ტრაგედია — იხოცებიან ახალგაზრდები

„ისეთი გრძნობა მაქვს, თითქოს ჩვენი თაობა იღუპება“ (ჯოანა ფ. 18 წლის პირველკურსელი, [კონექტიკუტი აშშ]).

ავსტრალიის ერთ-ერთ შტატში, კუნძულ ტასმანიის დედაქალაქის — ჰოუბარტის — გარეუბანში, პოლიციელებმა საშინელება იხილეს. ერთ სახლში მათ ოთხი მკვდარი გოგონა იპოვეს, რომელთაგან უმცროსი ათის, ხოლო უფროსი თვრამეტი წლის იყო. ოთხივე საკუთარმა მამამ მოკლა, რომელიც იქვე ნახეს თავში სასიკვდილოდ დაჭრილი. მარჯვენა ხელი მას ცულით ჰქონდა მოკვეთილი. ამ ტრაგედიამ შეძრა მთელი ტასმანია. ხალხი საგონებელში ჩავარდა — რატომ? რატომ უნდა მომკვდარიყო ეს ოთხი უდანაშაულო გოგონა?

ბელგიის მოსახლეობა აფორიაქებულია ციხიდან თავდებით გამოშვებული მოძალადის მიერ ექვსი გოგონას გაუპატიურების და ოთხი მათგანის მკვლელობის გამო. იბადება იგივე კითხვა — რატომ? არგენტინაში მრავალი დედა ფიქრობს, რომ 30 000 ადამიანი, რომელთა შორის მათი შვილებიც იყვნენ, შეიწირა ეგრეთ წოდებულმა „ბინძურმა ომმა“a. ზოგი მათგანი აწამეს, მოწამლეს, შემდეგ კი თვითმფრინავიდან ოკეანეში გადაყარეს. ბევრი ჯერ კიდევ ცოცხალი იყო, როდესაც წყალში ყრიდნენ. რატომ უნდა დახოცილიყვნენ ისინი? მათი დედები კვლავაც ელიან პასუხს.

1955 წლის დედათა მსოფლიო კონგრესმა დაგმო ომი და „ომისა და მისთვის მზადებით გამოწვეული უბედურებებისგან შვილების, დიდის თუ პატარის, დაცვისთვის მებრძოლი დედების გამაფრთხილებელ ძახილად“ გამოცხადდა. მაგრამ იმ კონგრესის შემდეგაც სისხლისმღვრელ კონფლიქტებში მთელ მსოფლიოში უფრო და უფრო მეტი ახალგაზრდა იღუპება, რაც უდიდესი დანაკარგია კაცობრიობისთვის.

ახალგაზრდების სიკვდილი — რას გვაუწყებს ისტორია?

ისტორიის ფურცლები გაჟღენთილია ახალგაზრდების სისხლით. ჩვენს ეგრეთ წოდებულ განვითარებულ XX საუკუნეშიც კი რასობრივ და ტომობრივ კონფლიქტებში სისხლის ღვრის მთავარი სამიზნეები ახალგაზრდები არიან. თითქოს ახალგაზრდები საკუთარი სიცოცხლით უნდა აგებდნენ პასუხს უფროსი თაობის შეცდომებისა და ამბიციების გამო.

ჟურნალ „ახალი რესპუბლიკის“ ცნობით, ერთ აფრიკულ ქვეყანაში, „უფლის ჯარად“ წოდებულ მოზარდთა რელიგიურ სამხედრო ჯგუფს ასწავლიდნენ, რომ მათ ტყვია არ გაეკარებოდა. გასაკვირი არ არის, რომ სტატიას „იმედგაცრუებული მოზარდები“ ერქვა. მშობლები კარგავენ შვილებს, რომლებიც სულაც ვერ დაემალნენ ტყვიას, ამიტომაც მართებულად ითხოვენ პასუხს შეკითხვებზე: რატომ უნდა მომკვდარიყვნენ ჩვენი შვილები? რა მიზნით?

ამ ყოველივეს ახალგაზრდების თვითმკვლელობაც ემატება.

[სქოლიოები]