Tũkanengane Tulakiti Ũvoo wa Ũsumbĩ Na. 38 Mwei wa 11!
1. Nĩ makũlyo maũ andũ mekũlasya ĩũlũ wa akwʼũ, na Mweinĩ wa 11, makũlyo asu makasũngĩwa ata?
1 Kĩkwʼũ nĩ mũmaitha wa andũ onthe. (1 Ako. 15:26) Andũ aingĩ nĩmekũlasya vala akwʼũ maendaa na ethĩwa makamona ĩngĩ. Kwondũ wa ũu, ikundi syonthe ikeethĩwa iinengane tulakiti Ũvoo wa Ũsumbĩ Na. 38, ĩla yĩ na kyongo Mo Andũ Ala Makwie Nĩmatonya Kwĩthĩwa Thayũ Ĩngĩ? Kambeini ĩno ĩkambĩĩa Ĩtukũ 1, Mwei wa 11, na ĩyĩendeea kwa kĩlungu kya mwei ũmwe. Kambeini yathela, Ũvoo wa Ũsumbĩ Na. 38 ĩkatũmĩawa ũtavanyʼanĩ ta tulakiti ila ingĩ.
2. Tulakiti Ũvoo wa Ũsumbĩ Na. 38 ĩvangĩtwe ata?
2 Ũndũ Ĩvangĩtwe: Tulakiti Ũvoo wa Ũsumbĩ Na. 38, ĩseũvĩtwʼe kwa nzĩa ĩtonya kũkũnzwa nĩ kana ĩthangũ ya mbee yonanyʼe kyongo kya tulakiti na ndeto ii: “Ũsũngĩo waku nĩ . . . ĩĩ? aiee? nĩvatonyeka?” Mũndũ avingũa tulakiti ĩno, nũkwona ũsũngĩo wa ĩkũlyo yĩla nĩyo kyongo kya tulakiti, na ũndũ wathani wa Mbivilia ũtonya kũmũtethya. Ĩngĩ, nũkwona nĩkĩ ũtonya kũĩkĩĩa ũndũ Mbivilia yaĩtye. Ĩthangũnĩ ya ĩtina ya tulakiti ĩno, ve ĩkũlyo ya kwendeesya yĩla mũndũ ũtonya kũtiwa aisũanĩa na nũthoketwʼe eemanyĩsye maũndũ angĩ.
3. Tũkanengane ata tulakiti Ũvoo wa Ũsumbĩ Na. 38?
3 Ũndũ Ĩkanenganwe: Kambeini ĩno ĩkaendeewʼa o ũndũ ũmwe na kambeini ya kũthokya andũ ũmbanonĩ wa kũlilikana kĩkwʼũ kya Yesũ na ya ũmbano wa kĩvalo. Atumĩa ma kĩkundi makeeka mĩvango ya ũndũ kambeini ĩno ĩkekwa kĩsionĩ kyenyu kwosana na valũa wa Ĩtukũ 1, Mwei wa 4, 2013. Ikundi ila syĩ na kĩsio kĩnini no ikũlye ikatetheesya ikundi ila syĩ na isio nene. Osa tulakiti o ila ũtonya kũtũmĩa vandũ va kyumwa kĩmwe. Kambeini yambĩĩa, tulakiti syaĩle kũnenganwe nyũmba na nyũmba, na ĩtina iinenganwe kũndũ kũla kũngĩ. Mwamina tulakiti isu mwei ũte mũthelu, nenganei mavuku ala mavangĩĩwe kũnenganwe mweinĩ ũsu. Wathanthatũ wa mbee wa mwei ũsu, tũkaendeesya kambeini vandũ va kũmantha andũ ma kũmanyĩwʼa Mbivilia. No tũnengane makaseti Wathanthatũ na Wakyumwa ethĩwa mũndũ nĩwendeewʼa. We nĩwĩkĩte mĩvango nĩ kana ũtũmĩe ĩvinda yingĩ ũndũ vatonyeka kambeininĩ ĩno?