Eka Wendo Ũũthangaasye Ũendeee Kũtavanyʼa!

1. Tweemanyĩisye kyaũ ũmbanonĩ wa kĩla mwaka wa 2023?

ŨMBANONĨ wa kĩla mwaka wa 2023,a nĩtwakwatie ũmanyi mweũ ũkonetye maũndũ amwe tũĩkĩĩaa na tweewʼa imanyĩthya sya kũtanĩthya ĩũlũ wa wĩa witũ wa kũtavanyʼa. Kwa ngelekanyʼo, nĩtweemanyĩisye kana no kwĩthĩwa andũ amwe makakwata mwanya wa kũka ngalĩ ya andũ ma Yeova o na ĩtina wa Mbaviloni Ĩla Nene kwanangwa. O na nĩtweemanyĩisye kana kwambĩĩa Mwei wa 11, 2023, atavanyʼa ma Ũsumbĩ maikakũlawʼa maumye livoti ya maũndũ onthe ala mekie ũtavanyʼanĩ. Mo moalyũku asu nĩmeũtuma wĩa witũ wa kũtavanyʼa woneka ũte wa vata na ũtaĩle kũtethwʼa na mĩtũkĩ ta tene? Ti wʼo, o na vanini!

2. Nĩkĩ wĩa witũ wa kũtavanyʼa wĩthĩawa waĩle kũtethwʼa na mĩtũkĩ mũnango, o ũndũ mĩthenya ĩvĩtĩte? (Maliko 13:10)

² O ũndũ mĩthenya ĩvĩtĩte, wĩa witũ wa kũtavanyʼa wĩthĩawa waĩle kũtethwʼa na mĩtũkĩ mũnango. Nĩkĩ? Nũndũ no ĩvinda ĩnini mũno ĩtielye mũthya ũtanavika. Kwasũanĩa kĩla Yesũ wawetie ĩũlũ wa wĩa wa kũtavanyʼa mĩthenyanĩ ya mũminũkĩlyo. (Soma Maliko 13:10.) Kwosana na ũvoo ũngĩ ũvwʼanene na ũsu, ũla waandĩkiwe nĩ Mathayo, Yesũ aisye kana ũvoo mũseo ũkatavanwʼa nthĩ yonthe “mũthya” ũtanavika. (Mt. 24:14) Ndeto ĩsu yonanasya ĩvinda ya kwanangwa vyũ kwa nthĩ ĩno nthũku ya Satani. Yeova nũtwʼĩte ‘mũthenya na saa’ sya maũndũ asu makilyĩ kwĩkĩka o mĩtũkĩ. (Mt. 24:36; 25:13; Meko 1:7) Kĩla mũthenya wavĩta, wĩthĩawa watũthengeesya ĩvindanĩ yĩu. (Alo. 13:11) Ĩndĩ mũthya ũikaavika, no nginya tũendeee kũtavanyʼa.

3. Nĩ kyaũ kĩtũthangaasya tũtavanyʼe?

³ Yĩla tũũsũanĩa wĩa witũ wa kũtavanyʼa, nũseo tũkekũlya-ĩ: Nĩkĩ tũtavanasya ũvoo mũseo? Wendo nĩwʼo ũtũthangaasya tũtavanyʼe. Yĩla tũũtavanyʼa, twĩthĩawa tũyonanyʼa kana nĩtwendete ũvoo mũseo, nĩtwendete andũ, na ũndũ ũla wa vata vyũ, nĩtũmwendete Yeova na ĩsyĩtwa yake. Ekai tũneenee ũndũ ũmwe kũthi ũla ũngĩ.

TŨTAVANASYA NŨNDŨ NĨTWENDETE ŨVOO MŨSEO

4. Twĩkaa ata yĩla twatavwʼa ũvoo mũna mũseo?

⁴ No ũlilikane ũndũ weewie yĩla wakwatie ũvoo mũna mũseo? No kwĩthĩwa wamanyie kana ve mũndũ wa mũsyĩ wasyaa kana ũkethĩwa weetĩiwe wĩa wawendaa mũno. Vate nzika, waĩ na mea ma kũtavya andũ ma mũsyĩ na anyanyau ũvoo ũsu mũseo. Wʼo ũndũ ta ũsu nĩweekĩkie yĩla weewie ũvoo ũla wa mwanya vyũ, nawʼo nĩ ũvoo mũseo wa Ũsumbĩ wa Ngai?

5. Weewie ata yĩla wemanyĩisye ya mbee ũwʼo ũla wĩ Ndetonĩ ya Ngai? (O na ĩngĩ, sisya visa.)

⁵ Kwavindĩĩsya ũndũ weewie yĩla weemanyĩisye ya mbee ũwʼo ũla wĩ Ndetonĩ ya Ngai. Nĩwamanyie kana Ĩthe waku wa ĩtunĩ nũkwendete, nĩwendaa wĩthĩwe mũthaithi wake, nĩwathanĩte kũmina vyũ woo na mathĩna, no wĩkwatye kwona ĩngĩ endwa maku ala makwie ĩvinda yĩla Ngai ũkatwʼĩkĩthya maũndũ meũ ĩtunĩ na nthĩ, na maũndũ angĩ maingĩ ta asu. (Mko. 10:​29, 30; Yoa. 5:​28, 29; Alo. 8:​38, 39; Ũvu. 21:​3, 4) Ũwʼo ũsu nĩwakiitie ngoo yaku. (Luka 24:32) Nĩwendie maũndũ ala weemanyĩasya, na nĩwendaa kũtavya onthe ala wakomana namo maũndũ asu!—Sianĩsya na Yelemia 20:9.

6. Ngewa ya Ernest na Rose yĩũmanyĩsya kyaũ?

⁶ Kwasũanĩa ngewa ĩno. Mwana-a-asa wĩtawa Ernestb aangĩe myaka ĩkũmi yĩla ĩthe wake wakwie. Aĩtye: “Neekũlasya atĩĩ: ‘Aendie ĩtunĩ? Akeethĩwa thayũ ĩngĩ?’ Neewʼĩaa syana ila ĩngĩ syaĩ na aaĩthe moo kĩwĩu.” Ernest nĩwakothaa kũthi kũla kũthikawa andũ, aitulya ndu vau mbũanĩ ya ĩthe wake, na aivoya atĩĩ: “Ngai, ethĩwa nĩvatonyeka nĩenda kũmanya vala ĩthe wakwa ũĩ.” Ta myaka 17 kuma ĩthe wake akwʼa, nĩwakũlilwʼe kana no ende kwĩmanyĩsya Mbivilia na eetĩkĩla ate kweteela. Nĩwatanie mũno kũmanya kana akwʼũ mayĩthĩawa mesĩ ũndũ o na wĩva, no ũndũ ũmwe na makomete too mũito, na kana Mbivilia yathanĩte kana kũkeethĩwa na ũthayũũkyo. (Mũta. 9:​5, 10; Meko 24:15) Mũthya, nĩwakwatie mosũngĩo ma makũlyo ala mamũthĩnĩtye kwa ĩvinda yĩasa. Ernest nĩwatanĩaa mũno maũndũ ala waendeee kwĩmanyĩsya. Mũka wake, Rose, nĩwambĩĩie kwĩmanyĩsya, na o nake nĩwendie maũndũ ala weemanyĩasya. Twĩ 1978, me elĩ nĩmavatisiwe. Maĩ na kĩthito kingĩ kya kũtavya andũ ma mũsyĩ, anyanya, na andũ ala angĩ mekũmethukĩĩsya maũndũ ala maĩkĩĩe. Nũndũ wa ũu, Ernest na Rose nĩmatetheesye andũ mbee wa 70 makavatiswa.

7. Vaendaa ata yĩla twenda ũwʼo ũla wĩ Mbivilianĩ na ngoo yonthe? (Luka 6:45)

⁷ Vate nzika, yĩla twenda ũwʼo ũla wĩ Mbivilianĩ na ngoo yonthe, twĩwʼaa tũyenda kũtavya andũ onthe ĩũlũ wawʼo. (Soma Luka 6:45.) Twĩwʼaa o ta amanyĩwʼa ma Yesũ ĩvindanĩ ya atũmwa, ala maisye: “Tũitonya kũeka kũneena ĩũlũ wa maũndũ ala twonete na kwĩwʼa.” (Meko 4:20) Twĩthĩawa twendete ũwʼo mũno vyũ nginya ũkethĩa twĩenda kũtavya andũ aingĩ ũndũ vatonyeka.

TŨTAVANASYA NŨNDŨ NĨTWENDETE ANDŨ

8. Nĩ kyaũ kĩtũthangaasya tũnyaĩĩkĩsye angĩ ũvoo mũseo? (Sisya ĩsandũkũ “Mende Andũ na Ũimatwʼĩkĩthya Amanyĩwʼa.”) (O na ĩngĩ, sisya visa.)

⁸ O ta Yeova na Mwana wake, nĩtwendete andũ. (Nth. 8:31; Yoa. 3:16) Twĩwʼĩaa ĩnee yingĩ ala ‘mate na Ngai’ na ‘mate na wĩkwatyo.’ (Aev. 2:12) Nũndũ wa mathĩna ala me namo, no mewʼe ta me ĩimanĩ ĩliku, ĩndĩ ithyĩ twĩ na ĩkanda ya kũmakusya maume vo, nayo nĩ ũvoo mũseo wa Ũsumbĩ wa Ngai. Na kwoou nũndũ nĩtũmendete na nĩtũmewʼĩaa ĩnee, twendaa kwĩka kyonthe kĩla tũtonya tũmanyaĩĩkĩsye ũvoo mũseo. Ũvoo ũsu wa mwanya no ũtume methĩwa na wĩkwatyo, ũkamatetheesya matanĩe thayũ oyu, na mayĩthĩwa na mwanya wa kwĩsa kũkwata “ũla thayũ wa wʼo,” kana kwa ndeto ingĩ, thayũ wa tene na tene ĩvinda yĩla Ngai ũkatwʼĩkĩthya maũndũ meũ.—1 Tim. 6:19.

9. Nĩ ũkanyʼo wĩva tũnengae andũ ĩũlũ wa ĩvinda yũkĩte, na nĩkĩ? (Esekieli 33:​7, 8)

⁹ O na ĩngĩ, kwenda andũ nĩkũtũthangaasya tũmatavye kana mũthya wa nthĩ ĩno nthũku nũthengeee. (Soma Esekieli 33:​7, 8.) Nĩtwĩwʼĩaa tei atũi maitũ na andũ maitũ ma mũsyĩ ala mate Ngũsĩ. Aingĩ moo maendeeaa kwĩka o maũndũ moo matesĩ kĩla kyũkĩte, nakyo nĩ “thĩna mũnene ũtaaĩthĩwa kuma mwambĩlĩlyo wa nthĩ kũvika o na yu, na ndũkethĩwa ĩngĩ.” (Mt. 24:21) Na twendaa mamanye kĩla kĩkekĩka ĩvindanĩ yĩu ya ũsilĩlo. Ndĩni sya ũvũngũ ikamba kwanangwa, na ĩtina wa ũu, nthĩ ĩno nthũku ĩyanangwa kaũnĩ wa Alimaketoni. (Ũvu. 16:​14, 16; 17:​16, 17; 19:​11, 19, 20) Tũvoyaa kana nongi andũ aingĩ ũndũ vatonyeka nĩmewʼa ũkanyʼo ũsu na maitwʼa kũmũthũkũma Yeova vamwe naitũ yu tũĩ. Ĩndĩ nata ala maleaa kwĩthukĩĩsya ũkanyʼo ũsu ĩvindanĩ yĩĩ, o na ethĩwa nĩ andũ maitũ ma mũsyĩ?

10. Nĩkĩ nĩ ũndũ wa vata tũendeee kũkanyʼa andũ?

¹⁰ O tondũ ĩsomo ĩvĩtu yonanĩtye, no wĩthĩwe wĩ wendi wa Yeova kwovosya andũ ala makambĩĩa kũmũĩkĩĩa yĩla makona Mbaviloni Ĩla Nene ĩyanangwa. Ethĩwa ũu nĩwʼo vailye, kĩu kĩonanyʼa kana nĩ ũndũ wa vata tũendeee kũkanyʼa andũ. Kwasũanĩa ũndũ ũũ: Kĩla tũmatavasya oyu no kĩtume methĩwa na ũndũ wa kũlilikana ĩvindanĩ yĩu. (Sianĩsya na Esekieli 33:33.) No kwĩthĩwa makalilikana ũkanyʼo ũla twamanengie na kĩu kĩimathangaasya mamũthũkũme Yeova vamwe naitũ ĩvinda yĩtanamba kũthela. O tondũ ũla mũsikalĩ wa yela ndũanĩ ya Vilivi wambĩĩie kũĩkĩĩa Yesũ ĩtina wa “kĩthingitho kĩnene kya nthĩ” kumĩla, no kwĩthĩwa andũ amwe matethukĩĩasya ũvoo witũ oyu makaalyũla mawoni moo ĩtina wa kwona Mbaviloni Ĩla Nene ĩyanangwa vyũ.—Meko 16:​25-34.

TŨTAVANASYA NŨNDŨ NĨTŨMWENDETE YEOVA NA ĨSYĨTWA YAKE

11. Nĩ kwa nzĩa yĩva tũmũnengae Yeova nguma, ndaĩa, na vinya witũ? (Ũvuanyʼo 4:11) (O na ĩngĩ, sisya visa.)

¹¹ Ũndũ ũla wa vata vyũ ũtumaa tũtavanyʼa ũvoo mũseo nĩkwĩthĩwa nĩtũmwendete Yeova Ngai na ĩsyĩtwa yake ĩtheu. Twonaa wĩa witũ wa kũtavanyʼa wĩ nzĩa ĩmwe ya kũmũtaĩa Ngai witũ, ũla tũmwendete. (Soma Ũvuanyʼo 4:11.) Nĩtwĩtĩkĩlaa na ngoo yonthe kana no Yeova Ngai waĩlĩte kũnengwa nguma, ndaĩa, na vinya nĩ athũkũmi make aĩkĩĩku. Tũmũnengae nguma na ndaĩa yĩla twatavya angĩ maũndũ meũmaĩkĩĩthya kana nĩwe ‘woombie syĩndũ syonthe’ na kana twĩ thayũ nũndũ wake. Na tũmũnengae vinya witũ yĩla twatũmĩa ĩvinda, ũtonyi, na malĩ sitũ kũtavanyʼa na kĩthito kingĩ ũndũ vatonyeka. (Mt. 6:33; Luka 13:24; Ako. 3:23) Ũwʼo nĩ kana nĩtũmwendete Ngai witũ na nĩtwendete kũtavya angĩ ĩũlũ wake. O na ĩngĩ, nĩtwĩthĩawa na mea ma kũtavya angĩ ĩũlũ wa ĩsyĩtwa yake na kĩla yonanasya. Nĩkĩ tũkwasya ũu?

12. Tũtheasya ĩsyĩtwa ya Yeova ata yĩla twĩ ũtavanyʼanĩ?

¹² Kũmwenda Yeova nĩkwʼo kũtumaa tũthesya ĩsyĩtwa yake. (Mt. 6:9) Kĩu kĩonanyʼa kana twendaa kũtetheesya kũvetea ĩsyĩtwa ya Yeova ũvuku wʼonthe ũla ũetetwe nĩ ũvũngũ ũla Satani ũnyaĩĩkasya. (Mwa. 3:​1-5; Yovu 2:4; Yoa. 8:44) Yĩla twĩ ũtavanyʼanĩ, twĩthĩawa na mea ma kũtetea Ngai witũ kwa kũtavya onthe ala mekwĩthukĩĩsya ũwʼo ĩũlũ wake. Twendaa andũ onthe mamanye kana nguma yake ĩla nene nĩ wendo, nzĩa yake ya kũsumbĩka nĩ ndũngalu na ndĩ mavĩtyo, na kana Ũsumbĩ wake ũkilyĩ kũvetea andũ mathĩna onthe na ũimaetea mũuo na ũtanu. (Sav. 37:​10, 11, 29; 1 Yoa. 4:8) Yĩla twatavya angĩ maũndũ asu ĩũlũ wa Yeova, twĩthĩawa tũithesya ĩsyĩtwa yake. O na ĩngĩ, nĩtũtanaa kũmanya kana twĩthĩawa twekala kwosana na ĩsyĩtwa yitũ. Ata?

13. Nĩkĩ twonaa yĩ ndaĩa nene kwĩtwa Ngũsĩ sya Yeova? (Isaia 43:​10-12)

¹³ Yeova atũnyuvĩte tũtwʼĩke “ngũsĩ” syake. (Soma Isaia 43:​10-12.) Myaka yĩana ũna mĩvĩtu, valũa ũmwe kuma kwa Nzama Ĩla Ĩtongoesye waisye ũũ: “Kĩanda kĩla kĩnene tũtonya kwĩthĩwa nakyo nĩ kwĩtwa Ngũsĩ sya Yeova.”c Nĩkĩ? Kwasũanĩa ngelekanyʼo ĩno. Twasye ũilĩĩlwe ĩvĩtyo ya kwĩka maũndũ mana mathũku na yu veendeka mũndũ aĩkĩĩthye kana maũndũ asu ti ma wʼo, na kana wĩ mũndũ mũseo ũtesa kwĩka maũndũ mathũkĩte ũu. We ũnyuva ũũ? Vate nzika, ũnyuva mũndũ ũmwĩsĩ na ũmũĩkĩĩe, na wĩsĩkĩe nesa nĩ angĩ nginya ũkethĩa no mamũĩkĩĩe. O ta ũu, kwona Yeova atũnyuvĩte tũtwʼĩke Ngũsĩ syake nĩ kwonanyʼa kana nũtwĩsĩ nesa na nũtũĩkĩĩe tũtavye angĩ kana nowe Ngai ũla wa wʼo. Naitũ twonaa yĩ ndaĩa nene kwĩtwa Ngũsĩ syake, na kwoou nĩtũtũmĩaa myanya yonthe ĩla twakwata kũmanyĩthya angĩ ĩsyĩtwa yake na kũmaĩkĩĩthya kana maũndũ ala mawetawa ĩũlũ wake ti ma wʼo. Tweeka ũu, twĩthĩawa twekala kwosana na ĩsyĩtwa yitũ, yĩla tũtanĩaa mũno kwĩtwa, nayo nĩ Ngũsĩ sya Yeova!—Sav. 83:18; Alo. 10:​13-15.

TWĨENDEEA KŨTAVANYʼA NGINYA MŨTHYA

14. Nĩ maũndũ meva ma kũtanĩthya tweteele?

¹⁴ Mwa, ve maũndũ maingĩ ma kũtanĩthya tweteele! Twĩ na wĩkwatyo wa kwona Yeova aitũathima nĩ kana tũtetheesye andũ angĩ aingĩ metĩkĩle ũwʼo mbee wa ũla thĩna mũnene kwambĩĩa. O na ĩngĩ, twĩ na ũtanu kũmanya kana ĩvindanĩ ya ũla thĩna mũnene, yĩla yĩkethĩwa yĩ yũmũ vyũ, andũ angĩ aingĩ nĩmatonya kwĩthyũũa matie nthĩ ĩno ya Satani na mayũka tũmũthaithe Yeova twĩ vamwe!—Meko 13:48.

15-16. Twĩendeea kwĩka ata, na twĩĩka ũu nginya ĩndĩĩ?

¹⁵ Yu tũĩ, twĩ na wĩa wa kũtethya. Nĩtũnengetwe kĩanda kya kũtavanyʼa ũvoo mũseo wa Ũsumbĩ wa Ngai ĩũlũ wa nthĩ yonthe, ũla ũtakatavanwʼa ĩngĩ. Ĩvindanĩ o yĩu, no nginya tũendeee kũkanyʼa andũ. Me na vata wa kũmanya kana mũthya wa nthĩ ĩno nthũku nũthengeee na mĩtũkĩ. Na ĩndĩ yĩla ĩvinda ya ũsilĩlo yĩkavika, makamanya kana ũvoo ũla twatavanasya waumĩte kwa Yeova Ngai.—Esek. 38:23.

¹⁶ Kwoou yu tũtwʼĩte kwĩka ata? Nũndũ nĩtwendete ũvoo mũseo, nĩtwendete andũ, na ũndũ ũla wa vata vyũ nĩtũmwendete Yeova Ngai na ĩsyĩtwa yake, nĩtũtwʼĩte kana twĩendeea kũtavanyʼa na kĩthito, twĩ na mea na tũteũvũthĩĩsya wĩa ũsu nginya yĩla Yeova ũkasya, “Nũu yu!”