Ũndũ Tũtonya Kwĩthĩwa Atavanyʼa Aseo​—Kũkiita Ngoo ya Mũmanyĩwʼa Ũtũmĩĩte Ĩvuku “Ĩyĩkalyei Ene Wendonĩ wa Ngai”

NĨKĨ NĨ ŨNDŨ WA VATA: Nĩ kana andũ mamũthaithe Yeova kwa nzĩa ĩla wendaa, no nginya memanyĩsye ĩũlũ wa myolooto yake na mayĩkala kwosana nayo. (Isa 2:3, 4) Ĩvuku ya kelĩ yĩla tũtũmĩaa kwĩmanyĩsya Mbivilia na andũ nĩ ‘Wendo wa Ngai,’ na nĩyĩtetheeasya amanyĩwʼa ma Mbivilia mamanye ũndũ matonya kũtũmĩa myolooto ya Ngai thayũnĩ woo. (Aevl 5:14) No nginya tũtate vyũ kũkiita ngoo syoo ĩla tũũmamanyĩsya nĩ kana mewʼe meekĩwa vinya wa kwĩka moalyũku ala maĩle.—Alo 6:17.

ŨTONYA KWĨKA ŨU ATA?:

• Ĩyũmbanyʼe nesa ũlilikene mavata ma mũmanyĩwʼa waku. Andĩka makũlyo ala matonya ũkũtetheesya ũmanye mosũanĩo na mawoni make ĩũlũ wa kĩla mũkwĩmanyĩsya.—Nth 20:5; be 259

• Tũmĩa tũsandũkũ twʼonthe tũla twĩ ĩvukunĩ yĩu nĩ kana ũtetheesye mũmanyĩwʼa one vata wa kũatĩĩa myolooto ya Mbivilia

• Tetheesya mũmanyĩwʼa atũmĩae wasya wake wa ngoo nesa ĩla ũkwĩka motwi, ĩndĩ ndũkatate kũmwĩkĩa motwi.—Aka 6:5

• Tũmĩa ũĩ kũmanya kana mũmanyĩwʼa nũkwenda kũtetheewʼa atũmĩe myolooto ĩmwe ya Mbivilia. Mũthuthye kwa nzĩa nzeo amanye kana wendo wake kwa Yeova nĩwʼo waĩle kũtuma eka moalyũku ala maĩle.—Nth 27:11; Yoa 14:31