ĨSOMO YA 8

Ngelekanyʼo Itonya Kũmanyĩsya Nesa

Mathayo 13:34, 35

KWA ŨKUVĨ: Manyĩsya nesa kwa kũtũmĩa ngelekanyʼo syĩ laisi, itonya kwendeesya ethukĩĩsya maku na itonya kũmatetheesya maelewe maũndũ ala ma vata.

Tũmĩa ngelekanyʼo syĩ laisi. O ta Yesũ, tũmĩa ngelekanyʼo syĩ laisi kũelesya maũndũ me vinya kũeleeka. Ndũkongeleele mautĩĩo matonya kũtuma ngelekanyʼo yaku yĩthĩwa yĩ vinya kũeleeka. Eka maũndũ ala ũũweta ngelekanyʼonĩ yaku methĩwe mosanĩte na kĩla ũũmanyĩsya, nĩ kana ilĩko sya ethukĩĩsya maku iikelelũke moona maũndũ ala ũũneena matekwosana.

Ĩkalaa wĩ metho. Siasya maũndũ ala makũthyũlũlũkĩte, soma mavuku ma Kĩklĩsto, na ũyĩthukĩĩasya amanyĩsya ala aseo. Ũyĩka maũndũ asu siasya kana no wone ngelekanyʼo ila itonya kũũtetheesya ũmanyĩsye nesa. Tata wie ngelekanyʼo isu nesa.
Sũanĩa ethukĩĩsya maku. Nyuva ngelekanyʼo ikwonanyʼa maũndũ ala ethukĩĩsya maku mekaa na maũndũ ala mamendeeasya. Ĩthĩwa wĩ metho nĩ kana ngelekanyʼo ila ũũtũmĩa iikese kũtuma ethukĩĩsya maku mewʼa nthoni kana mathata.
Kindĩlĩĩla ũndũ ũla wa vata. Yĩla ũũtũmĩa ngelekanyʼo, neenea maũndũ ala manene na ti o tũmaũndũ tũla tũnini. Tetheesya ethukĩĩsya maku methĩwe matonya kũlilikana ngelekanyʼo ĩla watũmĩa vamwe na ũndũ ũla mekwĩmanyĩsya kumana nayo.