ĨSOMO YA 56
Ĩthĩwai na Ngwatanĩo Kĩkundinĩ
Yĩla twĩ vamwe na Aklĩsto ala angĩ, twĩwʼaa o tondũ Mũsumbĩ Ndaviti weewʼaa. Aisye atĩĩ: “Ũndũ ũseo ũnenevete na ũndũ ũseũvĩte ana-a-asa mekalanʼya vamwe me ũmwe!” (Savuli 133:1) Ngwatanĩo ta ĩsu ndĩkaa kwĩyĩete. Kĩla ũmwe witũ no nginya ekĩe kĩthito nĩ kana yĩthĩwe.
1. Nĩ ũndũ wĩva wĩ ũtheinĩ katĩ wa athũkũmi ma Ngai?
Ũkathi ũmbanonĩ wa kĩkundi nthĩ ĩngĩ, nũtonya kũlea kũelewa nĩ kĩthyomo kyoo, ĩndĩ ũkewʼaa wĩ mwĩanĩe o ta wĩ o mũsyĩ. Nĩkĩ? Nũndũ twĩmanyĩasya Mbivilia tũtũmĩĩte mavuku o ala, kĩla vandũ. Na nĩtũtataa mũno twonanyʼe wendo ithyĩ kwa ithyĩ. O na ethĩwa twĩkalaa va, ithyonthe ‘nĩtwĩkaĩlaa syĩtwa ya Yeova, na kũmũthũkũmaa na ngoo ĩmwe.’—Nzevania 3:9.
2. Ũtonya kwĩka ata nĩ kana kĩkundi kĩthĩwe na ngwatanĩo?
Mbivilia yaĩtye atĩĩ: “Endanai mũno kuma ngoonĩ.” (1 Vetelo 1:22) Ũtonya kũatĩĩa ũtao ũũ ata? Vandũ va kũsiasya mawonzu ma ala angĩ, siasya nguma nzeo ila me nasyo. Na vandũ va kũtindanasya na o ala mendete maũndũ ala wendete, tata ũmanyane na ana-a-asa na eĩtu-a-asa maumĩte kũndũ kwĩ kĩvathũkanyʼo. O na ĩngĩ, ĩkĩa kĩthito vyũ ũvetange ngoonĩ yaku ũndũ o na wĩva ũla ũtonya kũtuma wĩyĩwʼa wĩ wa vata kwĩ ala angĩ.—Soma 1 Vetelo 2:17.a
3. Ũtonya kwĩka ata waemanwa na Mũklĩsto ũngĩ?
O na kau twĩ ngwatanĩo, ithyonthe twĩ na naĩ. Mavinda amwe nĩtũtũlanaa ngoo kana tũkaũmĩanyʼa o mũno. Kwoou Ndeto ya Ngai ĩtũtavĩtye atĩĩ: “Endeeai . . . kũekeanĩa,” na ĩkaendeea kwasya: “O tondũ Yeova wamũekeie inywʼĩ na ngenda, o nenyu no nginya mwĩke oou.” (Soma Akolosai 3:13.) Ithyĩ nĩtũũmĩasya Yeova mavinda maingĩ mũno, ĩndĩ aitũekea. Kwoou o nake endaa tũekee ana-a-asa maitũ oou. Wamanya kana nĩwavĩtĩsya mũndũ ũla ũngĩ, ĩthĩwa wĩ wa mbee kwosa ĩtambya nĩ kana mũlũnge maũndũ.—Soma Mathayo 5:23, 24.b
ĨMANYĨSYE MŨNANGO
Ĩmanyĩsye ĩũlũ wa maũndũ amwe ũtonya kwĩka ũkatuma kĩkundi kĩthĩwa na mũuo na ngwatanĩo.
Waĩle kwĩka ata nĩ kana ũtũngĩĩe mũuo?
4. Ĩvathane na kĩmena
Nĩtwaĩle kwenda ana-a-asa maitũ onthe. Ĩndĩ no twĩwʼe ve vinya kũlikana na mũndũ tũkwĩwʼa tũtavwʼanene maũndũnĩ mana. Nĩ kyaũ kĩtonya kũtũtetheesya veethĩwa vailye ũu? Somai Meko ma Atũmwa 10:34, 35, na ĩndĩ mũineenea makũlyo aa:
Yeova etĩkĩlaa andũ ma mĩthemba yonthe methĩwe athũkũmi make. Kĩu kyaĩle kũtuma ũmona ata ala maumĩte kũndũ kwĩ kĩvathũkanyʼo kana maeetwe kĩvathũkanyʼo naku?
Nĩ maũndũ meva andũ mekaa kĩsionĩ kya kwenyu makonanyʼa kana me na kĩmena? Na nĩkĩ waĩle kwĩvathana namo?
Somai 2 Akolintho 6:11-13, na ĩndĩ mũineenea ĩkũlyo yĩĩ:
Wĩona ũtonya kwĩka ata ũkethĩwa na ngwatanĩo ya vakuvĩ vamwe na ana-a-asa na eĩtu-a-asa ala maumĩte kũndũ kwĩ kĩvathũkanyʼo kana maeetwe kwa nzĩa yĩ kĩvathũkanyʼo naku?
5. Ekeaa na ngenda na ũitata kwĩthĩawe mũuo
Yeova atũekeaa na ngenda o na kau vaiĩ ĩvinda ũkenda tũmũekee. Somai Savuli 86:5, na ĩndĩ mũineenea makũlyo aa:
Yeova atũekeaa mũno wĩana ata?
We nũtũngaa mũvea nũndũ wa kwĩthĩwa Yeova atonya kũtũekea? Nĩkĩ wasũngĩa ũu?
Nĩ maũndũ meva matonya kũtuma tũtewʼana na ala angĩ?
Tũtonya kũatĩĩa ngelekanyʼo ya Yeova ata na tũyĩkalaa twĩ ngwatanĩo na ana-a-asa na eĩtu-a-asa maitũ? Somai Nthimo 19:11, na ĩndĩ mũineenea ĩkũlyo yĩĩ:
Yĩla wavĩtĩwʼa kana wathatwʼa nĩ mũndũ, ũtonya kwĩka ata nĩ kana maũndũ maikathũkĩĩe?
Mavinda amwe nĩtũvĩtĩasya ala angĩ. Yĩla vathi ũu, twaĩle kwĩka ata? Ĩloelei VITIO, na ĩndĩ mũineenea ĩkũlyo yĩla yĩatĩĩe.
Kwosana na ũndũ twoona vitionĩ, mwĩĩtu-a-asa ũsu eeka ata nĩ kana atũngĩĩe mũuo?
6. Siasya ũseo wa ana-a-asa na eĩtu-a-asa maku
Yĩla twalikana mũno na ana-a-asa na eĩtu-a-asa maitũ, nĩtũmanyaa nguma syoo ila nzeo, o vamwe na mawonzu moo. Kwoou tũtonya kwĩka ata tũsũanĩĩae mũno nguma syoo nzeo? Ĩloelei VITIO, na ĩndĩ mũineenea ĩkũlyo yĩla yĩatĩĩe.
Nĩ kyaũ kĩtonya kũũtetheesya wonae nguma ila nzeo sya ana-a-asa na eĩtu-a-asa maku?
Yeova asiasya mũno nguma sitũ ila nzeo. Somai 2 Mavinda 16:9a, na ĩndĩ mũineenea ĩkũlyo yĩĩ:
Kũmanya kana Yeova asiasya mũno nguma syaku ila nzeo, kwatuma wĩwʼa ata?
O na kau mbete ĩseũvĩtwʼe na syĩndũ sya thooa mũnene no yĩthĩwe ĩkũũtũĩtwe o kũndũ kũnini, kĩu kĩituma yĩeka kwĩthĩwa yĩ ya vata. O ta ũu, ana-a-asa na eĩtu-a-asa maitũ onthe me na naĩ, ĩndĩ nĩ ma vata mũno vala ve Yeova
ANDŨ AMWE MAASYA: “Mũndũ akũvĩtĩsya waĩle kũmũnyamasya ũyĩsa kũmũekea nĩ kana ndakasyokee ĩvĩtyo yĩu ĩngĩ.”
Nĩkĩ twaĩle kũekea ala angĩ na ngenda?
KĨLA TWEEMANYĨSYA
No ũtume kĩkundi kĩthĩwa na ngwatanĩo ethĩwa ũkaekeaa ana-a-asa na eĩtu-a-asa maku yĩla makũvĩtĩsya, na ũyonyʼa onthe wendo.
Makũlyo ma Kũsyokeleela
Ũtonya kwĩka ata wĩvathane na kĩmena?
Waĩle kwĩka ata yĩla waemanwa na Mũklĩsto ũngĩ?
We nũkwenda kũatĩĩa ngelekanyʼo ya Yeova ya kũekeaa ala angĩ? Nĩkĩ wasũngĩa ũu?
MAŨNDŨ ANGĨ MA KWĨMANYĨSYA
Ĩloele vitio wone ũndũ ngelekanyʼo ĩmwe yaeleiwʼe nĩ Yesũ ĩtonya kũtũtetheesya tũikasilĩlae ala angĩ.
Nĩtwaĩle kwĩtya ũekeo o na ethĩwa twĩĩwʼa ti ithyĩ tũvĩtĩtye?
“Kwĩtya Ũekeo—Nzĩa Nzeo ya Kũtũngĩĩa Mũuo” (Mũsyaĩĩsya, Ĩtukũ 1, Mwei wa 11, 2002)
Sisya wone ũndũ andũ amwe memanyĩĩtye kũkua angĩ mate na kyende.
Soma wone ũndũ ũtonya kũmina thĩna na mĩtũkĩ yĩla waemanwa na Mũklĩsto ũngĩ, ũndũ ũsu ũtanamba kumĩlya thĩna nthĩnĩ wa kĩkundi.
“Ekai Wendo Ũmũtongoesye Mwĩwʼane Ĩla Mwaemanwa” (Mũsyaĩĩsya, Mwei wa 5, 2016)
a Maelesyo ma Mũthya Namba 6 nĩmonanĩtye ũndũ wendo ũsukumaa Aklĩsto mesũvĩe nĩ kana maikakwatye ala angĩ ũwau ũtonya kũkwatanwʼa.
b Maelesyo ma Mũthya Namba 7 nĩmonanĩtye ũndũ tũtonya kũmina mathĩna ala makonetye maũndũ ma viasala na maũndũ ma mĩao.