Kũekewa Naĩ Wovosyo Ũtaaumwʼa

Nthembo ya wovosyo, ĩla Yesũ waumisye na nthakame yake, noyo yĩ yoka ĩtumaa tũekewa naĩ. (Aev. 1:7) O na vailye ũu, Mbivilia yaĩtye: “Nĩkwĩthĩwa Ngai, kwondũ wa wũmĩĩsyo wake, nĩwaekeaa naĩ ila syeekawa ĩvinda ĩvĩtu,” na ũu nĩ kwasya, Yesũ ataaumya nthembo ya wovosyo. (Alo. 3:25) Ĩndĩ we Yeova aĩ atonya kwĩka ũu ata na ĩvindanĩ o yĩu aiatĩĩa ũsili wa katĩ?

Yeova nĩwathanie “ũsyao” ũla ũkatangĩĩa ala mamũĩkĩĩaa na maĩkĩĩaa mawatho make. Yĩla wathanie ũndũ ũsu, no ũndũ ũmwe na waminĩte kumya wovosyo. (Mwa. 3:15; 22:18) Ngai nĩweesĩ nesa vyũ kana ĩvinda yake yavika, Mwana wake akeeyumya na ngenda ethĩwe nthembo ya wovosyo. (Aka. 4:4; Aevl. 10:​7-10) Yĩla Yesũ waĩ kũũ nthĩ, Yeova nĩwamũnengete ũkũmũ wa kũekea naĩ o na wovosyo ũtaaĩsa kumwʼa. Yesũ aĩ atonya kũekea naĩ sya ala maĩ na mũĩkĩĩo nũndũ nĩweesĩ kana wovosyo waĩ ũvwʼĩke naĩ syoo.—Mt. 9:​2-6.