Kambeini ya Kũthokya Andũ Ũlilikanonĩ wa Kĩkwʼũ kya Yesũ Ĩkambĩĩa Ĩtukũ 1, Mwei wa 3
1. Kambeini ya kũthokya andũ Ũlilikanonĩ wa Kĩkwʼũ kya Yesũ ĩkambĩĩa ĩndĩĩ, na nĩkĩ ne ndaasanga mwaka ũũ?
1 Wakatano, Ĩtukũ 1 Mwei wa 3, nĩwʼo tũkambĩĩa kambeini ya kũthokya andũ Ũlilikanonĩ wa Kĩkwʼũ kya Yesũ, ũla ũkekwa Matukũ 26, Mwei wa 3. Ũu nĩ kwonanyʼa kana kambeini ĩsu ĩkeethĩwa yĩ ndaasanga kũvĩtũka myaka ĩla mĩvĩtu. Kwa kĩtumi kĩu, andũ aingĩ makeethĩwa matonya kũthokwʼa, mũno mũno ethĩwa kĩkundi kĩ na kĩsio kĩnene kya kũtavanyʼa.
2. Ve mĩvango myaũ ya kwosa tũthangũ na ya kũthokya andũ kĩsionĩ?
2 Kwĩyũmbanĩsya: Atumĩa ma kĩkundi makaelesya ũndũ kĩsio kyenyu kĩkatavanwʼa, na kana tũthangũ twa kũthokanyʼa nĩtwaĩle kũtiwa mĩsyĩ ĩla ĩtanethĩwa andũ. Tũthangũ twa kũthokanyʼa twatiala ĩtina wa kũtavanyʼa nyũmba na nyũmba, no tũnenganwe kũndũ kũla kũngĩ. Mũsyaĩĩsya wa ũthũkũmi akavanga tũthangũ twa kũthokanyʼa twonanĩtye saa na vala vakekĩwa ũmbano ũsu twiwe mesanĩ ya mavuku nĩ kana atavanyʼa mose. Tũthangũ tũyaĩle kwiwa twʼonthe savalĩ ũmwe. Atavanyʼa maĩle kwosa o tũthangũ tũla meũtũmĩa kwa kyumwa.
3. Nĩ kyaũ twaĩlĩte kũlilikana ĩla tũũthokanyʼa?
3 Tũkasya Ata? Nĩ ũseo kũneena kwa ũkuvĩ nĩ kana tũthokye andũ aingĩ ũndũ vatonyeka. Ĩthangũnĩ ya 4 ve ũndũ wa kwasya tũtonya kũtũmĩa kwosana na kĩsio kitũ. Vaiĩ vata wa kwĩkalaata ethĩwa mwene nyũmba nũkwendeewʼa kana e na makũlyo. Tũithokanyʼa Wathanthatũ kana Wakyumwa, twaĩle kũnengane makaseti ĩla twoona vaĩle. Matukũ 2, Mwei wa 3, vandũ va kũmantha andũ ma kũmanyĩwʼa Mbivilia tũkeethĩwa tũithokanyʼa.
4. Nĩkĩ twaĩle kwĩkĩa kĩthito wĩanĩ wa kũthokya angĩ?
4 Twĩĩkwatya andũ aingĩ makoombana vamwe naitũ. Ũvoo ũla ũkaumwʼa ũkaelesya ũwʼo ĩũlũ wa Yesũ. (1 Ako. 11:26) Ũkoonanyʼa ũndũ tũtethekaa kumana na kĩkwʼũ kyake. (Alo. 6:23) Na ĩngĩ ũkoonanyʼa nĩkĩ nĩ ũndũ wa vata kũmũlilikana. (Yoa. 17:3) Ekai twĩkĩe kĩthito wĩanĩ ũũ wa kũthokya angĩ!