Nĩkĩ Ũla Mũthĩnzĩo Mũnene wa Ngai Nĩ wa Vata Mũno?

NŨŨ WANENGANE MŨTHĨNZĨO ŨSU?

Mĩthĩnzĩo ĩmwe yĩthĩawa yĩ ya vata mũno nũndũ ĩnenganĩtwe nĩ mũndũ wĩ na ũkũmũ kana tũnengete ndaĩa. Nayo ĩngĩ, o na kau no yĩthĩwe yĩ o ya thooa mũnini, nĩyĩthĩawa yĩ ya vata kwitũ nũndũ twĩthĩawa tũnengetwe nĩ andũ ma mũsyĩ ala twendete, kana anyanya tũmaĩkĩĩe. Ngelekanyʼo ya mũthĩnzĩo ta ũsu nĩ ũla Jordan wanengiwe nĩ Russell, o tondũ twoona kĩlungunĩ kĩvĩtu. Ĩndĩ kĩu kĩkonanĩtye ata na mũthĩnzĩo wa nthembo ya wovosyo?

Ũndũ wa mbee, Mbivilia yaĩtye kana ‘Ngai nĩwamũtũmie Mwana wake kũũ nthĩ, ũla wasyaiwe e ũmwe, nĩ kana twĩthĩwe na thayũ kwondũ wake.’ (1 Yoana 4:9) Kĩu nĩkĩtumaa mũthĩnzĩo ũsu wĩthĩwa wĩ wa vata mũno. Vai kĩndũ kana mũndũ wĩ ũtonyi na ũkũmũ ta Ngai. Mũandĩki ũmwe wa savuli waĩ Mũevelania aisye ũũ ĩũlũ wa Ngai: “No we wĩ weka, syĩtwa yaku nĩ Yeova, Nue Wĩ Ĩũlũ wa Onthe ĩũlũ wa nthĩ yonthe.” (Savuli 83:18) Kwoou nũndũ Ngai nĩwe wĩ ĩũlũ wa onthe, vai mũndũ ũngĩ waĩ atonya kũtũnenga mũthĩnzĩo wa vata kwĩ ũsu watũnengie.

Ũndũ wa kelĩ, Ngai nĩwe “Asa waitũ.” (Isaia 63:16) Ũu ũtonyeka ata? Ngai nĩwe ũtũnengete thayũ. O na nũtũsũvĩaa vyũ o tondũ ĩthe wĩ wendo ũsũvĩaa syana syake. Ngai aiweta ĩũlũ wa athaithi amwe make ma tene akũlilye atĩĩ: “Evalaimu nĩ mwana wakwa mwendwa? nĩ mwana wendeeasya? . . . ngoo yakwa yĩ na mea nake: nditĩa kũmwĩwʼĩa tei.” (Yelemia 31:20) Ũu nowʼo Ngai wĩwʼaa ĩũlũ wa athũkũmi make ũmũnthĩ. We nĩ Mũmbi witũ mwene vinya wʼonthe, o na ĩngĩ nĩwe Ĩthe na Mũnyanya witũ. Kũmanya ũu no kũtume twendeewʼa mũno nĩ mũthĩnzĩo o na wĩva kuma kwake!

NĨKĨ MŨTHĨNZĨO ŨSU WANENGANWE?

Mĩthĩnzĩo ĩmwe yĩthĩawa yĩ ya vata nũndũ ũla wamĩnengane ekaa ũu nũndũ nĩwendete ala angĩ kuma ngoonĩ, ĩndĩ ti aĩ nũndũ nĩ kĩndũ waĩle kwĩanĩsya. Mũndũ ũla wanengane mũthĩnzĩo kuma ngoonĩ ndethĩawa eteele kũĩvwa.

Ngai anenganie Mwana wake kwondũ witũ nũndũ nĩwatwendete. Mbivilia yaĩtye atĩĩ: ‘Ũndũnĩ ũũ wendo wa Ngai nĩwonanĩtwʼe kwitũ, nũndũ Ngai nĩwamũtũmie Mwana wake kũũ nthĩ, ũla wasyaiwe e ũmwe.’ Nĩkĩ Ngai weekie ũu? “Nĩ kana twĩthĩwe na thayũ kwondũ wake.” (1 Yoana 4:9) Yaĩ no nginya Ngai eke ũu? Aiee. Nthembo ya ‘wovosyo’ ya Yesũ Klĩsto nĩ wonanyʼo wa ‘mumo’ kana ũseo ũtathimĩka wa Ngai.—Alomi 3:24.

Nĩkĩ tũtonya kwasya kana mũthĩnzĩo wa Ngai nĩ wonanyʼo wa “mumo” wake? Mbivilia ĩeleetye ũndũ ũsu kwa kwasya atĩĩ: “Ngai nĩwonanisye wendo wake mwene kwitũ, atĩ yĩla twaĩ athe, Klĩsto akwʼa kwondũ witũ.” (Alomi 5:8) Wendo mwingĩ wa Ngai nĩwʼo watumie osa ĩtambya nĩ kana atetheesye andũ me na naĩ, na matesa kwĩtethya. Vai ũndũ twaaĩka waaĩle kũtuma Ngai atwonyʼa wendo ũsu, na vai ũndũ twĩsa kwĩka tũkamũĩva. Vai wendo waaonanwʼa ũvĩtũkĩte ũla Ngai watwonisye ĩla watũnengie mũthĩnzĩo wa wovosyo.

NĨ KYAŨ MŨNDŨ WEEYĨIMA NĨ KANA ANENGANE MŨTHĨNZĨO ŨSU?

Mĩthĩnzĩo ĩmwe yĩthĩawa yĩ ya vata mũno nũndũ ũla wamĩnengane ethĩawa eyĩimĩte maũndũ maingĩ. Ĩla mũndũ weevata kĩndũ wendete vyũ na aitũnenga ta mũthĩnzĩo, tũkyonaa kĩ kya vata mũno nũndũ wa kwĩyumya kwake.

Mbivilia yaĩtye kana Ngai ‘nĩwanenganie Mwana wake e ũmwe.’ (Yoana 3:16) Ngai aumisye Mwana wake ũla wamwendete mũno. Myakanĩ mingĩ ĩla Ngai woombaa syĩndũ ila syĩ matunĩ na kũũ nthĩ, Yesũ nĩwatetheanĩisye nake na kwoou eethĩwa e “ũtanu wake.” (Nthimo 8:30) Yesũ nĩ ‘Mwana mwendwa’ wa Ngai na nĩwe “mũvwʼano wa Ngai ũtonekaa.” (Akolosai 1:13-15) Vaiĩ andũ matonya kwĩthĩwa na ngwatanĩo ndũmu kũvĩtũka ĩla yaĩ na Ngai na Mwana wake, Yesũ.

Ĩndĩ o na vailyĩ ũu, Ngai ‘ndaamwĩwʼĩa tei Mwana wake mwene.’ (Alomi 8:32) Yeova aumisye mũndũ ũla wendete vyũ kwondũ witũ. Ũsu nĩwʼo mũthĩnzĩo wa thooa mũnene vyũ ũla Ngai wanengie andũ.

MŨTHĨNZĨO ŨTONYA KWĨANĨSYA VATA MŨNENE VYŨ

Mĩthĩnzĩo ĩmwe yĩthĩawa yĩ ya vata mũno nũndũ nĩyĩanĩasya vata mũnene ũkwendaa kũthĩnĩkĩwa na mĩtũkĩ. Kwa ngelekanyʼo, ũtonya kwĩwʼa ata mũndũ akeyumya akũĩvĩe mbesa ũteĩ wĩsa kũkwata nĩ kana ũiitwe ũwau mũthũku ũtonya ũkũaa? Vate nzika ũsu wĩthĩwa wĩ mũthĩnzĩo wa vata mũno, kana ti wʼo?

Mbivilia yaĩtye atĩĩ: ‘O ũndũ onthe makusaa nthĩnĩ wa Atamu, o ta ũu nthĩnĩ wa Klĩsto onthe makeethĩwa thayũ.’ (1 Akolintho 15:22) Nũndũ twĩ ũsyao wa Atamu, ithyonthe ‘nĩtũkusaa,’ na tũyĩsa kwĩvathana na woo ũla ũetawe nĩ mowau na kĩkwʼũ, kana kwĩyĩwʼanĩthya na Ngai nĩ kana twĩthĩwe tũte na naĩ. Twĩ andũ, tũitonya kũvonokya “thayũ” witũ kana wa andũ angĩ. Mbivilia yaĩtye: “Vai ũmwe wamo ũtonya kwovosya mwana-a-inya wake kwa ũndũ o na wĩva, kana kũmũnenga Ngai mbovosya kwondũ wake . . . Ndũĩvĩka tene na tene.” (Savuli 49:7, 8) Vate nzika, twĩ na vata mũnene wa kũtetheewʼa nũndũ tũyĩsa kwĩyovosya. Ngai akaema kũtũtethya, tũyĩsa kwĩthĩwa na wĩkwatyo.

Nũndũ Yeova nũtwendete mũno, nĩweeyumisye atũĩvĩa kĩla kyendekaa nĩ kana atangĩĩe thayũ witũ, na kwoou kwĩsĩla vala ve Yesũ “onthe makeethĩwa thayũ.” Nthembo ya wovosyo yĩanĩasya ũndũ ũsu ata? Mbivilia yaĩtye atĩĩ: “Nthakame ya Yesũ Mwana wake nĩtũtheasya naĩ syonthe.” Kwoou kwĩthĩwa na mũĩkĩĩo nthĩnĩ wa nthakame ya Yesũ ĩla yetĩkiwʼe nĩkũtumaa twĩthĩwa tũtonya kũekewa naĩ sitũ na kũkwata thayũ ũtathela. (1 Yoana 1:7; 5:13) Namo endwa maitũ ala makwie makatethwʼa ata nĩ nthembo ya wovosyo? Mbivilia ĩsũngĩĩte atĩĩ: “Nĩkwĩthĩwa kĩkwʼũ nĩkyookie kwondũ wa mũndũ, kũthayũũka kwa akwʼũ nakwʼo nĩkwookie kwondũ wa mũndũ [Yesũ].”—1 Akolintho 15:21.a

Vai mũthĩnzĩo ũngĩ twaakwata kuma kwa mũndũ wĩ na ũkũmũ mũnene kana wĩ na wendo mwingĩ ta ũla mũthĩnzĩo wa nthembo ya wovosyo ya Yesũ. Vai mũndũ waatũnenga kĩndũ kĩnene ta kĩla Yeova Ngai watũnengie. Na vai mũthĩnzĩo wĩanĩasya vata mũnene ta nthembo ya wovosyo ĩla ĩtũthaasya kuma ũkombonĩ wa naĩ na kĩkwʼũ. Vate nzika, vai mũthĩnzĩo ũtonya kũthengeea ũla mũthĩnzĩo ũtaweteka wa nthembo ya wovosyo.