Yesũ Nĩwaendeee Kwongeleka, Ĩndĩ Yoana Aendeee Kũoleka

Ĩtina wa kũtanĩa Vasaka ya mwaka wa 30, Yesũ na amanyĩwʼa make nĩmaumie Yelusaleme. Ĩndĩ vandũ va kũsyoka ĩmwe kwa ĩmwe kwoo Kalilii, maendie nthĩ ya Yutia, vala mavatisie andũ aingĩ. O nake Yoana Mũvatisi aĩ atethetye wĩa ũsu wa kũvatisa andũ kwa ĩvinda ya mwaka ta ũmwe, na nĩvatonyeka amanyĩwʼa amwe make makethĩwa maĩ o nake Ũsĩnĩ wa Yolotani.

Yesũ ndavatisaa andũ, ĩndĩ eeĩaĩe amanyĩwʼa make mavatisane. Ĩvindanĩ yĩu, Yesũ na Yoana nĩmamanyĩasya Ayuti ala meelilĩte nũndũ wa kũlea kwĩanĩsya ũtianĩo wa Mĩao.—Meko ma Atũmwa 19:4.

Ĩndĩ amanyĩwʼa ma Yoana nĩmamwĩwʼĩaa Yesũ kĩwĩu, na kwoou mamwĩie Yoana atĩĩ: “Mũndũ [Yesũ] ũla ũnaĩ nake . . . nũkũvatisa, na andũ onthe maendeee kũthi vala ũĩ.” (Yoana 3:26) Ĩndĩ vandũ va Yoana kwĩwʼĩa Yesũ kĩwĩu, nĩwatanie kwona Yesũ aendeee nesa wĩanĩ wake, na endaa o namo amanyĩwʼa make matane vandũ va kwĩwʼa kĩwĩu. Yoana amalilikanilye atĩĩ: “Inywʼĩ ene nĩmũũkũsĩĩa kana naisye, ‘Tinyie Klĩsto, ĩndĩ nĩtũmĩtwe nũke mbee wake.’” Aeleisye ũndũ ũsu kwa kũtũmĩa ngelekanyʼo onthe maĩ matonya kũelewa nesa. Aisye atĩĩ: “Mũndũ o na wĩva ũla wĩ na mũtwawa nĩwe mũtwaani. Ĩndĩ yĩla mũnyanyae wa mũtwaani waũngama na amwĩwʼa aineena, ethĩawa na ũtanu mwingĩ nũndũ wa wasya wa mũtwaani. Kwoou ũtanu wakwa nĩwusũĩte.”—Yoana 3:28, 29.

O tondũ mũnyanyae wa mũtwaani ũtanaa, Yoana nĩwatanie mũno yĩla watavisye amanyĩwʼa make ĩũlũ wa Yesũ myei mĩvũthũ yaĩ ĩnavĩta. Amwe ma amanyĩwʼa make nĩmamũatĩĩie Yesũ na ĩtina wa ĩvinda nĩmesaa kwĩtĩkĩwʼa mauta kwĩsĩla veva mũtheu. O na Yoana nĩwendaa amanyĩwʼa ala watiele namo mamũatĩĩe Yesũ. Kĩeleelo kya Yoana kyaĩ kũseũvya nzĩa kwondũ wa wĩa wa Klĩsto wa kũtavanyʼa. Yoana aielesya ũndũ ũsu aisye atĩĩ: “Ũsu eendeea kwongeleka, ĩndĩ nyie nĩendeea kũoleka.”—Yoana 3:30.

Nake Yoana, ũla wesie kũtwʼĩka mũmanyĩwʼa wa Yesũ, ayĩandĩka ĩũlũ wa vala Yesũ waumĩte na ũndũ wesaa kũtuma andũ matangĩĩwa aisye atĩĩ: “Ũla wumĩte ĩũlũ e ĩũlũ wa ala angĩ onthe. . . . Asa nũmwendete Mwana na nũmũnengete syĩndũ syonthe. Ũla ũmũĩkĩĩaa Mwana e na thayũ wa tene na tene; ũla ũtamwĩwʼaa Mwana ndakona thayũ, ĩndĩ ũthilĩku wa Ngai ũtũaa ĩũlũ wake.” (Yoana 3:31, 35, 36) Ũsu nĩ ũwʼo wa vata mũno andũ onthe maĩle kũmanya!

Kavinda kanini ĩtina wa Yoana Mũvatisi kũelesya kana no nginya wĩa wake ũoleke, nĩwakwatiwe nĩ Mũsumbĩ Elote. Elote oosete kĩveti kya mwana-a-ĩthe wake Vilivu, kĩla kyeetawa Elotia, kĩkatwʼĩka kĩveti kyake. Nũndũ wa ũu, Yoana nĩwawetie ũtheinĩ kana ũsu waĩ ũlaalai, na kwoou Elote amwĩkya kolokolonĩ. Yĩla Yesũ weewie kana Yoana nũnakwatiwe, nĩwaumie Yutia, na “aenda Kalilii” e na amanyĩwʼa make.—Mathayo 4:12; Maliko 1:14.