Syo Ngũsĩ sya Yeova Niĩkĩĩaa Yesũ?

KŨMŨĨKĨĨA YESŨ NĨ ŨNDŨ WA VATA

Anthony: Ũvoo waku Tim? Nĩnatana kũkwona ĩngĩ.

Tim: Nĩ mũseo. O nakwa nĩnatana kũkwona.

Anthony: Nĩnakũetee makaseti ma mĩtũkĩ ma Mũsyaĩĩsya na Amkeni! Nĩĩkwatya nũũtanĩa mũno kũsoma ilungu ila syĩ makasetinĩ aa.

Tim: Nĩ mũvea. O na weeka nesa kũka ũmũnthĩ nũndũ ve ũndũ ngwendaa kũũkũlya.

Anthony: Nĩ sawa. No ũngũlye.

Tim: Yu-ĩ, ĩso nĩnaneenaa na mũndũ tũthũkũmaa ĩmwe. Na ĩndĩ namũtavya ĩũlũ wa tũla tũvuku ũnanengie, na ũndũ nonete twĩ tũseo. Ĩla nĩnamũtavisye ĩũlũ watw’o, anambĩie ndikambĩle kũtũsoma nũndũ Ngũsĩ sya Yeova iiĩkĩĩaa Yesũ. Ndeto isu nĩ sya w’o? Nĩnamwĩie ndilea kũũkũlya wooka.

Anthony: Weeka nesa kũngũlya, vandũ va kũkũlya mũndũ ũngĩ ũte Ngũsĩ. Ĩsu nĩyo nzĩa ĩla nzeo ũtonya kũatĩĩa wenda kũmanya kĩla mũndũ ũĩkĩĩaa. Ti w’o?

Tim: Ĩĩ, na nĩkyo kĩtumi nĩnavangie no uwe ngakũlya.

Anthony: Ũw’o nĩ kana Ngũsĩ sya Yeova niĩkĩĩaa Yesũ vyũ. Tũĩkĩĩa kana no nginya mũndũ amũĩkĩĩe Yesũ nĩ kenda etangĩĩwa.

Tim: O nakwa no nĩneesĩ ũu ĩndĩ ĩla mũndũ ũsu ũnambĩie kana mũiĩkĩĩaa Yesũ, nĩw’o nĩnakwatiwe nĩ nzika. Ti ta twaaneenea ũndũ ũsu ĩngĩ nĩ naku.

Anthony: Wĩona ata ngakwony’a mĩsoa yĩ Mbivilianĩ ĩla ĩkwonany’a vata wa kũmũĩkĩĩa Yesũ? Nĩ mĩsoa ĩtũmĩawa mũno nĩ Ngũsĩ sya Yeova ĩla iũtavany’a.

Tim: Nĩ sawa no ũmbony’e.

Anthony: Eka ĩndĩ twambĩĩe na ndeto ii sya Yesũ syĩ ĩandĩkonĩ ya Yoana 14:6. Vaa Yesũ aneenaa na ũmwe wa atũmwa make. Vaĩtye atĩĩ: “Yesũ amwĩa, Nyie ninyie nzĩa, na ninyie w’o, na ninyie thayũ: vai mũndũ wũkaa kwa Asa, atesĩle kwakwa.” Kwosana na mũsoa ũsu, twaĩle kwĩsĩla vala ve ũũ e weka nĩ kana tũvikĩe Asa?

Tim: Vala ve Yesũ.

Anthony: Nĩ w’o, na nĩkyo kĩtumi Ngũsĩ sya Yeova syĩĩkĩĩaa ũu vyũ. Eka ngũkũlye ĩkũlyo yĩngĩ: Kwosana na ũndũ wĩsĩ, ĩla mũndũ ũkũvoya aĩle kũvoya ĩsyĩtwanĩ yaũ?

Tim: Ĩsyĩtwanĩ ya Yesũ.

Anthony: Wasũngĩa nesa. Na nĩkyo kĩtumi kĩla ĩvinda nĩvoyaa ĩsyĩtwanĩ ya Yesũ. O na Ngũsĩ sya Yeova syonthe ivoyaa ĩsyĩtwanĩ ya Yesũ.

Tim: Nĩnatana kũmanya ũu.

Anthony: Ĩandĩko yĩngĩ ngwenda tũsome nĩ Yoana 3:16. Mũsoa ũsu nĩ wa vata mũno nginya andũ amwe maasya no ũndũ ũmwe na mavuku monthe ma ũvoo mũseo me vamwe. Ũu nĩ kwasya kana, maũndũ ala onthe maandĩkiwe ĩũlũ wa Yesũ na ũthũkũmi wake ĩla waĩ kũũ nthĩ, nĩmatonya kũelew’a nĩ mũsoa ũsu ũmwe. Nĩĩkwatya no wende kũsoma ĩandĩko yĩu.

Tim: Nĩ sawa. Yaĩtye ũũ: “Nũndũ Ngai nĩwendete nthĩ, nĩwanenganie Mwana wake e ũmwe, nĩ kana o ũla ũmwĩtĩkĩlaa ndakae, ĩndĩ ethĩwe na thayũ ũtathela.”

Anthony: Nĩ mũvea mũno. We tyo ũtũaa wĩsĩ ĩandĩko yĩu?

Tim: Ĩĩ, nĩnĩw’ĩte mavinda maingĩ mũno yĩisomwa ĩkanisanĩ.

Anthony: Nĩ ĩandĩko yĩsĩkĩe mũno. Wasisya ĩandĩko yĩu nesa nũkwona ũndũ Yesũ waisye. Aisye kana andũ makakwata thayũ ũtathela nũndũ Ngai nũmendete. Ĩndĩ asyokie asya no nginya meke ata?

Tim: Methĩwe na mũĩkĩĩo.

Anthony: Nĩ w’o. Twaĩle kwĩthĩwa na mũĩkĩĩo nthĩnĩ wa Yesũ Klĩsto, Mwana wa Ngai. Ũndũ ũsu wa kana no nginya andũ methĩwe na mũĩkĩĩo nthĩnĩ wa Yesũ nĩ kenda makwate thayũ ũtathela nũwetetwe ĩthangũnĩ ya 2 ya ĩkaseti yĩĩ ya Mũsyaĩĩsya nakũetee. Yĩeleetye kĩeleelo kyayo yĩkasya kana “yĩkĩaa andũ vinya mamũĩkĩĩe Yesũ Klĩsto ũla wakwie nĩ kana tũkwate thayũ ũtathela, na ũla yu nĩ Mũsumbĩ wa Ũsumbĩ wa Ngai.”

Tim: Waneena w’o. Makaseti menyu monanĩtye nesa vyũ kana Ngũsĩ sya Yeova niĩkĩĩa Yesũ.

Anthony: Ĩĩ nĩ w’o.

Tim: Na nĩkĩ andũ maasya kana mũiĩkĩĩaa Yesũ?

Anthony: Nĩvatonya kwĩthĩwa itumi kauta. Andũ amwe nĩmatonya kwĩthĩwa meewie ũu kuma kwa andũ angĩ. Namo angĩ nĩmatonya kwĩthĩwa mamanyĩiw’e maũndũ asu mate ma w’o nĩ atongoi ma ndĩni.

Tim: O na angĩ nĩmatonya kwĩthĩwa maasya kana mũiĩkĩĩaa Yesũ nũndũ mwĩyĩtaa Ngũsĩ sya Yeova, vandũ va kwĩyĩta Ngũsĩ sya Yesũ.

Anthony: Ĩĩ, kĩu nĩkĩtonya kwĩthĩwa kĩ kĩtumi kĩngĩ.

Tim: Na nĩkĩ mũtindĩaa kũneena ĩũlũ wa Yeova?

“NĨNĨMAMANYĨTHĨTYE SYĨTWA YAKU”

Anthony: Ũndũ wa mbee tũĩkĩĩaa kana nĩ ũndũ wa vata kũtũmĩa ĩsyĩtwa ya Ngai, Yeova, o tondũ Mwana wake, Yesũ, wayĩtũmĩaa. Kwasũanĩa ĩũlũ wa ndeto ila Yesũ waneenie ĩla wavoyaa Ĩthe wake. Ndeto isu syĩ ĩandĩkonĩ ya Yoana 17:26. No wende kũsoma ĩandĩko yĩu?

Tim: Ĩĩ, no nende. Yaĩtye atĩĩ: “Nĩnĩmamanyĩthĩtye syĩtwa yaku, na ngatũma yĩmanyĩka; nĩ kana wendo ũla ũmbendete naw’o wĩthĩwe nthĩnĩ woo, nakwa nĩthĩwe nĩ nthĩnĩ woo.”

Anthony: Nĩ mũvea. Ĩandĩkonĩ yĩu Yesũ aisye nĩwamanyĩthĩtye andũ ĩsyĩtwa ya Ngai. We wĩona nĩkĩ weekie ũu?

Tim: Mwa nyie ndyĩsĩ nesa.

Anthony: No tũsome ĩandĩko yĩngĩ yĩtũtetheesye kũelewa ũndũ ũsu nesa. Nĩenda tũsome Yoeli 2:32. Ndeto sya mbee sya ĩandĩko yĩu syaĩtye atĩĩ: “Na kũkeethĩwa, o ũla ũkekaĩla syĩtwa ya Yeova nũkatangĩĩwa.” Nĩĩkwatya yu nũkwĩtĩkĩla kana ethĩwa nĩ ũndũ wa vata mũno mũndũ ekaĩle ĩsyĩtwa ya Yeova nĩ kana etangĩĩwa, vate nzika o nake Yesũ nĩweesĩ ũu.

Tim: Ĩĩ, nĩngwĩtĩkĩla vyũ.

Anthony: Nĩkyo kĩtumi Yesũ woonie wĩ ũndũ wa vata mũno amanyĩw’a make mamanye, na maitũmĩa ĩsyĩtwa yĩu nĩ kana metangĩĩwa. Na ũsu nĩ ũndũ ũmwe ũtumaa tũneena ĩũlũ wa Yeova mũno. Twonaa wĩ ũndũ wa vata tũtetheesye andũ mamanye ĩsyĩtwa ya Ngai na maiyĩkaĩla.

Tim: Ĩndĩ o na ethĩwa andũ mayĩsĩ ĩsyĩtwa ya Ngai na maiyĩtũmĩaa, nĩmethĩawa mesĩ meneena ĩũlũ waũ ĩla meũweta Ngai.

Anthony: Ũu nũtonya kwĩthĩwa ne w’o. Ĩndĩ lilikana kana Ngai atũtavisye ĩsyĩtwa yake nĩ kana wĩthĩwe wĩ ũndũ wĩ laisi kũmũthengeea.

Tim: Ũu nĩ kwasya ata?

Anthony: Kwasũanĩa ngelekany’o ĩno: Vayaĩ vata wa kũmanya ĩsyĩtwa ya Mose. Twaĩle kwĩthĩwa tũmwĩsĩ o ta ũla mũndũ waanisye Ũkanga Mũtune, kana ũla wanengiwe ĩla Mĩao Ĩkũmi. Nao vaĩ vata wa kũmanya ĩsyĩtwa ya Noa? Twaĩle kwĩthĩwa o tũmwĩsĩ ta ũla mũndũ waakie ngalawa na oovosya andũ make na nyamũ. O ta ũu, Yesũ Klĩsto o nake aĩle kwĩthĩwa esĩkĩe o ta mũndũ waumie ĩtunĩ na akw’a kwondũ wa naĩ sitũ. Ti w’o?

Tim: Nĩona ũu nĩ w’o.

Anthony: Ĩndĩ Ngai nĩwaĩkĩĩthisye kana nĩtwamanya masyĩtwa ma andũ asu. Vai kĩndũ kĩtumaa ũvoo wendeesya ũu ta kũmanya masyĩtwa ma ala mawetetwe nthĩnĩ wa ũvoo ũsu. O na kau tũyaaona Mose, Noa, kana Yesũ, kũmanya masyĩtwa moo nĩkũtumaa tũĩkĩĩa kana mo maĩ kw’o.

Tim: Ndyaasũanĩa ũu, ĩndĩ nĩ ũndũ ũkwosana na kĩlĩko.

Anthony: Ũsu nũndũ ũngĩ ũtumaa Ngũsĩ sya Yeova itũmĩa ĩsyĩtwa ya Ngai mũno. Twĩthĩawa tũyenda andũ maĩkĩĩe kana Yeova Ngai e kw’o, na kana no methĩwe na ũnyanya mũseo vamwe nake. O na ĩngĩ nĩtwendaa andũ mamanye kana Yesũ e na kĩanda nthĩnĩ wa kũtangĩĩwa kwitũ. No tũsome ĩandĩko yĩngĩ yĩmwe nĩ kana tũelewe ũndũ ũsu nesa.

Tim: Nĩ sawa.

Anthony: Mwambĩĩonĩ nĩtũsomie ĩandĩko ya Yoana 14:6. Lilikana Yesũ aisye atĩĩ: “Ninyie nzĩa, na ninyie w’o, na ninyie thayũ.” Yu twĩsoma ĩandĩko ya Yoana 14:1. No wende kũsoma ũndũ Yesũ waisye mũthyanĩ wa mũsoa ũsu?

Tim: Nĩ sawa. Veasya ũũ: “Mũĩkĩĩei Ngai, na mũindĩkĩĩa nyie.”

Anthony: Nĩ mũvea. We ũtonya kwasya ata, nĩ kana twĩthĩwe na mũĩkĩĩo wa w’o, we wĩona kana twaĩle kwĩnyuvĩa o ũla tũkwenda kũĩkĩĩa katĩ wa Ngai na Yesũ?

Tim: Aiee. Yesũ aisye twaĩle kũmaĩkĩĩa onthe.

Anthony: Ũu nĩ w’o. Ĩndĩ nĩĩkwatya nũkwĩtĩkĩla kana kwĩthĩwa na mũĩkĩĩo nthĩnĩ wa Ngai na Yesũ ti o kũneena tũ. Twaĩle kwĩthĩwa na mwĩkalo ũkwonany’a kana nĩtũmũĩkĩĩte Ngai na Yesũ.

Tim: Ĩĩ, vaĩle kwĩthĩwa vailyĩ ũu.

Anthony: Ĩndĩ mũndũ atonya kwonany’a ata kana e na mũĩkĩĩo nthĩnĩ wa Ngai na nthĩnĩ wa Yesũ? Tũkaneenea ĩkũlyo yĩu ĩvinda yĩla yĩngĩ.a

Tim: No nendeew’e nĩ ũndũ ũsu.