Valũa wa Mbee kwa Akolintho

15 Yu, ana-a-asa, nĩngũmũlilikanyʼa ũvoo mũseo ũla namũtavisye, na ũla mweetĩkĩlile, na ũla kwondũ wawʼo mũũngamĩte mwĩ alũmu. 2 Na nũndũ wawʼo nĩmũũtangĩĩwa mwaendeea kwĩthĩwa mũlũmanĩtye na ũvoo mũseo ũla namũtavisye, ethĩwa kwĩtĩkĩla kwenyu kũyaĩ kwa mana.

3 Nũndũ katĩ wa maũndũ ma mbee ala namũmanyĩisye nomo o nakwa namanyĩĩtwʼe, kana Klĩsto nĩwakwie kwondũ wa naĩ sitũ kwosana na Maandĩko; 4 na kana nĩwathikiwe, ĩĩ, na kana nĩwathayũũkiwʼe mũthenya wa katatũ kwosana na Maandĩko; 5 na kana nĩwamumĩlĩĩile Keva, * na asyoka amaumĩlĩĩla ala Ĩkũmi na Elĩ. 6 Ĩtina wa vau nĩwamaumĩlĩĩile ana-a-asa angĩ mbee wa 500 ĩvinda yĩmwe, na aingĩ moo me o vamwe naitũ, ĩndĩ amwe nĩmakwie. 7 Na ĩtina wa vau nĩwamumĩlĩĩile Yakovo, na ĩndĩ amaumĩlĩĩla atũmwa onthe. 8 Ĩtina wa onthe nĩwambumĩlĩĩile nyie, ta ũmwe ũsyaĩtwe ĩvinda yĩte ĩviku.

9 Nĩkwĩthĩwa ninyie mũnini katĩ wa atũmwa, na ndyaĩle kwĩtwa mũtũmwa, nũndũ nĩnathĩnasya kĩkundi kya Ngai. 10 Ĩndĩ nyie nĩilye ũndũ nĩilye ũmũnthĩ nũndũ wa ũseo mwingĩ wa Ngai. Na ũseo wake mwingĩ kwakwa ndwaĩ wa mana, nũndũ nĩnatethisye wĩa mwingĩ kũmavĩtũka onthe; o na kau ti kwa ũtonyi wakwa, ĩndĩ nĩ kwĩsĩla ũseo mwingĩ wa Ngai ũla naĩ nawʼo. 11 Kwoou, o na ethĩwa ninyie kana nĩmo, ũu nĩwʼo tũtavanasya, na ũu nĩwʼo mwatwʼĩkie etĩkĩli.

12 Yu ethĩwa nĩkũũtavanwʼa kana Klĩsto nĩwathayũũkiwʼe, nĩkĩ amwe katĩ wenyu mekwasya kana kũiĩ ũthayũũkyo? 13 Ethĩwa kũiĩ ũthayũũkyo, o nake Klĩsto ndaathayũũkwʼa. 14 Na ethĩwa Klĩsto ndaathayũũkwʼa, kũtavanyʼa kwitũ no kwa mana, na mũĩkĩĩo wenyu o nawʼo nĩ wa mana. 15 O na ĩngĩ, ithyĩ twĩ ngũsĩ sya ũvũngũ sya Ngai, nũndũ nĩtumĩtye ũkũsĩ ĩũlũ wa Ngai tũkasya kana nĩwamũthayũũkisye Klĩsto, nake ndethĩwa aamũthayũũkya ethĩwa kwa wʼo akwʼũ maikathayũũkwʼa. 16 Nũndũ ethĩwa akwʼũ maikathayũũkwʼa, o nake Klĩsto ndaathayũũkwʼa. 17 O na ĩngĩ, ethĩwa Klĩsto ndaathayũũkwʼa, mũĩkĩĩo wenyu nĩ wa mana; mwĩ o naĩnĩ syenyu. 18 O na ala makwie me nthĩnĩ wa Klĩsto nĩmaaie vyũ. 19 Ethĩwa tũmwĩkwatĩtye Klĩsto nthĩnĩ wa thayũ ũũ wʼoka, nithyĩ ma kwĩwʼĩwa tei vyũ kwĩ andũ onthe.

20 Ĩndĩ yu Klĩsto nĩwathayũũkiwʼe, nake nĩwe ũsyao wa mbee wa ala makwie. 21 Nũndũ ethĩwa kĩkwʼũ kyookie nũndũ wa mũndũ ũmwe, ũthayũũkyo o nawʼo ũkooka nũndũ wa mũndũ ũmwe. 22 Nũndũ o tondũ andũ onthe makusaa nũndũ wa Atamu, o ta ũu onthe makeethĩwa thayũ nũndũ wa Klĩsto. 23 Ĩndĩ kĩla ũmwe akathayũũkwʼa ĩvinda yake mwene: Klĩsto ũsyao wa mbee, na ĩtina ala ma Klĩsto ĩvinda ya kwĩthĩwa vo kwake. 24 Na mũthya, akanengane Ũsumbĩ kwa Ngai wake nake nĩwe Ĩthe, yĩla ũkethĩwa aminĩte silikalĩ syonthe na ũkũmũ wʼonthe na vinya. 25 Nũndũ no nginya asumbĩke e mũsumbĩ nginya yĩla Ngai ũkaia amaitha make ungu wa nyaaĩ syake. 26 Na mũmaitha wa mũthya ũla ũkaminwa nĩ kĩkwʼũ. 27 Nũndũ Ngai “nĩwaiie syĩndũ syonthe ungu wa nyaaĩ syake.” Ĩndĩ yĩla ũkwasya kana ‘syĩndũ syonthe nĩsyaiiwe ungu wa nyaaĩ syake,’ nĩ ũndũ wĩ ũtheinĩ kana Ũla waiie syĩndũ syonthe ungu wake ndatalĩtwe vo. 28 Ĩndĩ yĩla syĩndũ syonthe ikaiwa ungu wake, nĩvo ĩndĩ ũ Mwana mwene ũkeyia ungu wa Ũla waiie syĩndũ syonthe ungu wake, nĩ kana Ngai ethĩwe syĩndũ syonthe kwa onthe.

29 Ethĩwa ũu tiwʼo vailye, matonya kwĩka ata andũ ala meũvatiswa nĩ kana methĩwe akwʼũ? Nĩkĩ mavatisawa nĩ kana methĩwe akwʼũ, ethĩwa ala akwʼũ maikathayũũkwʼa nongi? 30 O na ĩngĩ, nĩkĩ twĩthĩawa mũisyonĩ kĩla ĩvinda? 31 Kĩla mũthenya nĩthĩawa mũisyonĩ wa kũawa, o tondũ vate nzika nĩthĩawa na ũtanu nũndũ wenyu nthĩnĩ wa Klĩsto Yesũ, Mwĩaĩi waitũ. 32 Ethĩwa o ta andũ ala angĩ, * nĩnokitie na nyamũ sya kĩthekanĩ nĩ Eveso, ũu ũndethya na kyaũ? Ethĩwa akwʼũ maikathayũũkwʼa, “ekai tũye na tũinywʼa, nũndũ ũnĩ tũkakwʼa.” 33 Mũikakengeke. Itindo nthũku nĩsyanangaa mwĩkalĩle mũseo. 34 Amũkai na mũyĩka ũla ũlũngalu na mũikaendeee kwĩka naĩ, nũndũ amwe maimwĩsĩ Ngai. Nĩneena ũu nĩ kana mwĩwʼe nthoni.

35 Ĩndĩ mũndũ no asye: “Akwʼũ makathayũũkwʼa ata? Ĩĩ, makathayũũkwʼa na mwĩĩ wa mũthemba mwaũ?” 36 We mũndũ mũtumanu! Kĩla wavanda kĩitonya kwĩthĩwa thayũ ate o kyambie kũkwʼa. 37 Na ĩũlũ wa kĩla ũũvanda, ndũvandaa mwĩĩ ũla ũkethĩwa vo, ĩndĩ o mbeũ, yĩthĩwe nĩ ya nganũ kana nĩ ya mũthemba ũngĩ; 38 ĩndĩ Ngai nũmĩnengae mwĩĩ o ũndũ we mwene ũkwenda, na nũnengae kĩla mbeũ mwĩĩ wayo. 39 Mĩĩ yonthe ndĩthĩawa ĩvwʼanene, ĩndĩ ve mwĩĩ wa mũndũ, na ve mwĩĩ wa indo, ũngĩ wa nyũnyi, na ũngĩ wa makũyũ. 40 Na kwĩ mĩĩ ya ĩtunĩ na mĩĩ ya kũũ nthĩ; ĩndĩ wanake wa mĩĩ ya ĩtunĩ wĩ kĩvathũkanyʼo na wanake wa mĩĩ ya kũũ nthĩ. 41 Syũa yĩ wanake wa mũthemba mũna, na mwei wĩ wanake wa mũthemba ũngĩ; nawʼo wanake wa ndata nĩ wa mũthemba ũngĩ; o na eka ũu, wanake wa ndata ĩmwe wĩ kĩvathũkanyʼo na wa ndata ĩla ĩngĩ.

42 Na ũu nowʼo ũthayũũkyo ũilye. Mwĩĩ nũvandawa ũla wanangĩkaa ĩndĩ nũthayũũkawʼa ũla ũtanangĩkaa. 43 Nũvandawa ũte na ndaĩa ĩndĩ nũthayũũkawʼa wĩ na ndaĩa. Nũvandawa wĩ na wonzu ĩndĩ nũthayũũkawʼa wĩ na vinya. 44 Ũvandawa mwĩĩ wa nyama ĩndĩ nũthayũũkawʼa mwĩĩ wa veva. Ethĩwa kwĩ mwĩĩ wa nyama, kwĩ mwĩĩ wa veva o nawʼo. 45 Nĩkũandĩkĩtwe: “Atamu, mũndũ wa mbee, nĩwatwʼĩkie kyũmbe kĩ thayũ.” Atamu wa mũthya nĩwatwʼĩkie veva ũla ũnenganae thayũ. 46 Ĩndĩ ũla wa veva tiwʼo wa mbee. Ũla wa nyama nĩwʼo wa mbee, na ĩtina ũla wa veva. 47 Mũndũ wa mbee aumie kũũ nthĩ na oombĩtwe na kĩtoo, ĩndĩ mũndũ wa kelĩ aumie ĩtunĩ. 48 O tondũ ũla wũmbĩtwe na kĩtoo ũilye, nowʼo ala mombĩtwe na kĩtoo mailye; na o tondũ ũla wa ĩtunĩ ũilye, nowʼo ala ma ĩtunĩ mailye. 49 Na o tondũ twĩ na mũvwʼano wa ũla woombiwe na kĩtoo, o ta ũu tũkeethĩwa na mũvwʼano wa ũla wa ĩtunĩ.

50 Ĩndĩ nĩmũtavya ũũ, ana-a-asa, mwĩĩ na nthakame iitonya kũtiĩwa Ũsumbĩ wa Ngai, o na kĩla kyanangĩkaa kĩitonya kũtiĩwa kĩla kĩtanangĩkaa. 51 Sisyai! nĩngũmũtavya kĩmbithĩ kĩtheu: “Ti ithyonthe tũkakoma too kĩkwʼũnĩ, ĩndĩ ithyonthe tũkaalyũlwa, 52 kwa mĩtũkĩ vyũ, kũvenyʼa na kũsalukya, ĩvinda ya soo wa mũthya. Nũndũ soo ũkavuvwa, na akwʼũ maithayũũkwʼa matatonya kwanangĩka, na tũkaalyũlwa. 53 Nũndũ ũũ wanangĩkaa no nginya wĩvwʼĩke ũla ũtanangĩkaa, na ũũ ũkusaa no nginya wĩvwʼĩke ũla ũtakusaa. 54 Ĩndĩ yĩla ũũ wanangĩkaa wĩĩvwʼĩka ũla ũtanangĩkaa na yĩla ũũ ũkusaa wĩĩvwʼĩka ũla ũtakusaa, nĩvo ĩndĩ ndeto ii syaandĩkiwe ikeanĩa: “Kĩkwʼũ nĩkĩmeletwʼe tene na tene.” 55 “Kĩkwʼũ, ũsindi waku ũĩ va? Kĩkwʼũ, ũmoa waku ũĩ va?” 56 Naĩ nĩyo ũmoa ũla ũetae kĩkwʼũ, na vinya wa naĩ nĩ Mĩao. * 57 Ĩndĩ twĩmũtũngĩa Ngai mũvea, nũndũ nũtũnengae ũsindi kwĩsĩla Yesũ Klĩsto, Mwĩaĩi waitũ!

58 Kwoou, ana-a-asa endwa, ĩthĩwai mwĩ alũmu, mũtathingithĩka, na mavinda onthe mũyĩthĩwa na maũndũ maingĩ ma kwĩka wĩanĩ wa Mwĩaĩi, mũimanya kana wĩa wenyu ti wa mana nthĩnĩ wa Mwĩaĩi.