ნაწილი 2
ტანჯვა-წამებისგან გათავისუფლებული დედამიწა
1, 2. როგორი განსხვავებული შეხედულება აქვს მრავალ ადამიანს?
მაგრამ, მსოფლიოში მილიონობით ადამიანს სრულიად სხვა შეხედულება აქვს. ისინი ხედავენ კაცობრიობის საოცარ მომავალს. ისინი ამბობენ, რომ აქ, დედამიწაზე, მალე იქნება ქვეყნიერება, რომელიც სრულიად გათავისუფლდება ტანჯვისა და ბოროტებისგან. ისინი დარწმუნებულნი არიან, რომ ყოველივე ცუდს მალე მოეღება ბოლო და დამყარდება სრულიად ახალი ქვეყნიერება. ისინი იმასაც ამბობენ, რომ ამ ახალ ქვეყნიერებას უკვე ჩვენს დროში ეყრება საძირკველი!
2 ამ ადამიანებს სწამთ, რომ ახალი ქვეყნიერება თავისუფალი იქნება ომის, სისასტიკის, დანაშაულის, უსამართლობისა და სიღატაკისგან. ეს იქნება ქვეყნიერება ავადმყოფობების, მწუხარების, ცრემლებისა და თვით სიკვდილის გარეშე. იმ დროს ადამიანები გასრულყოფილდებიან და მარადიულად იცხოვრებენ ბედნიერად სამოთხეში დედამიწაზე. მკვდრებიც კი იქნებიან აღდგენილნი და მიეცემათ შესაძლებლობა იცხოვრონ მარადიულად!
3, 4. რატომ არიან ეს ადამიანები დარწმუნებულნი, რომ მათი თვალსაზრისი სწორია?
3 არის კი ეს თვალსაზრისი მომავლის შესახებ მხოლოდ სასურველი ოცნება? — სრულიადაც არა. იგი დაფუძნებულია მტკიცედ დასაბუთებულ რწმენაზე, რომ ეს სამოთხე უსათუოდ იქნება (ებრაელთა 11:1). რატომ არიან ისინი ასე დარწმუნებულნი? იმიტომ, რომ ყოველივე ეს აღგვითქვა სამყაროს ყოვლისშემძლე შემოქმედმა.
4 ღმერთის დანაპირების შესახებ ბიბლია გვამცნობს: „არცერთი სიტყვა არ გაცუდებულა იმ სასიკეთო სიტყვებიდან, რაც თქვენზე უთქვამს უფალს, თქვენს ღმერთს. როგორც აგიხდათ ყველა სასიკეთო სიტყვა, რაც უფალს, თქვენს ღმერთს ჰქონდა ნათქვამი თქვენთვის“. „ღმერთი კაცი არ არის, რომ ცრუობდეს. . . თქვას და არ გააკეთოს? ილაპარაკოს და არ შეასრულოს?“ „დაიფიცა ცაბაოთ უფალმა და თქვა: როგორც ჩავიფიქრე, ისე იქნება; როგორც გადავწყვიტე, ისე მოხდება“ (იესო ნავეს ძე 23:14, 15 რიცხვნი 23:19; ესაია 14:24).
5. რომელი კითხვები ითხოვენ პასუხს?
5 მაგრამ, თუ ღმერთს განზრახული ჰქონდა, რომ დედამიწაზე დაეფუძნებინა ტანჯვისგან თავისუფალი სამოთხე, რატომ დაუშვა ბოროტება? რატომ აყოვნებს ექვსი ათასი წელი, რომ საბოლოოდ მოსპოს უსამართლობა? შეიძლება თუ არა გასულ საუკუნეებში არსებული ტანჯვა მიუთითებდეს იმაზე, რომ, სინამდვილეში, ღმერთი არ ზრუნავს ჩვენზე ან რომ ის საერთოდ არ არსებობს?