Maũndũ ma Kũlilikana ma Ũmbano Mũnene

◼ Masaa ma Ũmbano: Mĩomo ya vala vakombanĩwa ĩkavingũawa saa 2:00 sya kwakya. Kĩlungu kya wini kĩkambĩĩaa saa 3:20 sya kwakya kĩla mũthenya. Wini wambĩĩa ithyonthe twaĩle kwĩkala nthĩ nĩ kana ũmbano wambĩĩe kwa nzĩa nzeo. Wathi wa mũthya na mboya ya kũminĩĩa ikeethĩwa saa 11:00 ĩ ya wĩoo Wakatano na Wathanthatũ, na saa 10:00 ĩ ya wĩoo Wakyumwa.

◼ ‘Mũtaĩe Yeova na Wathi’: Andũ ma Yeova ma ĩvinda ya tene nĩmamũtaĩaa na mbathi, na ĩvindanĩ ya ũmũnthĩ kwina nĩ kĩlungu kya vata ũthaithinĩ wa wʼo. (Sav. 28:7) Kĩlungu kya kwakya na kya mũthenya nthĩnĩ wa ũmbano mũnene wa mĩthenya ĩtatũ kyambĩĩaa na wini. Kĩlungu kĩu kya wini kĩyĩthĩawa vo vate kĩtumi kĩanĩu, ĩndĩ kĩthĩawa kĩseũvĩtwʼe nĩ kana twĩmanyĩsye ĩũlũ wa Yeova na tũimũthaitha. Kwoou, ĩla mwene kĩvĩla watangaasa kana kĩlungu kya wini kĩkilyĩ kwambĩĩa, twaĩle kwĩthĩwa tũilyĩ nthĩ na twĩthukĩĩsye nesa, vandũ va kũea ngewa. Tweeka ũu tũkeethĩawa tũyonanyʼa kana nĩtũkwona wĩa ũla ũtethawʼa nĩ ala methĩawa kĩkundinĩ kya kũkũna wathi kya Watchtower wĩ wa vata mũno. Ana-a-asa na eĩtu-a-asa asu matũmĩaa mbesa syoo kũthi Patterson, New York, kelĩ kwa mwaka nĩ kana maseũvye mbathi sya kũtũtanĩthya. Ĩtina wa kwĩthukĩĩsya nesa kĩlungu kĩu kya wini, ithyonthe twaĩle kũmũtaĩa Yeova na mbathi sitũ sya Ũsumbĩ.

◼ Vandũ va Kwia Ngalĩ: Kũndũ kwʼonthe kũla tũnengetwe mwanya wa kwia ngalĩ, andũ maikaĩvaa, na ala mavika mbee nĩmo makambaa kũnengwa mwanya. Nũndũ vandũ va kwia ngalĩ vayĩthĩawa ve vanene, nũseo andũ makavanga kũka na ngalĩ ĩmwe ũmbanonĩ vandũ va kĩla mũndũ kũka na yake. No andũ ala me mamutha monzu makanengawe mwanya wa kwia ngalĩ kũla kũvathĩtwe kwondũ woo.

◼ Ivĩla: Mĩomo ya vala vekũmbanĩwa yavingũwa, mwĩkũlwʼa mũikasembe ta mũũsindana na ala angĩ ĩla mũendete kũkwata ivĩla. Kũlea kwĩyenda nĩkũtumaa tũsũanĩa ĩũlũ wa ala angĩ mbee na nĩkũtumaa andũ mamanya kana ithyĩ twĩ Aklĩsto ma wʼo, na ũu ũituma mamũtaĩa Ngai. (Yoa. 13:34, 35; 1 Ako. 13:5; 1 Vet. 2:12) No wiĩe ivĩla andũ ma mũsyĩ waku, ala mũũtũmĩa ngalĩ ĩmwe, kana amanyĩwʼa maku ma Mbivilia. Wĩkũlwʼa ndũkaie syĩndũ syaku ivilanĩ ila ũteũkwatĩa andũ. Weeka ũu, ala angĩ makamanya kana ve ivĩla matonya kwĩkalĩla. Andũ ala akũũ na ala me na mawonzu nĩmavathĩwe ivĩla. Nĩkwĩthĩwa vala mavathĩwe vai ivĩla mbingĩ, no mũndũ ũmwe kana elĩ ala meũsũvĩa mũndũ woo maĩlĩte kwĩkala ivĩlanĩ isu.

◼ Kwĩkĩa Ngũa Nesa: Twaĩle kwĩkĩa ngũa nesa, ĩndĩ ti kwĩthĩwa na mwĩkĩĩle mũthũku wa andũ ma nthĩ. (1 Tim. 2:9) O na ĩla twĩ maũtelinĩ, tũtanathi kana ĩtina wa ũmbano, nĩtwaĩle kwĩvathana na kwĩkĩa ngũa itaĩle. Tweeka ũu tũkeethĩwa na ũthasyo wa kwĩkĩa mbangyi ya ũmbano mũnene vamwe na kũtavanyʼa vaumĩla mwanya tũte kwĩwʼa nthoni. Tweethĩwa na mwĩkalĩle mũseo vamwe na kwĩkĩa ngũa nesa ũmbanonĩ mũnene ũla wũkĩte tũkamũtanĩthya Yeova, na tũituma andũ ala me na ngoo nzeo mendeewʼa nĩ ũvoo mũseo.—Nzev. 3:17.

◼ Kũtũmĩa Nesa Syĩndũ ta Simũ: Twonanasya kana twĩ na mwĩkalĩle mũseo kwa kũlea kũthĩnyʼa ala angĩ ĩla twatũmĩa nesa syĩndũ ta simũ kana syĩndũ ingĩ o ta isu. Ethĩwa nĩtũũtũmĩa kamela, nĩtũkwosa vitio, kana nĩtũũtũmĩa kakombiũta ka kwʼoko, twaĩle kũsũanĩa ala angĩ kwa kũlea kũmathĩnyʼa kana kũmathwʼĩka. O na ĩngĩ, nĩtwonanasya mwĩkalĩle mũseo ethĩwa tũiũtũma ũtũmane mũkuvĩ vate kĩtumi kĩseo ũmbano ũendeee.

◼ Lĩu wa Mũthenya: Mwĩkũlwʼa mũke na lĩu wa mũthenya vandũ va kumaala mũkamanthe lĩu. Ĩkĩa lĩu kĩndũnĩ kĩnini kĩtonya kwĩanĩa ungu wa kĩvĩla. Syĩndũ nene mũno sya kũkua lĩu na mĩio ya ngilasi ĩyaĩlĩte kũkuwa ũmbanonĩ.

◼ Mĩvothi: Kumya mĩvothi ya ngenda ya kũtetheesya wĩa wa nthĩ yonthe ĩla twĩ ũmbanonĩ nĩ nzĩa ya kũtũnga mũvea. Andũ ala mekumya mĩvothi maitũmĩa kyeki, maĩlĩte kũandĩka kĩĩvwe International Bible Students Association. Ĩngĩ, mũndũ no aumye mĩvothi kwa kũtũmĩa kaati ya vengi (debit card kana credit card).

◼ Ndawa: Ethĩwa nũtũmĩaa ndawa ũandĩkĩwe nĩ ndakĩtalĩ, wĩkũlwʼa ũkue syĩanĩtye nũndũ vaikethĩwa na mũvango wa kũnengane ndawa ta isu ũmbanonĩ. Ala metonyaa ndawa sya ũwau wa sukalĩ maĩlĩte kwĩkya singano ila matũmĩa vala vaĩle, ĩndĩ mayaĩle kwĩkya kũla kwĩkawʼa mavuti ũmbanonĩ kana ũtelinĩ.

◼ Kwĩsũvĩa: Ĩsũvĩe mũno ndũkaũmĩe nũndũ wa kũsiũũka kana kũtulwʼa. Kĩla mwaka andũ nĩmaũmĩawʼa nĩ iatũ, mũno mũno ila ndũlu. Nũseo kwĩkĩa iatũ ikwĩanĩe nesa nĩ kana wĩthĩwe ũtonya kũlĩsa ngasinĩ, kũtembea kũndũ kweeku, na kũndũ kũngĩ.

◼ Ala me na Thĩna wa Kwĩwʼa: Ũmbano ũũ ũkanyaĩĩkwʼa na mĩtambo ya letiũ ya FM kwondũ wa ethukĩĩsya. Nĩ kana ũtetheke nĩ ũmbano ũũ nesa, ĩthĩwa wĩ na kamasinĩ ke na makaa maseo katonya kũkwata mĩtambo ya FM, na kayĩthwa ke na twĩndũ twa kwĩkĩa matũ ĩla ũkwĩthukĩĩsya.

◼ Tũkalĩ twa Kũsukuma Twana na Ivĩla Ila Itũmĩawa Kũla Kũthyũmũawa (lawn chairs): Andũ mayaĩle kũka na syĩndũ isu ũmbanonĩ. Ĩndĩ mũndũ no oke na tũvĩla twa kũsũvĩa syana ethĩwa nĩveũkwatĩkana mwanya wa kũtũia vala asyai mekalĩte.

◼ Mauta ma Kwĩvuva: Nĩkwĩthĩwa maũmbano amwe mekĩawa myakonĩ nthĩnĩ, twĩthĩawa tũyonanyʼa kana nĩtwendete ala angĩ twatũmĩa mauta ma kwĩvuva mate na mũuke mwingĩ nĩ kana maikathĩnyʼe andũ ala mathũawa nĩ mĩuke.—1 Ako. 10:24.

◼ Voomu ya Tafadhali Fuatia Upendezi (S-43): Voomu ya Tafadhali Fuatia Upendezi nĩyaĩle kũtũmĩwa kũandĩka ũvoo ĩũlũ wa andũ ala mekwendeewʼa twakomana namo ĩvindanĩ ya ũmbano. Voomu ĩsu yausũwʼa yaĩle kũnenganwe Mũvĩanĩ wa Mavuku kana ĩkanengwa mũandĩki wa kĩkundi twasyoka ikundinĩ.

◼ Mĩkaawa: Twaĩle kwĩthĩwa na mwĩkalĩle mũseo ĩla twĩ mĩkaawanĩ nĩ kana tũmũtaĩe Yeova. Ĩkĩa ngũa kwa nzĩa ĩkwonanyʼa wĩ mũtavanyʼa wa ũvoo mũseo. Tia mbesa nini sya kũtũnga mũvea ethĩwa nĩkwĩkawa ũu kwenyu.

◼ Ũteli:

(1) Ndũkakwate nyũmba mbingĩ kwĩ ila wĩtũmĩa, na ndũketĩkĩle nyũmba yaku ĩkome andũ aingĩ kũvĩtũka ala mathĩĩwe.

(2) Ndũkavĩndũe mĩvango yaku ya kũtũmĩa nyũmba ate o vaumĩla ũndũ ũtasiĩĩka. Wavĩndũa mĩvango yaku, tavya ene ma ũteli mĩtũkĩ ũndũ vatonyeka nĩ kana nyũmba ĩsu ĩnengwe andũ angĩ. (Mt. 5:37) Ĩkĩĩthya nĩwanengwa namba ya kwonanyʼa nĩwaekana na nyũmba ĩsu. Waekana na nyũmba ĩsu vatiele masaa ĩtheo wa 48 ũmĩlike, ndwĩtũngĩwa mbesa ila waĩvĩte sya kũkwata nyũmba.

(3) Watũmĩa kaati ya vengi kũkwata nyũmba ya kũkoma, waĩlĩte kũmanya kana ũteli nĩwosaa mbesa imwe itonya kũĩvĩa nyũmba ĩsu, vamwe na syĩndũ ila itonya kwanangĩka ĩvindanĩ yĩla ũkwĩthĩwa ũilyĩ ũtelinĩ ũsu. Ĩtina wa wauma ũtelinĩ, ndũkethĩwa ũtonya kũtũmĩa mbesa isu nginya ĩla ũkaminana namo.

(4) Osa kakalĩ ka kũkua mĩio o ĩla ũũkatũmĩa, na ũikatũnga mĩtũkĩ nĩ kana ala angĩ makatũmĩe.

(5) Nenga athũkũmi ma ũteli mbesa nini sya kũmatũngĩa mũvea ĩla maũtetheesya kũkua syĩndũ ethĩwa kwenyu nĩkwĩkawa ũu. Ĩka oou kwa ũla ũkũtethya wĩa wa kũthesya nyũmba ĩla ũkwĩkala.

(6) Uĩa nyũmbanĩ o ila mũnengetwe mwanya wa kũuĩa vo.

(7) Ndũkatũmĩe na ĩtomo malĩu, kaawa, kana syĩndũ ingĩ sya kũya ila inengawe aeni ũtelinĩ.

(8) Mavinda onthe onanyʼa ũsyao wa veva ĩla ũũthũkũmana na andũ ma ũteli. Methĩawa na aeni aingĩ, na nĩmewʼaa mũyo ĩla twamonyʼa tei, wũmĩĩsyo, na tweethĩwa tũimaelewa.

(9) Asyai maĩle kũsũvĩa syana syoo mavinda onthe syĩ ũtelinĩ, kwa ngelekanyʼo, ĩla syĩ kũndũ kũla kũseũvĩtwʼe kwa kũtuvĩa, livutinĩ (elevators), kana syĩ kũndũ kũngĩ vau ũtelinĩ.

(10) Mbesa ila syonanĩtwʼe nthĩnĩ wa Orodha ya Mahali pa Kulala Palipopendekezwa nĩsyo waĩlĩte kũĩva kwa mũthenya, ĩndĩ ndwĩthĩawa ũtilĩtwe koti mbesanĩ isu. Waĩvĩthwʼa mbesa ivĩtũkĩte isu ndũketĩkĩle, ĩndĩ tavya ala me Mũvĩanĩ wa Vandũ va Kũkoma mĩtũkĩ ũndũ vatonyeka.

(11) Vaumĩla mathĩna ũtelinĩ, tavya ala me Mũvĩanĩ wa Vandũ va Kũkoma ũmbanonĩ nĩ kana maũtetheesye.

◼ Wĩa wa Kwĩyumya: Ũla ũnũkwenda kũtetheesya aĩle kũthi Mũvĩanĩ wa Ũthũkũmi wa Kwĩyumya. Syana ila itavikĩtye myaka 16 o nasyo no syĩyumye ithũkũme vamwe na asyai masyo, mũndũ ũla wĩkalaa nasyo, kana mũndũ ũngĩ mũima ũla ũnyuvĩtwe nĩ mũsyai kana nĩ ũla wĩkalaa nasyo.