ŨNDŨ ŨTONYA KŨSINDA KĨMENA

4 | Mwĩkwatye Ngai Aũtetheesye

Kĩla Mbivilia Ĩmanyĩasya:

“Ũsyao wa veva nĩ wendo, ũtanu, mũuo, wũmĩĩsyo, kwĩka angĩ nesa, ũseo, mũĩkĩĩo, ũuu, na kwĩsiĩĩa.”—AKALATIA 5:22, 23.

Kĩla Yĩthĩawa Ĩyonanyʼa:

No tũsinde kĩmena twamwĩkwatya Ngai atũtetheesye. Ve nguma tũtesa kwĩthĩwa nasyo tũtatetheewʼe nĩ veva wake mũtheu. Kwoou vandũ va kũtata kũsinda kĩmena tũtũmĩĩte vinya witũ, nũseo tũmwĩkwatye Ngai atũtetheesye. Tweeka ũu, tũkeethĩawa na woni ta ũũ mũtũmwa Vaulo waĩ nawʼo: “Nĩndonya maũndũ onthe nũndũ wa vinya wa ũla ũndonyethasya.” (Avilivi 4:13) Na tũkeethĩwa tũtonya kwasya ũũ: “Ũtethyo wakwa nĩwumaa kwa Yeova.”—Savuli 121:2.

Ũndũ Ũtonya Kwĩka:

“Yeova nũtumĩte nĩekana na ũngʼendu na ngatwʼĩka mũndũ wendete mũuo.”—WALDO

Mũvoye Yeova kuma ngoonĩ aũnenge veva wake mũtheu. (Luka 11:13) Mũkũlye aũtetheesye wĩthĩwe na nguma nzeo. O na ĩngĩ, ĩmanyĩsye ĩũlũ wa nguma ila Mbivilia ĩwetete itũtetheeasya kũsinda kĩmena, ta wendo, mũuo, wũmĩĩsyo, na kwĩsiĩĩa. Ĩkĩa kĩthito wĩke maũndũ matonya ũkũtetheesya wĩthĩwe na nguma isu. Na ũimantha anyanya ala o namo maendeee kwĩkĩa kĩthito methĩwe nasyo. Anyanya ta asu no ‘maũthuthye wĩthĩwe na wendo na meko maseo.’—Aevelania 10:24.

Ngewa—WALDO

Nĩwasindie Kĩmena na Aekana na Ũngʼendu

Waldo akomanie na mathĩna maingĩ mũno e mũnini, na kĩu kyatumie eana e mũndũ wĩ kĩmena. Easya: “Natindĩaa kũkita na andũ ala mathooasya ndawa sya kũmila . . . Ĩvinda yĩmwe, kĩkundi kĩmwe kyaĩ na ũmaitha na kĩla nalikĩte nĩkyatũmie mũndũ ũmwe waĩ na ũtũĩka wa kũaa andũ nĩ kenda ambũae, ĩndĩ nĩnavonokie o na kaũ nĩwandonyie na kavyũ.”

Waldo ndaaĩwʼa mũyo yĩla mũka wambĩĩie kwĩmanyĩsya Mbivilia na Ngũsĩ sya Yeova. Aĩtye ũũ: “Nĩnamenete Ngũsĩ, na kaingĩ namaumangaa naĩ mũno. Ĩndĩ kĩla ĩvinda manzũngĩaa nesa.”

Ĩndĩ ĩtina wa ĩvinda, o nake Waldo nĩwambĩĩie kwĩmanyĩsya Mbivilia. Easya: “Ndwaĩ ũndũ wĩ laisi kũatĩĩa kĩla neemanyĩasya. Nyie neesĩ ndikesa kũeka kwĩthĩwa nĩ mũthilĩku na nĩ mũngʼendu.” Ĩndĩ ve kĩndũ kĩmwe wesie kwĩmanyĩsya Mbivilianĩ kyamũvĩndũa vyũ.

Waldo aĩtye atĩĩ: “Mũthenya ũmwe, Alejandro, ũla nĩwe wamanyĩasya, angũlilye nĩsome Akalatia 5:22, 23. . . . Alejandro angeleisye kana ndyaĩ nĩsa kwĩthĩwa na nguma isu kwa vinya wakwa mwene, ĩndĩ no veva mũtheu wa Ngai waĩ ũtonya kũndetheesya. Ũndũ ũsu watumie nĩĩkĩĩa vyũ kana no nĩekane na ũthilĩku na ũngʼendu!”

Waldo nĩwamwĩkwatisye Ngai, na nũndũ wa ũu, nĩwasindie kĩmena. Aĩtye atĩĩ: “Andũ ma mũsyĩ na anyanyawa ma tene masengʼaa mũno moona moalyũku ala nĩkĩte.” Ongelete kwasya: “Yeova nũtumĩte nĩekana na ũngʼendu na ngatwʼĩka mũndũ wendete mũuo.”