Tũmĩa Tulakiti Kũnyaĩĩkya Ũvoo Mũseo
1. Tulakiti syĩthĩĩtwe iitũmĩwa ata nĩ andũ ma Ngai?
1 Tulakiti sya Mbivilia nitũmĩĩtwe kwa ĩvinda yĩasa nĩ andũ ma Yeova kũnyaĩĩkya ũvoo mũseo. Mwaka wa 1880, C. T. Russell na kĩkundi kyake nĩmaambĩĩie kumĩthya Bible Students’ Tracts (ila ĩtina syeetiwe Old Theology Quarterly), ila syanengawa asomi ma ĩkaseti ya Watch Tower mainyaĩĩkye kwa andũ onthe. Tulakiti syoonekaa syĩ sya vata mũno na nĩkyo kĩtumi ĩla C. T. Russell waandĩkĩthisye kambuni ĩte ya viasala ya kũendeesya wĩa wa Ũsumbĩ mwaka wa 1884, ndeto “tulakiti” yeekĩiwe nthĩnĩ wa ĩsyĩtwa, Zion’s Watch Tower Tract Society, ĩla yu yĩtawa Watch Tower Bible and Tract Society of Pennsylvania. Kũvikĩĩa mwaka wa 1918, tulakiti mbee wa milioni 300 nĩsyanyaĩĩkĩtwʼe nĩ Amanyĩwʼa ma Mbivilia. Tulakiti iendeee kwĩthĩwa syĩ na mawumĩlo maseo wĩanĩ wa kũtavanyʼa.
2. Nĩkĩ tulakiti syĩthĩawa na mawumĩlo maseo ũtavanyʼanĩ?
2 Nĩkĩ Syĩthĩawa na Mawumĩlo Maseo?: Tulakiti syĩ langi mũseo na nĩ sya kwendeesya methonĩ. Syĩthĩawa na ũvoo mũkuvĩ wa kwendeesya na wa kũmanyĩsya. Nĩsyendeeasya ene nyũmba ala matonya kwĩthĩwa matendete kũsoma makaseti kana mavuku. Nĩ laisi o na kwa atavanyʼa eũ na syana kũnengane tulakiti. Ĩngĩ, tulakiti syĩthĩawa ite nene na syĩ laisi kũkua.
3. Elesya ũndũ tulakiti yakũtetheeisye kũkwata ũla wʼo kana ũndũ wonekete kuma mavukunĩ maitũ ũkwonanyʼa vata wa tulakiti.
3 Aingĩ makwataa ũwʼo kwĩsĩla kũsoma tulakiti. Kwa ngelekanyʼo, kĩveti kĩmwe kuma nthĩ ya Haiti kyoonie ĩmwe ya tulakiti sitũ ĩvalũkĩte nzĩanĩ. Kyamyosie, kyamĩsoma, na kyasya, “Nĩnakwata ũwʼo!” Ĩtina wa ĩvinda, nĩkyaendie Nyũmbanĩ ya Ũsumbĩ, kyambĩĩa kwĩmanyĩsya Mbivilia, na kyavatiswa—maũndũ asu onthe nũndũ wa vinya wa Ndeto ya Ngai ũla waĩ tulakitinĩ ĩsu.
4. Kĩeleelo kitũ nĩ kyaũ ĩla tulakiti iũnenganwe mweinĩ mũna?
4 Nyũmba na Nyũmba: Nũndũ tulakiti syĩ mawumĩlo maseo ũtavanyʼanĩ, ikeethĩawa iinenganwe nthĩnĩ wa mwei mũna ĩvinda kwa ĩvinda, kwambĩĩa Mwei wa 11. Kĩeleelo kitũ ti o kũnengane tulakiti tũ, ĩndĩ nĩ kũitũmĩa kwambĩĩsya ũneeni vamwe na andũ. Mwene nyũmba endeewʼa ĩla twamũthokea ya mbee kana ĩla twamũsyokea, nĩtũtonya kũmwonyʼa ũndũ twĩmanyĩasya Mbivilia tũitũmĩa ĩvuku Mbivilia Ĩmanyĩasya kana ĩvuku yĩngĩ ya kwĩmanyĩsya. Tũtonya kũnengane tulakiti ĩla tũũtavanyʼa nyũmba na nyũmba ata? Kĩla tulakiti yĩ kĩvathũkanyʼo, kwoou twaĩlĩte kũmanya nesa ũvoo ũla wĩ tulakitinĩ ila tũũnengane.
5. Tũtonya kunengane tulakiti ũtavanyʼanĩ wa nyũmba na nyũmba ata?
5 Nzĩa ĩla tũũtũmĩa kũnengane tulakiti yaĩle kwosana na ũndũ kĩsio kĩilyĩ na ũvoo ũla wĩ tulakitinĩ ĩla tũũnengane. No twambĩĩe kwa kũnenga mwene nyũmba tulakiti. Wanake wa ĩthangũ ya ĩũlũ ya tulakiti no ũmwendeesye. Kana no tũmwonyʼe mwene nyũmba tulakiti mbingĩ anyuve ĩla ĩkũmwendeesya. Ĩla tũũtavanyʼa kĩsionĩ andũ makĩaa kũvingũa mũomo, no tũkwate tulakiti ũndũ matonya kwona ĩthangũ ya ĩũlũ yayo, kana no tũmakũlye tũlikĩlye tulakiti ungu wa mũomo na tũimakũlya woni woo ĩũlũ wayo. Ethĩwa kyongo kya tulakiti nĩ ĩkũlyo, no tũmũkũlye woni wake ĩũlũ wa ĩkũlyo yĩu. Kana no tũmanthe ĩkũlyo yĩngĩ yĩla yĩtonya kũmwendeesya na yĩtuma enda kũneena vamwe naitũ. Na ĩndĩ no tũsome vamwe na mwene nyũmba ũvoo mũnini kuma tulakitinĩ, na twavikĩĩa ĩkũlyo no tũũngame vanini na tũimũthokya mwene nyũmba eyĩelesye. Maandĩko ala ma mũsingi no masomwe kuma Mbivilianĩ. Twamina kũneenea ũvoo mũna, no tũminĩĩe kwa kwĩka mĩvango mĩseo ya kũsyoka ĩngĩ. Nyũmbanĩ ila tweethĩa vate andũ, no tũtie tulakiti vandũ vaseo vevithanĩtye, ethĩwa kĩkundi kitũ nĩkĩkaa ũu.
6. Tũtonya kũtũmĩa tulakiti nthĩnĩ wa ũtavanyʼa wa nzĩanĩ ata?
6 Ũtavanyʼa wa Nzĩanĩ: Nũtũmĩĩte tulakiti nthĩnĩ wa ũtavanyʼa wa nzĩanĩ? Aingĩ nzĩanĩ methĩawa mekalaatĩte na matatonya kũũngama maneene naitũ. No wĩthĩwe ũndũ wĩ vinya kũmanya kana mũndũ kwa wʼo nũkwendeewʼa. Nĩkwĩthĩwa tũyĩsĩ kana nĩmekũsoma makaseti ma mĩtũkĩ twamanenga, no tũmanenge tulakiti. Nũndũ ĩthangũ ya ĩũlũ ya tulakiti nĩ ya kwendeesya na tulakiti yĩ ũvoo mũkuvĩ, andũ no mendeewʼe nĩ kũmĩsoma ĩla makwata ndatĩka nini. Ethĩwa andũ mayĩkalaatĩte, no tũneenee ũvoo mũna kuma tulakitinĩ vamwe namo.
7. Weta maũndũ monekete mekwonanyʼa ũndũ tulakiti itonya kũtũmĩwa nthĩnĩ wa ũtavanyʼa wa ĩla vaumĩla mwanya.
7 Ũtavanyʼa wa Ĩla Vaumĩla Mwanya: Ũtavanyʼa wa ĩla vaumĩla mwanya wĩthĩawa wĩ laisi tũitũmĩa tulakiti. Mwana-a-asa ũmwe ekĩaa tulakiti nini mũvukonĩ wa ngũa yake kĩla ĩvinda ayuma mũsyĩ. Ĩla wakomana na mũndũ, ta kalanĩ wa nduka, amũkũlasya amũnenge kĩndũ kya kũsoma na aimumĩsya tulakiti. Ĩla mũndũ ũmwe na mũka maendie kũtembea New York City, me ku nĩmamanyie kana nĩmeũkomana na andũ kuma nthĩ syĩ kĩvathũkanyʼo. Kwoou nĩmakuie kavuku Nations na tulakiti iana ũndũ mũna sya ithyomo syĩ kĩvathũkanyʼo. Ĩndĩ, ĩla meewʼa mũndũ aineena kĩthyomo kĩeni e ũtee wa nzĩa aita syĩndũ kana e vakuvĩ namo mailyĩ vandũ va kũthyũmũa, kana me mũkaawanĩ, mamũkũlasya mamũnenge tulakiti ya kĩthyomo kyake.
8. Tulakiti no ta mbeũ kwa nzĩa myaũ?
8 “Vuĩa Mbeũ Syaku”: Tulakiti no ivwʼananĩthwʼe na mbeũ. Mũĩmi anyaĩĩkasya mbeũ syake kĩla vandũ nũndũ ndesĩ nĩ syĩva ila itonya kũmea na kwĩana. Ĩandĩko ya Mũtavanʼya 11:6 yaasya: “Kĩoko vuĩa mbeũ syaku, na wĩoo ndũkasiĩĩe kwʼoko kwaku; nũndũ ndwĩsĩ ila ikaĩla, ethĩwa nĩ ii kana iya, kana ethĩwa syelĩ ikeethĩwa nzeo ũndũ ũmwe.” Kwoou, ekai ‘tũendeee kũnyaĩĩkya ũmanyi’ tũitũmĩa mũio ũũ wa kũtavanyʼa wĩ mawumĩlo maseo.—Nth. 15:7.
[Mbulavu ĩthangũnĩ ya 3]
Nũndũ tulakiti syĩ mawumĩlo maseo ũtavanyʼanĩ, ikeethĩawa iinenganwe nthĩnĩ wa mwei mũna ĩvinda kwa ĩvinda, kwambĩĩa Mwei wa 11