Kwĩthĩwa na Mũuo o na kau kwĩ na Kaũ na Ithokoo
Mũndũũme wĩtawa Gary, ũla weethĩawa itanĩ, aĩtye: “Ndambĩĩe kwĩmanyĩsya Mbivilia, ndyeethĩawa nĩsĩ nĩkĩ kwĩthĩawa na ũngʼendu, ũsili ũte wa katĩ, na mathĩna ĩũlũ wa nthĩ. Ĩndĩ yu nĩ na mũuo wa kĩlĩko. Nĩnĩsĩ kana Yeova Ngai akatuma nthĩ yĩthĩwa na mũuo.”
Ti Gary wĩwʼaa ũu e weka. Kwoona ũndũ Mbivilia ĩtetheesye angĩ.
MBIVILIA YAĨTYE: “Wĩ mũseo, Mwĩaĩi, na nĩwĩyũmbanĩtye kũekea.”—Savuli 86:5.
ŨNDŨ KŨMANYA ŨU KŨTETHASYA: “Mũsoa ũsu ũndĩkĩĩthasya kana Yeova e tei. Nĩnĩsĩ kana nĩwĩyũmbanĩtye kũndekea nũndũ wa maũndũ onthe ala neekie ĩvinda ĩvĩtu yĩla naĩ itanĩ.”—Wilmar, Colombia.
MBIVILIA YAĨTYE: “Nĩngũmba matu meũ na nthĩ nzaũ; na maũndũ ma mbee matikalilikanwa, o na matikalika kĩlilikanonĩ.”—Isaia 65:17.
ŨNDŨ KŨMANYA ŨU KŨTETHASYA: “Nĩthĩawa na ũwau wa kũkwʼa ngoo mũno na mawĩmakĩo maingĩ nũndũ wa maũndũ mathũku ala neeyoneie yĩla naĩ itanĩ. Ĩndĩ ĩandĩko yĩu yĩndilikanasya kana o mĩtũkĩ Yeova nũkũndetheesya nũlwe vyũ nĩ maũndũ asu mathũku. Maikalika ĩngĩ kĩlĩkonĩ kana ngoonĩ. Ũsu nĩ mũthĩnzĩo wa mwanya ta kĩ!”—Zafirah, Amelika.
MBIVILIA YAĨTYE: “Mĩthenyanĩ yake ala alũngalu makaaĩlaa, na kũkeethĩwa mũuo mwingĩ, kũvika mwei ndũkethĩwa ĩngĩ.”—Savuli 72:7.
ŨNDŨ KŨMANYA ŨU KŨTETHASYA: “Mavinda maingĩ nĩnzũanĩaa ndeto isu. O mĩtũkĩ, kaũ na maũndũ mathũku ala ũetae makathela vyũ, na tũikethĩawa na vata wa kũthĩnĩka tũyĩkũlya ethĩwa endwa maitũ nĩ asũvĩĩku.”—Oleksandra, Ukraine.
MBIVILIA YAĨTYE: “Akwʼũ maku makeethĩwa thayũ. . . . Amũkai mwine, inywʼĩ ala mũtũaa kĩtoonĩ.”—Isaia 26:19.
ŨNDŨ KŨMANYA ŨU KŨTETHASYA: “Vakuvĩ andũ onthe ma mũsyĩ witũ nĩmooaĩwe kaũnĩ wa mbaĩ ũla waĩ Rwanda. Ĩndĩ mũsoa ũsu ũndĩkĩĩthĩtye kana ngamona ĩngĩ. Neteele na mea mũno kwĩwʼa mawasya moo ĩngĩ mathayũũkwʼa.”—Marie, Rwanda.
MBIVILIA YAĨTYE: “Vatiele ĩvinda ĩnini, na mũthũku ndakethĩwa . . . Ĩndĩ ala auu makatiĩwa nthĩ, na makeetanʼya mũuonĩ mwingĩ.”—Savuli 37:10, 11.
ŨNDŨ KŨMANYA ŨU KŨTETHASYA: “O na kau kaũ nĩwathelile, kũyĩthĩawa sila wa katĩ na kwĩ o andũ athũku. Mĩsoa ĩsu yĩthĩĩtwe ĩindethya mũno. Yeova nĩwonaa maũndũ onthe na nũmbeleawa. Nĩwathanĩte kana o mĩtũkĩ maũndũ asu onthe makathela na maikalilikanwʼa ĩngĩ.”—Daler, Tajikistan.
Andũ ala mawetetwe ĩkasetinĩ yĩĩ nĩ amwe katĩ wa Ngũsĩ sya Yeova milioni mbingĩ ala matetheewʼe nĩ Mbivilia makethĩwa na mũuo. Nĩmemanyĩĩtye ũndũ matonya kũkĩlya vinya kĩmena kĩla kĩthĩawa vo nũndũ wa andũ kwĩthĩwa me ma ngo, nthĩ, na mbaĩ syĩ kĩvathũkanyʼo. Kana o nũndũ wa maũndũ angĩ. (Aeveso 4:31, 32) Ngũsĩ sya Yeova iikwataa mbau ngalĩko o na ĩmwe maũndũnĩ ma siasa na iyĩlikasya maũndũnĩ ma ũngʼendu.—Yoana 18:36.
O na ĩngĩ, Ngũsĩ sya Yeova nitwʼĩĩkaa athaithi ala angĩ ĩũlũ wa nthĩ yonthe. (Yoana 13:35) Kwa ngelekanyʼo, yaĩ no nginya Oleksandra, ũla wawetwa mwambĩĩonĩ, akĩĩe nthĩ ĩngĩ e na mwĩĩtu-a-inyia nũndũ wa kaũ. Aĩtye: “Yĩla twakĩlile mũvaka wa nthĩ yitũ oou, tweethĩie Ngũsĩ sya kũu itweteele na nĩsyatũthokisye. Ũtethyo woo nĩwatumie tũmanyĩa kwĩkala nthĩ ĩsu twakĩĩie.”
Nĩtũũkũthokya ũke maũmbanonĩ maitũ vala ũtonya kwĩmanyĩsya maũndũ maingangĩ ĩũlũ wa ũndũ ũtonya kũkwata mũuo oyu na ĩũlũ wa nthĩ yĩ mũuo ĩla Mbivilia yathanĩte. Lika nthĩnĩ wa jw.org/kam nĩ kana ũmanye vandũ vakuvĩ naku vala ũmbano wĩkĩawa kana ũkũlye ũmanyĩwʼe Mbivilia vate ndĩvi nĩ ũmwe wa Ngũsĩ sya Yeova mũtũmĩĩte ĩvuku Tanĩa Thayũ Tene na Tene!