ნაწილი 11
უკვე მიმდინარეობს ახალი ქვეყნიერების საძირკვლის ჩაყრა
1, 2. რა ხდება ჩვენს თვალწინ, რითაც სრულდება ბიბლიის წინასწარმეტყველება?
ასევე შესანიშნავია ის ფაქტი, რომ ეშმაკის ძველი ქვეყნიერების გადაგვარების დროს, მიმდინარეობს ახალი ქვეყნიერების საძირკვლის ჩაყრა. ღმერთი ჩვენს თვალწინ აგროვებს ადამიანებს ყველა ხალხებიდან და საფუძველს უყრის დედამიწის იმ ახალ საზოგადოებას, რომელიც ახლო მომავალში შეცვლის დღევანდელ დაყოფილ ქვეყნიერებას. ბიბლიაში, 2 პეტრეს 3:13-ში ამ ახალ საზოგადოებას ეწოდება ‘ახალი დედამიწა’.
2 ბიბლიის წინასწარმეტყველება აგრეთვე ამბობს: „უკანასკნელ დღეებში [დრო, რომელშიც ჩვენ ვცხოვრობთ]. . . დაიძრება უთვალავი ხალხი და იტყვის: მოდი, ავიდეთ უფლის მთაზე [ღმერთისადმი ჭეშმარიტი თაყვანისმცემლობა]. . . გვასწავლოს თავისი გზები და მისი ბილიკებით ვიაროთ“ (ესაია 2:2, 3).
3. ა) რომელ ადამიანებზე სრულდება ესაიას წინასწარმეტყველება? ბ) რას ამბობს ამის შესახებ ბიბლიის უკანასკნელი წიგნი?
3 ამჟამად ეს წინასწარმეტყველება სრულდება იმ ადამიანებზე, რომლებიც ემორჩილებიან ‘ღმერთის გზებს და დადიან მისი ბილიკებით’. ბიბლიის უკანასკნელი წიგნი ამ მშვიდობისმოყვარე, საერთაშორისო საზოგადოებას წარმოგვიდგენს, როგორც ‘უთვალავ ხალხს. . . ყოველი ერიდან და ტომიდან, და ხალხებიდან და ენებიდან’, ღმერთისადმი მსახურებაში გაერთიანებულ ჭეშმარიტ მსოფლიო ძმობას. ბიბლია ასევე ამბობს: „ესენი არიან დიდი ჭირიდან მოსულები“. ეს ნიშნავს, რომ ისინი გადაიტანენ ამ ბოროტი სისტემის აღსასრულს (გამოცხადება 7:9, 14; მათე 24:3).
ჭეშმარიტი საერთაშორისო ძმობა
4, 5. რატომ არის შესაძლებელი იეჰოვას მოწმეების საერთაშორისო ძმობის არსებობა?
4 იეჰოვას მილიონობით მოწმე გულწრფელად ცდილობს ღმერთის მითითებებსა და გზებთან შეთანხმებულად ცხოვრებას. მათი მარადიული სიცოცხლის იმედი დამყარებულია ღმერთის ახალ ქვეყნიერებაზე. ღმერთის მცნებებთან შეთანხმებული ყოველდღიური ცხოვრებით, ისინი ავლენენ თავიანთ მზადყოფნას დაემორჩილონ მის მმართველობას ახლაც და ახალ ქვეყნიერებაშიც. ყველგან, მიუხედავად თავიანთი ეროვნებისა ან რასისა, ისინი ემორჩილებიან ერთსა და იმავე მოთხოვნებს, რომლებიც დადგენილია ღმერთის მიერ მის სიტყვაში. აი, რატომ წარმოადგენენ ისინი ჭეშმარიტ საერთაშორისო ძმობას, ღმერთის მიერ ორგანიზებულ, ახალ მსოფლიო საზოგადოებას (ესაია 54:13; მათე 22:37, 38; იოანე 15:9, 14).
5 იეჰოვას მოწმეები არ ისაკუთრებენ პატივს, რომ არსებობს უნიკალური, საერთაშორისო ძმობა. ისინი აღიარებენ, რომ ეს არის ღმერთის ძლევამოსილი სულის ზეგავლენის შედეგი იმ ადამიანებზე, რომლებიც ემორჩილებიან მის კანონს (საქმე 5:29, 32; გალატელთა 5:22, 23). ეს — ღმერთის ქმედებაა. იესოს სიტყვების თანახმად, „შეუძლებელი კაცთა მიერ, შესაძლებელია ღმერთის მიერ“ (ლუკა 18:27). ამიტომ, ღმერთი, რომელსაც შესწევდა ძალა, შეექმნა მტკიცე სამყარო, აგრეთვე ძლევამოსილია, რომ ჩამოაყალიბოს ახალი ქვეყნიერების მტკიცე საზოგადოება.
6. რატომ შეიძლება იეჰოვას მოწმეთა ძმობას ვუწოდოთ თანამედროვე დროის სასწაული?
6 ამრიგად, ახალი ქვეყნიერებისათვის საფუძვლის ჩაყრაზე დაკვირვებით, რომელიც ახლა მიმდინარეობს, შეიძლება დავინახოთ, თუ როგორი იქნება ღმერთის მმართველობის ფორმა. ის კი, რაც ღმერთმა მოიმოქმედა მოწმეების მიმართ — თანამედროვე დროის სასწაულია. რატომ? იმიტომ, რომ მან იეჰოვას მოწმეები ჭეშმარიტ მსოფლიო ძმობად ჩამოაყალიბა, რომელიც არასოდეს დაიყოფა ნაციონალიზმის, რასიზმისა და რელიგიური ინტერესების გამო. დღეს მოწმეთა რიცხვი მილიონებს აღწევს და მიუხედავად იმისა, რომ ისინი ცხოვრობენ 200-ზე მეტ ქვეყანასა და კუნძულზე, მტკიცედ არიან ერთმანეთთან დაკავშირებულნი, როგორც ერთი სხეული. მთელი ისტორიის მანძილზე არსებული საერთაშორისო უნიკალური ძმობა ნამდვილად არის თანამედროვე დროის სასწაული — ღმერთის ქმედება (ესაია 43:10, 11, 21; საქმე 10:34, 35; გალატელთა 3:28).
ღმერთის ხალხის ამოცნობა
7. იესოს სიტყვების თანახმად, რით ამოიცნობიან მისი ჭეშმარიტი მიმდევრები?
7 კიდევ რით შეგვიძლია გავიგოთ, თუ რომელ ხალხს იყენებს იეჰოვა ახალი ქვეყნიერების საფუძვლად? მაგალითად ვინ ასრულებს იესოს სიტყვებს იოანეს 13:34, 35-დან? მან განაცხადა: „ახალ მცნებას გაძლევთ თქვენ; რათა გიყვარდეთ ერთმანეთი, როგორც მე შეგიყვარეთ თქვენ, თქვენც ისე გიყვარდეთ ერთმანეთი. ჩემი მოწაფეები რომ ხართ, იმით გაიგებენ ყველანი, თუ სიყვარული გექნებათ ურთიერთს შორის“. იეჰოვას მოწმეებს სწამთ ამ სიტყვების და მასთან შეთანხმებულად მოქმედებენ. როგორც ღმერთის სიტყვა ცხადყოფს, მათ აქვთ „გულითადი სიყვარული ერთმანეთისადმი“ (1 პეტრე 4:8). ისინი შეიმოსნენ „სიყვარულით, რომელიც სრულქმნილობის ერთობლიობაა“ (კოლასელთა 3:14). მაშასადამე, „დუღაბი“ რომელიც მთელ მსოფლიოში აერთიანებს მათ, არის ძმური სიყვარული.
8. 1 იოანეს 3:10-12-ის თანახმად, კიდევ რით შეიძლება ამოიცნო ღმერთის ხალხი?
8 ასევე 1 იოანეს 3:10-12-ში ნათქვამია: „ამით შეიცნობიან ღმერთის შვილნი და ეშმაკის შვილნი: ყოველი, ვინც კი არ იქმს სიმართლეს, იგი არ არის ღმერთისაგან, და ისიც, ვისაც თავისი ძმა არ უყვარს. რამეთუ ეს არის ცნობა, რომელიც დასაბამიდან მოისმინეთ, რათა გვიყვარდეს ერთმანეთი. ისე კი არა, როგორც კაენი, რომელიც ბოროტისაგან იყო და მოკლა თავისი ძმა“. ამიტომ, ღმერთის ხალხი, როგორც საერთაშორისო ძმობა, არ მონაწილეობს ძალადობაში.
სხვა განმასხვავებელი ნიშანი
9, 10. ა) რა სამუშაოს მიხედვით შეიძლება უკანასკნელ დღეებში ღმერთის მსახურების ამოცნობა? ბ) როგორ ასრულებენ იეჰოვას მოწმეები მათეს 24:14-ს?
9 არსებობს კიდევ სხვა შესაძლებლობა ღმერთის ხალხის ამოსაცნობად. ქვეყნიერების აღსასრულის შესახებ წინასწარმეტყველებაში იესომ ჩამოთვალა მრავალი რამ, რაც დროის ამ მონაკვეთისთვის, ბოლო დღეებისთვის დამახასიათებელი იქნებოდა (იხილე ნაწილი 9.) ამ წინასწარმეტყველების ძირითადი ნაწილი მოხსენიებულია მათეს 24:14-ში: „და ექადაგება ეს სახარება სასუფევლის შესახებ მთელ მსოფლიოში ყველა ხალხს დასამოწმებლად. და მაშინ მოვა აღსასრული“.
10 ვხედავთ თუ არა ამ წინასწარმეტყველების შესრულებას? — დიახ. 1914 წლიდან, როდესაც დაიწყო უკანასკნელი დღეები, იეჰოვას მოწმეები, იესოს მითითების თანახმად, მთელ მსოფლიოში კარდაკარ ქადაგებენ კეთილ ცნობას, ღმერთის სამეფოს შესახებ (მათე 10:7, 12; საქმე 20:20). ყველა ქვეყანაში მილიონობით მოწმე აკითხავს ადამიანებს, რომ ესაუბროს ახალი ქვეყნიერების შესახებ. ამის შედეგია ის, რომ შენ მიიღე ეს ბროშურა, რადგან იეჰოვას მოწმეების საქმიანობაში ასევე შედის ღმერთის სამეფოს შესახებ მილიარდობით ლიტერატურის დაბეჭდვა და გავრცელება. იცნობ თუ არა კიდევ ვინმეს, ვინც მსოფლიო მასშტაბით კარდაკარ ქადაგებს ღმერთის სამეფოს შესახებ? მარკოზის 13:10 კი ცხადყოფს, რომ „პირველად“ სამქადაგებლო და დამოძღვრის საქმიანობა უნდა შესრულდეს, ვიდრე მოვიდოდეს აღსასრული.
პასუხი, მეორე დიდ საკამათო საკითხზე
11. კიდევ რას აღწევენ იეჰოვას მოწმეები ღმერთის მმართველობისადმი მორჩილებით?
11 ღმერთის პრინციპებისა და კანონებისადმი მორჩილებით იეჰოვას მოწმეები სხვა რამესაც აღწევენ. ისინი აჩვენებენ, რომ სატანა ტყუოდა, როდესაც ამტკიცებდა, რომ ადამიანები ვერ შეძლებენ განსაცდელის დროს დარჩნენ ღმერთის ერთგულნი, და ამით პასუხობენ მეორე დიდ საკამათო საკითხზე, რომელიც ეხება ადამიანთა უმწიკვლოებას (იობი 2:1-5). ყველა ეროვნების მილიონობით ადამიანისგან შემდგარი, იეჰოვას მოწმეთა ორგანიზაცია, როგორც ერთი სხეული, ამჟღავნებს ერთგულებას ღმერთის მმართველობის მიმართ. მიუხედავად თავიანთი არასრულყოფილებისა და სატანის ზემოქმედებისა, უზენაესი მმართველობის შესახებ საკამათო საკითხში ისინი ღმერთის მხარეს იჭერენ.
12. ვის ბაძავენ მოწმეები თავიანთი რწმენით?
12 დღეს, იეჰოვას მილიონობით მოწმე თავისი საქმიანობით უერთდება წარსული დროის მოწმეთა გრძელ რიგს, რომლებმაც ღმერთისადმი ერთგულება გამოავლინეს. ზოგიერთი მათგანი იყო: აბელი, ნოე, იობი, აბრაამი, სარა, ისააკი, იაკობი, დებორა, რუთი, დავითი და დანიელი (ებრაელთა, თავი 11). ბიბლიაში ისინი მოხსენიებულნი არიან, როგორც ‘მოწმეთა ღრუბელი’ (ებრაელთა 12:1). მათ, და ასევე სხვებმაც, ქრისტეს მოციქულების ჩათვლით, შეინარჩუნეს ღმერთისადმი უმწიკვლოება. და თვით იესომ, სრულყოფილი უმწიკვლოების შენარჩუნებით დიდებული მაგალითი მოგვცა.
13. სატანის შესახებ იესოს რომელი სიტყვების ჭეშმარიტება დასტურდება?
13 უმწიკვლოების ამ მაგალითებით დასტურდება იესოს სიტყვები, რომელიც უთხრა რელიგიურ ბელადებს სატანის შესახებ: „ახლა კი ჩემს მოკვლას ეძიებთ, კაცისას, რომელმაც გითხრათ ჭეშმარიტება, რაც ღმერთისაგან მოვისმინე. . . თქვენი მამა არის ეშმაკი და მამათქვენის გულისთქმის შესრულება გწადიათ. ის კაცისმკვლელი იყო თავიდან და ჭეშმარიტებაში ვერ დადგა, რადგან არაა მასში ჭეშმარიტება. როცა სიცრუეს ამბობს, თავისას ამბობს, რადგან ცრუა იგი და სიცრუის მამაა“ (იოანე 8:40, 44).
რას აირჩევ?
14. როგორ ეყრება საძირკველი ახალ ქვეყნიერებას?
14 ახალი ქვეყნიერების საფუძველი, რომელიც ღმერთის მიერ ყალიბდება იეჰოვას მოწმეთა საერთაშორისო საზოგადოებად, დღითიდღე ძლიერდება. ყოველწლიურად ასიათასობით ადამიანი, ზუსტ შემეცნებაზე დამყარებული ნების თავისუფლების გამოყენებით, აღიარებს ღმერთის მმართველობას. ისინი ხდებიან ახალი ქვეყნიერების საზოგადოების ნაწილი, უზენაესი ხელისუფლების შესახებ საკამათო საკითხში იკავებენ ღმერთის მხარეს და ამტკიცებენ, რომ სატანა — ცრუა.
15. რა გამორჩევის საქმეს ატარებს იესო ჩვენს დღეებში?
15 ღმერთის მმართველობის არჩევით, ისინი ემზადებიან, რომ „ცხვრებისა“ და „თხების“ გამორჩევის დროს იყვნენ ღირსნი დადგნენ ქრისტეს „მარჯვნივ“. უკანასკნელი დღეების შესახებ წინასწარმეტყველებაში იესომ თქვა: „და შეკრებილი იქნება მის წინაშე ყველა ერი, და გამოარჩევს ერთიმეორისაგან, როგორც მწყემსი გამოარჩევს ცხვრებს თხებისაგან. და დააყენებს ცხვრებს თავის მარჯვნივ და თხებს — მარცხნივ“. ცხვრები — არიან თავმდაბალი ადამიანები, რომლებიც ღმერთის მმართველობის მორჩილებით ერთიანდებიან ქრისტეს ძმებთან და მხარს უჭერენ მათ. თხები კი — ჯიუტი ადამიანები არიან, რომლებიც უარყოფენ ქრისტეს ძმებს და არ ემორჩილებიან ღმერთის მმართველობას. რა იქნება ამ ‘გამორჩევის’ შედეგი? იესომ თქვა: „და წავლენ ესენი [თხები] საუკუნო სატანჯველს, ხოლო [ცხვრები] — საუკუნო ცხოვრებაში“ (მათე 25:31-46).
16. რა უნდა აკეთო, თუ გსურს იცხოვრო მომავალ სამოთხეში?
16 ნამდვილად, ღმერთი ზრუნავს ჩვენზე! სულ მალე ის დაამყარებს დედამიწაზე მშვენიერ სამოთხეს. გსურს თუ არა იცხოვრო დედამიწაზე სამოთხეში? თუ დიახ, მაშინ გამოამჟღავნე ღმერთის მზრუნველობის მიმართ მადლიერება მის შესახებ შემეცნების შეძენითა და ნასწავლის პრაქტიკაში გამოყენებით. „ეძებეთ უფალი, როცა შეიძლება მისი პოვნა; მოუხმეთ მას, როცა ახლოს არის იგი. მიატოვოს ბოროტეულმა თავისი გზა და ცოდვილმა კაცმა — თავისი ზრახვები; მიაქციოს უფლისკენ და ის შეიწყალებს მას, და ჩვენი ღმერთისკენ, რადგან მრავალგზის მიმტევებელია“ (ესაია 55:6, 7).
17. რატომ არ შეიძლება დროის დაკარგვა, როცა არჩევანს ვაკეთებთ, თუ ვის ვემსახუროთ?
17 არ შეიძლება დროის დაკარგვა. ამ სისტემის აღსასრული ძალიან ახლოსაა. ღმერთის სიტყვა გვირჩევს: „ნუ შეიყვარებთ ქვეყნიერებას, ნურც იმას, რაც ქვეყნიერებაზეა: ვისაც ქვეყნიერება უყვარს, მასში არ არის მამის სიყვარული. . . და ქვეყნიერებაც გადადის და მისი გულისთქმაც, ღმერთის ნების აღმსრულებელი კი რჩება უკუნისამდე“ (1 იოანე 2:15-17).
18. მოქმედების როგორი წესი მოგცემს შესაძლებლობას, რომ რწმენით ელოდო ცხოვრებას ღმერთის ახალ ქვეყნიერებაში?
18 ახლა ღმერთის ხალხი ემზადება ახალ ქვეყნიერებაში მარადიული სიცოცხლისთვის. ისინი იძენენ სულიერ შემეცნებას და სამოთხის შექმნისთვის აუცილებელ სხვა ხელობებს. ჩვენი დიდი სურვილია, რომ შენ აირჩიო ღმერთი, როგორც მმართველი და მხარი დაუჭირო სიცოცხლის გადამრჩენ სამუშაოს, რომელიც მიმდინარეობს დღეს მთელ დედამიწაზე. შეისწავლე ბიბლია იეჰოვას მოწმეებთან ერთად და შეიძინე შემეცნება ღმერთის შესახებ, რომელიც ნამდვილად ზრუნავს შენზე და რომელიც ბოლოს მოუღებს ტანჯვა-წამებას. ასეთი მოქმედებით შეძლებ გახდე ახალი ქვეყნიერების საძირკვლის ნაწილი. მაშინ შეძლებ რწმენით ელოდო ღმერთის მოწონებას და მარადიულ ცხოვრებას შესანიშნავ ახალ ქვეყნიერებაში.
[სურათი 31 გვერდზე]
იეჰოვას მოწმეები შეადგენენ ჭეშმარიტ საერთაშორისო ძმობას.
[სურათი 32 გვერდზე]
ღმერთის ახალ ქვეყნიერებას ახლა ეყრება საძირკველი.