Tetheesya Amanyĩwʼa ma Mbivilia Matwʼe Kũmũthũkũma Yeova

1-2. (a) Nĩkĩ amanyĩwʼa amwe ma Mbivilia makĩaa kũtwʼa kũmũthũkũma Yeova? (b) Twĩneenea kyaũ ĩsomonĩ yĩĩ?

NĨVETHĨWA ve maũndũ maũsiĩĩaa kũtwʼĩka Ngũsĩ ya Yeova? Nĩvatonyeka ũkethĩwa wakĩaa kũthatĩwa nĩ ala mũthũkũmaa ĩmwe, anyanyau, kana andũ maku ma mũsyĩ. Kana nĩvatonyeka ũkethĩwa weewʼaa ta ũtatonya kũatĩĩa myolooto ya Ngai. Ethĩwa ũu nĩwʼo weewʼaa, no ũelewe nĩkĩ amanyĩwʼa amwe ma Mbivilia mewʼaa ve vinya kwĩka ũtwi wa kũtwʼĩka Ngũsĩ sya Yeova.

² Yesũ nĩweesĩ kana maũndũ ta asu no masiĩĩe mũndũ kwĩka maendeeo ma kĩ-veva. (Mt. 13:​20-22) Ĩndĩ ndaaeka kũtetheesya ala makĩaa kũmũatĩĩa. Vandũ va ũu, nĩwatetheeisye andũ ta asu (1) mamanye kĩla kĩũmasiĩĩa kwĩka maendeeo, (2) mamwende Yeova mũnango, (3) mamũvĩtye mbee thayũnĩ woo, na (4) maikĩlya vinya mawetu ala meũmakwata. Tũtonya ata kũatĩĩa ngelekanyʼo ya Yesũ na tũitetheesya ala mekwĩmanyĩsya Mbivilia matũmĩĩte ĩvuku Tanĩa Thayũ Tene na Tene! matwʼe kũmũthũkũma Yeova?

TETHEESYA MŨMANYĨWʼA WAKU AMANYE KĨLA KĨŨMŨSIĨĨA KWĨKA MAENDEEO

3. Nĩ kyaũ kĩtonya kwĩthĩwa kyasiĩĩaa Nikotemo kũtwʼĩka mũmanyĩwʼa wa Yesũ?

³ Nikotemo aĩ mũtongoi wa Ayuti waĩ nguma, ĩndĩ ve ũndũ wamũsiĩĩaa kũtwʼĩka mũmanyĩwʼa wa Yesũ. Myei ta thanthatũ ĩtina wa Yesũ kwambĩĩa ũtavanyʼa wake, Nikotemo nĩwamanyie kana atũmĩtwe nĩ Ngai. (Yoa. 3:​1, 2) Ĩndĩ we nĩwatwie kũkomana na Yesũ evithĩte nũndũ ‘nĩwakĩaa Ayuti.’ (Yoa. 7:13; 12:42) Nĩvatonyeka akethĩwa asũanĩaa kana nũkũkwata wasyo mũnene atwʼĩka mũmanyĩwʼa wa Yesũ.a

4. Yesũ atetheeisye Nikotemo ata aelewe kĩla Ngai wendaa eke?

⁴ Nikotemo nĩweesĩ ĩla Mĩao ya Mose, ĩndĩ nĩwendaa kũtetheewʼa aelewe kĩla Ngai wendaa eke. Kwoou Yesũ amũtetheeisye ata? Nĩweeyũmbanĩtye kũtũmĩa ĩvinda yake, o na ethĩwa ekomana nake ũtukũ. Eka ũu, nĩwamũeleisye nesa kĩla waaĩlĩte kwĩka nĩ kana atwʼĩke mũmanyĩwʼa wake. Kwa ngelekanyʼo, amwĩie elile, avatiswe na kĩwʼũ, na aiĩkĩĩa Mwana wa Ngai.—Yoa. 3:​5, 14-21.

5. Tũtonya ata kũtetheesya mũmanyĩwʼa wa Mbivilia amanye kĩla kĩũmũsiĩĩa kwĩka maendeeo?

⁵ O na ethĩwa mũmanyĩwʼa wa Mbivilia nĩwĩsĩ Maandĩko nesa, nĩvatonyeka akethĩwa ayenda kũtetheewʼa amanye kĩla kĩũmũsiĩĩa kwĩka maendeeo. Kwa ngelekanyʼo, no kwĩthĩwa wĩa wake ũkuaa ĩvinda yake yingĩ kana andũ make ma mũsyĩ mamũvĩngaa. Kwoou ĩyumye ũmũtetheesye. No ũmũthokye mũĩsanĩe kaindo kana mũkathi kũtembea vandũ. Mavindanĩ ta asu, no ewʼe e mũthalĩku mũnango kũkũelesya mawetu ala wĩ namo. Mwĩkĩe vinya eke moalyũku ala mekwendeka nĩ kana onyʼe Yeova kana nũmwendete, ĩndĩ ti aĩ nĩ kana akũtanĩthye.

6. Ũtonya ata kũtetheesya mũmanyĩwʼa ethĩwe na ũkũmbaũ wa kũatĩĩa kĩla ũkwĩmanyĩsya? (1 Akolintho 16:13)

⁶ Yĩla mũmanyĩwʼa wa Mbivilia weethĩwa ate na nzika kana Yeova nũkũmũtetheesya ekale kwosana na myolooto ya Mbivilia, akeethĩawa na ũkũmbaũ wa kũatĩĩa kĩla ũkwĩmanyĩsya. (Soma 1 Akolintho 16:13.) Kĩanda kyaku no kĩelekanwʼe na kya mwalimũ. Walilikana ĩvinda yĩla waĩ sukulu, nĩ mwalimũ wĩva wendete mũno? Nĩvatonyeka ũkethĩwa wendete ũla waũtetheeasya e na wũmĩĩsyo nĩ kana ũĩkĩĩe vyũ kana no wĩanĩsye kĩla we mwene ũkwenda kwĩka. O ta ũu, mwalimũ mũseo wa Mbivilia ndekaa o kũmanyĩsya kĩla Ngai wendaa twĩke, ĩndĩ nũĩkĩĩthasya mũmanyĩwʼa wake kana Yeova no amũtetheesye kwĩka moalyũku ala mekwendeka. Ũtonya kwĩka ũu ata?

TETHEESYA MŨMANYĨWʼA WAKU AMWENDE YEOVA MŨNANGO

7. Yesũ atetheeisye ethukĩĩsya make ata mamwende Yeova mũnango?

⁷ Yesũ nĩweesĩ kana amanyĩwʼa make mamwenda Ngai, kĩu kĩkamathangaasya maatĩĩe kĩla meemanyĩsya. Kaingĩ, amanyĩasya amanyĩwʼa make maũndũ matonya kũmatetheesya kũmwenda Ĩthe woo wa ĩtunĩ mũnango. Kwa ngelekanyʼo, aelekanilye Yeova na mũndũũme ũnengae syana syake syĩndũ nzeo. (Mt. 7:​9-11) Ĩndĩ andũ amwe mamwĩthukĩĩsye nĩmatonya kwĩthĩwa mataĩ na aa-ĩthe mamendete. Kwoou kwasũanĩa ũndũ matonya kwĩthĩwa meewie yĩla Yesũ wamanengie ngelekanyʼo ya mũndũũme wĩ ĩnee ũla wathokisye nesa mwana wake weekĩte maũndũ maingĩ mathũku. Kĩu kyaĩ kĩtonya kũtuma meyonea nesa ũndũ Yeova wĩwʼĩaa ĩnee yingĩvĩte syana syake kũũ ĩũlũ wa nthĩ.—Luka 15:​20-24.

8. Ũtonya ata kũtetheesya mũmanyĩwʼa wa Mbivilia amwende Yeova mũnango?

⁸ O naku no ũtetheesye mũmanyĩwʼa wa Mbivilia amwende Yeova mũnango wakindĩlĩĩlaa nguma syake yĩla mũkwĩmanyĩsya. Kĩla ĩvinda mũkwĩmanyĩsya, mũtetheesye one ũndũ kĩu mũkwĩmanyĩsya kĩkwonanyʼa kana Yeova nũtwendete. Na yĩla mũũneenea nthembo ya wovosyo, mũtetheesye one ũndũ ĩmũkonetye we mwene. (Alo. 5:8; 1 Yoa. 4:10) Yĩla mũmanyĩwʼa wa Mbivilia waelewa ũndũ Yeova ũmwendete we mwene, nĩvatonyeka kĩu kĩkamũtetheesya kũmwenda mũnango.—Aka. 2:20.

9. Nĩ kyaũ kyatetheeisye mũndũũme wĩtawa Michael kũalyũla mwĩkalĩle wake?

⁹ Kwasũanĩa ngewa ya Michael, ũla wĩkalaa Indonesia. Aeewe ũwʼonĩ, ĩndĩ ndaaosa ĩtambya ya kũvatiswa. E na myaka 18, nĩwathamĩĩie nthĩ ĩngĩ, na e kũu, athũkũmaa wĩa wa kũtwaa maloli. Ĩtina, nĩwasyokie Indonesia nĩ kana akatwaane, ĩndĩ nĩwatiie mũsyĩ wake kũu na aendeea na wĩa wake. Ĩvindanĩ o yĩu, kĩveti kyake na kelĩtu koo nĩmambĩĩie kwĩmanyĩsya Mbivilia na meeka maendeeo. Ĩtina wa inyia wake kũkwʼa, nĩwatwie kũsyoka mũsyĩ nĩ kana akasũvĩe ĩthe wake, na nĩweetĩkĩlile kwĩmanyĩsya Mbivilia. Mayĩmanyĩsya kĩlungu kya “Ĩmanyĩsye Mũnango” Ĩsomo ya 27, ĩvukunĩ Tanĩa Thayũ Tene na Tene! nĩwakiitiwe ngoo mũno. Asũanĩa ũndũ Yeova ũtonya kwĩthĩwa eewie oona Mwana wake aithĩna, kĩu nĩkyatumie aĩa. Ũndũ ũsu nĩwatumie ona nthembo ya wovosyo yĩ ya vata mũno, na nũndũ wa ũu, aalyũla mwĩkalĩle wake na avatiswa.

TETHEESYA MŨMANYĨWʼA WAKU AMŨVĨTYE YEOVA MBEE THAYŨNĨ WAKE

10. Yesũ atetheeisye amanyĩwʼa make ata mamũvĩtye Yeova mbee thayũnĩ woo? (Luka 5:​5-11) (O na ĩngĩ, sisya visa.)

¹⁰ Andũ amwe Yesũ watavisye ũvoo nĩmamanyie na mĩtũkĩ kana nĩwe Masia ũla wathanĩtwe, ĩndĩ nĩmendaa kũtetheewʼa mavĩtye mbee ũthũkũmi woo. Vetelo na Endelea nĩmeethĩĩtwe me amanyĩwʼa ma Yesũ kwa ĩvinda yĩana ũna yĩla wamathokisye mamũatĩĩe ĩvinda yonthe. (Mt. 4:​18, 19) Me na Yakovo na Yoana mateaa makũyũ, na viasala woo waendeee nesa. (Mko. 1:​16-20) Yĩla Vetelo na Endelea ‘matiie itei syoo,’ nĩvatonyeka makethĩwa meekie mĩvango ya ũndũ mekũendeea kũthĩnĩkĩa mũsyĩ woo o maendeee kũmũatĩĩa Yesũ. Nĩ kyaũ kyamatetheeisye kũvĩtya mbee ũthũkũmi woo? Ngewa ĩla yĩ ĩvukunĩ ya Lũka nĩtũeleetye kyama kĩla Yesũ weekie, kĩla kyatumie matethĩwa na nzika kana Yeova e ũtonyi wa kwĩanĩsya mavata moo.—Soma Luka 5:​5-11.

11. Tũtonya ata kũtũmĩa maũndũ ala twĩyoneete kũtetheesya mũmanyĩwʼa ethĩwe na mũĩkĩĩo mũlũmangu?

¹¹ O na kũtwʼĩka tũitonya kwĩka syama, ta Yesũ, no tũelesye amanyĩwʼa maitũ ũndũ twĩyoneete Yeova aitetheesya ala mamũvĩtya mbee thayũnĩ woo. Kwa ngelekanyʼo, no ũlilikane ũndũ Yeova waũtetheeisye yĩla wambĩĩie kũthi maũmbanonĩ? Nĩvatonyeka ũkethĩwa walasimĩkie kũthi kũneena na ũla wakũandĩkĩte na wamũelesya nĩkĩ ũtakathũkũmaa masaa mate ma wĩa ethĩwa kĩu nĩkĩũkũsiĩĩa kũthi maũmbanonĩ. Ũitavya mũmanyĩwʼa waku maũndũ ala wĩyoneete, mũelesye ũndũ mũĩkĩĩo waku walũlũmĩĩile nũndũ wa kwona Yeova aiathima ũtwi waku wa kũvĩtya mbee ũthaithi wake.

12. (a) Nĩkĩ twaĩlĩte kũthokya atavanyʼa me kĩvathũkanyʼo yĩla tũkwĩmanyĩsya na mũmanyĩwʼa wa Mbivilia? (b) Ũtonya ata kũtũmĩa vitio nĩ kana ũmanyĩsye mũmanyĩwʼa waku nesa? Nengane ngelekanyʼo.

¹² O na ĩngĩ, mũmanyĩwʼa waku no atetheke eewʼa moalyũku ala ana-a-asa na eĩtu-a-asa mekĩte thayũnĩ woo nĩ kana mamũvĩtye Yeova mbee. Kwoou yĩla mũkwĩmanyĩsya, thokasya ana-a-asa na eĩtu-a-asa me kĩvathũkanyʼo. Makũlye maelesye ũndũ makwatie ũwʼo na moalyũku ala meekie nĩ kana mavĩtye ũthũkũmi wa Yeova mbee thayũnĩ woo. O na no mwĩloele vitio ila syĩ ungu wa kĩlungu “Ĩmanyĩsye Mũnango” na ethĩwa nĩvatonyeka, no mwĩloele ila syĩ nthĩnĩ wa “Maũndũ Angĩ ma Kwĩmanyĩsya” ĩvukunĩ Tanĩa Thayũ Tene na Tene! Kwa ngelekanyʼo, yĩla mũũneenea Ĩsomo ya 37, no ũmũwetee myolooto ĩla yĩ vitionĩ Yeova Akatwĩanĩasya Mavata Maitũ.

TETHEESYA MŨMANYĨWʼA WAKU AKĨLYE VINYA MAWETU ALA MEŨMŨKWATA

13. Yesũ atetheeisye amanyĩwʼa make ata meyũmbanĩsye kũvĩngwa?

¹³ Yesũ nĩwatavasya aatĩĩi make ĩngĩ na ĩngĩ kana makavĩngwa, na amwe makamavĩnga nĩ andũ moo ma mũsyĩ. (Mt. 5:11; 10:​22, 36) Kavinda kakuvĩ atanoawa, nĩwatavisye amanyĩwʼa make kana maĩ matonya kũawa nũndũ wa kũmũthaitha Yeova. (Mt. 24:9; Yoa. 15:20; 16:2) Na nĩkyo kĩtumi wameie mekalae metũĩĩe yĩla me ũtavanyʼanĩ. Kwa ngelekanyʼo, ameie maikakananĩe na mũndũ o na wĩva ũkumanyʼa kĩla maĩkĩĩaa na amea methĩwe me metho ĩũlũ wa kĩla meũweta na kĩla mekwĩka.

14. Ũtonya kũtetheesya mũmanyĩwʼa waku ata eyũmbanĩsye kũvĩngwa? (2 Timotheo 3:12)

¹⁴ No tũtetheesye mũmanyĩwʼa witũ wa Mbivilia eyũmbanĩsye kũvĩngwa twamũelesya maũndũ amwe ũtonya kũtavwʼa nĩ andũ ala ũthũkũmaa namo, anyanyae, na andũ make ma mũsyĩ. (Soma 2 Timotheo 3:12.) Andũ amwe ũthũkũmaa namo no mambĩĩe kũmũthekeea nũndũ yu nũkũtata kũatĩĩa momanyĩsyo ma Mbivilia thayũnĩ wake. Namo andũ ma mũsyĩ no mambĩĩe kumanyʼa mũĩkĩĩo wake. O ũndũ twoombanyʼa amanyĩwʼa ma Mbivilia na mĩtũkĩ kwondũ wa ũvĩnganĩsya, nowʼo makethĩawa meyũmbanĩtye yĩla waumĩla.

15. Nĩ kyaũ kĩtonya kũtetheesya mũmanyĩwʼa wa Mbivilia omĩĩsye kũvĩngwa nĩ andũ ma mũsyĩ?

¹⁵ Yĩla mũmanyĩwʼa wa Mbivilia ũkũvĩngwa nĩ andũ make ma mũsyĩ, mwĩkĩe vinya asũanĩe kĩla kĩũtuma meka ũu. Nĩvatonyeka makethĩwa maisũanĩa ekĩte kwawʼa kana o makethĩwa mamenete Ngũsĩ sya Yeova. O nake Yesũ ndaakuwa nesa nĩ andũ amwe ma mũsyĩ woo. (Mko. 3:21; Yoa. 7:5) Kwoou manyĩsya mũmanyĩwʼa waku wa Mbivilia kwĩthĩwa na wũmĩĩsyo na aineenasya andũ onthe nesa, o vamwe na andũ make ma mũsyĩ.

16. Tũtonya kũtetheesya mũmanyĩwʼa wa Mbivilia ata atũmĩe ũĩ yĩla ũkũelesya angĩ maũndũ ala ũĩkĩĩaa?

¹⁶ O na yĩla andũ ma mũsyĩ moonanyʼa kana nĩmekwendeewʼa, no wĩthĩwe wĩ ũndũ mũseo mũmanyĩwʼa akaema kũelesya maũndũ onthe ala wĩmanyĩĩtye savalĩ ũmwe. Akeka ũu, no anosye andũ make ma mũsyĩ na kĩu kĩitũma matenda kũneena nake ĩũlũ wa mũĩkĩĩo wake ĩngĩ. Kwoou ĩkĩa vinya mũmanyĩwʼa waku aelesye o maũndũ manini na aitia mwanya wa kwĩsa kũneenea angĩ maingangĩ ĩvinda yĩngĩ. (Ako. 4:6) Kwa ngelekanyʼo, no amonyʼe kĩsese kitũ kya jw.org. Kĩu no kĩmatetheesye makemanyĩsya maũndũ maingĩ ĩũlũ wa Ngũsĩ sya Yeova o kavola kwa kavola.

17. Ũtonya ata kũmanyĩsya mũmanyĩwʼa wa Mbivilia asũngĩe makũlyo ala andũ angĩ matonya kwĩthĩwa namo ĩũlũ wa Ngũsĩ sya Yeova? (O na ĩngĩ, sisya visa.)

¹⁷ Nĩ kana mũmanyĩwʼa waku ethĩwe eyũmbanĩtye kũsũngĩa makũlyo ala andũ make ma mũsyĩ kana ala mathũkũmaa ĩmwe matonya kũmũkũlya, no mũtũmĩe kĩlungu “Makũlyo Makũlawʼa Mavinda Maingĩ” kĩla kĩ nthĩnĩ wa jw.org/kam. (2 Tim. 2:​24, 25) Na mũthyanĩ wa kĩla ĩsomo, neeneai ilungu syĩ na kyongo, “Andũ Amwe Maasya” kana “Andũ Amwe no Makũlye” ila syĩ nthĩnĩ wa ĩvuku Tanĩa Thayũ Tene na Tene! Ĩkĩa vinya mũmanyĩwʼa waku atũngĩlĩĩle ĩngĩ na ĩngĩ kĩla ũkũthi kũelesya andũ atũmĩĩte ndeto syake mwene. Na ndũkakĩe kũmũelesya ũndũ ũtonya kwaĩlangya nzĩa yake ya kũelesya angĩ kĩla ũĩkĩĩe. Weeka ũu, kĩu kĩkamũtetheeasya ateteae mũĩkĩĩo wake e na ũkũmbaũ.

18. Ũtonya ata kwĩkĩa vinya mũmanyĩwʼa wa Mbivilia atwʼĩke mũtavanyʼa ũte mũvatise? (Mathayo 10:27)

¹⁸ Yesũ eeaĩe amanyĩwʼa make matavye andũ ũvoo mũseo. (Soma Mathayo 10:27.) O ũndũ mũmanyĩwʼa wa Mbivilia weemanyĩsya na mĩtũkĩ kũelesya angĩ maũndũ ala ũĩkĩĩe, ũu nowʼo ũkeethĩawa atonya kũmwĩkwatya Yeova na mĩtũkĩ. Ũtonya ata kũmũtetheesya eke ũu? Yĩla kĩkundinĩ kwatangaaswa kana kwĩ na kambeini ya kũtavanyʼa, mwĩkĩe vinya asũanĩe ũndũ ũtonya kũtwʼĩka mũtavanyʼa. Mũtavye ũndũ vethĩawa ve laisi kũtavanyʼa ĩvindanĩ ta yĩu. O na ĩngĩ, no eyĩkĩĩe mũvango wa kumasya maũvoo kĩlungunĩ kya amanyĩwʼa ũmbanonĩ wa katĩkatĩ wa kyumwa. Kĩu kĩkamũtetheeasya emanyĩsye ũndũ ũtonya kũelesya mũĩkĩĩo wake e na ũkũmbaũ.

ONYʼA MŨMANYĨWʼA WAKU KANA NŨMŨĨKĨĨE

19. Yesũ oonanisye ata kana nĩwaĩkĩĩe amanyĩwʼa make, na tũtonya kũatĩĩa ngelekanyʼo yake ata?

¹⁹ Yesũ atanoawa na akambata ĩtunĩ, atavisye amanyĩwʼa make kana mũthenya ũmwe makoonana ĩngĩ. Ĩndĩ mayaaelewa kana awetaa ĩvinda yĩla makathi ĩtunĩ. O na vailye ũu, we asyaisye ũĩkĩĩku woo ĩndĩ ti nzika ila maĩ nasyo. (Yoa. 14:​1-5, 8) Nĩweesĩ kana nĩvendekaa ĩvinda nĩ kana maelewe maũndũ amwe, ta wĩkwatyo wa kũthi ĩtunĩ. (Yoa. 16:12) O naitũ no twonyʼe mũmanyĩwʼa wa Mbivilia kana tũi na nzika nũkwenda kũmwendeesya Yeova.

20. Mwĩĩtu-a-asa ũmwe wa Malawi oonanisye ata kana nĩwaĩkĩĩe mũmanyĩwʼa wake wa Mbivilia?

²⁰ Tũyĩthĩawa na nzika kana mũmanyĩwʼa witũ wa Mbivilia nũkwenda kwĩka kĩla kyaĩle. Kwasũanĩa ngelekanyʼo ya mwĩĩtu-a-asa ũmwe wĩtawa Chifundo wa Malawi. Ambĩĩie kwĩmanyĩsya Mbivilia na mũndũ mũka wa mũika wa kanisa wa Katholeki wĩtawa Alinafe matũmĩĩte ĩvuku Tanĩa Thayũ Tene na Tene! Mamina kũsoma ĩsomo ya 14, Chifundo nĩwakũlilye mũmanyĩwʼa wake kĩla wasũanĩaa ĩũlũ wa kũtũmĩa mĩvwʼanano ũthaithinĩ. Alinafe nĩwathatie na amwĩa: “Ũsu nĩ ũtwi wa mũndũ mwene.” Chifundo asũanĩaa kana mũmanyĩwʼa wake nũkũeka kwĩmanyĩsya. Ĩndĩ nĩwaendeeie kũmũmanyĩsya e na wũmĩĩsyo na ekwatĩtye kana ĩtina wa ĩvinda akaelewa kana nĩ ũthũku kũtũmĩa mĩvwʼanano. Ĩtina wa myei mĩvũthũ, nĩwakũlilye Alinafe ĩkũlyo yĩĩ yĩ nthĩnĩ wa ĩsomo ya 34: “Kũvikĩĩa vau ũtethekete ata nũndũ wa kwĩmanyĩsya Mbivilia, na kwĩmanyĩsya ĩũlũ wa Yeova, Ngai ũla wa wʼo?” Chifundo nũwetete ũndũ wasũngĩie. Aĩtye: “Awetie maũndũ maingĩ maseo, na ũndũ ũmwe nĩ kana Ngũsĩ sya Yeova iyĩkaa maũndũ ala Mbivilia ĩvatanĩte.” Ĩvinda ĩnini ĩtina wa ũu, Alinafe nĩwaekie kũtũmĩa mĩvwʼanano ũthaithinĩ na avatiswa.

21. Tũtonya ata kũtetheesya mũmanyĩwʼa wa Mbivilia atwʼe kũmũthũkũma Yeova?

²¹ O na kau Yeova nĩwe “ũla wĩanasya”, nĩtwĩthĩawa na kĩanda kya kũtetheesya mũmanyĩwʼa wa Mbivilia eke maendeeo. (1 Ako. 3:7) Tũyĩkaa o kũmanyĩsya mũmanyĩwʼa kĩla Ngai wendaa eke. Vandũ va ũu, nĩtũmũtetheeasya amwende Yeova mũnango. O na ĩngĩ, nĩtũmwĩkĩĩaa vinya onanyʼe kana nũmwendete Yeova kwa kũmũvĩtya mbee thayũnĩ wake. Na nĩtũmũmanyĩasya ũndũ ũtonya kũmwĩkwatya Yeova yĩla wakomana na mawetu. Eka ũu, yĩla twoonyʼa mũmanyĩwʼa witũ wa Mbivilia kana nĩtũmũĩkĩĩe, kĩu no kĩtume o nake ona kana no aatĩĩe myolooto ya Yeova na kĩu kĩituma atwʼa kũmũthũkũma.