ᲡᲐᲡᲬᲐᲕᲚᲝ ᲡᲢᲐᲢᲘᲐ 29
ᲡᲘᲛᲦᲔᲠᲐ 121 გვჭირდება თავშეკავება
იფრთხილეთ, რომ არ ცდუნდეთ!
„იფხიზლეთ და განუწყვეტლივ ილოცეთ, რათა არ ცდუნდეთ“ (ᲛᲐᲗ. 26:41).
ᲛᲘᲖᲐᲜᲘ
ამ სტატიიდან დავინახავთ, რამ შეიძლება მიგვიყვანოს ცოდვამდე და რა უნდა გავაკეთოთ, რომ არ ვცდუნდეთ.
1, 2. ა) რის შესახებ გააფრთხილა იესომ მოწაფეები? ბ) რატომ მიატოვეს მოწაფეებმა იესო? (იხილეთ აგრეთვე სურათები).
ᲘᲔᲡᲝᲡ სიკვდილის წინა ღამეს მოციქულები ირწმუნებოდნენ, რომ არ მიატოვებდნენ თავიანთ უფალს (მათ. 26:35). ფაქტია, ამის დიდი სურვილი ჰქონდათ, თუმცა ვერ ხვდებოდნენ, რომ რთულ ვითარებაში შეიძლება ადვილი არ ყოფილიყო ასე მოქცევა. ამიტომაც იესომ გააფრთხილა ისინი: „იფხიზლეთ და განუწყვეტლივ ილოცეთ, რათა არ ცდუნდეთ. სული მონდომებულია, ხორცი კი – სუსტი“a (მათ. 26:41). როგორც ამ სიტყვებიდან გამოჩნდა, იესოს კარგად ესმოდა, რომ არასრულყოფილი ადამიანი დაზღვეული არაა შეცდომებისგან. თუმცა მისი ნათქვამი მოციქულებისთვის ერთგვარი გაფრთხილებაც იყო, რომ ზედმეტად თავდაჯერებულები არ გამხდარიყვნენ.
2 სამწუხაროდ, მოწაფეებმა არ გაითვალისწინეს იესოს რჩევა. როცა მათი მოძღვარი შეიპყრეს, შეშინებულებმა ზუსტად ის გააკეთეს, რასაც ირწმუნებოდნენ, რომ არასდროს გააკეთებდნენ – მათ მიატოვეს ის (მათ. 26:56).
იესომ მოწაფეები გააფრთხილა, რომ ეფხიზლათ, რათა არ ცდუნებულიყვნენ. თუმცა მოწაფეებმა არ გაითვალისწინეს რჩევა და მიატოვეს ის (იხილეთ აბზაცები 1, 2).
3. ა) რატომ არის საშიში ზედმეტი თავდაჯერებულობა? ბ) რას განვიხილავთ ამ სტატიაში?
3 ჩვენც გადაწყვეტილი გვაქვს, რომ არ ჩამოვშორდეთ იეჰოვას. თუმცა არასრულყოფილების გამო არც ჩვენ ვართ დაზღვეული შეცდომებისგან (რომ. 5:12; 7:21–23). ჩვენ ყველანაირად უნდა ვეცადოთ, არ გავხდეთ ზედმეტად თავდაჯერებულები, რადგან ცდუნების წინაშე შეიძლება ნებისმიერ მომენტში აღმოვჩნდეთ. ამიტომ ძალიან მნიშვნელოვანია, გავითვალისწინოთ იესოს რჩევა და ვიფხიზლოთ. ეს სტატია სწორედ ამაში დაგვეხმარება. თავიდან იმაზე ვისაუბრებთ, როგორ გავერკვეთ, პირადად ჩვენთვის რა შეიძლება იყოს მაცდუნებელი. შემდეგ იმაზე ვიმსჯელებთ, რა უნდა გავაკეთოთ, რომ არ ვცდუნდეთ, ბოლოს კი განვიხილავთ, რა დაგვეხმარება, რომ არასდროს მოვადუნოთ სიფხიზლე.
ᲠᲐ ᲨᲔᲘᲫᲚᲔᲑᲐ ᲘᲧᲝᲡ ᲩᲕᲔᲜᲗᲕᲘᲡ ᲛᲐᲪᲓᲣᲜᲔᲑᲔᲚᲘ?
4, 5. მხოლოდ მძიმე ცოდვების ჩადენას უნდა ვერიდოთ? ახსენით.
4 იეჰოვასთან ჩვენს მეგობრობას შეიძლება დროთა განმავლობაში პატარ-პატარა შეცდომებმაც გამოუთხაროს ძირი და საბოლოოდ მძიმე ცოდვაც კი ჩავიდინოთ.
5 მოწაფე იაკობმა თქვა: „თითოეულს სცდის საკუთარი სურვილი, რომელიც აიყოლიებს და აცდუნებს მას“ (იაკ. 1:14). გამოდის, რომ გამონაკლისი არავინ ვართ. თუმცა თითოეული ჩვენგანისთვის შეიძლება სხვადასხვა რამ აღმოჩნდეს მაცდუნებელი. ზოგისთვის ეს შეიძლება იყოს უზნეობის ჩადენის სურვილი თუ რაიმე უწმინდური ჩვევა, მაგალითად, მასტურბაცია და პორნოგრაფიის ყურება. ზოგს კი ისეთი მანკიერი თვისებები ექცეს მახედ, როგორებიცაა სიფიცხე, სიამაყე და კაცთმოშიშება.
6. რას უნდა გავუსწოროთ თვალი?
6 იცით, პირადად თქვენთვის რა შეიძლება აღმოჩნდეს მაცდუნებელი? სახიფათო მდგომარეობაში ჩავიგდებთ თავს, თუ ვიფიქრებთ, რომ შეცდომა არ მოგვივა ან თვალს დავხუჭავთ საკუთარ სისუსტეებზე (1 იოან. 1:8). როგორც პავლეს სიტყვებიდან ჩანს, თუ არ იფრთხილებს, სულიერად მოწიფულიც შეიძლება ცდუნდეს (გალ. 6:1). ამიტომ ძალიან მნიშვნელოვანია, გულწრფელები ვიყოთ საკუთარ თავთან და თვალი გავუსწოროთ ჩვენს სისუსტეებს (2 კორ. 13:5).
7. როგორ უნდა მოვიქცეთ? მოიყვანეთ მაგალითი.
7 როგორ უნდა მოვიქცეთ მას შემდეგ, რაც განვსაზღვრავთ, რა არის ჩვენი სუსტი მხარეები? მაგალითად, რას აკეთებდნენ ძველად, გალავნიანი ქალაქი რომ დაეცვათ? რადგან გალავნის ყველაზე დაუცველი ადგილი კარიბჭე იყო, ყველაზე მეტ დაცვასაც იქ აყენებდნენ. ჩვენც ასე უნდა მოვიქცეთ, განსაკუთრებული ყურადღება მივაქციოთ იმ მხარეებს, რომლებშიც მოვიკოჭლებთ და მთელი ძალების მობილიზება სწორედ იქ მოვახდინოთ (1 კორ. 9:27).
ᲠᲐ ᲣᲜᲓᲐ ᲒᲐᲕᲐᲙᲔᲗᲝᲗ, ᲠᲝᲛ ᲐᲠ ᲕᲪᲓᲣᲜᲓᲔᲗ?
8, 9. როგორ უნდა მოქცეულიყო იგავების მე-7 თავში მოხსენიებული ახალგაზრდა, რომ ცოდვა არ ჩაედინა? (იგავები 7:8, 9, 13, 14, 21).
8 რა უნდა გავაკეთოთ, რომ არ ვცდუნდეთ? ვნახოთ, რისი სწავლა შეგვიძლია იგავების მე-7 თავში მოხსენიებული ახალგაზრდისგან, რომელიც უზნეობის მახეში გაება. ამ თავიდან ჩანს, რომ სანამ ის უზნეო ქალს გაჰყვებოდა, არაერთი შეცდომა დაუშვა.
9 დავიწყოთ იმით, რომ ის საღამო ხანს „გაუყვა გზას [და] იმ ქალის ქუჩაზე შეუხვია“, შემდეგ კი პირდაპირ „მისი სახლისკენ გაემართა“ (წაიკითხეთ იგავების 7:8, 9). ის არც ამ ქალის დანახვაზე მიტრიალდა და წინააღმდეგობა არ გაუწია, როცა მან აკოცა. შემდეგ ამ ქალმა იმაზე დაიწყო საუბარი, თუ როგორ შესწირა სამშვიდობო მსხვერპლი. ახალგაზრდამ ამასაც მოუსმინა და, როგორც ჩანს, დაიჯერა, რომ ის ცუდი ქალი არ იყო (წაიკითხეთ იგავების 7:13, 14, 21). ამდენი შეცდომა რომ არ დაეშვა, ის ცდუნების წინაშე არ აღმოჩნდებოდა და ცოდვასაც აირიდებდა თავიდან.
10. რა შეიძლება დაემართოს ნებისმიერ ქრისტიანს?
10 ის, რაც წიგნ „იგავებში“ მოხსენიებულ ახალგაზრდას დაემართა, შეიძლება ნებისმიერ ქრისტიანს დაემართოს. მაგალითად, ბევრს, ვინც მძიმე ცოდვა ჩაიდინა, თავიდან ეგონა, რომ მოულოდნელად აღმოჩნდა ცდუნების წინაშე და ვერ შეძლო თავის გაკონტროლება. თუმცა მას შემდეგ, რაც გააანალიზეს მომხდარი, მიხვდნენ, რომ, სინამდვილეში, ცოდვას წინ არაერთი არასწორი ნაბიჯი უძღოდა. მაგალითად, შეიძლება ისეთ ადამიანებს დაუახლოვდნენ, რომლებმაც ცუდი ზეგავლენა მოახდინეს მათზე, გართობის დროს მოადუნეს სიფხიზლე, საეჭვო ვებსაიტებს სტუმრობდნენ ან ისეთ ადგილებში დადიოდნენ, სადაც ქრისტიანის ადგილი ნამდვილად არ იყო. მათ შეიძლება ლოცვაც შეწყვიტეს, აღარც ბიბლიას კითხულობდნენ, აღარც კრების შეხვედრებს ესწრებოდნენ და მსახურებაშიც აღარ იღებდნენ მონაწილეობას. დიახ, როცა ქრისტიანი ცოდვას ჩადის, იმ ახალგაზრდისა არ იყოს, ეს მოულოდნელად ნამდვილად არ ხდება.
11. რას უნდა მოვერიდოთ?
11 როგორც დავინახეთ, ჩვენთვის მთავარი მხოლოდ ის არ უნდა იყოს, რომ მძიმე ცოდვა არ ჩავიდინოთ. ჩვენ იმასაც უნდა ვეცადოთ, რომ არ გადავდგათ მცდარი ნაბიჯები, რომელიც ცოდვამდე მიგვიყვანდა. სწორედ ამას გაუსვა ხაზი სოლომონმა უგუნურ ახალგაზრდაზე საუბრის ბოლოს: „ნუ იხეტიალებ მის [ანუ უზნეო ქალის] ბილიკებზე“ (იგავ. 7:25). მან უზნეო ქალის შესახებ ასეთი გაფრთხილებაც დაწერა: „თავი შორს დაიჭირე მისგან და მისი სახლის შესასვლელს ნუ გაეკარები“ (იგავ. 5:3, 8). დიახ, რომ არ შევცოდოთ, ყველაფერს უნდა მოვერიდოთ, რაც ცოდვის გზაზე დაგვაყენებდა.b ჩვენ შეიძლება ისეთი რაღაცებზეც კი მოგვიწიოს უარის თქმა, რაც, თავისთავად, ქრისტიანისთვის მიუღებელი არ არის, თუმცა პირადად ჩვენთვის იყოს მაცდუნებელი (მათ. 5:29, 30).
12. რისი სწავლა შეგვიძლია იობისგან? (იობი 31:1).
12 იობს გააზრებული ჰქონდა, რომ ერთი ნაბიჯიც კი არ უნდა გადაედგა ცოდვისკენ. ამიტომაც თქვა: „პირობა მივეცი ჩემს თვალებს და როგორ შევხედავდი ქალწულს გულისთქმით?!“ (წაიკითხეთ იობის 31:1). ჩვენც მტკიცედ უნდა გვქონდეს გადაწყვეტილი, რომ მოვერიდოთ ყველაფერს, რის გამოც შეიძლება ცდუნების წინაშე აღმოვჩნდეთ.
13. რატომ არის მნიშვნელოვანი ფიქრების გაკონტროლება? (იხილეთ აგრეთვე სურათები).
13 ფიქრების კონტროლი ძალიან მნიშვნელოვანია (გამ. 20:17). ზოგს ჰგონია, რომ თუ ცუდს არაფერს გააკეთებს, შეუძლია, რაზეც უნდა იმაზე იფიქროს. თუმცა ეს თავის მოტყუებაა და მეტი არაფერი. სინამდვილეში, თუ ადამიანი გასაქანს მისცემს არასწორ ფიქრებს, სურვილი ისე გაუძლიერდება, რომ საბოლოოდ შეიძლება ვეღარ გაუძლოს ცდუნებას და მძიმე ცოდვაც კი ჩაიდინოს. ასე რომ, თუ არასწორი ფიქრები გაგვიჩნდება, რაშიც, თავისთავად, გასაკვირი არაფერია, მაშინვე უნდა უკუვაგდოთ ისინი და ისეთ რამეზე გადავიტანოთ ყურადღება, რაც მოსაწონია ღვთისთვის (ფილ. 4:8; კოლ. 3:2; იაკ. 1:13–15).
ჩვენ უნდა მოვერიდოთ ყველაფერს, რის გამოც შეიძლება ცდუნების წინაშე აღმოვჩნდეთ (იხილეთ აბზაცი 13).
14. კიდევ რა გაგვიადვილებს სწორად მოქცევას?
14 კიდევ რა უნდა გავაკეთოთ? მნიშვნელოვანია, დავრწმუნდეთ, რომ იეჰოვას კანონების თანახმად ცხოვრება საუკეთესო არჩევანია. ზოგჯერ შეიძლება განსხვავებული აზრი გვქონდეს ან ისეთი რამისკენ მიგვიწევდეს გული, რასაც იეჰოვა არ იწონებს. თუმცა, თუ ყველანაირად ვეცდებით, დავრწმუნდეთ, რომ მისი კანონების მორჩილება სასიკეთოა ჩვენთვის, ნამდვილ ბედნიერებას გამოვცდით.
15. რატომ არის მნიშვნელოვანი, შევიყვაროთ ის, რაც კარგია?
15 სწორად მოქცევის სურვილი რომ გავიძლიეროთ და თავი ავარიდოთ მაცდუნებელ სიტუაციებს, უნდა შევიძულოთ „ის, რაც ცუდია“ და შევიყვაროთ „ის, რაც კარგია“ (ამოს. 5:15). ამ შემთხვევაში მაშინაც კი არ ავყვებით ცდუნებას, თუ მოულოდნელად აღმოვჩნდებით მაცდუნებელ სიტუაციაში.
16. კიდევ რა გვიძლიერებს სწორად მოქცევის სურვილს? (იხილეთ აგრეთვე სურათები).
16 ქრისტიანულ შეხვედრებზე დასწრება და მსახურებაში აქტიური მონაწილეობა სწორად მოქცევის სურვილს გვიძლიერებს. თანაც ამ დროს ნაკლებია იმის ალბათობა, რომ რაიმე ცუდის გაკეთება მოგვინდეს (მათ. 28:19, 20; ებრ. 10:24, 25). ღვთის სიტყვის შესწავლა და მასზე ფიქრიც გაგვიძლიერებს „იეჰოვას კანონის“ სიყვარულს და ბოროტების სიძულვილს (იეს. 1:8; ფსალმ. 1:2, 3; 119:97, 101). და ბოლოს, უნდა გავითვალისწინოთ იესოს რჩევაც: „განუწყვეტლივ ილოცეთ, რათა არ ცდუნდეთ“ (მათ. 26:41). ამგვარად, იეჰოვას მივცემთ შესაძლებლობას, დახმარება აღმოგვიჩინოს ცდუნებებთან ბრძოლაში (იაკ. 4:8).
კარგი სულიერი განრიგი დაგვეხმარება, არ ავყვეთ ცდუნებას (იხილეთ აბზაცი 16).c
ᲐᲠᲐᲡᲓᲠᲝᲡ ᲛᲝᲐᲓᲣᲜᲝᲗ ᲡᲘᲤᲮᲘᲖᲚᲔ
17. რა სისუსტე ახსენებდა პეტრეს გამუდმებით თავს?
17 ზოგიერთ სისუსტეს შეიძლება ბოლომდე ვძლიოთ, თუმცა ზოგიერთმა კვლავ და კვლავ შეგვახსენოს თავი. ეს კარგად ჩანს მოციქული პეტრეს მაგალითიდან. კაცთმოშიშების გამო მან სამჯერ უარყო იესო (მათ. 26:69–75). თუმცა მოგვიანებით, როცა სინედრიონის წინაშე წარადგინეს, მან ისე გაბედულად ისაუბრა, რომ კაცი იფიქრებდა, სძლიაო თავის სისუსტეს (საქ. 5:27–29). მაგრამ მოგვიანებით კაცთმოშიშებამ კვლავაც შეახსენა პეტრეს თავი და „წინადაცვეთილთა შიშით“ რაღაც პერიოდი შეწყვიტა უცხოტომელ ქრისტიანებთან ურთიერთობა (გალ. 2:11, 12). შესაძლოა პეტრე სიცოცხლის ბოლომდეც კი ებრძოდა ამ სისუსტეს.
18. რატომ არ უნდა მოვადუნოთ სიფხიზლე?
18 პეტრეს მსგავსად შეიძლება ჩვენც ვიფიქროთ, რომ გარკვეულ სისუსტეს მოვერიეთ, თუმცა მოგვიანებით მან კვლავაც შეგვახსენოს თავი. ზუსტად ასე მოხდა ერთი ძმის შემთხვევაში, რომელიც ერთ დროს პორნოდამოკიდებული იყო. ის ამბობს: „ათი წლის განმავლობაში საერთოდ არ მიყურებია პორნოგრაფიისთვის. მეგონა, საბოლოოდ დავძლიე ეს პრობლემა. თუმცა მოგვიანებით მივხვდი, რომ ეს ასე არ იყო. ხელსაყრელ მომენტში სისუსტემ ისევ შემახსენა თავი“. საბედნიეროდ, ამ ძმამ შეძლო ჩავარდნის შემდეგ ფეხზე წამოდგომა. ის იმ დასკვნამდე მივიდა, რომ ამ სისუსტესთან ბრძოლა შეიძლება ქვეყნიერების ბოლომდეც მოუწიოს და არცერთი წუთი არ უნდა მოადუნოს სიფხიზლე. ამის შემდეგ ის კიდევ უფრო მეტ სიფრთხილეს იჩენს. თანაც ბრძოლას მხოლოდ საკუთარი ძალებით არ ცდილობს – მას გვერდში კრების უხუცესები და მეუღლე უდგანან.
19. როგორ უნდა მოვიქცეთ, თუ კვლავაც გვიწევს რაიმე სისუსტესთან ბრძოლა?
19 როგორ უნდა მოვიქცეთ, თუ კვლავაც გვიწევს რაიმე სისუსტესთან ბრძოლა? ისევ და ისევ უნდა გავითვალისწინოთ იესოს რჩევა: „იფხიზლეთ“. ჩვენ მაშინაც არ უნდა მოვადუნოთ სიფხიზლე, როცა, ერთი შეხედვით, ყველაფერი რიგზეა (1 კორ. 10:12). გარდა ამისა, ყველანაირად უნდა ვერიდოთ მაცდუნებელ სიტუაციებს და კვლავაც მივმართოთ ბრძოლის ნაცად მეთოდებს. მაშ არასდროს შევწყვიტოთ ბრძოლა, რადგან, როგორც იგავების 28:14-ში წერია, „ბედნიერია კაცი, რომელიც მუდამ ფრთხილობს“ (2 პეტ. 3:14).
ᲫᲐᲚᲘᲡᲮᲛᲔᲕᲐ ᲓᲐᲒᲘᲤᲐᲡᲓᲔᲑᲐᲗ
20, 21. ა) როგორ დაგვიფასდება ძალისხმევა? ბ) რას გააკეთებს იეჰოვა, თუ არ შევწყვეტთ ბრძოლას? (2 კორინთელები 4:7).
20 თუ ყველანაირად ვეცდებით სიფხიზლის შენარჩუნებას, შეგვიძლია დარწმუნებული ვიყოთ, რომ ძალისხმევა დაგვიფასდება. იეჰოვამ ისე შეგვქმნა, რომ ნამდვილ ბედნიერებას მისი ნორმებით ცხოვრება გვანიჭებს, რასაც ვერც კი შეედრება „წარმავალი ხორციელი სიამე“ (ებრ. 11:25; დაბ. 1:27; ფსალმ. 19:8). თანაც, როცა იეჰოვას ნორმების თანახმად ვცხოვრობთ, სუფთა სინდისი და იმის იმედი გვაქვს, რომ ერთ დღესაც მარადიული ცხოვრებით გავიხარებთ (1 ტიმ. 6:12; 2 ტიმ. 1:3; იუდ. 20, 21).
21 ფაქტია, სისუსტეებთან ბრძოლა არ არის მარტივი. თუმცა ამ ბრძოლაში მარტო არ ვართ, იეჰოვა ჩვენ გვერდითაა. როგორც 2 კორინთელების 4:7-დან (წაიკითხეთ) ვიგებთ, იეჰოვა მზადაა, მოგვცეს „ძალა, რომელიც ჩვეულებრივს აღემატება“. ეს იმაზე მიანიშნებს, რომ ამ ბრძოლაში წარმატების მისაღწევად ჩვეულებრივი ძალაცაა საჭირო და აღმატებულიც, ანუ ჩვენი გასაკეთებელი ჩვენ უნდა გავაკეთოთ და არასდროს მოვადუნოთ სიფხიზლე. ამ შემთხვევაში იეჰოვა, დაპირებისამებრ, საჭირო დროს აღმატებულ ძალას მოგვცემს (1 კორ. 10:13). ასე რომ, ეჭვი არ შეგეპაროთ, იეჰოვას დახმარებით ყველაფერი გამოგივათ!
ᲡᲘᲛᲦᲔᲠᲐ 47 ყოველდღე ლოცვით მიმართეთ იეჰოვას
a ᲒᲐᲜᲛᲐᲠᲢᲔᲑᲐ: მათეს 26:41-ში მოხსენიებული „სული“ მიანიშნებს ძალაზე, რომელიც ადამიანს რაიმე ემოციას უჩენს ან რაიმეს გაკეთებისკენ უბიძგებს, „ხორცი“ კი – ჩვენს არასრულყოფილებაზე. ასე რომ, სწორად მოქცევის როგორი სურვილიც არ უნდა გვქონდეს, თუ არ ვიფრთხილებთ, შეიძლება ვერ გავუძლოთ ცდუნებას.
b რჩევები იმის თაობაზე, თუ როგორ უნდა მოიქცეს შემცოდველი, იხილეთ წიგნში „იხარეთ ცხოვრებით მარადიულად!“, გაკვეთილი 57, 1–3 პუნქტები. აგრეთვე იხილეთ 2020 წლის ნოემბრის „საგუშაგო კოშკი“, სტატია „შენი თვალები წინ იყურებოდეს“, გვ. 27–29, აბზ. 12–17.
c ᲡᲣᲠᲐᲗᲔᲑᲘᲡ ᲐᲦᲬᲔᲠᲐ: ძმა დილით ყოველდღიურ მუხლს კითხულობს, შესვენებაზე – ბიბლიას, საღამოს კი შუა კვირის შეხვედრას ესწრება.