‘Ĩthĩwai na Mwĩkalĩle Waĩle kwa Andũ-ma-mbaĩ-ingĩ’

1. Nĩkĩ twaĩlĩte kwĩthĩwa na mwĩkalĩle mũseo ĩvindanĩ ya maũmbano manene ala mokĩte?

¹ Nĩkwĩthĩwa ĩvinda yĩla twĩ na maũmbano manene andũ aingĩ nĩmatwonaa na mayenda kũmanya ĩũlũ witũ, mwĩkalĩle witũ waĩlĩte kwonanyʼa nesa Ngai ũla tũthaithaa. (Ali. 20:26) Meko maitũ, mwĩkĩĩle witũ, na kwĩyanakavya kwitũ syaĩlĩte kwonanyʼa nesa kana twĩ aatĩĩi ma wʼo ma Klĩsto. Ĩla twĩ maũmbanonĩ manene ma mĩthenya ĩtatũ kana ma nthĩ mbingĩ, tũtonya ata ‘kwĩthĩwa na mwĩkalĩle waĩle kwa Andũ-ma-mbaĩ-ingĩ’ nĩ kana tũmũtaĩe Ĩthe waitũ wa ĩtunĩ?—1 Vet. 2:12.

2. Tũkeethĩwa na myanya yĩva ya kwonanyʼa ndaĩa sya Kĩklĩsto ĩvindanĩ ya ũmbano mũnene ũla wũkĩte?

² Ĩka Maũndũ kwa Nzĩa ya Kĩklĩsto: Wendo ũla twĩthĩawa nawʼo ithyĩ kwa ithyĩ na ũndũ twĩkalanasya na “ala me ũtee,” nĩ kĩvathũkanyʼo vyũ na veva ũla usĩe ĩũlũ wa nthĩ. (Ako. 3:10; 4:5; 2 Tim. 3:1-5) Twaĩle kwĩthĩwa na tei na wũmĩĩsyo ĩla tũũthũkũmana na andũ ma ũteli na ma mĩkaawa o na kwaumĩla mathĩna. Kũtiĩa andũ ala meũtũtetheesya mbesa nini sya kũmatũngĩa mũvea kwonanasya twĩ na mwĩkalĩle mũseo.

3. Nĩ ũndũ mwaũ asyai malilikanĩtwʼe, na nĩkĩ?

³ Asyai maĩle kũsũvĩa syana syoo ĩla me ũmbanonĩ, mĩkaawanĩ, na ũtelinĩ. (Nth. 29:15) Mũũngamĩi ũmwe wa ũteli eeie asyai amwe atĩĩ: “Nĩtwendete Ngũsĩ mũno. Inywʼĩ vamwe na syana syenyu mwĩthĩawa mwĩ auu na mwĩ na mwĩkalĩle mũseo mũno. Athũkũmi onthe ma ũteli ũũ maneenaa ĩũlũ wenyu, na twĩwʼa mũyo takeka no mũkae vaa kĩla wikendi.”

4. Twaĩlĩte kwĩkĩa ngũa ata ĩvindanĩ ya ũmbano mũnene ũla tweteele?

⁴ Kwĩkĩa Ngũa Nesa: Twaĩle kwĩkĩa ngũa nesa ĩla twĩ ũmbanonĩ, tũte kũatĩĩa mĩtuo ya nthĩ. (1 Tim. 2:9) O na ĩla tũendete ũtelinĩ mũthenya wa mbee na ĩla tumĩte mũthenya wa mũthya, vamwe na ĩla twĩ maũndũnĩ maitũ tũtambĩte kũthi kana twauma ũmbanonĩ, twaĩlĩte kwĩkĩa ngũa syĩ na ndaĩa. Tweeka ũu, tũkatanĩa kwĩkĩa mbangyi sitũ na tũikewʼa wia wa kumĩsya angĩ ũkũsĩ mwanya wa kwĩka ũu waumĩla. Tweekĩa ngũa nesa na tweethĩwa na mwĩkalĩle mũseo ĩla twĩ maũmbanonĩ asu manene tweteele, tũkatuma ala me na ngoo nzeo menda kwĩmanyĩsya Mbivilia na tũkamũtanĩthya Yeova.—Nzev. 3:17.

Maũndũ ma Kũlilikana ma Ũmbano Mũnene wa Mĩthenya Ĩtatũ wa 2014

◼ Masaa ma Ũmbano: Mĩomo ya vala vakombanĩwa ĩkavingũawa saa 2:00 sya kwakya. Kĩlungu kya wini kĩkambĩĩaa saa 3:20 sya kwakya kĩla mũthenya. Wini wambĩĩa ithyonthe twaĩle kwĩkala nthĩ nĩ kana ũmbano wambĩĩe kwa nzĩa nzeo. Wathi wa mũthya na mboya ya kũminĩa ikeethĩwa saa 10:55 ĩ ya wĩoo Wakatano na Wathanthatũ, na saa 9:50 ĩ ya wĩoo Wakyumwa.

◼ Maũmbano Manene ma Nthĩ Mbingĩ: Isio imwe ikeethĩwa na maũmbano manene ma nthĩ mbingĩ. Lilikana kana ovisi wa ũvonge ũthoketye o ikundi imwe na aeni anini kuma nthĩ ingĩ nũndũ nĩyĩkĩte ĩsavu ya ivĩla ila ikethĩwa vo, kũndũ kwa kwia ngalĩ, na moteli ma kwĩkala. Kũthi ũmbanonĩ mũnene wa nthĩ mbingĩ ũte mũthokye nĩkũtonya kũtuma amwe maaĩwa nĩ ivĩla. O na ethĩwa nũndũ wa itumi nũũlasimĩka kũthi ũmbanonĩ ũngĩ mũnene eka ũla kĩkundi kyaku kĩaĩwe, ndwaĩle kũnyuva kũthi ũmbanonĩ mũnene wa nthĩ mbingĩ.

◼ Vandũ va Kwia Ngalĩ: Kũndũ kwʼonthe kũla tũnengetwe mwanya wa kwia ngalĩ, andũ maikaĩvaa, na ala mavika mbee nĩmo makambaa kũnengwa mwanya. Nũndũ vandũ va kwia ngalĩ vayĩthĩawa ve vanene, nũseo andũ ala maumĩte vamwe makavanga kũka na ngalĩ o ĩmwe ũmbanonĩ vandũ va kĩla mũndũ kũka na yake. No andũ ala iwete makanengawe mwanya wa kwia ngalĩ kũla kũvathĩtwe kwondũ woo.

◼ Ivĩla: Mĩomo ya vala vekũmbanĩwa yavingũwa, mwĩkũlwʼa mũikasembe ta mũũsindana na ala angĩ ĩla mũendete kũkwata ivĩla. Kũlea kwĩyenda nĩkũtumaa tũsũanĩa ĩũlũ wa ala angĩ mbee na nĩkũtumaa andũ mamanya kana ithyĩ twĩ Aklĩsto ma wʼo, na ũu ũituma mamũtaĩa Ngai. (Yoa. 13:34, 35; 1 Ako. 13:4, 5; 1 Vet. 2:12) No wiĩe ivĩla andũ ma mũsyĩ waku, ala mũũtũmĩa ngalĩ ĩmwe, kana amanyĩwʼa maku ma Mbivilia. Andũ ala akũũ na ala me na mawonzu nĩmavathĩwe ivĩla. Nĩkwĩthĩwa vala mavathĩwe vai ivĩla mbingĩ, no mũndũ ũmwe kana elĩ ala meũsũvĩa mũndũ woo maĩlĩte kwĩkala ivĩlanĩ isu.

◼ Lĩu wa Mũthenya: Mwĩkũlwʼa mũke na lĩu wa mũthenya vandũ va kumaala mũkamanthe lĩu. Kua lĩu na kĩndũ kĩnini kĩtonya kwĩanĩa ungu wa kĩvĩla. Syĩndũ nene mũno sya kũkua lĩu na mĩio ya ngilasi iyaĩlĩte kũkuwa ũmbanonĩ.

◼ Mĩvothi: Kumya mĩvothi ya ngenda ya kũtetheesya wĩa wa nthĩ yonthe ĩla twĩ ũmbanonĩ nĩ nzĩa ya kũtũnga mũvea. Andũ ala mekumya mĩvothi maitũmĩa kyeki, maĩlĩte kũandĩka kĩĩvwe International Bible Students Association. Ĩngĩ, mũndũ no aumye mĩvothi kwa kũtũmĩa kaati ya vengi (debit card kana credit card).

◼ Ndawa: Ethĩwa nũtũmĩaa ndawa, wĩkũlwʼa ũkue syĩanĩtye nũndũ vaikethĩwa na mũvango wa kũnengane ndawa ũmbanonĩ. Ala metonyaa ndawa sya ũwau wa sukalĩ maĩlĩte kwĩkya singano ila matũmĩa vala vaĩle, ĩndĩ mayaĩle kwĩkya kũla kwĩkawʼa mavuti ũmbanonĩ kana ũtelinĩ.

◼ Kwĩsũvĩa: Ĩsũvĩe mũno ndũkaũmĩe nũndũ wa kũsiũũka kana kũtulwʼa. Kĩla mwaka andũ nĩmaũmĩawʼa nĩ iatũ, mũno mũno ila ndũlu. Nũseo kwĩkĩa iatũ ikwĩanĩe nesa na iũkũtonyethya kũtembea ngasinĩ, kũndũ kweeku, na kũndũ kũngĩ.

◼ Mauta ma Kwĩvuva: Nĩkwĩthĩwa maũmbano amwe mekĩawa myakonĩ nthĩnĩ, nĩ ũndũ wa wendo kũtũmĩa mauta ma kwĩvuva mate na mũuke mwingĩ nĩ kana maikathĩnyʼe andũ ala mathũawa nĩ mĩuke.—1 Ako. 10:24.

◼ Voomu ya Tafadhali Fuatia Upendezi (S-43): Voomu ya Tafadhali Fuatia Upendezi nĩyaĩle kũtũmĩwa kũandĩka ũvoo ĩũlũ wa andũ ala mekwendeewʼa twakomana namo ĩvindanĩ ya ũmbano. Voomu ĩno yausũwʼa yaĩle kũnenganwe Mũvĩanĩ wa Mavuku kana ĩkanengwa mũandĩki wa kĩkundi twasyoka ikundinĩ.

◼ Mĩkaawa: Twaĩle kwĩthĩwa na mwĩkalĩle mũseo ĩla twĩ mĩkaawanĩ nĩ kana tũmũtaĩe Yeova. Ĩkĩa ngũa kwa nzĩa ĩkwonanyʼa wĩ mũtavanyʼa wa ũvoo mũseo. Tia mbesa nini sya kũtũnga mũvea ethĩwa nĩkwĩkawa ũu kwenyu.

◼ Ũteli:

Ndũkakwate nyũmba mbingĩ kwĩ ila wĩtũmĩa, na ndũketĩkĩle nyũmba yaku ĩkome andũ aingĩ kũvĩtũka ala mathĩĩwe.
Ndũkavĩndũe mĩvango yaku ya kũtũmĩa nyũmba ate o vaumĩla ũndũ ũtasiĩĩka. Wavĩndũa mĩvango yaku, tavya ene ma ũteli mĩtũkĩ ũndũ vatonyeka nĩ kana nyũmba ĩsu ĩnengwe andũ angĩ. (Mt. 5:37) Ĩkĩĩthya nĩwanengwa namba ya kwonanyʼa nĩwaekana na nyũmba ĩsu. Waekana na nyũmba ĩsu vatiele masaa ĩtheo wa 48 ũmĩlike, ndwĩtũngĩwa mbesa ila waĩvĩte sya kũkwata nyũmba.
Watũmĩa kaati ya vengi kũkwata nyũmba ya kũkoma, waĩlĩte kũmanya kana ũteli nũsiĩaa mbesa itonya kũĩvĩa nyũmba ĩsu, vamwe na syĩndũ ila itonya kwanangĩka ĩvindanĩ yĩla ũkwĩthĩwa ũilyĩ ũtelinĩ ũsu. Ĩtina wa wauma ũtelinĩ, ndũkethĩwa ũtonya kũtũmĩa mbesa isu masiĩĩe nginya vengi ĩmaĩve.
Osa kakalĩ ka kũkua mĩio o ĩla ũũkatũmĩa, na ũikatũnga nĩ kana ala angĩ makatũmĩe.
Nenga athũkũmi ma ũteli mbesa nini sya kũmatũngĩa mũvea ĩla maũtetheesya kũkua syĩndũ ethĩwa kwenyu nĩkwĩkawa ũu. Ĩka oou kwa ũla ũkũtethya wĩa wa kũthesya nyũmba ĩla ũkwĩkala.
Uĩa nyũmbanĩ o ila mũnengetwe mwanya wa kũuĩa vo.
Ndũkatũmĩe naĩ malĩu, kaawa, kana syĩndũ ingĩ sya kũya ila inengawe aeni ũtelinĩ kwa kwosa na kũikua ũmbanonĩ.
Mavinda onthe onanyʼa ũsyao wa veva ĩla ũũthũkũmana na andũ ma ũteli. Nũndũ me na aeni aingĩ, nĩ ũseo kwĩthĩwa wĩ na tei, wũmĩĩsyo, na ũisũanĩa ala angĩ.
Asyai maĩle kũsũvĩa syana syoo mavinda onthe syĩ ũtelinĩ, wĩthĩwe syĩ kũndũ kũla kũseũvĩtwʼe kwa kũthambĩa, livutinĩ, kana syĩ kũndũ kũngĩ.
Mbesa ila syonanĩtwʼe nthĩnĩ wa Orodha ya Mahali pa Kulala Palipopendekezwa nĩsyo waĩlĩte kũĩva kwa mũthenya, ĩndĩ vai koti mbesanĩ isu. Waĩvĩthwʼa mbesa ivĩtũkĩte isu ndũketĩkĩle, ĩndĩ tavya Mũvĩa wa Vandũ va Kũkoma mĩtũkĩ ũndũ vatonyeka.
Vaumĩla mathĩna ũtelinĩ, tavya Mũvĩa wa Vandũ va Kũkoma ũmbanonĩ nĩ kana maũtetheesye.

◼ Wĩa wa Kwĩyumya: Ũla ũnũkwenda kwĩyumya aĩle kũthi Mũvĩanĩ wa Ũthũkũmi wa Kwĩyumya. Syana ila itavikĩtye myaka 16 o nasyo no syĩyumye ithũkũme vamwe na asyai masyo, mũndũ ũla wĩkalaa nasyo, kana mũndũ ũngĩ mũima ũla ũnyuvĩtwe nĩ mũsyai kana nĩ ũla wĩkalaa nasyo.