[pai kaw na hkra de] Maselo, Yomara hte Haiba. Langai hpra gaw myi n mu laika hte ka da ai Saping Mungkan Nnan Ga Gale Chyum Laika hpe jum da
Shanhte Tsawra Myit Madun Hkrum Wa
YOMARA hte shi a kanau Maselo yan Haiba gaw, kahtawng kaji re ai Gwatimala hta nga ai. Yomara gaw, Yehowa Sakse Ni hte Chyum Laika sharin hpang wa ai. Hpang de, shi kanau yan mung Chyum Laika sharin wa ai. Raitim, manghkang langai nga ai. Shan nau masum gaw myi n mu ai ni rai nna, myi n mu laika hpe mung n chye hti ai. Dai majaw, chyum ga sharin ya ai hpunau gaw, hkaja ai laika pang ni hte chyum daw ni shanhte hpe hti dan nna sharin ya ai.
Shanhte nawku zuphpawng sa lung na matu mung yak ai. Minit 40 sa ra ai, ni htum Nawku Htingnu de pyi, shanhte hkrai n lu sa ai. Raitim, nawku hpung kaw na hpunau ni gaw, shanhte zuphpawng yawng hpe lu lung hkra lajang ya ai. Ngut nna, bat lapran zuphpawng hta shan nau ni jawng ma lit ang ai shaloi, atsawm hkrang shala lu hkra, tsun na lam ni matsing hkra hpunau ni karum ya ai.
2019, May shata hta shanhte a kahtawng kaw nawku zuphpawng hpe galaw hpang ai. Dai shaloi, aten galu ningshawng yan la langai gaw, dai kahtawng de htawt nga ai. Shan la gaw shan pyi n chye hti, n chye ka ai myi n mu laika hpe shan nau ni chye hti, chye ka hkra sharin ya na matu, yaw shada let dai de htawt mat ai re. Dai majaw, shan la gaw laika dum de sa nna, myi n mu laika hte seng nna hkaja ai. Gara hku sharin ya na ngu ai ladat hpe mung hkaja ai.
Nawku zuphpawng hta Maselo mahtai jaw nga
Shata loi na ai shaloi, shan nau masum gaw myi n mu laika hpe atsawm lu hti wa ai. Dai majaw wenyi lam hta rawt jawt na matu lam hpaw wa ai.a Ya, Yomara, Maselo hte Haiba gaw, aten galu ningshawng galaw nga ai. Maselo gaw magam tau langai re. Bat shagu, shan nau ni Yehowa a magam hta bungli law nga ai. Shanhte a myit rawt ai lam gaw, kaga ni hpe mung shadut ya ai.
Nawku hpung madun ai tsawra myit hte madi shadaw ai lam ni hpe shan nau masum grai chyeju dum ai. Yomara ndai hku tsun ai: “Shawng nnan Yehowa Sakse Ni hte hkrum ai shaloi, jet ai Hkristan tsawra myit anhte hpe madun ai.” Maselo gaw ndai hku tsun ai: “Anhte hta buga nawku hpung kaw na laklai ai manang ni nga ai. Kahkyin gumdin ai mungkan grup hpunau hpung hta lawm lu nga ai.” Yomara hte shi kanau ni gaw, mungkan hpe hparadisu hku nna Yehowa galaw ya na aten hpe myit rawt let la nga ai.—Shk 37:10, 11; Esa 35:5.
a Myi N Mu Laika Hti Chye Hkra Sharin La (Ingalik) ngu ai brochure hpe, myi n mu ai ni (sh) myi atsawm n mu ai ni hti chye, ka chye hkra sharin ya na matu lajang da ai.