Ũvoo Mũseo Kwondũ wa Andũ Onthe

Kũthayũũkwʼa kwa Yesũ nĩkwatumie amanyĩwʼa make methĩwa na ũkũmbaũ na kĩthito. Kwa ngelekanyʼo, mũtũmwa Vaulo nĩwaendaa kũndũ ta Asia na Menditelenia, akyambĩĩsya ikundi kwondũ wa kũthaitha Ngai. O na ĩngĩ nĩwaendaa kũu nĩ kana alũlũmĩĩlye Aklĩsto maendee kwĩthĩwa me aĩkĩĩku nũndũ nĩmatatawa methĩwe na mwĩkalo mũthũku, na nĩmavĩngawa na kũthĩnwʼa. O na kau kwaĩ mathĩna maingĩ ta asu, andũ aingĩ nĩmatwʼĩkie Aklĩsto.

Vaulo nĩwesie kwĩkwʼa kolokolonĩ. Ĩndĩ o na e mwove, nĩwaandĩkĩaa Aklĩsto mavalũa nĩ kana amekĩe vinya na aimanenga ũtao. Nĩwaumisye ũkanyʼo kana kũkaumĩla andũ makakaĩa ũla mũĩkĩĩo. O na nĩwaveveewe nĩ veva mũtheu kwathana kana kũkaumĩla andũ mailyĩ ta “nzũi mbai” ala makaneena “ndeto sya ngũlũ,” na mailika katĩ wa Aklĩsto nĩ kana ‘makusye amanyĩwʼa mamaatĩĩe mo.’—Meko ma Atũmwa 20:29, 30.

Ĩla atũmwa maĩ vakuvĩ kũthela, andũ ta asu nĩmambĩĩie kumĩla. Ĩvindanĩ yĩu Yesũ aĩ ĩtunĩ na nĩwamũvuanĩisye mũtũmwa Yoana ĩũlũ wa ĩvinda yũkĩte, nake Yoana aandĩka maũndũ asu nthĩnĩ wa ĩvuku yĩtawa Ũvuanʼyo. Na o tondũ Yoana waandĩkie, vai mũndũ waĩ atonya kũsiĩĩa Ngai aianĩsya kĩeleelo kyake kwelekela nthĩ na andũ. O na alei na alimũ ma ũvũngũ mayaĩ matonya. Yaĩ no nginya andũ ma “kĩla mũthemba na mbaĩ na kĩthyomo na ũko wa andũ” mewʼe ũvoo mũseo ĩũlũ wa Ũsumbĩ wa Ngai. (Ũvuanʼyo 14:6) Na no nginya nthĩ yĩĩkala o tondũ mũũnda wa Eteni wailyĩ, na vai nzika kana ala mekaa kwenda kwa Ngai makekala vo!

We nũkwona ũsu ta “ũvoo mũseo” kwaku? Ethĩwa nũkwona ũu, ĩmanyĩsye vyũ ũvoo ũla Ngai waandĩkĩe andũ Mbivilianĩ na ũimanya ũndũ ũvoo ũsu ũtonya kũũtethya ũmũnthĩ na ĩvinda yĩla yũkĩte.

No wĩsomee Mbivilia kĩsesenĩ kya Indaneti kya www.jw.orgkwa ithyomo vakuvĩ 50. Kĩsesenĩ kĩu nũtonya kũsoma kavuku ketawa Ũvoo Mũseo Kuma kwa Ngai! na kangĩ ketawa Biblia—Ina Ujumbe Gani? vamwe na ĩvuku Mbivilia Yo Ĩmanyĩasya Ata? na mavuku angĩ ta asu. Mavuku asu onthe matũnengete ĩtumi sya kũĩkĩĩa Mbivilia, na makatũtavya ũndũ ũtao wayo ũtonya kũtũtethya vamwe na mĩsyĩ yitũ. O na wenda kũmanya maũndũ maingangĩ no ũneene na Ngũsĩ sya Yeova.

​—Ũvoo ũũ wumĩtwʼe ĩvukunĩ ya Meko ma Atũmwa, Aeveso, Avilivi, Akolosai, Vilemona, 1 Yoana, Ũvuanʼyo.