Ũndũ Tũtonya Kwĩthĩwa Atavanyʼa Aseo—Waĩle Kwĩka Ata Wakomana na Mwene Nyũmba Mũthilĩku?

Nĩkĩ Nĩ Ũndũ wa Vata?: Andũ aingĩ ala twĩthĩaa ĩla tũũtavanyʼa methĩawa me auu. O na vailyĩ ũu, Yesũ athanie kana andũ amwe makatũmena. (Yoa. 17:14) Kwoou, tũyaĩlĩte kũsengʼa ĩla twakomana na andũ mathilĩkĩte. Ĩla tweethĩana na andũ ta asu, twaĩle kwĩka maũndũ kwa nzĩa ĩtonya kũmwendeesya Yeova, ũla nĩwe ũtũtũmĩte tũtavanyʼe. (Alo. 12:17-21; 1 Vet. 3:15) Kwĩka ũu kũkatuma maũndũ matathũkĩĩa. O na ĩngĩ, ũu ũkatuma mwene nyũmba ũsu na ala moona ũndũ tweeka methukĩĩsya ĩvinda yĩngĩ Ngũsĩ sya Yeova syathi kũmatavya ũvoo.—2 Ako. 6:3.

Ũtonya Kwĩka Ũu Ata?:

Ĩthĩwa wĩ mũuu na wĩ na ũnyanya ĩla ũũneena na mwene nyũmba ũthilĩkĩte. Kwĩka ũu no kũtume avoova. Ndũkone mwene nyũmba ta uwe ũkũthatĩe. (Mũta. 7:9) No kwĩthĩwa athatĩte nũndũ wa mathĩna make mwene kana ũkethĩa wamũthokea ĩvinda yĩtaĩle. O na ethĩwa athatĩte nũndũ twathi kũmũtavya ũvoo, nĩvatonyeka ũkethĩa thĩna ũsu umanĩte na kwĩwʼa ndeto ite nzeo ĩũlũ witũ.—2 Ako. 4:4.
Sũngĩa mwene nyũmba wĩ mũuu na ũitũmĩa ndeto nzeo. (Nth. 15:1) No wĩthĩwe wamũamũkya kana wamũtilĩĩla ũndũ ũkwĩkaa? O na kau tũyĩtasya ũekeo nũndũ wa wĩa witũ wa kũtavanyʼa, no ũmwĩtye ũekeo nũndũ wa kũmũthokea ĩvinda yĩtaĩle. No ethĩwe angʼathĩtye nũndũ nĩwĩwʼĩte tũineenewa naĩ? Ethĩwa vailyĩ ũu, no ũmwĩe: “Nĩnĩsĩ ũndũ ta ũsu no ũtume ũthata. Ĩndĩ nĩvatonyeka ũkethĩa ndeto ila wĩwʼĩte ĩũlũ witũ ite sya wʼo. No ngũelesye?” No ethĩwe atetĩkĩlanaa na ũndũ ũmwe tũmanyĩasya, ta kũtengwa kana kwĩkĩwa nthakame? No ũmwĩe: “Nĩngũkũelewa. O na andũ angĩ nĩmethĩawa na woni ta ũsu waku. No nĩkwonyʼe kuma Mbivilianĩ nĩkĩ tũmanyĩasya ũndũ ũsu?”
Ethĩwa mũndũ ũsu nũngʼathĩtye mũno, nũseo tũkamũtia vandũ va kũsũngĩlana nake. Atwĩa ndekwenda kũthokewa ĩngĩ nĩ Ngũsĩ sya Yeova, no tũmwĩe kana nĩtũkwĩka ũu wasya.

Tata Kwĩka Ũndũ Ũũ Mweinĩ Ũũ:

Ũthaithinĩ wenyu wa mũsyĩ, tatai mwonanyʼe ũndũ mũtonya kwĩka mwakomana na mwene nyũmba ũthilĩkĩte.
Mwatiana na mwene nyũmba eĩ mũthilĩku, neena wĩ na ũla mũũtavanyʼa nake ĩũlũ wa ũndũ mwĩĩ mũtonya kwĩka maũndũ nesanga.