Kũthokya Andũ kwa Nzĩa yĩ Laisi

1. Kambeini ya kũthokya andũ ũmbanonĩ mũnene ĩkambĩĩa ĩndĩĩ?

¹ Twasye wĩ na mũvango wa kũuĩa anyanya maku kana mũsyĩ waku lĩu mũna ũwendete, na ũyĩthĩa lĩu ũsu wĩtũmĩa mbesa mbingĩ na kĩthito kingĩ kũũthooa na kũũua. Ĩla lĩu ũsu wavya, no mũvaka ũkethĩwa na ũtanu ũithokya aeni maku. O ta ũu, ana-a-asa na eĩtu-a-asa nĩmakũnĩte wĩa mwingĩ nĩ kana tũkwate lĩu wa kĩ-veva ũla tũkatanĩa ũmbanonĩ mũnene wa mĩthenya ĩtatũ. Syumwa itatũ ũmbano ũsu ũtanamba kũvika, Yeova nũtũnengete kĩanda kya kũthokya andũ. Nĩ kyaũ kĩkatũtetheesya kũthokanyʼa twĩ na ũtanu mwingĩ?

2. Nĩ kyaũ kĩkatuma twĩthĩwa na kĩthito kingĩ kya kũthokanyʼa?

² Twasũanĩa ũndũ tũunĩkaa kumana na lĩu wa kĩ-veva ũla Yeova ũtũnengae maũmbanonĩ manene, tũkeethĩwa na kĩthito kingĩ kya kũthokanyʼa. (Isa. 65:13, 14) Ĩngĩ, nĩtwaĩlĩte kũlilikana kana kambeini ya kũthokanyʼa ĩla twĩthĩawa nayo kĩla mwaka yĩthĩawa na mosyao maseo. (Sisya ĩsandũkũ “Nĩyĩthĩawa na Mosyao.”) Amwe ala tũũmathokya makooka ũmbanonĩ ũsu, na angĩ maikoka. O na ethĩwa ala tũũthokya maikoka onthe, kĩthito kitũ ĩvindanĩ ya kambeini ĩsu kĩkamũtaĩa Yeova na kĩkoonanyʼa ũndũ Yeova ne Ngai mũlau.—Sav. 145:3, 7; Ũvu. 22:17.

3. Tũthangũ twa kũthokanyʼa tũkanenganwe ata?

³ Nzama ya atumĩa nĩyo yaĩle kũvanga ũndũ kĩkundi kĩkathokanyʼa. Nĩ kana kĩkundi kĩthokanyʼe kĩsio kĩnene, nzama ĩsu no ĩtwʼe ethĩwa kĩkundi kĩkatiaa tũthangũ twa kũthokanyʼa mĩsyĩ ĩla ĩte na andũ na kana no kĩthokanyʼe kũndũ kũla kwĩthĩawa na andũ aingĩ kĩsionĩ kyoo. Mĩthenya ya Wathanthatũ na Wakyumwa, atavanyʼa maĩle kũnengane makaseti na tũthangũ twa kũthokanyʼa moona vaĩle. Kambeini yathela, tũkatana mũno ta kĩ kũmanya kana nĩtũnatethisye wĩa mũseo wa kũthokya andũ aingĩ ũndũ vatonyeka moke mbokanĩ ĩsu Yeova ũseũvĩtye!

Nĩyĩthĩawa na Mosyao

Myaka kauta mĩvĩtu, mwĩĩtu-a-asa ũmwe aithokya andũ nĩwasengʼie kana kĩthito kya kũthokya andũ kĩkeethĩwa na mosyao. Eekũlasya atĩĩ, ‘Yo andũ ala mathokwʼa makooka ũmbanonĩ ũsu?’ Wathanthatũ kwakya mwĩĩtu-a-asa ũsu e ũmbanonĩ mũnene nĩwoonie mũndũũme wa ndĩni ya Sikh ailyĩ vakuvĩ nake na avanga kũneena nake. Mwĩĩtu-a-asa ũsu eethĩie kana mũndũũme ũsu ookĩte ũmbanonĩ ũsu nũndũ nĩwakwatie kathangũ ka kũmũthokya. Aĩ na makũlyo maingĩ, na mwĩĩtu-a-asa ũsu nĩwasũngĩie. Nĩwawetie kana nĩwaendeee kũtanĩa ũmbano ũsu mũno na nĩwendeeiwʼe nĩ ũndũ andũ maĩ atheu na maĩ na mwĩkalĩle mũseo. O mũthenyanĩ ũsu, mwĩĩtu-a-asa ũsu nĩwaeie ngewa na mũndũ na mũka ala mailyĩ vakuvĩ nake. O namo meekĩte o kũthokwʼa na mookĩte ũmbanonĩ ũsu na mbasi. Nĩmaendeee kũtanĩa ũmbano ũsu na maĩ na mũvango wa kũka mũthenya ũla waatĩĩe. Mwĩĩtu-a-asa ũsu nĩwamanyie kana kambeini yitũ ya kũthokya andũ kĩla mwaka yĩthĩawa yĩ ya vata.
Ũmbanonĩ mũnene ũneekiwe o mĩtũkĩ, mũndũ na mũka, ala nĩ mavainia ma kĩla ĩvinda, nĩmambĩĩie kũneena na mũndũũme ũmwe vamwe na kĩveti kyake ala maĩ akũũ. Mũndũũme ũsu na mũka nĩmawetie kana nĩyo yaĩ ĩvinda yoo ya mbee kũka ũmbanonĩ ũsu. Mavainia asu mamakũlilye atĩĩ: “Mũnathokiwʼe nũũ?” Namo masũngĩa ũũ: “Mũthenya ũmwe twavikie mũsyĩ na tweethĩa kathangũ ka kũtũthokya ungu wa mũomo.” Nĩmasomie kathangũ kau na mausũsya mwanya ũla wĩthĩawa kathangũnĩ kau ĩtina. Ana-a-asa na eĩtu-a-asa angĩ nĩmamathokisye maĩsanĩe lĩu wa mũthenya. Nĩmatanĩie ũmbano ũsu vyũ nginya mavanga kũsyoka ũnĩ wake. Mĩvango nĩyeekiwe nĩ kana masyokewe nũndũ nĩmendeeiwʼe.