MOSŨNGĨO MA MAKŨLYO MA MBIVILIA
Nĩvatonyeka andũ makekala tene na tene?
Nĩ kyaũ kĩtonya kũtũthasya kuma ũkombonĩ wa kĩkwʼũ?
Mũndũ wa mbee ũla weetawa Atamu ekalile myaka maana maingĩ. Ĩndĩ nĩwesie kũkũa na akwʼa. Kuma ĩvindanĩ yĩu andũ nĩmatatĩte kwĩka maũndũ maingĩ nĩ kana maikakũe. Ĩndĩ o na vailyĩ ũu, vai mũndũ waaĩvitha kĩkwʼũ. Nĩkĩ? Kĩtumi nũndũ Atamu nĩweekie naĩ ya kũlea kũmwĩwʼa Ngai, na nũndũ wa ũu nĩwakũie na ĩtina akwʼa. Tũkũaa nũndũ Atamu nĩwatũtiĩe naĩ ĩsu ĩetae kĩkwʼũ.—Soma Mwambĩlĩlyo 5:5; Alomi 5:12.
Twaĩle kũĩvĩwa wovosyo nĩ kana tũtanĩe kwĩkala tene na tene. (Yovu 33:24, 25) Wovosyo nĩ kĩndũ kĩla kĩĩvawa nĩ kana mũndũ athawʼe. Kwoou ithyĩ twaĩle kũĩvĩwa wovosyo nĩ kana tũthawʼe kuma kĩkwʼũnĩ. (Kuma 21:29, 30) Yesũ nĩwatũĩvĩie wovosyo ĩla wakwie kwondũ witũ.—Soma Yoana 3:16.
Tũtonya kwĩka ata nĩ kana twĩkale tene na tene?
Ti kĩla mũndũ ũkathawʼa kuma ũkombonĩ wa mowau na ũkũũ. Ũu nĩ wʼo nũndũ andũ ala matamwĩwʼaa Ngai o tondũ Atamu weekie, maikakwata mũthĩnzĩo wa thayũ. Andũ ala maekeetwe naĩ syoo no mo makatanĩa kwĩkala tene na tene.—Soma Isaia 33:24; 35:3-6.
No nginya twose ĩtambya nĩ kana tũekewe. Twaĩle kũmũmanya Ngai kwa kwĩmanyĩsya Ndeto yake, Mbivilia. Ĩtũmanyĩasya ũndũ tũtonya kwĩthĩwa twĩ atanu, na ũndũ tũtonya kwĩthĩwa anyanya ma Ngai na tũyĩkala tene na tene.—Soma Yoana 17:3; Meko ma Atũmwa 3:19.