Ũndũ Tũtonya Kwĩthĩwa Atavanyʼa Aseo, Kwĩthĩwa Twĩyũmbanĩtye Kũvĩndũkana na Maũndũ

NĨKĨ NĨ ŨNDŨ WA VATA: Etĩkĩwʼa mauta na malondu angĩ nĩmathoketye andũ ma mĩthemba yonthe ‘mose kĩwʼũ kya thayũ mana.’ (Ũvu 22:17) Kĩwʼũ kĩu kya thayũ kyonanasya maũndũ onthe ala Yeova wĩkĩte nĩ kana avonokye andũ ala ewi kuma naĩnĩ na kĩkwʼũnĩ. Nĩ kana tũtetheesye andũ ala me na mĩĩkĩĩo na syĩthĩo syĩ kĩvathũkanyʼo, nĩtwaĩle kũtavanyʼa “ũvoo mũseo wa tene na tene” kwa nzĩa ĩtonya kwendeesya kĩla ũmwe woo.​—Ũvu 14:6.

ŨTONYA KWĨKA ŨU ATA?:

• Nyuva ũndũ ũla ũũthi kũneenea o vamwe na ĩandĩko yĩtonya kũkiita ngoo sya andũ kĩsionĩ kyenyu. No ũtũmĩe ũndũ ũmwe kuma kĩlungunĩ Ũndũ Ũtonya Kwasya kana ũkaneenea ũndũ wĩsĩ nĩwĩthĩawa na mosyao maseo kĩsionĩ kyenyu. Nĩ maũndũ meva andũ methukĩĩasya mũno kĩsionĩ kyenyu na ũtonya kũtũmĩa maandĩko meva? Ve ũndũ ũneekĩkie mĩtũkĩ andũ aingĩ maendeee kũũsũanĩa kana kũũneenea? Nĩ ũndũ wĩva ũtonya kwendeesya mũndũũme kana mũndũ mũka?

• Ĩka maũndũ ala mekawa kĩsionĩ kyenyu ta kwamba kũkethanyʼa na mũndũ ũtanambĩĩa kũmũtavya ũvoo.​—2Ko 6:3, 4

• Ĩthĩwa wĩsĩ nesa mavuku na vitio ila syĩ nthĩnĩ wa Syĩndũ Ila Tũtũmĩaa Mũno Kũmanyĩsya nĩ kana ũitũmĩe kwa mũndũ ũla woonanyʼa kana nũkwendeewʼa

• Umya mavuku kana vitio sya ithyomo sya andũ ala ũkwona nũtonya kũkomana namo kĩsionĩ kyenyu

• No ũvĩndũe kĩla wĩĩvangĩte kũneenea nĩ kana kyosane na mavata ma mwene nyũmba. (1Ko 9:19-23) Kwa ngelekanyʼo, ũtonya kwasya ata wamanya kana mwene nyũmba nũnakwʼĩĩwe?

ĨLOELEI VITIO NA ĨNDĨ MŨISŨNGĨA MAKŨLYO AA:

• Mũtavanyʼa ambĩĩa kũneenea kyaũ na mwene nyũmba?

• Nĩ maũndũ meva manamũkwatĩte mwene nyũmba?

• Nĩ ĩandĩko yĩva yĩĩaĩle kwondũ wa mwene nyũmba, na nĩkĩ?

• Ũvĩndũaa ata kĩla wĩĩvangĩte kũtavanyʼa kyosane na mavata ma andũ kĩsionĩ kyenyu?