Atavanyʼa meũnengane tulakiti vakuvĩ na taoni nene yĩtawa Monrovia, nthĩ ya Liberia

Ũndũ Ũtonya Kwasya

●○○ KŨTAVYA MŨNDŨ YA MBEE

Ĩkũlyo: Mbivilia no ĩtũtethye ũmũnthĩ?

Ĩandĩko: 2Tim 3:16

Kĩla mũkaneenea wasyoka: Nĩ ũvoo mwaũ wĩ Mbivilianĩ?

○●○ KŨSYOKEA MŨNDŨ YA MBEE

Ĩkũlyo: Nĩ ũvoo mwaũ wĩ Mbivilianĩ?

Ĩandĩko: Mt 6:10

Kĩla mũkaneenea wasyoka: Ũsumbĩ wa Ngai ũkeeka ata?

○○● KŨSYOKEA MŨNDŨ YA KELĨ

Ĩkũlyo: Ũsumbĩ wa Ngai ũkeeka ata?

Ĩandĩko: Nda 2:44

Kĩla mũkaneenea wasyoka: Nĩ maũndũ meva makekĩka ĩũlũ wa nthĩ ndeto ila syĩ ĩandĩkonĩ yĩĩ syeanĩa?

Kwambĩĩa mwei ũũ, maũmbano ma katĩkatĩ wa kyumwa maikethĩawa na ilungu itatũ syĩ kĩvathũkanyʼo ila ineethĩawa syonanĩtye kĩla tũtonya kwasya ũtavanyʼanĩ. Vandũ va ũu, Kavuku ka Kwĩmanyĩsya ka Ũmbano kakeethĩawa na kĩlungu kyonanĩtye ũndũ tũtonya kwasya kĩ na ĩkũlyo, ĩandĩko, na ĩkũlyo yĩngĩ yonanĩtye kĩla mũkaneenea wasyoka. Kĩla kyumwa vakoonanawʼa vitio ĩmwe yonanĩtye ũndũ tũtonya kwasya. Kĩla mũtavanyʼa no anyuve nĩ ĩvuku yĩva katĩ wa mavuku ala tũtũmĩaa kũmanyĩsya andũ ũkwenda kũtũmĩa na nĩ ĩndĩĩ ũkũyĩtũmĩa. Kwa ngelakanyʼo, no avange kũyĩtũmĩa ĩla ũkũtavya mũndũ ya mbee kana ĩla ũkũmũsyokea. O na ĩngĩ, kavuku kaitũ kakeethĩawa konanĩtye maũndũ tũtonya kũtũmĩa ilungunĩ ilĩ sya kũsyokea mũndũ ila tũnengetwe. Nzĩa ĩsu ĩkatũtetheesya twĩanĩĩsye nesa kĩeleelo kitũ kya kũmanyĩsya onthe “ala manyuvĩtwe [kana, me na ngoo nzeo kwondũ wa] kwĩthĩwa na thayũ ũtathela.”—Meko 13:48.

Ilungu sya Amanyĩwʼa: Ethĩwa vayonanĩtwʼe ũndũ ũngĩ, amanyĩwʼa maĩle kwĩka ũndũ kĩlungu kĩla kyonanĩtye ũndũ tũtonya kwasya kyaĩtye.