ცრუ რელიგიები ხალხს არასწორ წარმოდგენას უქმნიან ღმერთზე

თუკი ღმერთი მოსიყვარულეა, რატომ სჩადიან რელიგიები მისი სახელით ამდენ ბოროტებას? იმიტომ რომ, ისინი არ იცნობენ ჭეშმარიტ ღმერთს. მეტიც, სიმართლეს ამახინჯებენ და ღვთის შესახებ სიცრუეს ავრცელებენ. როგორ აკეთებენ ისინი ამას? რას ფიქრობს ღმერთი ამ ყველაფერზე და რა ზომებს მიიღებს მდგომარეობის გამოსასწორებლად?

1. როგორ უქმნიან ცრუ რელიგიები ხალხს არასწორ წარმოდგენას ღმერთზე თავიანთი მოძღვრებებით?

რელიგიურმა წინამძღოლებმა „ღვთის ჭეშმარიტება სიცრუეზე გაცვალეს“ (რომაელები 1:25). მაგალითად, რელიგიების უმრავლესობა ღვთის სახელს უმალავს თავის მიმდევრებს. არადა ბიბლიიდან ნათლად ჩანს, რომ ღმერთი სახელით უნდა მოვიხსენიოთ (რომაელები 10:13, 14). ზოგიერთი რელიგიური წინამძღოლი, თუკი რამ ცუდი ხდება, ყველაფერში ღმერთს ადანაშაულებს. მაგრამ ეს სიცრუეა, რადგან ღმერთი არასდროს იწვევს ადამიანთა ტანჯვას (წაიკითხეთ იაკობის 1:13). სამწუხაროდ, რელიგიების მიერ გავრცელებულმა სიცრუემ ბევრი ადამიანი ჩამოაშორა ღმერთს.

2. როგორ უქმნიან ცრუ რელიგიები ხალხს არასწორ წარმოდგენას ღმერთზე თავიანთი საქმეებით?

ისინი არ იზიარებენ იეჰოვას დამოკიდებულებას ადამიანების მიმართ. ბიბლიაში ნათქვამია, რომ ცრუ რელიგიების „ცოდვები ცას მისწვდა“ (გამოცხადება 18:5). საუკუნეებია, რელიგიები ერევიან პოლიტიკაში, მხარს უჭერენ ომებს, იწონებენ ხალხის ხოცვა-ჟლეტას ან თავად ხდებიან ამის მიზეზი. ზოგი რელიგიური წინამძღოლი თავის მრევლს ფულს სძალავს, ფუფუნებაში რომ იცხოვროს. მათი საქმეები იმაზე მოწმობს, რომ ისინი არ იცნობენ ღმერთს. სწორედ ამიტომ არა აქვთ უფლება, რომ მისი სახელით ილაპარაკონ ან რამე გააკეთონ (წაიკითხეთ 1 იოანეს 4:8).

3. რას ფიქრობს ღმერთი ცრუ რელიგიებზე?

თუ ჩვენ გვაშფოთებს ცრუ რელიგიების საქმეები, წარმოგიდგენიათ, რას გრძნობს იეჰოვა?! მას უყვარს ადამიანები, მაგრამ დაუსჯელს არ დატოვებს რელიგიურ წინამძღოლებს, რომლებიც ჩირქს სცხებენ მის სახელს და მორწმუნე ხალხს უსამართლოდ ექცევიან. ღმერთი გვპირდება, რომ ყველა ცრუ რელიგია განადგურდება და „აღარ იარსებებს“ (გამოცხადება 18:21). იგი მალე შეასრულებს თავის პირობას (გამოცხადება 18:8).

გაიღრმავეთ ცოდნა

4. ღმერთი არ იწონებს ყველა რელიგიას

ბევრი ფიქრობს, რომ ყველა რელიგიას ღმერთამდე მივყავართ. სიმართლეს შეესაბამება ეს მოსაზრება? წაიკითხეთ მათეს 7:13, 14 და იმსჯელეთ ქვემოთ დასმულ კითხვაზე:

• როგორ აღწერს ბიბლია გზას, რომელსაც სიცოცხლემდე მივყავართ?

ნახეთ ვიდეო და იმსჯელეთ ქვემოთ დასმულ კითხვაზე:

ვიდეო: „იწონებს ღმერთი ყველანაირ თაყვანისცემას?“ (ნაწყვეტი) (3:22)

• ასწავლის ბიბლია, რომ ღვთისთვის ყველა რელიგია მოსაწონია?

5. ცრუ რელიგიები არ გამოირჩევიან სიყვარულით

ცრუ რელიგიები აქტიურად უჭერენ მხარს ომებს, რითაც ადამიანებს არასწორ წარმოდგენას უქმნიან ღმერთზე. მაგალითისთვის ნახეთ ვიდეო და იმსჯელეთ ქვემოთ დასმულ კითხვებზე:

ვიდეო: „რა როლი ითამაშა რელიგიამ მეორე მსოფლიო ომის დროს?“ (2:22)

• რა პოზიცია დაიკავეს ეკლესიებმა მეორე მსოფლიო ომის დროს?

• თქვენი აზრით, გამართლებულია მათი საქციელი?

წაიკითხეთ იოანეს 13:34, 35 და 17:16; შემდეგ იმსჯელეთ ქვემოთ დასმულ კითხვებზე:

• იწონებს ღმერთი რელიგიების მონაწილეობას ომებში?

• ცრუ რელიგიები ბევრ ბოროტებას სჩადიან. რა მეტყველებს იმაზე, რომ ისინი სიყვარულით არ გამოირჩევიან?

6. ღმერთს სურს, ცრუ რელიგიის ტყვეობისგან გაგვათავისუფლოს

წაიკითხეთ გამოცხადების 18:4a და იმსჯელეთ ქვემოთ დასმულ კითხვაზე:

• როგორ მოქმედებს თქვენზე იმის ცოდნა, რომ ღმერთს მათი დახმარება სურს, ვინც ცრუ რელიგიამ შეცდომაში შეიყვანა?

7. არ შეწყვიტოთ ღმერთთან დაახლოება

რატომ არ უნდა დაგაკარგვინოთ ღვთისადმი რწმენა რელიგიების ბოროტმა საქმეებმა? წარმოიდგინეთ, რომ შვილი მამის დარიგებას არად აგდებს, სახლიდან მიდის და ცუდ გზას ადგება. მამა არ იწონებს შვილის საქციელს. იქნებოდა სწორი, მამა დაგვედანაშაულებინა შვილის ურჩობაში?!

• რატომ არ უნდა დავადანაშაულოთ იეჰოვა ცრუ რელიგიების ბოროტი საქმეების გამო და რატომ არ უნდა შევწყვიტოთ მასთან დაახლოება?

შეჯამება:

ცრუ რელიგიები არასწორ წარმოდგენას უქმნიან ხალხს ღმერთზე თავიანთი მოძღვრებებითა და საქმეებით. ღმერთი ბოლოს მოუღებს ცრუ რელიგიებს.

გასამეორებელი კითხვები:

• რას ფიქრობთ ცრუ რელიგიების მოძღვრებებსა და საქმეებზე?

• რა დამოკიდებულება აქვს იეჰოვას ცრუ რელიგიების მიმართ?

• რა ელით ცრუ რელიგიებს?

გაიგეთ მეტი:

გაიგეთ, რატომ არ იწონებს ღმერთი ყველა რელიგიას.

„ყველა რელიგია ერთია? ყველა რელიგიას მიჰყავს ადამიანი ღმერთამდე?“ (სტატია ვებგვერდზე)

რატომ სურს იეჰოვას, რომ სხვებთან ერთად ვცეთ მას თაყვანი?

„აუცილებელია, რომელიმე რელიგიას მივეკუთვნებოდეთ?“ (სტატია ვებგვერდზე)

ერთი მღვდელი თავისი მრწამსის სისწორეში დაეჭვდა, მაგრამ ამან ჭეშმარიტების ძიებაში ხელი ვერ შეუშალა.

„რატომ დატოვა მღვდელმა ეკლესია?“ („გამოიღვიძეთ!“, თებერვალი, 2015)

საუკუნეებია, რელიგიები სიცრუეს ავრცელებენ ღმერთზე, რის გამოც ბევრს ჰგონია, რომ იგი სასტიკია და ჩვენი ბედი სულ არ ანაღვლებს. გაიგეთ, რა სიცრუეა გავრცელებული ღვთის შესახებ.

„ღმერთზე გავრცელებული სიცრუე“ („საგუშაგო კოშკი“, 1 ნოემბერი, 2013)