Kambeini Yĩthĩawa na Mosyao Maseo

Vatiele syumwa itatũ ũmbano wa kĩvalo ũvike, ikundi nĩsyĩthĩawa na kambeini ya kũthokya andũ kĩsionĩ moke ũmbanonĩ ũũ. Ve kĩtumi kĩseo kya kwĩthĩwa na kambeini ĩno kĩla mwaka. Ala mooka ũmbanonĩ nĩmendeeawʼa nĩ maũvoo ala maumawʼa, nĩ kwona mĩvĩa ĩvangĩtwe nesa yĩũngamĩwe nĩ andũ makĩtĩte kwĩyumya, mwĩkalĩle witũ mũseo, na ngwatanĩo ĩla yĩthĩawa. (Sav. 110:3; 133:1; Isa. 65:13, 14) O na ũu, no wĩkũlye kana kambeini ĩno nĩyĩthĩawa na mosyao maseo kũndũ kũla maũmbano mekĩawa kũasa.

Ĩtina wa ũmbano wa kĩvalo wa 2011, ovisi ũmwe wa ũvonge nĩwakwatie valũa kuma kwa mũndũ mũka ũla weethĩie kathangũ ka kũthokanyʼa mũomonĩ. Atwʼĩe evithaa athokewa nĩ Ngũsĩ sya Yeova. Aandĩkie ta ũũ: “Naĩ na nyũmba nzeo, mũũme mũseo, na noonaa nĩ na kĩla kĩndũ kya kũndanĩthya. Ĩndĩ ndyaĩ na ũtanu na ndyaĩ na kĩeleelo thayũnĩ. Kwoou natwie kũtwaa ngalĩ ũasa wa kĩlomita 320, nĩ kana nĩvike ũmbanonĩ Wathanthatũ.” Atanie mũno nginya akũnĩa mũũme simũ amũtavye ndeĩnũka mũthenya ũsu nĩ kana ombane Wakyumwa. “Neethukĩĩisye maũvoo onthe, nakomana na Ngũsĩ mbingĩ, na natwʼa kũendeea.” Asyoka mũsyĩ nĩwambĩĩie kwĩmanyĩsya, na ĩtina wa myei ĩna atwʼĩka mũtavanyʼa ũte mũvatise. “Nĩndanaa mũno nũndũ wa kathangũ kau nakethĩie mũomonĩ nũndũ ũmũnthĩ nĩ na kĩeleelo thayũnĩ wakwa!”

Amwe ma ala tũkathokya makooka ũmbanonĩ. Kwoou ĩkĩa kĩthito vyũ kambeininĩ ĩĩ ya vata. Kua tũthangũ tũla tũkethĩwa tũtialĩte ũmbanonĩ, na ũitũtũmĩa kũthokya andũ mwanya waumĩla.

[Ũvoo ĩũlũ wa visa ĩthangũnĩ ya 4]

Tũkanengane Tũthangũ twa Kũthokanyʼa Ata?

Nĩ kana tũthokye andũ aingĩ kĩsionĩ kitũ, twaĩle kũneena ndeto mbũthũ. No twasye ũũ: “Ũvoo waku. Twĩtethya wĩa ũendeee nthĩ yonthe wa kũthokanyʼa. Kaa nĩ kathangũ kaku ka kũũthokya. Nũkwĩthĩa ũvoo mwingangĩ vau.” Ĩthĩwa wĩ mũtanu. Ĩla tũũthokanyʼa Wathanthatũ na Wakyumwa, nĩtwaĩle kũnenga andũ ala mendeewʼa makaseti.