Mwĩkalĩle Ũla Ũmũtaĩaa Ngai
1. Nĩkĩ andũ mamanyaa Ngũsĩ sya Yeova mĩtũkĩ ĩla me ũmbanonĩ mũnene?
1 Andũ aingĩ nĩmamanyaa ĩla twĩ na maũmbano manene. Kũndũ kwingĩ kũla maũmbano asu methĩawa, isese sya maũvoo nitangaasaa kana nĩtũmbanĩte. Maũtelinĩ na mĩkaawanĩ nĩvethĩawa na andũ aingĩ ala methĩawa mokĩte ũmbanonĩ, na ala mekalaa vakuvĩ nĩmonaa aeni mekĩĩte mbangyi sya ũmbano. Nĩ ũseo kũlilikana maũndũ aa maatĩĩe nĩ kana twĩmũtaĩa Ngai kwĩsĩla mwĩkalĩle witũ twĩ ũmbanonĩ.—1 Vet. 2:12.
2. Mwĩkĩĩle mũseo wa ngũa twĩ vala ve kwĩkĩwa ũmbano ũtonya kũmũtaĩa Ngai ata?
2 Mwĩkĩĩle Mũseo wa Ngũa: Andũ nĩmendeeawʼa nĩ mwĩkĩĩle witũ wa ngũa ĩla twĩ ũmbanonĩ. Ĩndĩ mwĩkĩĩle witũ wa ngũa ĩla twĩ maũtelinĩ, tũiya mĩkaawanĩ, tũithooa syĩndũ, na tũyĩka maũndũ angĩ no ũwete maũndũ maingĩ ĩũlũ witũ. O na kau ti lasima tũkekĩa ngũa sya ũmbano mavinda ala angĩ, twaĩle kwĩkĩa ngũa syĩ na ndaĩa na syaĩle. Andũ ala meũtwona maĩle kwona kĩvathũkanyʼo katĩ witũ na andũ ala angĩ. (Alo. 12:2) O ta ũu, nĩtwaĩle kwĩkĩa mbangyi nũndũ ikoonyʼa andũ kana twĩ na ũmbano, na ũu ũitũnenga mwanya wa kũtavanyʼa, na ala angĩ mokĩte ũmbanonĩ maitũmanyʼa.
3. Tũtonya kwonanyʼa wũmĩĩsyo na kũsũanĩa ala angĩ ata?
3 Mwĩkalo Mũseo: Nũndũ mavindanĩ aa andũ aingĩ nĩmeyendete na mati mũvea, nĩ ũndũ mũseo mũno kwĩthĩwa twĩ na wũmĩĩsyo na tũisũanĩa andũ ala angĩ. Ũu ũkendeesya mũno andũ ala mathũkũmaa maũtelinĩ na mĩkaawanĩ. (2 Tim. 3:1-5) Ĩla tũkwiĩa andũ angĩ ivĩla kana ĩla tũũvanga lainĩ nĩ kana twose mavuku meũ ũmbanonĩ, twaĩle kũsũanĩa ala angĩ vandũ va ithyĩ ene. (1 Ako. 10:23, 24) Ĩtina wa kũthi ũmbanonĩ mũnene ya mbee, mũndũũme ũmwe aisye ũũ, “Ndĩũlilikana maũvoo ala maumiwʼe mũthenya ũsu, ĩndĩ ndĩkolwa nĩ mwĩkalĩle mũseo wa Ngũsĩ ũla noonie.”
4. Nĩkĩ twaĩle kwĩyumya ĩvinda ya ũmbano ethĩwa nĩtũtonya?
4 Wĩa wa Kwĩyumya: Aklĩsto ma wʼo mesĩkĩe kwa kwĩyumya. (Sav. 110:3) No wĩyumye ũkatetheesya ĩvinda ya ũmbano? Ana-a-asa na eĩtu-a-asa 600 nĩmeeyumisye kũthesya vandũ vamwe vala voombanĩawa. Andũ ala mathũkũmaa vau maisye: “Tũyaaona ũndũ ta ũũ! Nĩ vinya kwĩtĩkĩla kana wĩa ũũ nĩ wa kwĩyumya.” Tweteele na mea maingĩ ũmbano wa kĩvalo wa 2013 vala tũkethĩwa na mwanya wa kwĩthukĩĩsya twĩmanyĩsye, na mũno tũimũtaĩa Yeova.