ახალგაზრდებო, იკითხეთ ღვთის სიტყვა!

¹ ახალგაზრდობა სირთულეებისა და მნიშვნელოვანი გადაწყვეტილებების მიღების დროა. ბევრი თქვენგანი, ახალგაზრდა ქრისტიანებო, ყოველდღიურად განიცდით ზეწოლას, როცა გიბიძგებენ ღვთის ნორმების დარღვევისკენ. სანამ პირად გადაწყვეტილებას მიიღებ განათლებასთან, სამუშაოსთან და ქორწინებასთან დაკავშირებით, პირველ რიგში, უნდა დაისახო სულიერი მიზნები. მხოლოდ ამ შემთხვევაში მოახდენს დადებით გავლენას მთელ შენს ცხოვრებაზე სხვა გადაწყვეტილებები. კარგად განსაზღვრული სულიერი მიზნები დაგეხმარება ბრძნულად მოქმედებაში და ცხოვრებაში წარმატების მიღწევაში. ბიბლიის რეგულარული კითხვა და მასზე ფიქრი ღვთივსულიერი რჩევის თანახმად ცხოვრებისკენ აღგძრავს და შენი სათანადო მცდელობა წარმატებული იქნება (იესო 1:8; ფსალმ. 1:2, 3).

² რაში დაგეხმარება ბიბლიის კითხვა? სატანის მსოფლიო სავსეა ცდუნებებით, რომლებიც გვიბიძგებს ცოდვის ჩადენისკენ (1 იოან. 2:15, 16). შეიძლება გსმენია თანაკლასელების ან სხვა ახალგაზრდების შესახებ, რომლებიც თანატოლების ზეგავლენას დაჰყვნენ. ბიბლიის რჩევების მიყოლა მორალურ და სულიერ ძალას მოგცემს, რომ უარი თქვა ცოდვამდე მიმყვან გზებზე. გარდა ამისა, ღვთის სიტყვაში მოცემული რჩევები დაგეხმარება, რომ არ გაება სატანის მზაკვრულ მახეებში (2 კორ. 2:11; ებრ. 5:14). ღვთის გზებით სიარული ცხოვრებაში ჭეშმარიტ ბედნიერებასა და კმაყოფილებას მოგიტანს (ფსალმ. 118:1, 9, 11).

³ ღვთის სიტყვის უცვლელი პრინციპები აღემატება ადამიანურ სიბრძნეს (ფსალმ. 118:98—100). ბიბლიური პრინციპების კარგად ცოდნა და იეჰოვას გამჟღავნებულ განზრახვებზე ფიქრი, ამასთანავე გულწრფელი ლოცვა დაგეხმარება ბიბლიის ყოვლადბრძენ ავტორთან, იეჰოვა ღმერთთან, ახლო ურთიერთობის განვითარებაში. ის გვპირდება: „გასწავლი შენ და დაგაყენებ სწორ გზაზე, რომლითაც ივლი, თვალს დავიჭერ შენზე“ (ფსალმ. 31:8).

⁴ გამონახე დრო კითხვისთვის. ერთმა ახალგაზრდა ქრისტიანმა მიზნად დაისახა, რომ ბიბლია მთლიანად წაეკითხა და მან ეს ერთ წელში შეძლო. რა მოუტანა ამან მას? ის იხსენებს: „ბევრი გავიგე იეჰოვას შესახებ, რამაც დამაახლოვა მასთან და იმის სურვილი გამიჩინა, რომ მთელი ცხოვრების განმავლობაში მისი შიში მქონდეს“ (იაკ. 4:8). გაქვს ბიბლია მთლიანად წაკითხული? თუ არა, მიზნად დაისახე ამის გაკეთება. რა თქმა უნდა, იეჰოვა აკურთხებს შენს ძალისხმევას და უამრავ კურთხევას მოიმკი.