Ũmbano wa Kũlilikana Kĩkwʼũ kya Yesũ Nũlũlũmĩlasya Ngwatanĩo Yitũ

1, 2. Nĩ ũmbano wĩva mwakanĩ ũũ wa 2018 ũkalũlũmĩlya ngwatanĩo yitũ kwa nzĩa ya mwanya, na nĩkĩ? (Sisya visa ĩthangũnĩ yĩĩ.)

MATUKŨ 31, Mwei wa 3, 2018, Ngũsĩ sya Yeova na andũ angĩ aingĩ mendeeawʼa nĩ ũwʼo makeethĩwa na ũmbano wa kũlilikana Kyaũya kya Wĩoo kya Mwĩaĩi ũla wĩkawa kĩla mwaka. Syũa yĩithũa mũthenya ũsu nĩwʼo andũ milioni mbingĩ makombana malilikane kĩkwʼũ kya Klĩsto. Kĩla mwaka ũmbano ũsu nũlũlũmĩlasya ngwatanĩo ya andũ ĩũlũ wa nthĩ kwa nzĩa ya mwanya kwĩ ũmbano ũngĩ o na wĩva.

² Mũthenya ũsu ũitwʼĩka nĩwathela, no nginya wĩthĩe Yeova na Yesũ nĩmatanaa mũno moona andũ milioni mbingĩ ĩũlũ wa nthĩ maendeee kũmbana kwondũ wa kũlilikana kĩkwʼũ kya Yesũ. Mbivilia yathanie kana “ĩkomano ĩnene ya andũ, yĩla mũndũ o na wĩva ũtatonya ũyĩtalĩkya, kuma andũnĩ ma kĩla mũthemba na mbaĩ na ngo na ithyomo,” yĩkasya ũũ na wasya mũnene: “Ũtangĩĩo nĩ wa Ngai waitũ ũla wĩkalĩle kĩvĩla kya ũsumbĩ, na wa kala Katena.” (Ũvu. 7:9, 10) Nĩ ũndũ wa kwendeesya mũno kwona andũ maingĩvĩte ũu maietee Yeova na Yesũ ndaĩa nene kwa kũlilikana kĩkwʼũ kya Yesũ!

3. Twĩsũngĩa makũlyo meva ĩsomonĩ yĩĩ?

³ Ĩsomonĩ yĩĩ twĩsũngĩa makũlyo aa ana: (1) Kĩla ũmwe witũ atonya kwĩyũmbanĩsya na kũtetheka ata nĩ ũmbano wa kũlilikana kĩkwʼũ kya Yesũ? (2) Ũmbano ũsu ũlũlũmĩlasya ngwatanĩo ya andũ ma Ngai ata? (3) Kĩla ũmwe witũ atonya kwĩka ata nĩ kana alũlũmĩlye ngwatanĩo ĩsu? (4) Ve ĩvinda tũkombana ya mũthya tũlilikane kĩkwʼũ kya Yesũ? Ethĩwa nĩ wʼo, nĩ ĩndĩĩ?

ŨNDŨ TŨTONYA KWĨYŨMBANĨSYA NA KŨTETHEKA NĨ ŨMBANO ŨSU

4. Nĩkĩ twaĩle kũtata ũndũ vatonyeka tũikatĩe ũmbano wa kũlilikana kĩkwʼũ kya Yesũ?

⁴ Kwasũanĩa nĩkĩ ũmbano ũsu nĩ wa vata mũno. Lilikana kana kũthi maũmbanonĩ ma kĩkundi nĩ nzĩa ĩmwe ya kũmũthaitha Yeova. Kwoou vate nzika, Yeova na Yesũ nĩmonaa andũ ala mekĩaa kĩthito maikatĩe ũmbano ũsu wa mwanya. O naitũ nĩtwendaa mone kana tũilea kũthi kũlilikana kĩkwʼũ kya Yesũ ate o tũkwatiwe nĩ thĩna mũnene tũtesa kũwathũkĩa. Ĩla twoonanyʼa na meko maitũ kana nĩtwonaa maũmbano me ma vata mũno, twĩthĩawa tũyongeleela Yeova kĩtumi kya kũekana na masyĩtwa maitũ nthĩnĩ wa “ĩvuku ya ũlilikanʼyo.” Yĩu no yo yĩla ‘ĩvuku ya thayũ’ yĩandĩkawa masyĩtwa ma ala maĩle kwĩsa kũnengwa thayũ ũtathela.—Mal. 3:16; Ũvu. 20:15.

5. Tũtonya kũtũmĩa ata mĩthenya ĩla yĩthĩawa ĩtiele ũmbano wa kũlilikana kĩkwʼũ kya Yesũ ũtanavika ‘twĩthime ethĩwa twĩ o ũla mũĩkĩĩonĩ’?

⁵ Mĩthenyanĩ ĩla yĩthĩawa ĩtiele ũmbano wa kũlilikana kĩkwʼũ kya Yesũ ũvike, nĩtwaĩle kũmantha ĩvinda ya kũvoya na kũvindĩĩsya ĩũlũ wa ngwatanĩo yitũ na Yeova. (Soma 2 Akolintho 13:5.) Tũtonya kwĩka ũu ata? Nĩ kwa ‘kwĩthima ethĩwa twĩ o ũla mũĩkĩĩonĩ.’ Nĩ kana twĩthime, nũseo tũkekũlya makũlyo ta aa: ‘Nyie nĩnĩĩkĩĩaa vyũ kana vai ũseũvyo ũngĩ ĩũlũ wa nthĩ wĩkaa kwenda kwa Yeova eka ũũ witũ? Nĩnĩtataa ũndũ ndonya nĩtavanyʼe na ndimanyĩsya angĩ ũvoo mũseo wa Ũsumbĩ? Meko makwa nĩmonanasya kana ndi na nzika twĩkalĩte mĩthenyanĩ ya mũminũkĩlyo, na kana mũthya wa ũsumbĩki wa Satani wĩ vakuvĩ? Nĩnĩendeee kũmwĩkwatya Yeova na Yesũ o ũndũ namekwatĩtye ĩla neeyumisye nĩmũthũkũme Yeova Ngai?’ (Mt. 24:14; 2 Tim. 3:1; Aevl. 3:14) Kũvindĩĩsya makũlyo asu no kũtũtetheesye tũmanye mũĩkĩĩo witũ ũilyĩ ata.

6. (a) Nĩ kyaũ kĩkatuma tũkwata thayũ ũtathela? (b) Mũtumĩa ũmwe ekaa ata kĩla mwaka eyũmbanĩsye kũlilikana kĩkwʼũ kya Yesũ? Ũtonya kũatĩĩa ngelekanyʼo yake ata?

⁶ Soma na ũivindĩĩsya maũvoo ala methĩawa maeleetye ũndũ ũmbano ũsu ne wa vata. (Soma Yoana 3:16; 17:3.) Tũyĩsa kũkwata thayũ ũtathela tũtesie kwosa ĩvinda ‘tũmũmanye’ Yeova, na tũisyoka ‘tũmwĩtĩkĩle’ Mwana wake mũsyawa weka, Yesũ. Kwoou nĩ kenda wĩyũmbanyʼe, wĩona ata ũkamantha maũvoo kauta matonya kũũtetheesya ũlũlũmĩlye ngwatanĩo yaku vamwe na Yeova na Yesũ? Kwasũanĩa ũndũ mwana-a-asa ũmwe wĩthĩĩtwe e mũtumĩa kwa ĩvinda ĩasa wĩkaa. Kwa myaka mingĩ ethĩĩtwe ayũmbanyʼa ilungu sya Mũsyaĩĩsya ila ineeneete mũno mũno kũlilikana kĩkwʼũ kya Yesũ, vamwe na maũndũ ala Yeova na Yesũ mekĩte makonanyʼa kana nĩmatwendete. Vatiele syumwa nini ũmbano ũsu ũvike, osaa ilungu isu akaisoma ĩngĩ na aivindĩĩsya vata wa kũthi ũmbanonĩ ũsu. O na nĩwĩsaa kwĩkala akamantha kĩlungu kĩmwe kana o ilĩ akongeleela ila wĩthĩawa ombanĩtye. Mũtumĩa ũsu esĩte kwĩthĩa nĩwĩmanyĩasya maũndũ meũ kĩla mwaka nũndũ wa kũsyokeleela ilungu isu, vamwe na kũsoma na kũvindĩĩsya ilungu sya Mbivilia ila twĩthĩawa tũaĩwe tũsome ĩvindanĩ yĩu. Na ũndũ ũla wa vata nĩ kana kĩla mwaka ewʼaa amwenda Yeova na Yesũ mũnango. Kwĩthĩwa na mũvango ta ũsu no kũũtetheesye wende Yeova na Yesũ mũnango na ũimatũngĩaa mũvea mũno nũndũ wa kĩla mekĩte. Kĩu no kĩtume ũtetheka vyũ nĩ ũmbano ũsu.

ŨMBANO ŨSU NŨLŨLŨMĨLASYA NGWATANĨO YITŨ

7. (a) Yesũ avoyie ĩũlũ wa kyaũ ũtukũ ũla wambĩĩisye Kyaũya kya Wĩoo kya Mwĩaĩi? (b) Twĩsĩ ata kana Yeova nũsũngĩĩte mboya ya Yesũ?

⁷ Ũtukũ ũla Yesũ wambĩĩisye Kyaũya kya Wĩoo kya Mwĩaĩi, avoyeie aatĩĩi make methĩwe na ngwatanĩo o tondũ we na Ĩthe me ngwatanĩo. (Soma Yoana 17:20, 21.) Yeova nĩwasũngĩie mboya ĩsu Mwana wake mwendwa wavoyie, na nũndũ wa ũu ũmũnthĩ kwĩ andũ milioni mbingĩ maĩkĩĩaa kana nĩwatũmie Mwana wake. Vai ũmbano ũngĩ wa andũ ma Ngai wonanasya nesa ngwatanĩo ya Ngũsĩ sya Yeova ta ũmbano wa kũlilikana kĩkwʼũ kya Yesũ. Ũmbano ũsu wĩkawa kũndũ kwingĩ ĩũlũ wa nthĩ nĩ andũ ma nthĩ syĩ kĩvathũkanyʼo na langi syĩ kĩvathũkanyʼo. Kũndũ kũmwe ndwĩsa kwĩwʼa atĩ andũ ma ngo syĩ kĩvathũkanyʼo nĩmombanie vamwe mathaithe, o na moombana, andũ amwe monaa kĩndũ kyu kĩsaanĩtye mũno. Ĩndĩ Yeova na Yesũ moona ngwatanĩo ĩsu matanaa mũno!

8. Yeova anengie Esekieli ũtũmane wĩva ũkonetye ngwatanĩo?

⁸ Ithyĩ Ngũsĩ sya Yeova tũisengʼaa twoona ngwatanĩo ĩla twĩthĩawa nayo. Na kĩtumi nũndũ o na Yeova nĩwathanie tũkeethĩwa na ngwatanĩo ĩsu. Kwasũanĩa ũtũmane ũla wanengie mwathani Esekieli. Amwĩie akwatanyʼe mĩtĩ ĩlĩ, ũmwe waandĩkĩtwe “kwa Yuta” na ũla ũngĩ waandĩkĩtwe “kwa Yosevu.” (Soma Esekieli 37:15-17.) Kĩlungu kya “Makũlyo Kuma kwa Asomi Maitũ” kya ĩkaseti ya Mũsyaĩĩsya ya Mwei wa 7, 2016, kyaeleisye ũtũmane ũsu ũũ: “Yeova amũnengie Esekieli ũvoo wa wĩkwatyo, ũla wathanĩte ĩũlũ wa ngwatanĩo ĩla ĩkethĩwa vo mbaĩnĩ ya Isilaeli ĩtina wa kũsyoka Nthĩ ya Watho. O na ĩngĩ, ũvoo ũsu nĩwathanĩte ĩũlũ wa ngwatanĩo ĩla ĩkethĩwa andũnĩ ma Ngai. Ngwatanĩo ĩsu yaĩ yambĩĩe mĩthenyanĩ ya mũminũkĩlyo.”

9. Kĩla mwaka ĩvindanĩ ya kũlilikana kĩkwʼũ kya Yesũ twonaa ata ngwatanĩo ĩla Esekieli wathanie?

⁹ Kuma mwaka wa 1919 na kũendeea, Yeova nĩwambĩĩe kũvanga o kavola etĩkĩwʼa mauta nesa ĩngĩ na amombanyʼa. Kwa nzĩa ya ngelekanyʼo nĩmo ũla mũtĩ waandĩkĩtwe “kwa Yuta.” Na ĩndĩ tũendeangĩe, ala me na wĩkwatyo wa kwĩkala kũũ nthĩ nĩmaendeeie kwongeleka na makwatana na etĩkĩwʼa mauta. Asu me na wĩkwatyo wa kwĩkala kũũ nthĩ nĩmo maelekanĩtwʼe na ũla mũtĩ waandĩkĩtwe “kwa Yosevu.” Ikundi isu syelĩ syakwatanwʼa syatwʼĩkie “ĩĩthya yĩmwe.” (Yoa. 10:16; Nzek. 8:23) Yeova athanie kana akakwatanyʼa mĩtĩ ĩsu ĩlĩ ĩtwʼĩke mũtĩ ũmwe kwʼokonĩ kwake. (Esek. 37:19) Ũmũnthĩ ikundi isu syelĩ ithũkũmaa syĩ ngwatanĩo itongoewʼe nĩ Mũsumbĩ ũmwe, nake nĩ Yesũ Klĩsto. Ũsu nĩwe wathaninĩ wa Esekieli wĩtĩtwe nĩ Ngai “mũthũkũmi wakwa Ndaviti.” (Esek. 37:24, 25) Kĩla mwaka, ũmbanonĩ wa kũlilikana kĩkwʼũ kya Klĩsto nĩtwonaa ngwatanĩo ĩsu ya mwanya yawetiwe nĩ Esekieli nũndũ etĩkĩwʼa mauta na “malondu angĩ” nĩmombanaa vamwe ũmbanonĩ ũsu. Ĩndĩ kĩla ũmwe witũ atonya kũsũvĩa ata ngwatanĩo ĩsu na aimĩlũlũmĩlya?

ŨNDŨ KĨLA ŨMWE ŨTONYA KŨLŨLŨMĨLYA NGWATANĨO YITŨ

10. Tũtonya ata kũlũlũmĩlya ngwatanĩo ya andũ ma Ngai?

¹⁰ Nzĩa ĩmwe ya kũlũlũmĩlya ngwatanĩo ya andũ ma Ngai nĩ kwĩthĩwa na wĩnyivyo. Ĩla Yesũ waĩ kũũ nthĩ nĩweekĩie vinya amanyĩwʼa make mekalae menyivĩtye. (Mt. 23:12) Tweethĩwa na ngoo syĩnyivĩtye tũiketũlasya ta andũ ma nthĩ. Ĩndĩ wĩnyivyo ũkatumaa twĩnyivĩsya ala matongoesye, na veva ũsu nũtumaa kĩkundi kĩthĩwa na ngwatanĩo. Na kĩla kya vata nĩ kana tũkamwendeeasya Ngai nũndũ “nũsiĩĩaa ala mekwĩnenevya, ĩndĩ amanengae mumo ala menyivasya.”—1 Vet. 5:5.

11. Nĩkĩ kũsũanĩa ĩũlũ wa mũkate na mbinyu kũtonya kũtũtetheesya tũlũlũmĩlye ngwatanĩo yitũ?

¹¹ Nzĩa ya kelĩ nĩ kũvindĩĩsya kĩla kyonanawʼa nĩ mũkate na mbinyu ĩla ĩtũmĩawa ĩvinda ya kũlilikana kĩkwʼũ kya Yesũ. Ĩla ũendeee kwĩyũmbanĩsya mũthenya ũsu vindĩĩsya mũno nĩkĩ kũtũmĩawa mũkate ũte ĩlawa na mbinyu ndune, na nũseo ũkavindĩĩsya maũndũ asu mũno mũno ũtukũ ũsu wa mwanya. (1 Ako. 11:23-25) Mũkate ũsu wonanasya mwĩĩ ũte na naĩ ũla Yesũ waumisye ta nthembo, nayo mbinyu yonanasya ĩla nthakame yake yetĩkie. Ĩndĩ kũelewa maũndũ asu kwĩ kwʼoka kũitoetye. Lilikana kana nthembo ya wovosyo ya Klĩsto ĩtumaa twona ũndũ Yeova na Yesũ matwendie mũno kũte mũndũ ũngĩ o na wĩva. Yeova oonanisye nũtwendete kwa kũtũnenga Mwana wake, nake Yesũ oonanisye kana nũtwendete kwa kwĩtĩkĩla na ngenda akwʼe kwondũ witũ. Kũsũanĩa kĩu kwaĩlĩte kũtuma o naitũ tũmenda. Na nũndũ kĩla ũmwe witũ nũmwendete Yeova, wendo ũsu ũilyĩ mũkwa ũtwovanĩtye vamwe ũla ũlũlũmĩlasya ngwatanĩo ĩla twĩthĩawa nayo.

12. Nthĩnĩ wa ĩla ngelekanyʼo ya mũsumbĩ wendie ũtalo kwa ngombo syake, Yesũ oonanisye ata kana Yeova endaa tũekee ala angĩ?

¹² Nzĩa ya katatũ ya kũlũlũmĩlya ngwatanĩo yitũ nĩ kũekea angĩ kuma ngoonĩ. Twaekea ala matũvĩtĩsya, twĩthĩawa tũyonanyʼa nĩtũtũngaa mũvea twalilikana naĩ ila tũekeawa nũndũ wa nthembo ya Klĩsto. Kwasoma na ũivindĩĩsya ngelekanyʼo ĩla Yesũ wanenganie ĩandĩkonĩ ya Mathayo 18:23-34. Ĩkũlye-ĩ: ‘Nyie nĩnendaa kũatĩĩa kĩla Yesũ wamanyĩisye? Nĩnĩmomĩĩasya Aklĩsto ala angĩ na nĩnĩmaeleawa? Nĩnĩthĩawa nĩyũmbanĩtye kũekea ala mambĩtĩsya?’ Nĩ wʼo kana kĩla ĩvĩtyo yĩ ũito wayo, na ve ĩvĩtyo ĩna ũtonya kwĩkwa ũkethĩa ta mũndũ wĩĩwʼa ũiemwa vyũ nĩ kũekea ũla waũvĩtĩsya. Ĩndĩ ngelekanyʼo ĩsu ĩtũmanyĩasya kĩla Yeova wendaa twĩke. (Soma Mathayo 18:35.) Yesũ endaa tũkwatye nesa kana Yeova ndesa kũtũekea ethĩwa tũiekeaa ana-a-asa maitũ ĩla ve na kĩtumi kĩseo kya kũmaekea. Vate nzika, ũsu nĩ ũndũ twaĩle kũũvindĩĩsya mũno. Kwoou nĩ kana tũsũvĩe na tũilũlũmĩlya ngwatanĩo yitũ, twaĩlĩte kũekea angĩ o tondũ Yesũ watũmanyĩisye.

13. Kũmantha mũuo kũlũlũmĩlasya ata ngwatanĩo yitũ?

¹³ Kũekea angĩ kwonanasya kana twĩ andũ mendete kũmantha mũuo. Kwalilikana ũla ũtao mũtũmwa Vaulo wanenganie ĩla waisye kana twaĩlĩte ‘kwĩthingʼĩĩsya tũsũvĩe wĩwʼano ũmwe wa veva wovanonĩ wa mũuo.’ (Aev. 4:3) Ĩvindanĩ yĩĩ ya kũlilikana kĩkwʼũ kya Yesũ, na mũno mũno ũtukũ ũla tũkeka ũmbano ũsu, sũanĩa mũno ũndũ ũkuaa andũ ala angĩ. Ĩkũlye atĩĩ: ‘Ala angĩ nĩmene nesa kana nyie ndyoveeaa ũthatu ngoonĩ? Andũ no masye kana nĩndataa vyũ nĩwʼane na ala angĩ na ngĩsũvĩa ngwatanĩo yitũ?’ Asu nĩ makũlyo maito, na yĩĩ nĩ ĩvinda ĩseo ya kũmasũanĩa.

14. Tũtonya kwonanyʼa ata ‘nĩtũmĩanĩasya ithyĩ kwa ithyĩ nthĩnĩ wa wendo’?

¹⁴ Nzĩa ya kana ya kũlũlũmĩlya ngwatanĩo yitũ nĩ kwenda ana-a-asa na eĩtu-a-asa o tondũ Yeova ũmendete nũndũ we nĩ wendo. (1 Yoa. 4:8) Yĩsilya yĩĩ yĩyaĩlĩte kwĩsa kũlika kĩlĩkonĩ kitũ: ‘Ngeekaa o kũmĩanĩsya namo, ĩndĩ ti lasima nĩthĩwe nĩ vata namo’! Yĩsilya yĩu yĩyosanĩte na ũtao ũũ wa Vaulo: “Mũkyũmĩanĩsya inywʼĩ kwa inywʼĩ nthĩnĩ wa wendo.” (Aev. 4:2) Vaulo ndaatwĩa twĩke o ‘kũmĩanĩsya ithyĩ kwa ithyĩ.’ Atwĩie tũmĩanĩsye “nthĩnĩ wa wendo.” Asu nĩ maũndũ elĩ me kĩvathũkanyʼo. Ikundinĩ sitũ kwĩ andũ ma mĩthemba mingĩ na onthe Yeova nũmakusĩtye kwake. (Yoa. 6:44) Na nũndũ Yeova nũmakusĩtye, no nginya ethĩwe onete kana nĩ andũ matonya kwendeka. Kwoou nithyĩ aaũ twasye atĩ tũyĩsa kwenda Mũklĩsto mũna? Tũyaĩlĩte o na vanini kwĩsa kwĩthĩwa tũtendete ala angĩ o tondũ Yeova wendaa tũmende!—1 Yoa. 4:20, 21.

NĨ ĨNDĨĨ TŨKEKA ŨMBANO WA MŨTHYA WA KŨLILIKANA KĨKWʼŨ KYA YESŨ?

15. Twĩsĩ ata kana mũthenya ũmwe tũkalilikana kĩkwʼũ kya Yesũ tũtakeka ũu ĩngĩ?

¹⁵ Mũthenya ũmwe tũkalilikana kĩkwʼũ kya Yesũ tũtakeka ũu ĩngĩ. Twĩsĩ ata? Valũanĩ wa mbee ũla Vaulo waandĩkĩie Akolintho, eĩte Aklĩsto etĩkĩwʼa mauta kana kwa kũlilikana kĩkwʼũ kya Yesũ kĩla mwaka methĩawa ‘mayonanyʼa kĩkwʼũ kya Mwĩaĩi kũvika yĩla wĩũka.’ (1 Ako. 11:26) Vaulo aitũmĩa ndeto ‘kũka’ awetaa o ‘kũka’ kũla Yesũ wawetie wathaninĩ wake wa mũthenya wa mũminũkĩlyo. Wathaninĩ ũsu awetie ĩũlũ wa ũla thĩna mũnene tweteele asya: ‘Kũkooneka wonanyʼo wa Mwana wa mũndũ ĩtunĩ: na ĩndĩ mbaĩ syonthe sya nthĩ ikameta, na makoona Mwana wa mũndũ okĩte ĩũlũ wa mathweo ma ĩtu na vinya na ũtheu mũnene mũtisu. Nake [Yesũ] akatũma alaĩka make na wasya mũnene wa soo, nao makoombanyʼa ala anyuve make kuma ngalĩ inya sya iseve, kuma itulunĩ sya matu kũvika itulunĩ ila ingĩ syamo.’ (Mt. 24:29-31) Ĩla Yesũ waisye alaĩka “makoombanʼya ala anyuve make,” awetaa ĩvinda yĩla Aklĩsto etĩkĩwʼa mauta ala makethĩwa matiele kũũ nthĩ makakwata ĩtuvi yoo ya kũthi ĩtunĩ. Ũndũ ũsu ũkeekĩka kĩlungu kya mbee kya ũla thĩna mũnene kyavĩta na kaũ wa Ali–Maketoni ũtambĩĩe. Ĩtina wa ũu nĩvo ĩndĩ ala 144,000 makakwatĩanĩa na Yesũ kaũnĩ wa kũmina asumbĩ ma nthĩ. (Ũvu. 17:12-14) Ĩla tũkathi ũmbanonĩ wa kũlilikana kĩkwʼũ kya Yesũ na ĩtina wa vau ũ Yesũ ‘ayũka’ kũmbanyʼa etĩkĩwʼa mauta mathi ĩtunĩ, nĩwʼo tũkethĩwa tweeka ũmbano ũsu ya mũthya.

16. Nĩkĩ we ũtwʼĩte kwĩka kyonthe kĩla ũtonya ndũkatĩĩe ũmbano wa kũlilikana kĩkwʼũ kya Yesũ mwaka ũũ?

¹⁶ Kĩla ũmwe witũ naĩkĩĩthye kana akatetheka nĩ kũthi ũmbanonĩ wa kũlilikana kĩkwʼũ kya Yesũ Matukũ 31, Mwei wa 3, 2018. Na mwa nĩtũmũvoye Yeova atũtetheesye kwĩka kyonthe kĩla tũtonya nĩ kana tũlũlũmĩlye ngwatanĩo ya andũ make! (Soma Savuli 133:1.) Tũikolwe kana mũthenya ũmwe tũkeeka ũmbano wa kũlilikana kĩkwʼũ kya Yesũ ya mũthya. Ĩndĩ mũthenya ũsu ũte mũviku, nĩtũtatei vyũ ũndũ tũtonya tũikaatĩe ũmbano wa kũlilikana kĩkwʼũ kya Yesũ, na nĩtũendeee kwona ngwatanĩo ĩla twĩthĩawa nayo ĩvindanĩ ya ũmbano ũsu yĩ ya mwanya.