Ũndũ Tũtonya Kwonyʼa Angĩ Nĩtũmendete

Nũndũ ithyonthe twĩ ũsyao wa mũndũ wa mbee, Atamu, no twasye kana twĩ ma mũsyĩ ũmwe. Ĩndĩ o na kũtwʼĩka andũ ma mũsyĩ nĩmaĩle kũnengane ndaĩa na kwendana, ũmũnthĩ ti laisi kwona andũ mendene. Kĩu tikyo Ngai witũ wĩ wendo wendaa twĩke.

ŨNDŨ MAANDĨKO MATHEU MAĨTYE ĨŨLŨ WA WENDO

“Mwende mũtũi waku o tondũ wĩyendete.”—ALIVAI 19:18.

“Endeeai kũmenda amaitha menyu.”—MATHAYO 5:44.

MAŨNDŨ ALA MONANASYA KANA NĨTWENDENE

Kwoona ũndũ Ngai ũeleetye wendo Ndetonĩ yake ĩandĩkonĩ ya 1 Akolintho 13:4-7:

“Wendo nĩweteelaa na nĩwĩkaa ũseo.”

Kwasũanĩa ũndũ ũũ: We wĩwʼaa ata yĩla angĩ makũmĩĩsya, makwĩka nesa, na malea kũũthatĩa wavĩtya?

“Wendo ndwĩ kĩwĩu.”

Kwasũanĩa ũndũ ũũ: We wĩwʼaa ata woona andũ maikwĩwʼĩa kĩwĩu na maikũsũanĩa maũndũ mathũku?

Wendo “ndũmanthaa kwĩyĩuna.”

Kwasũanĩa ũndũ ũũ: We wĩwʼaa ata woona andũ ala angĩ mainenga ndaĩa woni waku na mateũkwatĩĩa woni woo kĩla ĩvinda?

Wendo “ndũtalaa mavĩtyo.”

Kwasũanĩa ũndũ ũũ: Ngai nĩwĩthĩawa eyũmbanĩtye kũekea ũla wĩkĩte naĩ na akelila. Maandĩko maĩtye: “Ndakateta mavinda onthe; o na ndekalasya ũthatu wake tene na tene.” (Savuli 103:9) Nĩtũtanaa mũno yĩla mũndũ tũmũvĩtĩsye watũekea. Kwoou, nĩtwaĩle kwĩthĩawa twĩyũmbanĩtye kũekea ala angĩ yĩla matũvĩtĩsya.—Savuli 86:5.

Wendo “ndũtanĩaa ũndũ ũte ũlũngalu.”

Kwasũanĩa ũndũ ũũ: Yĩla twakwatwa nĩ thĩna, tũyendaa kwona andũ angĩ maitanĩa thĩna witũ. Kwoou, o naitũ tũyaĩle kũtana yĩla andũ ala angĩ maendeee kũthĩna, o na ethĩwa nĩmatwĩkie ũndũ mũna mũthũku.

Nĩ kana Ngai atũathime, no nginya twĩke andũ ala angĩ maũndũ asu twaneenea monanasya kana nĩtũmendete, o na ethĩwa naaũ. Ũndũ ũmwe tũtonya kwĩka tũkonanyʼa kana nĩtwendete angĩ nĩ kũmatetheesya.