Matetheesye Methĩwe Me “Alũmu Mũĩkĩĩonĩ”

Nĩ ũndũ wa kũtanĩthya mũno kwona ũndũ Yeova ũendeee kũathima wĩa wa kũtavanyʼa. Andũ mbee wa 250,000 nĩmavatisawa kĩla mwaka. (Kũt. 28:2) Mũtavanyʼa amina kũtetheesya mũmanyĩwʼa wa Mbivilia kũvikĩĩa kũvatiswa, mavinda maingĩ nĩ laisi kũeka kũmũmanyĩsya nĩ kana amanthe andũ angĩ ma kũmanyĩsya. Nake mũmanyĩwʼa nĩvatonyeka akaeka kwĩmanyĩsya nĩ kana atũmĩe ĩvinda yingĩ ũtavanyʼanĩ. Ĩndĩ, twaĩlĩte kũmanya kana ve vata wa amanyĩwʼa ma Mbivilia kwĩthĩwa na mũsingi mũseo nthĩnĩ wa ũla wʼo. Maĩlĩte kwĩthĩwa na “mĩi mĩlũmu” nthĩnĩ wa Klĩsto na me ‘alũmu mũĩkĩĩonĩ.’ (Ako. 2:6, 7; 2 Tim. 3:12) Kwoou, ĩtina wa mũmanyĩwʼa wa Mbivilia kũvatiswa, aĩlĩte kũendeea kwĩmanyĩsya mavuku Mbivilia Ĩmanyĩasya na ‘Wendo wa Ngai’ nginya amamine.—Sisya Ũthũkũmi Witũ wa Ũsumbĩ wa Mwei wa 4, 2011 wa Kĩswaili, ĩthangũ ya 2.