვისმენთ, რომ მხეცმა ადამიანის სიცოცხლე იმსხვერპლა, თუ არ ჩავთვლით ტროპიკულ ქვეყნებს. მომავალში მსხვერპლის რიცხვი შეიძლება გაიზარდოს ომის შედეგად მიწის გაუდაბურების ან იმის გამო, რომ შიმშილისგან დასუსტებული ადამიანები იოლად ვეღარ მოიგერიებენ დამშეულ მხეცებს. გარდა ამისა, დღეს მრავალი ადამიანი უგუნური ცხოველების მსგავსად ისეთ მხეცურ თვისებებს ავლენს, რაც სრულიად განსხვავდება ესაიას 11:6—9-ში აღწერილი სურათისგან. უმეტესად სწორედ ასეთი ადამიანები არიან დამნაშავეები, რომ სქესობრივმა ძალადობამ, მკვლელობამ, ტერორიზმმა და დაბომბვამ გლობალური ხასიათი მიიღო (შეადარეთ ეზეკიელის 21:31; რომაელების 1:28—31; 2 პეტრეს 2:12). მეოთხე მხედარიც სპობს მათ მსხვერპლთ. ამ წინასწარმეტყველური სურათის მთავარი აზრი, როგორც ჩანს, ისაა, რომ ფერმიხდილი ცხენის მხედარი ნებისმიერი საშუალებით იწვევს უდროო სიკვდილს.

31. რატომ არ უნდა დავკარგოთ იმედი იმ უბედურებების მიუხედავად, რაც წითელი, შავი და ფერმიხდილი ცხენების მხედრების ჯირითს მოაქვს?

³¹ რაც პირველი ოთხი ბეჭდის ახსნიდან გავიგეთ, გვაიმედებს და გვასწავლის, რომ სასოწარკვეთილებაში არ ჩავცვივდეთ ომის, შიმშილის, დაავადებებისა და უდროო სიკვდილის გამომწვევი სხვა ფართოდ გავრცელებული მიზეზების გამო; არც იმან უნდა დაგვიკარგოს იმედი, რომ პოლიტიკური ლიდერები უძლურები არიან დღევანდელ პრობლემებთან ჭიდილში. მსოფლიო ვითარება ცხადყოფს, რომ წითელი, შავი და ფერმიხდილი ცხენების მხედრები დიდი შემართებით ჯირითობენ მთელ დედამიწაზე. ნუ დაგვავიწყდება, რომ პირველად თეთრი ცხენის მხედარი გამოვიდა ასპარეზზე. იესო გამეფდა, მან უკვე გაიმარჯვა და სატანა ზეციდან გადმოაგდო. მისი გამარჯვება იმაშიც აისახება, რომ ის მთელ მსოფლიოში კრებს სულიერი ისრაელის ძეთაგან დარჩენილებსა და უამრავ ხალხს, რომელთა რიცხვიც მილიონებს აღწევს. იესო მათ დიდი გასაჭირის გადასატანად ამზადებს (გამოცხადება 7:4, 9, 14). ის არ შეჩერდება, ვიდრე საბოლოოდ არ გაიმარჯვებს.

32. რა მოჰყვება თითოეული ბეჭდის ახსნას?

³² პირველი ოთხი ბეჭდიდან თითოეულის ახსნას მოჰყვება მოწოდება — „მოდი!“. ყოველი მოწოდების შემდეგ ასპარეზზე გამოდის ცხენზე ამხედრებული მხედარი, მეხუთე ბეჭდის ახსნისას კი მსგავსი მოწოდება აღარ ისმის. მიუხედავად ამისა, ეს მხედრები კვლავ ჯირითობენ და ქვეყნიერების აღსასრულამდე არც გაჩერდებიან (შეადარეთ მათეს 28:20). კიდევ რა შთამბეჭდავი მოვლენები მოჰყვება დარჩენილი სამი ბეჭდის ახსნას? ზოგი მოვლენა უკვე ვითარდება, თუმცა თვალისთვის უხილავად, ზოგის დანახვა კი მხოლოდ მომავალში იქნება შესაძლებელი; შესრულებით კი ყველა წინასწარმეტყველება შესრულდება. მოდი გავიგოთ, როგორ განვითარდება მოვლენები.

[სქოლიოები]

[ჩარჩო 92 გვერდზე]

მეფე იმარჯვებს

XX საუკუნის 30-იან და 40-იან წლებში იეჰოვას მოწმეების დაუძინებელი მტრები ცდილობდნენ, მათი მსახურება უკანონო და დანაშაულებრივ საქმიანობად შეერაცხათ (ფსალმუნი 94:20). 1936 წელს მხოლოდ შეერთებულ შტატებში მოწმეთა დაპატიმრების 1 149 ფაქტი დაფიქსირდა. იეჰოვას მოწმეებმა ბევრი სასამართლო საქმე აღძრეს, რომელთაგან ზოგი შეერთებული შტატების უზენაესმა სასამართლომაც კი განიხილა. აი რამდენიმე მნიშვნელოვანი გამარჯვება:

1943 წლის 3 მაისს უზენაესმა სასამართლომ საქმის „მარდოკი პენსილვანიის წინააღმდეგ“ მოსმენის შემდეგ დაადგინა, რომ იეჰოვას მოწმეებს ლიტერატურის გასაყიდად ლიცენზია არ სჭირდებოდათ. იმავე დღეს საქმის „მარტინი ქალაქ სტრატერსის წინააღმდეგ“ განხილვის შემდეგ სასამართლომ გადაწყვიტა, რომ კარზე ზარის დარეკვა და კარდაკარ მოსაწვევი ბარათებისა და სხვა სარეკლამო ფურცლების დარიგება კანონს არ ეწინააღმდეგებოდა.

1943 წლის 14 ივნისს უზენაესმა სასამართლომ საქმის „ტეილორი მისისიპის შტატის წინააღმდეგ“ განხილვის შემდეგ დაადგინა, რომ მოწმეები ქადაგებით ხალხს სახელმწიფოს დაუმორჩილებლობისკენ არ მოუწოდებდნენ. იმავე დღეს საქმის „დასავლეთ ვირჯინიის შტატის განათლების სისტემა ბარნეტის წინააღმდეგ“ მოსმენის შემდეგ სასამართლომ მიიღო გადაწყვეტილება, რომ სკოლის დირექციას არ ჰქონდა უფლება, სკოლიდან გაერიცხა იეჰოვას მოწმეთა შვილები, რომლებიც დროშას არ ესალმებოდნენ. მომდევნო დღეს ავსტრალიის უზენაესმა სასამართლომ იეჰოვას მოწმეთა საქმიანობის აკრძალვა გააუქმა და პირველ გადაწყვეტილებას „დესპოტური, თვითნებური და სასტიკი“ უწოდა.

[ჩარჩო 94 გვერდზე]

„ნება მიეცა, მშვიდობა წაეღო დედამიწიდან“

საით მივყავართ მეცნიერულ-ტექნიკურ პროგრესს? კანადაში, ქალაქ ტორონტოში გამომავალი გაზეთის „გლოუბ ენდ მეილის“ 1987 წლის 22 იანვრის ნომერში დაიბეჭდა საერთაშორისო განვითარებისა და კვლევითი ცენტრის პრეზიდენტის აივენ ჰედის კომენტარი:

„როგორც სანდო წყაროები იუწყებიან, მსოფლიოს ყოველი ოთხი მეცნიერიდან და ინჟინერ-ტექნოლოგიდან, რომლებიც კვლევით საქმიანობას ემსახურებიან, ერთი იარაღის მწარმოებელია. . . 1986 წლის მონაცემებით ამ საქმეში გაღებული ხარჯები წუთში 1, 5 მილიონ აშშ დოლარს შეადგენდა. იძლევა ეს მეტი უსაფრთხოების გარანტიას? ზესახელმწიფოების ბირთვული არსენალის სიმძლავრე 6 000-ჯერ აღემატება მეორე მსოფლიო ომის დროს გამოყენებული ყველა იარაღის სიმძლავრეს. წარმოიდგინეთ ექვსი ათასი მეორე მსოფლიო ომი! 1945 წლიდან მოყოლებული მსოფლიოში ერთად აღებული შვიდი კვირაც კი არ ყოფილა საომარი მოქმედებების გარეშე. მეორე მსოფლიო ომის შემდეგ 150-ზე მეტი საერთაშორისო თუ სამოქალაქო ომი გაჩაღდა. როგორც ვარაუდობენ, ამ ომებმა 19, 3 მილიონი ადამიანის სიცოცხლე შეიწირა; მათი უმრავლესობა გაერთიანებული ერების ორგანიზაციის არსებობის ეპოქაში შექმნილი მოწინავე ტექნიკის გამოყენების შედეგად დაიღუპა“.

2005 წლისთვის საომარმა მოქმედებებმა 20 მილიონზე მეტი ადამიანის სიცოცხლე იმსხვერპლა.

თავი 17

‘დახოცილი სულები’ ჯილდოს იღებენ

1. დროის რა მონაკვეთში ვცხოვრობთ და საიდან ვიცით ეს?

ღვთის სამეფო მმართველობს! თეთრ ცხენზე ამხედრებული მხედარი სადაცაა დაასრულებს დაპყრობას. წითელი, შავი და ფერმიხდილი ცხენები ჯერ კიდევ დაჯირითობენ დედამიწაზე. უდავოა, რომ სრულდება იესოს მიერ თავისი გამეფების შესახებ წარმოთქმული წინასწარმეტყველებები (მათეს 24, 25 თავები; მარკოზის 13 თავი; ლუკას 21 თავი). ჩვენ ნამდვილად ამ ქვეყნიერების ბოლო დღეებში ვცხოვრობთ (2 ტიმოთე 3:1—5). ამიტომ, მოდი, მთელი ყურადღება მივაპყროთ იმას, თუ როგორ ახსნის კრავი, იესო ქრისტე, გრაგნილის მეხუთე ბეჭედს. რა მოჰყვება ამას?

2. ა) რა დაინახა იოანემ მეხუთე ბეჭდის ახსნისას? ბ) რატომ არ უნდა გავიკვირვოთ, რომ სიმბოლური გაგებით ზეცაშიც არის სამსხვერპლო მსხვერპლის შესაწირავად?

² იოანე აღწერს მოვლენების შემდგომ განვითარებას: „როცა მეხუთე ბეჭედი ახსნა, სამსხვერპლოს ძირთან დავინახე ღვთის სიტყვისა და დამოწმების საქმის გამო დახოცილთა სულები“ (გამოცხადება 6:9). ეს როგორ? ცაშია სამსხვერპლო? იოანე პირველად ახსენებს სამსხვერპლოს, თუმცა მანამდე უკვე აღწერილი ჰქონდა ტახტზე მჯდომი იეჰოვა, მის გარშემო მყოფი ქერუბიმები, მინის ზღვა, ლამპრები და 24 უხუცესი, რომლებიც საკმეველს აკმევდნენ. ეს სურათი მოგვაგონებს მიწიერ კარავს, იეჰოვას საწმინდარს ისრაელში (გამოსვლა 25:17, 18; 40:24—27, 30—32; 1 მატიანე 24:4). ამიტომ არ არის გასაკვირი, რომ სიმბოლური გაგებით ზეცაშიც არის სამსხვერპლო მსხვერპლის შესაწირავად (გამოსვლა 40:29).

3. ა) როგორ იღვრებოდა სული ძველი ისრაელის კარვის „სამსხვერპლოს ძირში“? ბ) რატომ იხილა იოანემ დახოცილ მოწმეთა სულები ზეციერი სამსხვერპლოს ძირთან?

³ ამ სამსხვერპლოს ძირთან არიან „ღვთის სიტყვისა და დამოწმების საქმის გამო დახოცილთა სულები“. რა სულებს გულისხმობს იოანე? შეუძლებელია, ესენი უსხეულო სულები ყოფილიყვნენ, რომელთა არსებობისაც წარმართ ბერძნებს სწამდათ (დაბადება 2:7; ეზეკიელი 18:4). იოანემ იცოდა, რომ სულს, ანუ სიცოცხლეს, სისხლი განასახიერებს. როცა მღვდლები ძველი ისრაელის კარავთან შესაწირავ ცხოველს კლავდნენ, სისხლს ან სამსხვერპლოს ასხურებდნენ ან „დასაწვავი შესაწირავის სამსხვერპლოს ძირში“ ღვრიდნენ (ლევიანები 3:2, 8, 13; 4:7; 17:6, 11, 12). ამიტომ, ცხოველის სული სამსხვერპლოსთან ასოცირდება. მაგრამ რატომ იხილა იოანემ ღვთის მსახურთა სულები, ანუ სისხლი ზეციერი სამსხვერპლოს ძირთან? მათი სიკვდილი მსხვერპლშეწირვას ნიშნავდა.

4. რა გაგებით არის სულით შობილ ქრისტიანთა სიკვდილი მსხვერპლშეწირვა?

⁴ ღვთის სულიერ ძეებად შობილთა სიკვდილი მსხვერპლშეწირვაა. იეჰოვას ზეციერ სამეფოში თავიანთი როლის გამო ისინი ღვთის ნების თანახმად უარს ამბობენ დედამიწაზე მარადიულ სიცოცხლეზე, რაც მათი მხრიდან მსხვერპლის შეწირვის ტოლფასია. ისინი სიცოცხლეს სწირავენ მსხვერპლად, რომ მხარი დაუჭირონ იეჰოვას უზენაესობას (ფილიპელები 3:8—11; შეადარეთ ფილიპელების 2:17). ეს პირდაპირი გაგებით ეხება მათ, ვინც იოანემ სამსხვერპლოს ძირთან იხილა. ისინი ცხებულები არიან, რომლებიც გულმოდგინე მსახურებით უჭერდნენ მხარს იეჰოვას სიტყვასა და უზენაესობას. მათ მოწამეობრივი სიკვდილით დაასრულეს სიცოცხლე. მათი სულები ღვთის სიტყვისა და დამოწმების საქმის გამო დაიხოცა.

5. როგორ ითხოვენ შურისძიებას ერთგულთა სულები, თუკი დაღუპულები არიან?

⁵ მოქმედება შემდეგნაირად ვითარდება: «ისინი ღაღადებდნენ: „უზენაესო უფალო, წმინდაო და ჭეშმარიტო, როდემდე უნდა იკავებდე თავს გასამართლებისგან და დედამიწის მკვიდრებზე ჩვენი სისხლისთვის შურისძიებისგან?“ » (გამოცხადება 6:10). როგორღა ღაღადებენ მათი სულები ანუ სისხლი შურისძიებისთვის, თუკი ბიბლიაში წერია, რომ მკვდრები უგრძნობ მდგომარეობაში არიან? (ეკლესიასტე 9:5). მართალი აბელის სისხლიც ხომ აღაღადდა მას შემდეგ, რაც კაენმა მოკლა იგი?! მაშინ იეჰოვამ კაენს უთხრა: „ეს რა ჩაიდინე?! ყური დაუგდე, შენი ძმის სისხლი მიწიდან შემომღაღადებს“ (დაბადება 4:10, 11; ებრაელები 12:24). ეს იმას არ ნიშნავს, რომ აბელის სისხლი პირდაპირი გაგებით ლაპარაკობდა. აბელი უდანაშაულო მსხვერპლი იყო და სამართლიანობა მისი მკვლელის დასჯას მოითხოვდა. ქრისტიანი წამებულებიც უდანაშაულოები არიან და მათი მკვლელებიც უნდა დაისაჯონ (ლუკა 18:7, 8). ისინი ხმამაღლა ითხოვენ შურისძიებას, რადგან მათი რიცხვი მრავალი ათასია (შეადარეთ იერემიას 15:15, 16).

6. ძვ. წ. 607 წელს როგორ აგო პასუხი იუდამ უდანაშაულო სისხლის ღვრისთვის?

⁶ ამან შეიძლება გაგვახსენოს განდგომილი იუდას მდგომარეობა, როცა ძვ. წ. 716 წელს მენაშე სამეფო ტახტზე ავიდა. მან არაერთი უდანაშაულო ადამიანის სისხლი დაღვარა. როგორც ჩანს, წინასწარმეტყველი ესაია სწორედ მისი ბრძანებით გადახერხეს (ებრაელები 11:37; 2 მეფეები 21:16). მართალია, მენაშემ მოგვიანებით მოინანია და გამოსწორდა, მაგრამ დაღვრილი სისხლი არ შერჩენია. ძვ. წ. 607 წელს ბაბილონელებმა მიწასთან გაასწორეს იუდას სამეფო. „ეს იეჰოვას ბრძანებით ხდებოდა იუდაში, რათა თავიდან მოეშორებინა ის მენაშეს ცოდვების გამო, იმის გამო, რაც მან ჩაიდინა, მის მიერ დაღვრილი უდანაშაულო სისხლის გამო, რითაც აავსო იერუსალიმი; არ ინდომა იეჰოვამ პატიება“ (2 მეფეები 24:3, 4).

7. უმთავრესად ვინ არის დამნაშავე წმინდების სისხლის ღვრაში?

⁷ როგორც ბიბლიურ დროში, ისე დღეს, ღვთის მოწმეების მრავალი მკვლელი უკვე დიდი ხნის მკვდარია. მიუხედავად ამისა, ღვთის ხალხის ხოცვაში ბრალდებული ორგანიზაცია ჯერ კიდევ არსებობს და დღემდე დამნაშავეა სისხლის ღვრაში. ეს სატანის მიწიერი ორგანიზაციაა, მისი მიწიერი შთამომავლობა. ამ ორგანიზაციაში განსაკუთრებული ადგილი უკავია დიდ ბაბილონს, ცრუ რელიგიურ სამყაროსa. ბიბლიაში მასზე ნათქვამია, რომ ის წმინდებისა და იესოს მოწმეების სისხლითაა მთვრალი. სწორედ „მასში იქნა ნაპოვნი წინასწარმეტყველების, წმინდებისა და დედამიწაზე ყოველი მოკლულის სისხლი“ (გამოცხადება 17:5, 6; 18:24; ეფესოელები 4:11; 1 კორინთელები 12:28). მართლაც მძიმეა მისი დანაშაული! დიდი ბაბილონის მსხვერპლთა სისხლი მანამ იღაღადებს სამართლის აღსასრულებლად, სანამ დიდი ბაბილონი არ მოისპობა (გამოცხადება 19:1, 2).

8. ა) რა სისხლის ღვრის მოწმე გახდა იოანე? ბ) როგორ დევნიდნენ ქრისტიანებს რომის იმპერატორთა წაქეზებით?

⁸ პირველ საუკუნეში იოანე თვითონ გახდა ღვთის ერთგულ მსახურთა სისხლის ღვრის მოწმე, როდესაც ულმობელმა გველმა და მისმა მიწიერმა შთამომავლობამ ბრძოლა გამოუცხადა ცხებული ქრისტიანების მზარდ კრებას. იოანემ საკუთარი თვალით იხილა, როგორ გააკრეს ძელზე უფალი და როგორ მოუკლეს ძმა იაკობი, როგორ დახოცეს სტეფანე, პეტრე, პავლე და სხვები (იოანე 19:26, 27; 21:15, 18, 19; საქმეები 7:59, 60; 8:2; 12:2; 2 ტიმოთე 1:1; 4:6, 7). ახ. წ. 64 წელს რომის იმპერატორმა ნერონმა ქრისტიანები განტევების ვაცად აქცია და ქალაქის გადაწვა გადააბრალა, რათა ხალხს თვითონ ნერონი აღარ დაედანაშაულებინა. მემატიანე ტაციტუსი იტყობინება: „ქრისტიანებს ამასხარავებდნენ და ისე კლავდნენ. ზოგს მხეცების ტყავებს აცმევდნენ და მერე ძაღლებს აგლეჯინებდნენ; ზოგს [ბოძზე აკრავდნენ]b, ზოგს კი წვავდნენ, რომ ღამით ჩირაღდნებივით ენათებინათ“. დევნის შემდეგი ტალღა იმპერატორ დომიციანეს (ახ. წ. 81—96 წწ.) მმართველობის დროს აგორდა. სწორედ მაშინ გადაასახლეს იოანე კუნძულ პატმოსზე. მაშინ შესრულდა იესოს სიტყვები: „თუ მე მდევნიდნენ, თქვენც გაგდევნიან“ (იოანე 15:20; მათე 10:22).

9. ა) მზაკვრული ხელოვნების რა „შედევრი“ შექმნა სატანამ ახ. წ. IV საუკუნისთვის და რისი მთავარი ნაწილია ის? ბ) როგორ ეპყრობოდა ქრისტიანული ქვეყნების ზოგიერთი მმართველი იეჰოვას მოწმეებს ორივე მსოფლიო ომის დროს?

⁹ ახ. წ. IV საუკუნისთვის ძველ გველს, სატანა ეშმაკს უკვე შექმნილი ჰქონდა თავისი მზაკვრული ხელოვნების „შედევრი“ — განდგომილი ქრისტიანული სამყარო, ბაბილონური რელიგია, რომელიც ქრისტიანობის სახელით იყო შენიღბული. გველის შთამომავლობის ეს ძირითადი ნაწილი ერთმანეთის მოქიშპე უამრავ სექტად იყო დაყოფილი. ძველი დროის ორგული იუდას მსგავსად ქრისტიანულ სამყაროსაც დიდი ბრალი მიუძღვის სისხლის ღვრაში; მისი წევრები ხომ ორივე მსოფლიო ომის დროს ერთმანეთის წინააღმდეგ იბრძოდნენ. ქრისტიანული ქვეყნების ზოგიერთმა პოლიტიკურმა მმართველმა ორივე ომი ღვთის ცხებული მსახურების დახოცვის საბაბად გამოიყენა. ერთ-ერთ მიმოხილვაში, რომელიც მიეძღვნა ფრიდრიხ ციპფელის წიგნს „ეკლესიათა ბრძოლა გერმანიაში“, ჰიტლერის მიერ იეჰოვას მოწმეების დევნის შესახებ აღნიშნული იყო: „[მოწმეების] ერთი მესამედი დახოცეს: ზოგი სიკვდილით დასაჯეს, ზოგი მხეცურად მოკლეს, ზოგს კი შიმშილმა, ავადმყოფობამ და მძიმე შრომამ ამოხადა სული. მათ სასტიკად ავიწროებდნენ მათი უკომპრომისო რწმენის გამო, რაც ვერ ეთანხმებოდა ნაციონალ-სოციალისტურ იდეოლოგიას“ („Kirchenkampf in Deutschland“). სწორედ ქრისტიანულ სამყაროსა და მის სამღვდელოებაზე შეიძლება ითქვას: „შენი ტანსაცმლის კალთებზე უდანაშაულო ღარიბი ხალხის სისხლია“ (იერემია 2:34)c.

10. ბევრ ქვეყანაში როგორ ხდებოდნენ უამრავი ხალხის წარმომადგენელი ერთგული ქრისტიანები დევნის მთავარი ობიექტები?

¹⁰ უამრავი ხალხის წარმომადგენელი ახალგაზრდა ერთგული ქრისტიანები 1935 წლიდან მოყოლებული ბევრ ქვეყანაში დევნის მთავარი ობიექტები ხდებოდნენ (გამოცხადება 7:9). მეორე მსოფლიო ომის დამთავრების შემდეგაც კი ევროპის ერთ-ერთ ქალაქში 14 იეჰოვას მოწმე ჩამოახრჩვეს. რაში სდებდნენ მათ ბრალს? იმაში, რომ აღარ სწავლობდნენ ომს (ესაია 2:4). აზიასა და აფრიკაში კი არაერთი ახალგაზრდა მამაკაცი ცემით მოკლეს, ზოგიც — დახვრიტეს. ეს წამებულები, იესოს ცხებული ძმების ღირსეული მხარდამჭერები, უეჭველად აღდგებიან აღთქმულ „ახალ დედამიწაზე“ (2 პეტრე 3:13; შეადარეთ ფსალმუნის 110:3; მათეს 25:34—40; ლუკას 20:37, 38).

თეთრი გრძელი სამოსელი

11. რა გაგებით იღებენ წამებული ცხებული ქრისტიანები „თეთრ გრძელ სამოსელს“?

¹¹ ძველი დროის ერთგულ მსახურთა რწმენაზე ლაპარაკის შემდეგ მოციქულმა პავლემ დაწერა: „თუმცა თავიანთი რწმენით მიეცათ დამოწმება, არც ერთ მათგანს არ მიუღია დანაპირები, რადგან ღმერთმა უკეთესი გაითვალისწინა ჩვენთვის, რათა ისინი უჩვენოდ არ გასრულყოფილებულიყვნენ“ (ებრაელები 11:39, 40). რა არის ეს უკეთესი, რასაც პავლე და სხვა ცხებული ქრისტიანები ელოდნენ? იოანე ამას ხილვაში ხედავს: „თითოეულ მათგანს თეთრი გრძელი სამოსელი მისცეს და უთხრეს, რომ ცოტა ხანს კიდევ დაესვენათ, სანამ არ შეივსებოდა მათნაირი მონებისა და მათი ძმების რიცხვი, რომლებიც მათსავით უნდა დაეხოცათ“ (გამოცხადება 6:11). გრძელი სამოსლის მიღება იმაზე მიუთითებს, რომ ისინი უკვდავ სულიერ ქმნილებებად აღდგებიან. ისინი აღარ არიან დახოცილი სულები სამსხვერპლოს ძირთან. ისინი აღდგნენ და 24 უხუცესს შეუერთდნენ, რომლებიც თაყვანს სცემენ ზეციერ ტახტზე მჯდომ ღმერთს. ზეცაში მათაც მიეცათ ტახტები, რაც იმაზე მეტყველებს, რომ მათ სამეფო მდგომარეობა დაიკავეს. ისინი თეთრებში არიან ჩაცმულნი, რაც იმას ნიშნავს, რომ მართლებად არიან აღიარებულნი და ზეციერ ეზოში იეჰოვას წინაშე საპატიო ადგილს იმსახურებენ. სწორედ ამას ჰპირდებოდა იესო სარდისის კრების ერთგულ ცხებულ ქრისტიანებს: „მძლეველი თეთრი ტანსაცმლით შეიმოსება“ (გამოცხადება 3:5; 4:4; 1 პეტრე 1:4).

12. რა გაგებით ისვენებენ აღდგენილი ცხებულები „ცოტა ხანს კიდევ“ და როდემდე დაისვენებენ?

¹² ფაქტები ცხადყოფს, რომ ზეციერი აღდგომა 1918 წელს დაიწყო, მას შემდეგ, რაც 1914 წელს იესო ტახტზე ავიდა და თეთრ ცხენზე ამხედრებულმა ზეციდან სატანა და მისი დემონები დედამიწაზე გადმოყარა. აღდგენილმა ცხებულებმა იცოდნენ, რომ „ცოტა ხანს კიდევ [უნდა] დაესვენათ, სანამ არ შეივსებოდა მათნაირი მონების. . . რიცხვი“. იოანეს კლასის წევრებმა, რომლებიც ჯერ კიდევ დედამიწაზე არიან, განსაცდელებისა და დევნის დროს უნდა დაამტკიცონ თავიანთი ერთგულება; ზოგიერთი მათგანი შეიძლება მოკლან კიდეც. საბოლოოდ ბაბილონსა და მის პოლიტიკურ საყვარლებს მოეკითხებათ დაღვრილი მართალი სისხლი. ვიდრე ეს მოხდება, აღდგენილები, უეჭველია, დაკისრებულ საქმეს ასრულებენ ზეცაში. ისინი იმ გაგებით კი არ ისვენებენ, რომ განცხრომას ეძლევიან, არამედ მოთმინებით ელიან იეჰოვას შურისგების დღეს (ესაია 34:8; რომაელები 12:19). მათი დასვენება მაშინ დასრულდება, როდესაც ცრუ რელიგიის განადგურების მოწმენი გახდებიან, და როგორც „მოწოდებულნი, რჩეულნი და ერთგულნი“ უფალ იესო ქრისტესთან ერთად აღასრულებენ განაჩენს სატანის ბოროტი მიწიერი შთამომავლობის დარჩენილ ნაწილზე (გამოცხადება 2:26, 27; 17:14; რომაელები 16:20).

„პირველები. . . მკვდრები აღდგებიან“

13, 14. ა) მოციქული პავლეს სიტყვების თანახმად როდის იწყება ზეციერი აღდგომა და ვინ არიან აღდგენილნი? ბ) როდის აღდგებიან ზეციერი ცხოვრებისთვის უფლის დღის მომსწრე ცხებულები?

¹³ ის, რაც მეხუთე ბეჭდის ახსნიდან გავიგეთ, მთლიანად ეთანხმება იმ მუხლებს, რომლებშიც ზეციერ აღდგომაზეა საუბარი. მოციქული პავლე წერდა: „ამას გეუბნებით იეჰოვას სიტყვით: ჩვენ, ვინც ცოცხლად დავრჩებით იმ დრომდე, როცა უფალი მოსული იქნება, ვერ დავასწრებთ სიკვდილის ძილით მიძინებულებს, რადგან უფალი თვითონ ჩამოვა ზეციდან მბრძანებლური მოწოდებით, მთავარანგელოზის ხმითა და ღვთის საყვირით და პირველები ქრისტეში მკვდრები აღდგებიან. შემდეგ კი ჩვენ, ცოცხლად დარჩენილები, მათთან ერთად ვიქნებით ატაცებულნი ღრუბლებში, რათა უფალს შევეგებოთ ჰაერში, რის შემდეგაც მუდამ უფალთან ვიქნებით“ (1 თესალონიკელები 4:15—17).

¹⁴ საინტერესო ინფორმაციას ვიგებთ ამ მუხლებიდან. იესოს ის ცხებული ძმები, რომლებიც ცოცხლები იყვნენ იესოს მოსვლის დროს და დღემდე ცოცხლები არიან, მათზე ადრე გარდაცვლილთა შემდეგ ავლენ ზეცაში. ასეთები ანუ „ქრისტეში მკვდრები“ პირველები აღდგებიან. იესო იმ გაგებით ჩამოდის ზეციდან, რომ ყურადღებას აქცევს მათ და „თეთრ გრძელ სამოსელს“ აძლევს, ანუ სულიერი სიცოცხლისთვის აღადგენს. ამის შემდეგ ცოცხლად დარჩენილები ამთავრებენ მიწიერ ცხოვრებას. ბევრ მათგანს მტრები მხეცურად მოკლავენ. ისინი თავიანთ წინამორბედთა მსგავსად სიკვდილის ძილით კი აღარ დაიძინებენ, არამედ, მოკვდებიან თუ არა, მაშინვე შეიცვლებიან, „თვალის დახამხამებაში“, და ატაცებული იქნებიან ზეცაში, რათა იესოსა და ქრისტეს სხეულის დანარჩენ წევრებს შეუერთდნენ (1 კორინთელები 15:50—52; შეადარეთ გამოცხადების 14:13). ამგვარად, ცხებული ქრისტიანების აღდგენა აპოკალიფსის ოთხი მხედრის ასპარეზზე გამოსვლიდან მალევე იწყება.

15. ა) რა სასიხარულო ცნობას ვიგებთ მეხუთე ბეჭდის ახსნის შემდეგ? ბ) რითი დამთავრდება თეთრ ცხენზე ამხედრებული დამპყრობის ბრძოლა?

¹⁵ გრაგნილის მეხუთე ბეჭდის ახსნის შემდეგ სასიხარულო ცნობას ვიგებთ — მძლეველი ცხებული ქრისტიანები სიკვდილამდე ღვთის ერთგულები რჩებიან. ეს ცნობა სატანისა და მისი შთამომავლობისთვის კარგს არაფერს მოასწავებს. თეთრ ცხენზე ამხედრებული მძლეველი შეუჩერებლად განაგრძობს ბრძოლას და სწრაფად უახლოვდება იმ დროს, როდესაც პასუხს აგებინებს „ბოროტის ხელში“ მყოფ ქვეყნიერებას (1 იოანე 5:19). ეს მაშინ გაცხადდება, როცა კრავი მეექვსე ბეჭედს ახსნის.

[სქოლიოები]

თავი 18

მიწისძვრები უფლის დღეს

1, 2. ა) რა ხდება ძლიერი მიწისძვრის დროს? ბ) რას აღწერს იოანე მეექვსე ბეჭდის ახსნისას?

შესწრებიხართ ოდესმე ძლიერ მიწისძვრას? ცხადია, სასიამოვნო ამაში არაფერია. ძლიერ მიწისძვრას ზოგჯერ შეიძლება თან სდევდეს შემზარავი გუგუნი; შეიძლება რყევა ყოველმა ახალმა ბიძგმა გააძლიეროს; ხალხი ამ დროს უსაფრთხო ადგილს ეძებს და შეიძლება მაგიდის ქვეშაც კი შეძვრეს. ზოგჯერ მიწისძვრა მოულოდნელი და დამანგრეველი ბიძგით იწყება, რასაც ჭურჭლისა თუ ავეჯის მტვრევა, შენობების ნგრევა მოსდევს. მას კოლოსალური ზარალი მოაქვს, განმეორებითი ბიძგები კი დამატებით ზარალს იწვევს და ტრაგიკულ მდგომარეობას კიდევ უფრო ამძიმებს.

² ეს იმ სურათის წარმოდგენაში გვეხმარება, რომელიც იოანემ მეექვსე ბეჭდის ახსნისას იხილა: „როცა მეექვსე ბეჭედი ახსნა, დავინახე, რომ ძლიერი მიწისძვრა მოხდა“ (გამოცხადება 6:12ა). როგორც ჩანს, ეს დროის იმ მონაკვეთში ხდება, როცა სხვა ბეჭდებიც იხსნება. უფლის დღის რა მონაკვეთში ხდება ეს მიწისძვრა და რა მიწისძვრაზეა ლაპარაკი? (გამოცხადება 1:10).

3. ა) იესოს წინასწარმეტყველების თანახმად რა იქნებოდა მისი გამეფების ამოსაცნობი ნიშანი? ბ) რა მიწისძვრები უძღვის წინ გამოცხადების 6:12-ში აღწერილ ძლიერ სიმბოლურ მიწისძვრას?

³ ბიბლიაში პირდაპირი თუ გადატანითი მნიშვნელობით არაერთხელ არის საუბარი მიწისძვრებზე. როცა იესო იმ ნიშნის შესახებ საუბრობდა, რომლითაც მისი გამეფება ამოიცნობოდა, იწინასწარმეტყველა, რომ იქნებოდა „მიწისძვრები ხან ერთ და ხან მეორე ადგილას“ და ეს იქნებოდა „მშობიარობის ტკივილების“ დაწყების ერთ-ერთი მაჩვენებელი. 1914 წლიდან მოყოლებული, როდესაც დედამიწის მოსახლეობამ მილიარდებს მიაღწია, მიწისძვრების რიცხვმა იმატა, რამაც ადამიანთა მდგომარეობა კიდევ უფრო დაამძიმა (მათე 24:3, 7, 8). მართალია, მიწისძვრების გახშირებით წინასწარმეტყველება სრულდება, მაგრამ ეს მიწისძვრები სტიქიური უბედურებებია და სხვა არაფერი. ეს მიწისძვრები წინ უძღვის გამოცხადების 6:12-ში აღწერილ ძლიერ სიმბოლურ მიწისძვრას, რაც არაერთი წინასწარი ბიძგის შემდეგ საბოლოო გამანადგურებელ დარტყმას მიაყენებს ისედაც საძირკველშერყეულ სატანის ქვეყნიერებასa.

სოციალური რყევები

4. ა) როდიდან ელოდა იეჰოვას ხალხი 1914 წელს კატასტროფული მოვლენების დაწყებას? ბ) დროის რა პერიოდი უნდა დასრულებულიყო 1914 წელს?

⁴ იეჰოვას ხალხი XIX საუკუნის 70-იანი წლებიდან ელოდა იმას, რომ 1914 წელს კატასტროფული მოვლენების დაწყებით დასრულდებოდა უცხოტომელთათვის დანიშნული დროები. დროის ეს პერიოდი მოიცავს „შვიდ დროს“ (2520 წელს), რომელიც ძვ. წ. 607 წელს იერუსალიმში დავითის სამეფო დინასტიის დამხობით დაიწყო და ახ. წ. 1914 წელს ზეციერ იერუსალიმში იესოს გამეფებით დასრულდა (დანიელი 4:24, 25; ლუკა 21:24)b.

5. ა) რა განცხადება გააკეთა ჩარლს ტეიზ რასელმა 1914 წლის 2 ოქტომბერს? ბ) რა პოლიტიკური ძვრები დაიწყო 1914 წლიდან?

⁵ ჩარლზ ტეიზ რასელმა 1914 წლის 2 ოქტომბერს ბრუკლინში (ნიუ-იორკი) დილის თაყვანისცემაზე ბეთელის ოჯახის წინაშე მნიშვნელოვანი განცხადება გააკეთა: „წარმართთა ჟამი დასრულდა; მათი მეფეების დღეები დათვლილია“. მართლაც, 1914 წელს ისეთი ძლიერი ძვრები დაიწყო, რომ მსოფლიო სცენიდან არაერთი საუკუნოვანი მონარქია გაქრა. 1917 წელს რუსეთში სოციალისტური რევოლუციის დროს ბოლშევიკების მიერ მეფის რეჟიმის დამხობამ ხანგრძლივი კონფრონტაცია წარმოშვა მარქსისტულ იდეოლოგიასა და კაპიტალიზმს შორის. პოლიტიკური ცვლილებები დღესაც არყევს მსოფლიოს. დღეს მთავრობები ერთი ან ორი წელი თუ ძლებენ. პოლიტიკურ არასტაბილურობას მარტო იტალიის შემთხვევაც ცხადყოფს; ამ ქვეყანაში მეორე მსოფლიო ომის შემდეგ მხოლოდ 42 წლის განმავლობაში 47-ჯერ შეიცვალა მთავრობა. ეს ცვლილებები კი გლობალურ ცვლილებას უძღვის წინ. რა იქნება ამის შედეგი? დედამიწას მხოლოდ ღვთის სამეფო უხელმძღვანელებს (ესაია 9:6, 7).

6. ა) როგორ აღწერს ჰ. ჯ. უელსი ახალ ეპოქას? ბ) რას წერენ ფილოსოფოსი ბერტრან რასელი და სახელმწიფო მოღვაწე ჰაროლდ მაკმილანი 1914 წლის შემდგომ განვითარებულ მოვლენებზე?

⁶ ისტორიკოსებმა, ფილოსოფოსებმა და პოლიტიკურმა ლიდერებმა 1914 წელს „ახალი და მნიშვნელოვანი ეპოქის დასაწყისი“ უწოდეს. ამ ეპოქის დაწყებიდან 17 წლის შემდეგ ისტორიკოსმა ჰ. ჯ. უელსმა აღნიშნა: „წინასწარმეტყველი დიდი სიამოვნებით იწინასწარმეტყველებდა კარგს, მაგრამ ის ვალდებულია, თქვას ის, რასაც ხედავს. ის ხედავს მსოფლიოს, რომელშიც ჯერ კიდევ ჯარისკაცები, პატრიოტები, მევახშეები და თაღლითები ბატონობენ; მსოფლიოს, რომელიც გაჟღენთილია უნდობლობითა და სიძულვილით; მსოფლიოს, სადაც ელვის სისწრაფით იკარგება ადამიანის თავისუფლების ცნება; მსოფლიოს, რომელიც მწვავე კლასობრივი დაპირისპირებებისკენ მიექანება და ახალი ომებისთვის ემზადება“. 1953 წელს ფილოსოფოსი ბერტრან რასელი წერდა: „1914 წლიდან ყველა, ვინც აანალიზებს მსოფლიო მდგომარეობას, დიდად შეშფოთებულია მოვლენების განვითარებით, რომლებიც გაცილებით დიდი უბედურების მომასწავებელ სასიკვდილო მარშს მოგვაგონებს. . . ისინი ხედავენ, რომ კაცობრიობა ჰგავს ერთი ბერძნული ტრაგედიის გმირს, რომელსაც მრისხანე ღმერთები მიაქანებენ და ვეღარ განაგებს თავის ბედს“. 1980 წელს ერთ-ერთი სახელმწიფო მოღვაწე ჰაროლდ მაკმილანი იხსენებდა, რა მშვიდობიანად დაიწყო XX საუკუნე: „მე იმ მსოფლიოში დავიბადე, სადაც თითქოს ყველაფერი უკეთესობისკენ მიდიოდა. . . მაგრამ 1914 წლის ერთ მშვენიერ დილას მოულოდნელად ყველაფერი თავდაყირა დადგა“.

7—9. ა) რა „მიწისძვრები“ არყევს საზოგადოებას 1914 წლიდან მოყოლებული? ბ) რით დამთავრდებოდა ის სოციალური რყევები, რომლებიც იესოს მოსვლის შემდეგ დაიწყო?

⁷ მეორე მსოფლიო ომმა რყევების მორიგი ტალღა ააგორა. მცირემასშტაბიანმა ომებმა და საერთაშორისო ტერორიზმმა შეძრა მთელი დედამიწა. ხალხის უმეტესობას აშფოთებს ბირთვული განადგურების საშიშროება. საბედნიეროდ, კაცობრიობის მომავალი ადამიანის შემოქმედის ხელშია და არა თავად ადამიანის (იერემია 17:5).

⁸ ომების გარდა 1914 წლიდან ბევრმა სხვა მოვლენამ შეძრა საზოგადოება. 1929 წელს ამერიკის საფონდო ბირჟამ კრახი განიცადა. ამას მოჰყვა მსოფლიო ეკონომიკური კრიზისი, რამაც ყველა კაპიტალისტური ქვეყანა დააზარალა. მართალია, 1932—1934 წლებში ეს კრიზისი ჩაცხრა, მაგრამ მისი უარყოფითი შედეგი დღემდე შეიმჩნევა. ეკონომიკურად არასტაბილურ მსოფლიოში მდგომარეობის გასაუმჯობესებლად 1929 წლიდან არაერთი დროებითი პროგრამა აამოქმედეს. სახელმწიფოები დღემდე ბიუჯეტის დეფიციტის პოლიტიკას ატარებენ. 1973 წელს ნავთობის კრიზისმა და 1987 წელს საფონდო ბირჟაზე გამართულმა სპეკულაციებმა ფინანსურად კიდევ უფრო შეარყია მსოფლიო. მილიონები ცხოვრობდნენ ბანკიდან გამოტანილი სესხის ხარჯზე. ფინანსურ მაქინაციებს, ფასიანი ქაღალდების ბაზარზე გამართულ სპეკულაციებს, ლატარეასა და სხვა ფინანსურ თაღლითობას დიდძალი ხალხი ეწირება. ხშირ შემთხვევაში ეს სახელმწიფო მხარდაჭერით ხდება, როცა სახელმწიფო თავად უნდა ზრუნავდეს თავისი მოქალაქეების კეთილდღეობაზე. ქრისტიანული სამყაროს ტელე-ევანგელისტებიც კი მრავალმილიონიან მოგებას იღებენ (შეადარეთ იერემიას 5:26—31).

⁹ უფრო ადრე კი ეკონომიკურმა სირთულეებმა გზა გაუხსნა მუსოლინისა და ჰიტლერს ძალაუფლების ხელში ჩასაგდებად. დიდ ბაბილონს დრო არ დაუკარგავს მათი კეთილგანწყობის მოსაპოვებლად. ვატიკანმა 1929 წელს კონკორდატი დადო იტალიის მთავრობასთან, 1933 წელს კი — გერმანიის მთავრობასთან (გამოცხადება 17:5). ამას მოჰყვა შავბნელი დრო, რითაც ნაწილობრივ შესრულდა წინასწარმეტყველება იესოს მოსვლის შესახებ: „ხალხები გაიტანჯებიან და არ ეცოდინებათ გამოსავალი. . . ხალხს გული წაუვა შიშით და იმის მოლოდინით, რა დაატყდება თავს მსოფლიოს“ (ლუკა 21:7—9, 25—31)c. 1914 წლიდან მოყოლებული საზოგადოებას არყევდა და კვლავაც არყევს ძლიერი „მიწისძვრები“.

ახლა იეჰოვა არყევს

10. ა) რითაა გამოწვეული სოციალური რყევები? ბ) რას აკეთებს იეჰოვა და რატომ?

¹⁰ სოციალური რყევების მიზეზი ის არის, რომ ადამიანს არ შეუძლია თავისი ნაბიჯების წარმართვა (იერემია 10:23). გარდა ამისა, ძველი გველი, სატანა, „რომელსაც შეცდომაში შეჰყავს მთელი მსოფლიო“, უბედურებას ატეხს დედამიწას და ბოლო ძალებით ცდილობს, მთელი კაცობრიობა ჩამოაშოროს იეჰოვას თაყვანისცემას. თანამედროვე ტექნიკამ მსოფლიო ერთ დიდ სოფლად აქცია, თუმცა ეროვნული და რასობრივი სიძულვილი კვლავ ძირ-ფესვიანად არყევს საზოგადოებას, ეგრეთ წოდებული გაერთიანებული ერების ორგანიზაცია კი ვერანაირ გამოსავალს ვერ პოულობს. როგორც არასდროს, „კაცი კაცზე მძლავრობს მისდა საზიანოდ“ (გამოცხადება 12:9, 12; ეკლესიასტე 8:9). მაგრამ უზენაესი უფალი იეჰოვა, ცისა და მიწის შემოქმედი, 90 წელზე მეტი ხანია, რაც თვითონაც არყევს ხალხს, რათა ერთხელ და სამუდამოდ გადაიჭრას დედამიწაზე არსებული პრობლემები. როგორ?

11. ა) რას ნიშნავს „შევძრავ ცასა და მიწას“, რაზეც ანგიას 2:6, 7-შია საუბარი? ბ) როგორ სრულდება ანგიას წინასწარმეტყველება?

¹¹ ანგიას 2:6, 7-ში ვკითხულობთ: «აი რას ამბობს ლაშქართა ღმერთი იეჰოვა: „ცოტაც და კიდევ ერთხელ შევძრავ ცასა და დედამიწას, ზღვასა და ხმელეთს; შევძრავ ხალხებს და მოვა ხალხთა საუნჯე; დიდებით ავავსებ ამ სახლს, — ამბობს ლაშქართა ღმერთი იეჰოვა“ ». განსაკუთრებით 1919 წლიდან იეჰოვამ აღძრა თავისი მოწმეები, რომ ყველანაირი ადამიანისთვის გაეცხადებინათ გამოტანილი განაჩენი. ეს ის გაფრთხილებაა, რომელსაც სატანის მთელი ქვეყნიერება ისმენსd. ეს ხმა უფრო და უფრო მეტი ძალით ისმის და ღვთის მოშიშ ადამიანებს ანუ „საუნჯეს“ აღძრავს, გამოეყონ ერებს; თუმცა ისინი გამოეყოფიან ერებს არა იმიტომ, რომ სატანის ორგანიზაცია ირყევა, არამედ იმიტომ, რომ სწორად აფასებენ მოვლენებს და სურთ, იოანეს ცხებულ კლასთან ერთად იეჰოვას თაყვანისცემის სახლი დიდებით აავსონ. როგორ? ღვთის უკვე დამყარებული სამეფოს შესახებ სასიხარულო ცნობის გულმოდგინე ქადაგებით (მათე 24:14). ეს სამეფო, რომელშიც იესო და მისი ცხებული მიმდევრები მმართველობენ, მარადიულად იმეფებს იეჰოვას სადიდებლად, რადგან ის არის „სამეფო, რომელიც არ შეირყევა“ (ებრაელები 12:26—29).

12. თუ უკვე გამოეხმაურეთ მათეს 24:14-ში ნაწინასწარმეტყველებ ქადაგებას, რისი გაკეთება გმართებთ გამოცხადების 6:12-ში მოხსენიებულ „ძლიერ მიწისძვრამდე“?

¹² თუ თქვენც იმ მილიონებს მიეკუთვნებით, რომლებიც გამოეხმაურნენ ქადაგებას და დაესწრნენ იესოს სიკვდილის გახსენების საღამოს, მაშ, განაგრძეთ ბიბლიური ჭეშმარიტების შესწავლა (2 ტიმოთე 2:15; 3:16, 17). მიატოვეთ სატანის საზოგადოებისთვის დამახასიათებელი უზნეო ცხოვრების წესი. ეს საზოგადოება სასიკვდილოდაა განწირული. შეუერთდით ქრისტიანებისგან შემდგარ ახალი ქვეყნიერების საზოგადოებას და გულმოდგინედ შეასრულეთ ის საქმე, რასაც ეს საზოგადოება აკეთებს, სანამ საბოლოო „მიწისძვრას“ მიწასთან არ გაუსწორებია სატანის ქვეყნიერება! ვნახოთ, რა იგულისხმება „ძლიერ მიწისძვრაში“.

ძლიერი მიწისძვრა!

13. რატომ შეიძლება ითქვას, რომ კაცობრიობას ჯერ არ უხილავს ასეთი ძლიერი მიწისძვრა?

¹³ ამ ძნელად ასატან ბოლო დღეებში მრავალი მიწისძვრა ხდება — როგორც პირდაპირი, ისე გადატანითი მნიშვნელობით (2 ტიმოთე 3:1). მაგრამ არც ერთი მათგანი არ არის ის საბოლოო ძლიერი მიწისძვრა, რომელიც იოანემ მეექვსე ბეჭდის ახსნისას იხილა. წინასწარი რყევების დრო იწურება. კარსაა მომდგარი ისეთი ძლიერი მიწისძვრა, როგორიც კაცობრიობას ჯერ არ უხილავს. ეს იმდენად ძლიერი მიწისძვრა იქნება, რომ რყევები ვერ გაიზომება ვერც რიხტერის შკალით და ვერც სხვა რომელიმე საზომით. ეს იქნება არა რომელიმე კონკრეტულ ადგილზე მომხდარი უბედურება, არამედ კატაკლიზმი, რომელიც მთელ დედამიწას, მთელ გახრწნილ საზოგადოებას შეარყევს.

14. ა) რომელ წინასწარმეტყველებაშია მოხსენიებული ძლიერი მიწისძვრა და მისი შედეგები? ბ) რას ეხება იოელისა და გამოცხადების 6:12, 13-ში მოხსენიებული წინასწარმეტყველებები?

¹⁴ იეჰოვას სხვა წინასწარმეტყველებიც წინასწარმეტყველებდნენ ამ მიწისძვრისა და მისი კატასტროფული შედეგების შესახებ. მაგალითად, ძვ. წ. დაახლოებით 820 წელს იოელმა იწინასწარმეტყველა „იეჰოვას დიდი და შიშის მომგვრელი დღის მოსვლა“ და თქვა, რომ მაშინ მზე დაბნელდებოდა და მთვარე სისხლად იქცეოდა. შემდეგ განაგრძო: „ბრბოები, ბრბოები არიან განაჩენის ველზე, რადგან უახლოვდება იეჰოვას დღე განაჩენის ველს. დაბნელდება მზე და დაბნელდება მთვარე, აღარ გამოანათებენ ვარსკვლავები. სიონიდან დაიგრგვინებს იეჰოვა და იერუსალიმიდან გამოსცემს ხმას. შეირყევა ცა და მიწა, მაგრამ იეჰოვა იქნება თავშესაფარი თავისი ხალხისთვის და სიმაგრე — ისრაელის ძეებისთვის“ (იოელი 2:31; 3:14—16). ასეთი მიწისძვრა მხოლოდ იეჰოვას განაჩენის აღსრულების დროს, დიდი გასაჭირის დღეებში შეიძლება მოხდეს (მათე 24:21). ამგვარად, ლოგიკურია, დავასკვნათ, რომ გამოცხადების 6:12, 13-ში მოცემული წინასწარმეტყველება დროის იმავე მონაკვეთს ეხება (იხილეთ აგრეთვე იერემიას 10:10; სოფონიას 1:14, 15).

15. რა ძლიერ მიწისძვრაზე წინასწარმეტყველებდა აბაკუმი?

¹⁵ წინასწარმეტყველმა აბაკუმმა, რომელიც იოელის მოღვაწეობიდან დაახლოებით 200 წლის შემდეგ ცხოვრობდა, ლოცვით მიმართა თავის ღმერთს: „იეჰოვა, მოვისმინე შენ შესახებ. შემაშინა, იეჰოვა, შენმა საქმეებმა. განაახლე და გააცხადე ისინი ამ წლებში! შენი რისხვისას გაიხსენე წყალობა“. რა რისხვაზე მიდის საუბარი? აბაკუმი განაგრძობს, ხატოვნად აღწერს დიდ გასაჭირს და იეჰოვაზე ამბობს: „გაჩერდა ის, რომ შეერყია დედამიწა. შეხედა და შიშით აათრთოლა ხალხები. . . მრისხანედ მიაბიჯებდი დედამიწაზე და შენი რისხვით გალეწე ხალხები. მაინც გავიხარებ იეჰოვათი და ვიმხიარულებ ჩემი ხსნის ღმერთით“ (აბაკუმი 3:1, 2, 6, 12, 18). მართლაც მძლავრად შეარყევს იეჰოვა მთელ დედამიწას, როდესაც „გალეწავს“ ხალხებს!

16. ა) რა იწინასწარმეტყველა ეზეკიელმა სატანის მიერ ღვთის ხალხზე საბოლოო იერიშის მიტანის შესახებ? ბ) რა მოჰყვება იმ ძლიერ მიწისძვრას, რომელზეც გამოცხადების 6:12-შია საუბარი?

¹⁶ ეზეკიელიც წინასწარმეტყველებდა, რომ როდესაც გოგი (ზნედაცემული სატანა) მაგოგიდან საბოლოო იერიშს მიიტანდა ღვთის ხალხზე, იეჰოვა შეაზანზარებდა ისრაელის მიწას (ეზეკიელი 38:18, 19). ამაში შეიძლება პირდაპირი გაგებით მიწისძვრაც იგულისხმებოდეს, მაგრამ ისიც არ უნდა დაგვავიწყდეს, რომ წიგნი „გამოცხადება“ სიმბოლური ენითაა დაწერილი; ეს წინასწარმეტყველებაც სხვა წინასწარმეტყველებების მსგავსად სიმბოლური ხასიათისაა. აქედან გამომდინარე, მეექვსე ბეჭდის ახსნით ვიგებთ, რომ ქვეყნიერება ისე შეირყევა, როგორც არასდროს — მოხდება საშინელი მიწისძვრა და ყველა, ვინც იეჰოვა ღმერთის უზენაესობის წინააღმდეგ ილაშქრებს, განადგურდება.

სიბნელის დრო

17. როგორ მოქმედებს ძლიერი მიწისძვრა მზეზე, მთვარეზე და ვარსკვლავებზე?

¹⁷ იოანე განაგრძობს თხრობას. ძლიერი მიწისძვრის დროს მომხდარი საშინელი მოვლენები ზეცაზეც მოქმედებს. იოანე ყვება: „მზე ჯვალოსავით გაშავდა და მთვარე მთლიანად სისხლივით გახდა, ცის ვარსკვლავები დედამიწაზე ჩამოცვივდა მკვახე ლეღვივით, ძლიერი ქარით შერხეულ ლეღვის ხეს რომ სცვივა“ (გამოცხადება 6:12ბ, 13). მართლაც განსაცვიფრებელი მოვლენებია აღწერილი. წარმოიდგინეთ, რა საზარელი უკუნეთი ჩამოწვებოდა, ეს წინასწარმეტყველება პირდაპირი გაგებით რომ შესრულებელიყო. აღარ გაგვათბობდა მზის სხივები; აღარც ღამით გაგვინათებდა გზას ვერცხლისფერი მთვარე; აღარც ვარსკვლავები იციმციმებდა ცის კამარაზე. ნაცვლად ამისა, ცივი და უსიცოცხლო წყვდიადი დაისადგურებდა (შეადარეთ მათეს 24:29).

18. რა გაგებით დაუბნელდა ცა იერუსალიმს ძვ. წ. 607 წელს?

¹⁸ ერთ-ერთი წინასწარმეტყველების თანახმად ძველ ისრაელს სულიერი გაგებით ასეთი წყვდიადი მოიცავდა. იერემია აფრთხილებდა ისრაელს: „გაპარტახდება მთელი ქვეყანა. განა ბოლომდე არ შევმუსრავ მას?! ამიტომ იგლოვებს ქვეყანა და მაღლა ცა დაბნელდება“ (იერემია 4:27, 28). ძვ. წ. 607 წელს, როდესაც ეს წინასწარმეტყველება შესრულდა, იეჰოვას ხალხისთვის, მართლაც, შავბნელი დრო დადგა. მათი დედაქალაქი, იერუსალიმი, ბაბილონელებმა დაიპყრეს, მათი ტაძარი დაანგრიეს, მიწა კი გააპარტახეს. ისრაელებისთვის აღარ ჩანდა ზეციდან იმედის ნაპერწკალი. ყველაფერი ისე იყო, როგორც მგლოვიარე იერემია შესჩიოდა იეჰოვას: „გვკლავ და არ გვიბრალებ. ღრუბლებით კეტავ შენთან მოსასვლელს, ლოცვებმა რომ ვერ გამოაღწიონ მათში“ (გოდება 3:43, 44). იერუსალიმისთვის ეს ის წყვდიადი იყო, რომელიც სიკვდილსა და განადგურებას ნიშნავდა.

19. ა) როგორ აღწერს ღვთის წინასწარმეტყველი ესაია იმ სიბნელეს, რომელიც ძველ ბაბილონში დაისადგურებდა? ბ) როდის და როგორ შესრულდა ესაიას წინასწარმეტყველება?

¹⁹ მოგვიანებით, მსგავსი წყვდიადი ძველი ბაბილონისთვისაც უბედურებას ნიშნავდა. ამის შესახებ ერთი წინასწარმეტყველი ღვთის შთაგონებით წერდა: „აი, მოდის იეჰოვას დღე, სასტიკი რისხვითა და მრისხანებით, რათა გამაოგნებელი გახადოს ქვეყანა და აღგავოს მისგან ცოდვილები. აღარ გამოანათებენ ცის ვარსკვლავები და ქესილის თანავარსკვლავედები; მზე დაბნელდება ამოსვლისას და მთვარე აღარ გამოსცემს სინათლეს. ამ მიწაზე მივაქცევ მისივე ბოროტებას და ბოროტებზე — მათივე დანაშაულს“ (ესაია 13:9—11). ეს წინასწარმეტყველება შესრულდა ძვ. წ. 539 წელს, როდესაც ბაბილონი მიდიელებმა და სპარსელებმა დაიპყრეს; ის კარგად აღწერს იმ წყვდიადს, სასოწარკვეთილებას, რამაც იმედგადაწურული ბაბილონი მოიცვა, როდესაც მან სამუდამოდ დაკარგა მსოფლიო იმპერიის წოდება.

20. რა შემზარავი მომავალი ელის ამ ქვეყნიერებას, როდესაც ძლიერი მიწისძვრა მოხდება?

²⁰ მსგავსად ამისა, როდესაც ძლიერი მიწისძვრა მოხდება, მთელ ქვეყნიერებას წყვდიადი მოიცავს და ხალხი სასოწარკვეთილებაში ჩავარდება. ისინი სატანის ქვეყნიერების „მოკაშკაშე მნათობებში“ იმედის ნაპერწკალსაც ვეღარ დაინახავენ. პოლიტიკურ ლიდერებს, განსაკუთრებით კი ქრისტიანული ქვეყნების მეთაურებს დღეს უკვე გატეხილი აქვთ სახელი კორუფციით, სიცრუითა და უზნეობით (ესაია 28:14—19). მათი ნდობა აღარ შეიძლება. მალე ჩაქრება მათი მბჟუტავი სინათლე, როცა იეჰოვა განაჩენს აღასრულებს მათ წინააღმდეგ. მთვარის მსგავსად ისინიც ახდენენ გავლენას დედამიწაზე, მაგრამ მალე გამოაშკარავდება, რომ სისხლისმღვრელები და მკვლელები არიან. ამ ქვეყნიერების „ვარსკვლავები“ ჩამოვარდნილი მეტეორიტებივით ჩაქრებიან და ძლიერი ქარით გაფანტულ „მკვახე ლეღვს“ დაემსგავსებიან. მთელ დედამიწას შეარყევს „დიდი გასაჭირი, როგორიც არ ყოფილა ქვეყნიერების დასაწყისიდან დღემდე და აღარც იქნება“ (მათე 24:21). მართლაც შემზარავი მომავალია!

„ცა გრაგნილივით დაიხვა“

21. იოანეს ხილვაში რა ემართება „ცას“, „ყოველ მთას და ყოველ კუნძულს“?

²¹ იოანეს ხილვა ასე გრძელდება: „ცა გრაგნილივით დაიხვა და გაუჩინარდა, ყოველი მთა და ყოველი კუნძული მოშორებულ იქნა თავისი ადგილიდან“ (გამოცხადება 6:14). ცხადია, აქ არ იგულისხმება პირდაპირი გაგებით ცა, მთები და კუნძულები. მაშ, რაზეა საუბარი?

22. რა გაგებით დაიხვა ედომის ცა გრაგნილივით?

²² „ცის“ მნიშვნელობის გაგებაში გვეხმარება მსგავსი წინასწარმეტყველება, რომელიც ერების წინააღმდეგ იეჰოვას რისხვას ეხება: „დალპება ყველა, ვინც ცის ლაშქარშია. ცა გრაგნილივით დაიხვევა“ (ესაია 34:4). ეს წინასწარმეტყველება ედომზე უნდა შესრულებულიყო. როგორ? ძვ. წ. 607 წელს იერუსალიმის განადგურებიდან მცირე ხანში ბაბილონელებმა ედომიც მიწასთან გაასწორეს. როგორც ცნობილია, იმ დროს ცაში განსაკუთრებული არაფერი მომხდარა, მაგრამ ედომის „ცაში“e დიდი უბედურება დატრიალდა. ედომის მმართველებმა დაკარგეს ცასავით მაღალი მდგომარეობა (ესაია 34:5). ისინი თითქოს დაახვიეს და გამოუსადეგარი ძველი გრაგნილივით გვერდზე გადადეს.

23. რა არის „ცა“, რომელიც „გრაგნილივით დაიხვა“, და როგორ ადასტურებს ამას პეტრეს სიტყვები?

²³ ამგვარად „ცაში“, რომელიც „გრაგნილივით დაიხვა“, იგულისხმება ღვთის მოწინააღმდეგე მთავრობები, რომლებიც დედამიწაზე მმართველობენ. თეთრ ცხენზე ამხედრებული ყოვლისმპყრობელი მხედარი მათ ერთხელ და სამუდამოდ გაანადგურებს (გამოცხადება 19:11—16, 19—21). ამას ადასტურებს პეტრე მოციქული, რომელიც მეექვსე ბეჭდის ახსნისას განვითარებულ მოვლენებს ელოდა: „ახლანდელი ცა და დედამიწა კი იმავე სიტყვით ცეცხლისთვის არის გამზადებული და შემონახული უღვთოთა გასამართლებისა და დაღუპვის დღისთვის“ (2 პეტრე 3:7). მაგრამ რას ნიშნავს ფრაზა „ყოველი მთა და ყოველი კუნძული მოშორებულ იქნა თავისი ადგილიდან“?

24. ა) ბიბლიური წინასწარმეტყველებების თანახმად რის გამო იძვრის და რის გამო კარგავს სიმტკიცეს მთები და კუნძულები? ბ) როგორ „შეიძრნენ მთები“ ნინევეს დაცემის დროს?

²⁴ ბიბლიურ წინასწარმეტყველებებში ნათქვამია, რომ მთები და კუნძულები იძვრის ან კარგავს სიმტკიცეს დიდი პოლიტიკური რყევების გამო. მაგალითად, ნინევეს წინააღმდეგ იეჰოვას გამოტანილ განაჩენს რომ აცხადებდა, წინასწარმეტყველმა ნაუმმა დაწერა: „შეიძრნენ მთები მის გამო, დადნენ გორები. ზანზარებს დედამიწა მისი სახის წინაშე და ნაყოფიერი მიწა თავისი მკვიდრებითურთ“ (ნაუმი 1:5). როგორც ცნობილია, ძვ. წ. 632 წელს ნინევეს დაცემის დროს მთები პირდაპირი გაგებით არ შეძრულა, თუმცა ეს მსოფლიო იმპერია, რომელიც თავისი ძლიერებით მთას ჰგავდა, მოულოდნელად დაეცა (შეადარეთ იერემიას 4:24).

25. ქვეყნიერების აღსასრულს, როგორ ‘იქნება მოშორებული ყოველი მთა და ყოველი კუნძული’ თავისი ადგილიდან?

²⁵ მაშასადამე, მეექვსე ბეჭდის ახსნისას მოხსენიებული „ყოველი მთა და ყოველი კუნძული“ უნდა განასახიერებდეს მთავრობებსა და მათზე დამოკიდებულ ორგანიზაციებს, რომლებიც, ერთი შეხედვით, სიმტკიცით გამოირჩევიან. ისინი მალე შეიძვრებიან და შეაძრწუნებენ მათზე დაიმედებულ ხალხს. წინასწარმეტყველების თანახმად მოდის იეჰოვას და მისი ძის, იესოს რისხვის დიდი დღე — სატანის ორგანიზაციის გამანადგურებელი საბოლოო „მიწისძვრა“. ისინი შურს იძიებენ!

„ზედ დაგვემხეთ და დაგვმალეთ“

26. როგორ დაეცემათ თავზარი ღვთის უზენაესობის მოწინააღმდეგეებს და რას იტყვიან ისინი მაშინ, როცა შეძრწუნდებიან?

²⁶ იოანე განაგრძობს: «დედამიწის მეფეები, დიდებულები, ათასისთავები, მდიდრები და ძლიერები, ყველა მონა და თავისუფალი გამოქვაბულებსა და კლდოვან მთებში დაიმალნენ. ეუბნებიან მთებსა და კლდეებს: „ზედ დაგვემხეთ და დაგვმალეთ ტახტზე მჯდომის სახისგან და კრავის რისხვისგან, რადგან მოვიდა მათი რისხვის დიდი დღე და ვინ გაუძლებს?“ » (გამოცხადება 6:15—17).

27. რას ამბობდნენ სამარიაში მცხოვრები ორგული ისრაელები, და როგორ შესრულდა წინასწარმეტყველება?

²⁷ სამარიის, ისრაელის ჩრდილოეთი სამეფოს დედაქალაქის წინააღმდეგ იეჰოვას გამოტანილ განაჩენს რომ აცხადებდა, ოსიამ თქვა: «მოისპობა ბეთ-ავენის მაღლობები, ისრაელის ცოდვა. ნარ-ეკალი ამოვა მათ სამსხვერპლოებზე. ხალხი ეტყვის მთებს: „დაგვფარეთ!“ და გორებს: „ზედ დაგვემხეთ!“ » (ოსია 10:8). როდის შესრულდა ეს სიტყვები? ძვ. წ. 740 წელს, როდესაც ასურელებმა ხელთ იგდეს სამარია და ისრაელებს გასაქცევი აღარსად ჰქონდათ. ოსიას სიტყვები კარგად ასახავს უსუსურობით, შიშითა და დაბნეულობით გამოწვეულ განცდას, რაც მტრის ხელში ჩავარდნილ ხალხს დაეუფლა. ვერც გორებმა და ვერც სამარიის მთისმაგვარმა წეს-წყობილებამ ვერ დაიცვა ისინი, მიუხედავად იმისა, რომ ერთი შეხედვით, მტკიცედ იდგნენ.

28. ა) რა გამაფრთხილებელი სიტყვები უთხრა იესომ იერუსალიმელ ქალებს? ბ) როგორ შესრულდა იესოს სიტყვები?

²⁸ როდესაც რომაელ ჯარისკაცებს იესო ბოძზე გასაკრავად მიჰყავდათ, მან შემდეგი სიტყვებით მიმართა იერუსალიმელ ქალებს: «მოვა დრო, როცა ხალხი იტყვის: „ბედნიერნი არიან უშვილონი, საშვილოსნო, რომელსაც არ უშობია, და ძუძუ, რომელსაც არ უწოვებია!“ მაშინ ეტყვიან მთებს: „ზედ დაგვემხეთ!“ და გორებს: „დაგვფარეთ!“ » (ლუკა 23:29, 30). სარწმუნო ისტორიული წყაროები ადასტურებს, რომ ახ. წ 70 წელს რომაელებმა იერუსალიმი გაანადგურეს. ცხადია, იესოც იმას გულისხმობდა, რასაც ოსია. იუდაში დარჩენილმა ებრაელებმა ვერაფერს შეაფარეს თავი. ზოგი იერუსალიმს აფარებდა თავს, ზოგი კი მთის წვერზე აგებულ მასადას ციხე-სიმაგრეს, მაგრამ მაინც ვერ გაექცნენ იეჰოვას განაჩენის აღსრულებას.

29. ა) რა მდგომარეობაში აღმოჩნდებიან ქვეყნიერების მხარდამჭერები იეჰოვას რისხვის დღეს? ბ) იესოს რომელი წინასწარმეტყველება შესრულდება, როცა იეჰოვა რისხვით აენთება?

²⁹ მეექვსე ბეჭდის ახსნით ვიგებთ, რა მოხდება იეჰოვას რისხვის დღეს. ქვეყნიერება ერთხელ და სამუდამოდ შეირყევა, და მისი მხარდამჭერები თავშესაფარს დაუწყებენ ძებნას, მაგრამ ვერსად იპოვიან. ცრუ რელიგიამ, „დიდმა ბაბილონმა“, აშკარად გაუცრუა მათ იმედი. დახმარებას მათ ვეღარც მთის გამოქვაბულები აღმოუჩენენ და ვეღარც მთასავით ვეებერთელა პოლიტიკური თუ ფინანსური ორგანიზაციები. იეჰოვას რისხვისგან ვერაფერი დაიფარავს მათ, ვისი შემაშფოთებელი მდგომარეობაც იესომ შემდეგი სიტყვებით აღწერა: „მაშინ ცაში გამოჩნდება კაცის ძის ნიშანი და დედამიწის ყველა ტომი მწუხარებისგან მკერდში დაიწყებს ცემას; იხილავენ ძლიერებითა და აღმატებული დიდებით ცის ღრუბლებზე მომავალ კაცის ძეს“ (მათე 24:30).

30. ა) რატომ იკითხავენ: „ვინ გაუძლებს“? ბ) გაუძლებს ვინმე იეჰოვას სასამართლოს დღეს?

³⁰ ვინც არ ცნობს თეთრ ცხენზე ამხედრებული გამარჯვებული მხედრის ძალაუფლებას, მოუწევს იმის აღიარება, რომ ცდებოდა. ვინც განგებ უერთდება გველის შთამომავლობას, სატანის ქვეყნიერებასთან ერთად განადგურდება (დაბადება 3:15; 1 იოანე 2:17). მაშინ მთელი მსოფლიო ისეთ სავალალო მდგომარეობაში აღმოჩნდება, რომ ბევრი იკითხავს, ვინ გაუძლებსო?! მათ შეიძლება ისიც დაასკვნან, რომ გასამართლების დღეს კაციშვილი არ გამართლდება იეჰოვას წინაშე, მაგრამ ისინი შეცდებიან, როგორც ამას წიგნი „გამოცხადება“ ცხადყოფს.

[სქოლიოები]

[ჩარჩო 105 გვერდზე]

ნაწინასწარმეტყველები 1914 წელი ამოცნობილია

„ძვ. წ. 606 წელს ღვთის სამეფომ მმართველობა შეწყვიტა, მეფეს წაერთვა გვირგვინი და მთელი დედამიწა წარმართთა ძალაუფლებაში გადავიდა. ძვ. წ. 606 წლიდან 2520 წლის ათვლა ახ. წ. 1914 წელსf დასრულდება“ („სამი მსოფლიო“, გამოცემულია 1877 წელს, გვერდი 83, [ინგლ.]).

«ბიბლიიდან ნათლად ჩანს, რომ „წარმართთა ჟამი“ მოიცავს 2520-წლიან პერიოდს, ძვ. წ. 606 წლიდან ახ. წ. 1914 წლამდე» („საღვთო წერილის გამოკვლევა“, ტომი II, დაწერილია ჩ. ტ. რასელის მიერ და გამოცემულია 1889 წელს, გვერდი 79 [ინგლ]).

ჩარლზ ტეიზ რასელი და ისინი, ვინც მასთან ერთად იკვლევდნენ ბიბლიას, ათწლეულებით ადრე მივიდნენ იმ დასკვნამდე, რომ უცხოტომელთათვის დანიშნული დროები 1914 წელს დასრულდებოდა (ლუკა 21:24). მიუხედავად იმისა, რომ, მაშინ მათ ბოლომდე არ ესმოდათ, რა მოხდებოდა ამ წელს, მაინც დარწმუნებული იყვნენ, რომ მსოფლიო ისტორიაში ის გადამწყვეტი წელი იქნებოდა, და არც შემცდარან. ყურადღება მიაქციეთ ერთ-ერთ გაზეთში დაბეჭდილ კომენტარს:

«ევროპაში საშინელმა ომმა იფეთქა, რითაც განსაკუთრებული წინასწარმეტყველება შესრულდა. ბოლო 25 წლის განმავლობაში „ბიბლიის საერთაშორისო მკვლევარები“, რომლებიც დიდი ხნის განმავლობაში ცნობილი იყვნენ როგორც „ათასწლეულის გარიჟრაჟის მაუწყებლები“, ქადაგებითა და ბეჭდვითი სიტყვით მთელ მსოფლიოს ამცნობდნენ, რომ ბიბლიაში ნაწინასწარმეტყველები რისხვის დღე 1914 წელს დაიწყებოდა. „დაელოდეთ 1914 წელს!“ — ასეთი მოწოდება გაისმოდა ასობით მიმომსვლელი მქადაგებლისგან» („უორლდი“, ნიუ-იორკში გამომავალი გაზეთი, 30 აგვისტო, 1914 წელი).

[სქოლიოები]

[ჩარჩო 106 გვერდზე]

1914 წელი — ისტორიული თარიღი

ერთ-ერთ ნაშრომში („Politikens Verdenshistorie—Historiens Magt og Mening“, გამოცემულია კოპენჰაგენში 1987 წელს, გვ. 40) აღნიშნული იყო:

«XIX საუკუნეში ნათელი მომავლის რწმენა 1914 წელს დაიმსხვრა. ომის დაწყებამდე ერთი წლით ადრე დანიელი ისტორიკოსი და პოლიტიკოსი პეტერ მუნკი ოპტიმისტური განწყობით წერდა: „ყველაფერი იმაზე მეტყველებს, რომ ევროპის დიდ ქვეყნებს შორის ომი არ დაიწყება. ომის საშიშროება აღარც მომავალში იარსებებს. ამაზე 1871 წლიდან განვითარებული მოვლენებიც მეტყველებს“ ».

სრულიად საპირისპიროს ვკითხულობთ მის გვიანდელ მემუარებში: „1914 წელს ომმა იფეთქა. ეს თარიღი გადამწყვეტი აღმოჩნდა კაცობრიობის ისტორიაში. იმ ეპოქიდან, როცა ნათელი მომავლის იმედი გვქონდა და შედარებით უსაფრთხოდ შეგვეძლო გვეცხოვრა, ჩვენ შევაბიჯეთ კატასტროფებით, საშინელებებით, სიძულვილითა და საშიშროებებით აღსავსე ეპოქაში. ვერც მაშინ იტყოდა ვერავინ და ვერც დღეს იტყვის ვინმე, ის გაუნათებელი წვდიადი, რომელმაც მაშინ მოგვიცვა, მოსპობს თუ არა ათასწლეულების განმავლობაში კაცობრიობის შექმნილ ცივილიზაციას“.