Novembre

Ðɩtɩtɩlɩ tɔm tɩŋa pɩlɩɩnɩ wɛtʋ ndʋ tɩ-taa Yoonaa kaawɛɛ yɔ; pʋyɔɔ lɛ, ɖɩpɩzɩɣ nɛ ɖɩmaɣzɩ se ɛɛkɛ weyi paapɩzɩɣ nɛ pataa-ɩ liu yɔ, nɛ halɩ ɛtaawɛɛ siɣsiɣ. Yehowa ɖʋ-ɩ paɣtʋ kpayɩ se esusi nɩŋgbaŋʋʋ hɔm tɔm Niniivi tɛtʋ taa. Ɛlɛ mbʋ ɛzɩ Yoonaa kaañam Yehowa lɛ, ɛsʋʋ mɛlɛ ŋgʋ kɩkpakaɣ nʋmɔʋ tuluŋa yɔ se ‘eposini Yehowa.’ (Yon. 1:1-3) Ye pɩɩkɛ ña, ŋŋɖaɣnɩ haʋ Yoonaa waɖɛ lɛɛɖɛ se ɛla tʋmɩyɛ nɖɩ? Pɩtɩla ŋŋlakɩ mbʋ. Ɛlɛ Yehowa maɣzaa se pɩpɔzʋʋ se ɛha Yoonaa waɖɛ lɛɛɖɛ. (Yon. 3:1, 2) Yoonaa lɩzɩ ɛyʋ weyi ɛkɛnɩ ɖeyi ɖeyi yɔ nɛ ɛwɩlɩ ɛ-adɩma taa. (Yon. 2:2, 3, 10) Pɩtʋʋ fɛyɩ se Yoonaa kaatɩmnɩ Yehowa tam sakɩyɛ. Adɩma wena ɛlaba alɩwaatʋ ndʋ ɛɛwɛ kpakpayaɣ lotu taa yɔ, asɩɣnɩ-ɖʋ se ɖɩtɩlɩ se ɛtɩkɛ abalʋ weyi paɖʋ-ɩ tʋmɩyɛ naɖɩyɛ nɛ ese-ɖɩ yɔ yem. Tɔm ndʋ ɛyɔɔdaa yɔ, tɩwɩlɩɣ se ɛɛkɛ weyi eluzuu ɛ-tɩ yɔ, weyi ɛwɛnɩ ɛsɩmɩyɛ yɔ, nɛ ɛɛtɛm ɛ-taa se ɛñaŋ Yehowa. Pʋyɔɔ lɛ, pɩɩɖɩɣzɩɣ-ɖʋ se Yehowa taaka ɛ-lɩmaɣza Yoonaa ɛjandʋ yɔɔ. Ɛlɛ Yehowa cosi Yoonaa adɩma yɔɔ nɛ ewolo pɩ-yɔɔ nɛ ɛlabɩnɩ-ɩ tʋmɩyɛ ɛzɩ nayʋ yɔ! Ye mbʋ pɩcɛyɩ siŋŋ se paa ɛzʋtʋyʋ weyi lɛ, ‘ewelisi’ tɔm tɩŋa pʋcɔ nɛ ɛtasɩ lɔŋ. w20.04 15 § 4-6

Kajalaɣ pɩnzɩ mɩnʋʋ taa tɔmkpɛlɩkɩyaa kaatisaa nɛ pamʋ Krɩstʋ ñɩma wɩlɩtʋ, nɛ peyekaɣ se fezuu kiɖeɖeu ɛsɩnɩ-wɛ nɛ panɩɩ Ɛsɔtɔm taa. Pañɩnaa se pɩsa nɛ pa-taa tɛ se wɩlɩtʋ ndʋ tɩlɩnɩ Masɩ taa. (Tʋma 17:11, 12; Ebr. 5:14) Pɩtɩkɛ ɛzɩma pɩlakaɣ-wɛ yɔ nɛ ndʋ pamaɣzaɣ yɔ pi-ɖeke pɩɩsɩnɩnɩ-wɛ nɛ pɛwɛɛnɩ tisuu. Nɛ pataasɛɣ Yehowa yem mbʋ pʋyɔɔ yɔ pa nɛ po-koobiya pekpeɣliɣ lɛ, pɩhaɣ-wɛ taa leleŋ. Ɛlɛ “Ɛsɔ yɔɔ toovenim sɩmtʋ” kaasɩnɩnɩ-wɛ nɛ pɛwɛɛnɩ tisuu. (Kol. 1:9, 10) Toovenim tɔm ndʋ tɩwɛ Bibl taa yɔ, tɩɩlɛɣzɩɣ. (Keɣa 118:160) Kɩɖaŋ nɩɩyɩ yɔ: Alɩwaatʋ ndʋ koobu nɔɔyʋ ɖʋʋ-ɖʋ ɖɩwɩzɩyɛ yaa ɛlakɩ kɩdɛkɛdɩm sɔsɔm nabʋyʋ yɔ, toovenim tɔm ndʋ tɩɩlɛɣzɩɣ. Nɛ alɩwaatʋ ndʋ ɖɩkatɩɣ kala yɔ, tɩɩlɛɣzɩɣ ɖɔɖɔ. Pʋyɔɔ lɛ, pɩcɛyaa se ɖɩtɩlɩ Bibl taa wɩlɩtʋ camɩyɛ nɛ ɖa-taa tɛ se tɩkɛ toovenim. Ye ɖɩwɛnɩ tisuu sɔsɔm tɔm ndʋ Bibl wɩlɩɣ yɔ tɩ-yɔɔ yɔ, ɖɩkaɣ ɖɔkʋʋ ɖe-siɣsiɣ wɛtʋ Yehowa ɛsɩndaa kaɖɛ alɩwaatʋ taa. w20.07 9 § 6-7

Mbʋ ɖɩlakɩ Yesu koobiya patam numwaa yɔ, Yesu kpakɩɣ-pʋ ɛzɩ ɛnʋ ɖɩlakɩ-pʋ yɔ. (Mat. 25:34-40) Nʋmɔʋ sɔsɔʋ ŋgʋ kɩ-yɔɔ ɖɩpɩzɩɣ ɖɩtɩŋna nɛ ɖɩsɩnɩ patam numwaa yɔ, ŋgʋ lɛ se ɖɩla ɖo-ɖoŋ ɖeɖe tɔm susuu nɛ tɔmkpɛlɩkɩyaa labʋ tʋmɩyɛ nɖɩ Yesu ɖʋ ɛ-wayɩ tɩŋɩyaa yɔ ɖɩ-taa. (Mat. 28:19, 20) “Heŋ lɛɛŋ” sɩnʋʋ ɖeke yekina nɛ Krɩstʋ koobiya pɩzɩ nɛ pala tɔm susuu tʋmɩyɛ nɖɩ pɛwɛɛ nɛ palakɩ-ɖɩ ɛjaɖɛ kpeekpe yɔɔ lɛɛlɛɛyɔ yɔ. (Yoh. 10:16) Ye ŋkɛ heŋ lɛɛŋ taa tʋ yɔ, alɩwaatʋ ndʋ payɩ ŋɖʋʋ nesi tʋmɩyɛ nɖɩ yɔ, pɩtasɩna se ŋwɩlɩɣ patam numwaa ñɔ-sɔɔlɩm lɛ, ŋwɩlɩɣ-pʋ ɖɔɖɔ Yesu. Ða nɛ Yehowa nɛ Yesu ɖɩɖʋʋ taabalɩyɛ ɖɔɖɔ pɩtɩŋnɩ ɛzɩma ɖɩhaɣ liidiye se ɖɩɖʋnɩ nesi tʋmɩyɛ nɖɩ pɛwɛɛ nɛ peɖiyiɣ yɔ pɩ-yɔɔ. (Luka 16:9) Kɩɖaʋ nakʋyʋ yɔ: Ðɩpɩzɩɣ nɛ ɖɩha liidiye nɛ pɩsɩnɩ ɛjaɖɛ kpeekpe yɔɔ Ɛsɔ sɛtʋ tʋmɩyɛ. Palakɩnɩ liidiye nɖɩ tʋmɩyɛ se pɩsɩna nɛ pɔcɔnɩ mba kɛgbɛdɩsaɣ nakɛyɛ talɩ-wɛ yɔ pa-kɩcɛyɩm ɖeɖe. Ðɩpɩzɩɣ ɖɔɖɔ nɛ ɖɩsɩnɩ ɖa-maɣmaɣ ɖɛ-ɛgbɛyɛ liidiye nʋmɔʋ taa, nɛ ɖɩsɩnɩ mba ɖɩnawa se pɛwɛ kɩcɛyɩm taa yɔ.—Adu. 19:17. w20.04 24 § 12-13

Ɛzɩma hayo kiŋ wiyaʋ wɩlaa se ‘eekeŋ ɛ-caanaa tɛ Ɛsɔ cɔlɔ’? Iniyɔɔ Soviyetiiki kaasɔɔlaa se kɩɖɩzɩ Ɛsɔ sɛtʋ agbaa, pʋyɔɔ lɛ kɩñaɣ pana se kɩmʋ a-ɖoŋ. Pɩsa nɛ Iniyɔɔ Soviyetiiki komina talɩ kɩ-kaɖʋwa lɛ, kɩɖʋ paɣtʋ pɩnaɣ 1918 taa se pawɩlɩ sukulinaa taa se Ɛsɔ fɛyɩ. Ɛzɩma tɩyɛ hayo kiŋ wiyaʋ ɛnʋ ‘ɛɖʋ hɩɖɛ maalikasɩ tɛ ɛsɔ’? Iniyɔɔ Soviyetiiki kpaɣ liidiye sakɩyɛ nɛ kikpeɣlini kɩ-sɔɔjanaa nɛ kilu you wondu kudokiŋ sakɩyɛ se pɩsa nɛ kɩtasɩ wɛʋ ɖoŋ nɛ pɩkpaɖɩ. Alɩwaatʋ wɛɛ nɛ tɩɖɛɣ lɛ, hayo kiŋ wiyaʋ nɛ hadɛ kiŋ wiyaʋ pɔkɔm nɛ pekpeɣli you wondu sɔsɔtʋ sakɩyɛ se pakʋ ɛyaa miiliyaarɩwaa sakɩyɛ! Hayo kiŋ wiyaʋ sɩnɩ hadɛ kiŋ wiyaʋ nɛ pala nabʋyʋ; nɛ pɩ-tɔm cɛyaa. ‘Pesiɣ yɔkɩyʋ kʋzɔɔtʋ sɩʋ kpeliɣa’ ŋga lɛ, ajɛɛ kɩgbɛndʋʋ ɛgbɛyɛ nɖɩ payaɣ se ONU yɔ.—Dan. 11:31. w20.05 6-7 § 16-17

Apɩzɩɣ nɛ ɛɖʋ nesi nɛ pañɩnɩ mba pɛhɛ fezuu taa yɔ? Ða-tɩŋa, pʋ-tɔbʋʋ se ɛzʋtʋyaa, nʋmɔʋ lɩzɩyaa, hɔʋ taa ñɩma nɛ ɛgbɛyɛ taa tɔm susuyaa; ɖɩpɩzɩɣ nɛ ɖɩɖʋ nesi nɛ ɖɩñɩnɩ-wɛ. Ña-taabalʋ yaa ñɔ-hɔʋ taa tʋ nɔɔyʋ kɔm nɛ ɛpɩsɩ tɔm susuu yebiyu na? Ye ŋwɛɛ nɛ ŋsusuu tɔm kpaɣ ɖɩɣa nɛ ŋwolo ɖɩɣa yaa samaɣ taa nɛ ŋkatɩ ɛyʋ weyi ɛpɩsɩ tɔm susuu yebiyu yɔ, ɛbɛ pɩpɔzʋʋ se ŋla? Lɩzɩ ɛyʋ ɛnʋ pɩ-taa se ye ɛsɔɔlaa se nɔɔyʋ ewolo nɛ ɛna-ɩ yɔ, pɩkɛdɩɣnɩ-ŋ se ŋcɛlɩ ɛ-tɛ adɖɛɛsɩ yaa ɛ-kaŋgalaafu mayaɣ ɛgbɛyɛ taa ɛzʋtʋyaa. Payaɣ ɛgbɛyɛ taa ɛzʋtʋyʋ nɔɔyʋ se Thomas. Ɛyɔɔdaa se: “Kajalaɣ lɛ, mɔnpɔzʋʋ koobiya ndɩ ndɩ se mana se pasɩm ɖenɖe ɖɛ-ɛgbɛyɛ taa ñɩma mba papɩsɩ tɔm susuu yebiyaa yɔ pɛwɛ lɛɛlɛɛyɔ yɔ yaa we. Yaa mɔnpɔzʋʋ tɔm susuyaa se mana se pɔtɔzʋʋ nɔɔyʋ yɔɔ se eyebi kediɣzisi wobu na. Pʋwayɩ, alɩwaatʋ ndʋ mowoki koobiya halaa yaa abalaa mba papɩsɩ tɔm susuu yebiyaa yɔ pɔ-cɔlɔ yɔ, mɔnpɔzʋʋ-wɛ pe-piya nɛ pɔ-hɔʋ taa ñɩma lalaa yɔɔ. Mba papɩsɩ tɔm susuu yebiyaa yɔ, pa-taa nabɛyɛ wokaɣni pe-piya kediɣzisi, nɛ pɩtɩla piya nzɩ sɩɩkɛ tɔm susuyaa alɩwaatʋ natʋyʋ. Papɩzɩɣ nɛ pasɩnɩ piya nzɩ ɖɔɖɔ nɛ sɩpɩsɩ Yehowa cɔlɔ.” w20.06 24 § 1; 25 § 6-7

Tɛtʋ yɔɔ wondu kɩlɩzɩtʋ kpeekpe taa lɛ, ɛyaa ɖeke pɩzɩɣna nɛ pɔtɔzɩ mbʋ pɩlaba nɛ pɩɖɛɛ yɔ pɩ-yɔɔ nɛ patazɩ pɩ-taa nɛ papɩzɩ pɛkpɛlɩkɩ lɔŋ pɩlɩɩnɩ wezuu kɩbaŋʋ caɣʋ yɔɔ. Ye ɖɩlakɩ mbʋ yɔ, ɖɩpɩzɩɣ nɛ ɖɩkpɛlɩkɩ lɔŋ kɩbaŋ nɛ ɖɩlɛɣzɩ ɖa-maɣzɩm nɛ ɖe-wezuu caɣʋ. (1 Kɔr. 6:9-11; Kol. 3:9, 10) Toovenim taa lɛ, ɖɩpɩzɩɣ nɛ ɖɩfalɩsɩ ɖɛ-ɛhʋyɛ se pɩsa nɛ ɖɩtɩlɩ tʋkaɣ ŋga kɛwɛ kɩbam nɛ kɩdɛkɛdɩm pɛ-hɛkʋ taa yɔ. (Ebr. 5:14) Ðɩpɩzɩɣ nɛ ɖɩkpɛlɩkɩ ɛzɩma ɖɩwɩlɩ sɔɔlɩm, ɖɩnɩɩ lalaa siziŋ nɛ ɖɩna pa-pʋtɔdɩyɛ yɔ. Nɛ ɖɩpɩzɩɣ nɛ ɖɩkpɛlɩkɩ ɛzɩma ɖɩmaɣzɩnɩ Yehowa siɣsiɣ wɛtʋ yɔ. Nʋmɔŋ weyi ɩ-yɔɔ ɖɩtɩŋɩɣna nɛ ɖɩwɩlɩɣ se ɖɩwɛnɩ ɛsɩmɩyɛ tɔm ɖɔkʋʋ kʋjɔʋ yɔɔ yɔ, ɩ-taa nakʋyʋ lɛ se ɖɩñakɩ pana nɛ ɖɩtɔzʋʋ alɩwaatʋ ndʋ payɩ Yehowa sɩnɩ-ɖʋ nɛ ɛhɛzɩ ɖa-laŋɩyɛ yɔ tɩ-yɔɔ. Ye ɖɩlakɩ mbʋ yɔ, ɖa-taa kaɣ tɛm nɛ pɩkpaɖɩ se ɛkaɣ-ɖʋ sɩnʋʋ nɛ ɛsɩndaa ɖɔɖɔ. (Keɣa 76:13; 77:4, 7) Nʋmɔʋ lɛɛkʋ lɛ se ɖɩtɔzɩ kɩbam mbʋ ɛyaa lalaa labɩ-ɖʋ yɔ pɩ-yɔɔ nɛ ɖɩwɩlɩ se ɖɩwɛnɩ ɛsɩmɩyɛ mbʋ palakɩ yɔ pɩ-yɔɔ. Ñɩnɩyaa kɔma nɛ peɖiɣzina se ɛyaa mba pawɩlɩɣ ɛsɩmɩyɛ yɔ, pehikiɣ taa leleŋ nɛ pɩkpaɖɩɣ. w20.05 23 §12-13

Maɣzɩ nɛ ŋna ɛzɩma pɩɩlabɩ Moyizi alɩwaatʋ ndʋ ɛɛwɛ kaaʋ nakʋyʋ hɛɛŋa taa, nɛ ɛna natʋ natʋyʋ taa Yehowa paɣlɩka wɛɛ nɛ kɛɖɛɣ yɔ. Pɩtʋʋ fɛyɩ se pɩɩkɛ piti lakasɩ nzɩ ɛyʋ nɔɔyʋ taatɩɩnata pʋcɔ nɛ Yesu kɔŋ tɛtʋ yɔɔ yɔ! Moyizi nɩ tɔm natʋyʋ nɛ pɩtʋʋ fɛyɩ se tiyiyu nɔɔyʋ kaayɔɔdɩnɩ-tʋ. Ɛyɔɔdaa se: “[Yehowa, Yehowa] Ɛsɔ, pʋtɔdɩyɛ nayʋ nɛ hɛndɩyʋ, suuɖu tʋ nɛ pʋtɔdɩyɛ tʋ nɛ tʋtʋyɛ tʋ, weyi ɛnaɣ pʋtɔdɩyɛ pɩnzɩ kudoku yɔ, weyi ɛhɩzɩɣ azuluma nɛ kʋzɔɔtʋ nɛ kɩwɛɛkɩm yɔ.” (Ejl. 33:17-23; 34:5-7) Mbʋ Moyizi nawa yɔ, pɩtɩla ɛmaɣzaɣ pɩ-yɔɔ alɩwaatʋ ndʋ ɛlakaɣnɩ tʋmɩyɛ Yehowa hɩɖɛ, ɛzɩ ɛyɔɔdʋʋ sɔnɔ evemiye mayaɣ taa yɔ. Alɩwaatʋ ndʋ ɖɩmaɣzɩɣ Yehowa hɩɖɛ yɔɔ yɔ, pɩwɛɣ ɖeu se ɖɩmaɣzɩ weyi payaɣ-ɩ hɩɖɛ nɖɩ yɔ ɛ-yɔɔ. Pɩwɛɛ se ɖɩmaɣzɩ ɛ-wɛtʋ ndɩ ndɩ yɔɔ ɛzɩ e-ɖoŋ, ɛ-lɔŋsɩnɖɛ, e-siɣsiɣ wɛtʋ nɛ ɛ-sɔɔlɩm mbʋ yɔ. Ye ɖɩmaɣzɩɣ wɛtʋ ndʋ nɛ wɛtʋ lɛɛtʋ yɔɔ ɖɔɖɔ yɔ, pɩpɩzɩɣ piseɣti-ɖʋ nɛ ɖɩwɛɛnɩ ñamtʋ ɛ-yɔɔ nɛ pɩkpaɖɩ.—Keɣa 76:12-16. w20.06 8-9 § 3-4

Yesu yɔɔdaa se sɔɔlɩm mbʋ ɛ-tɔmkpɛlɩkɩyaa wɩlɩɣ ɖama yɔ, mbʋ kaɣnɩ wɩlʋʋ se pɛkɛ ɛ-tɔmkpɛlɩkɩyaa. (Yoh. 13:34, 35) Sɔɔlɩm mbʋ pɩwɛ Ɛsɔ samaɣ hɛkʋ taa yɔ, pɩsɩɣnɩ-ɖʋ se ɖɩtɩlɩ se kɛkɛ Yehowa samaɣ. Ɛlɛ, pɩsa nɛ ɖɩwɛɛnɩ tisuu sɔsɔm lɛ, pɩcɛyaa se ɖɩla nabʋyʋ. Pɩtɩkɛ sɔɔlɩm mbʋ pɩwɛ Ɛsɔ samaɣ hɛkʋ taa yɔ, pi-ɖeke pɩwɛɛ se piseɣti-ɖʋ nɛ ɖɩwɛɛnɩ tisuu. Ɛbɛ yɔɔ? Mbʋ pʋyɔɔ yɔ, ye sɔɔlɩm mbʋ pi-ɖeke pɩ-yɔɔ ɖɩwɛnɩ tisuu yɔ, ɖɩpɩzɩɣ nɛ ɖilesi tisuu mbʋ kɛlɛʋ. Kɩɖaŋ nɩɩyɩ yɔ: Ðɩpɩzɩɣ nɛ ɖiyele Yehowa sɛʋ alɩwaatʋ ndʋ koobu nɔɔyʋ, halɩ pɩtɩla ɛzʋtʋyʋ nɔɔyʋ yaa nʋmɔʋ lɩzɩyʋ nɔɔyʋ lakɩ kɩwɛɛkɩm sɔsɔm nabʋyʋ yɔ. Ðɩpɩzɩɣ ɖɔɖɔ nɛ ɖiyele Yehowa sɛʋ alɩwaatʋ ndʋ koobu nɔɔyʋ ɖʋʋ-ɖʋ ɖɩwɩzɩyɛ yaa pɩsɩɣ tisuu yebiyu nɛ ɛyɔɔdʋʋ se mbʋ pɩ-yɔɔ ɖitisiɣ yɔ pɩtɩtʋʋzɩ yɔ. Pʋyɔɔ lɛ, ye ɖɩsɔɔlaa se ɖɩwɛɛnɩ tisuu sɔsɔm yɔ, pɩwɛɛ se taabalɩyɛ kɩbanɖɛ nɖɩ ɖɩwɛ ɖa nɛ Yehowa ɖɛ-hɛkʋ taa yɔ, nɖɩ eseɣtini-ɖʋ nɛ ɖɩwɛɛnɩ tisuu. Ye mbʋ ɛyʋ lɛlʋ lakɩ yɔ, pi-ɖeke piyebina nɛ ŋwɛɛnɩ tisuu Ɛsɔ yɔɔ, nɛ pɩtɩkɛ taabalɩyɛ kɩbanɖɛ nɖɩ ɖɩwɛ ña nɛ Ɛsɔ mɩ-hɛkʋ taa yɔ, ñe-tisuu ɛɛkaɣ wɛʋ ɖoŋ. Lɩmaɣza wena ŋwɛnɩ Yehowa nɛ ɛ-samaɣ pɔ-yɔɔ yɔ, apɩzɩɣ asɩnɩ-ŋ nɛ ŋwɛɛnɩ tisuu nɛ pɩsɩɩnɩ ɖoli. Ɛlɛ pɩcɛyɩ siŋŋ ɖɔɖɔ se ŋkpɛlɩkɩɣ Bibl camɩyɛ, ŋnɩɩ ndʋ ŋkpɛlɩkɩɣ yɔ tɩ-taa nɛ ŋñɩnɩ ɛgbɛyɛ takayɩsɩ taa nɛ pɩsa nɛ ña-taa tɛ se ndʋ ŋwɛɛ nɛ ŋkpɛlɩkɩɣ Yehowa yɔɔ yɔ tɩkɛ toovenim. Pɩcɛyaa se ña-maɣmaɣ ŋñɩnɩ nɛ ŋtɩlɩ nɛ ña-taa tɛ se tɔm ndʋ Bibl wɩlɩɣ-ɖʋ Yehowa yɔɔ yɔ, tɩkɛ toovenim.—Roma 12:2. w20.07 8 § 2-3

Kɩɖaŋ sakɩyɛ wɛɛ nɛ ɩwɩlɩɣ se Ɛsɔ tiyiyaa wɛɛ nɛ pasɩɣnɩ-ɖʋ se ɖɩna mba pɛhɛ fezuu taa nɛ pɔsɔɔlaa se papɩsɩ Yehowa cɔlɔ yɔ. (Natʋ 14:6) Kɩɖaʋ nakʋyʋ yɔ. Payaɣ koobu abalɩñɩnʋ nɔɔyʋ se Silvio nɛ ɛwɛ Ekʋwatɛɛrɩ ɛjaɖɛ taa; ɛɛhɛ fezuu taa nɛ etendi Yehowa se etiyi nɔɔyʋ nɛ ɛsɩnɩ-ɩ nɛ ɛpɩsɩ ɛgbɛyɛ taa. Ɛwɛɛ nɛ ɛtɩmɩɣ lɛ, ɛzʋtʋyaa naalɛ talɩ ɛ-ɖɩɣa. Patalɩ ɛ-cɔlɔ mbʋ lɛ, pa-taa kaawɛ leleŋ se papaɣzɩ-ɩ sɩnʋʋ. Ye ɖɩsɩɣnɩ mba pɛhɛ fezuu taa yɔ se papɩsɩ Yehowa cɔlɔ yɔ, ɖɩkaɣ hiu taa leleŋ siŋŋ. Koobu abalɩñɩnʋ nʋmɔʋ lɩzɩyʋ nɔɔyʋ keŋni mba pɛhɛ fezuu taa yɔ siŋŋ, yʋsɩ tɔm ndʋ ɛyɔɔdaa yɔ. Ɛyɔɔdaa se: “Nabʋyʋ taa pɩwɛɣ-m kaɖɛ se mankpa man-tɩ nɛ mantaatisi taa leleŋ ɛsɩtɛɣlɩm. Man-taa wɛ leleŋ siŋŋ se ma nɛ Yehowa ɖɩlabɩ tʋmɩyɛ nɛ ɖɩsɩnɩ ɛ-sɛyaa kʋsɔɔlaa taa nɔɔyʋ nɛ ɛlɩɩ Sataŋ ɛjaɖɛ taa nɛ ɛpɩsɩ ɛgbɛyɛ taa.” Ye ŋkɛ weyi ɛhɛ fezuu taa yɔ, ña-taa pɩzɩɣ nɛ pɩtɛ se Yehowa sɔɔlɩ-ŋ mbʋ. Yehowa ɖaŋ kpam se ŋpɩsɩ, nɛ ɛkaɣ-ŋ mʋʋ nɛ taa leleŋ. w20.06 29 § 16-18

Yehowa kɛnɩ ‘ɖa-Wɩlɩyʋ Sɔsɔ;’ pʋyɔɔ lɛ, eyeba nɛ pama lalaa kɩɖaŋ ɛ-Tɔm taa se pɩsa nɛ ɛwɩlɩ-ɖʋ tɔm. (Iza. 30:21) Ye ɖɩmaɣzɩɣ Bibl taa kɛdɛsɩ nzɩ sɩyɔɔdʋʋ mba palɩzɩ Ɛsɔ wɛtʋ kɩbandʋ nɛ pawɩlɩ yɔ sɩ-yɔɔ yɔ, ɖɩkpɛlɩkɩɣ lɔŋ. Ye ɖɩtazɩɣ mbʋ pɩtalɩ mba patɩpɩzɩ nɛ palɩzɩ wɛtʋ kɩbandʋ ndʋ nɛ pawɩlɩ yɔ pɩ-taa yɔ, ɖɩkpɛlɩkɩɣ lɔŋ ɖɔɖɔ. (Keɣa 36:37; 1 Kɔr. 10:11) Maɣzɩ mbʋ pɩɩtalɩ Wiyaʋ Sɔɔlɩ yɔ pɩ-yɔɔ nɛ ŋna. Kiɖe tɛɛ lɛ, ɛɛkɛ evebu weyi ɛsɩm e-ɖoŋ kamaɣ yɔ. Ɛɛsɩm e-ɖoŋ kamaɣ nɛ halɩ ekizi se ɛɛmʋʋ wala sakɩyɛ. (1 Sam. 9:21; 10:20-22) Ɛlɛ alɩwaatʋ wɛɛ nɛ tɩɖɛɣ lɛ, Sɔɔlɩ paɣzɩ ɛ-tɩ kpazʋʋ nɛ ɛla mbʋ ɛtaawɛɛnɩ waɖɛ se ɛla yɔ. Ɛpɩsɩ wiyaʋ nɛ pitileɖi lɛ, ɛpaɣzɩ wɛnʋʋ tɩ kpazʋʋ. Kɩyakʋ nakʋyʋ, elesi suuɖu ŋgʋ ɛɛwɛna yɔ alɩwaatʋ ndʋ ɛɛɖaŋ nayʋ Samɩyɛɛlɩ yɔ, ɛkʋyaa nɛ ɛlaa miŋ kɩñaɣzʋʋ kɩlaʋ paa pataaha-ɩ nʋmɔʋ se ɛla mbʋ yɔ. Mbʋ pɩlɩ pɩ-taa yɔ lɛ se Sɔɔlɩ tɔm tɩtasɩ kɛdɩnʋʋ Yehowa, nɛ ɛlɛ kizi se ɛtaatasɩ kɛʋ wiyaʋ. (1 Sam. 13:8-14) Ye ɖɩkpɛlɩkɩ lɔŋ kɩɖaʋ ŋgʋ kɩ-taa nɛ ɖikizi se ɖɩɩlakɩ mbʋ patɩha-ɖʋ waɖɛ se ɖɩla yɔ, pʋbʋ lɛ ɖɩwɩlɩɣ se ɖɩkɛ lɔŋsɩnɖaa. w20.08 10 § 10-11

Pɩkɛ toovenim se Yehowa tɩŋnɩ Krɩstʋ yɔɔ nɛ ɛha “ɛyaa se pɛkɛ kʋjɔŋ” ɛ-ɛgbɛyɛ. (Efɛz. 4:8) Ɛyaa kʋjɔŋ ɩnɩ ɩ-taa nɩɩyɩ lɛ Nɔɔɖɛyaa Ɛgbɛyɛ taa ñɩma, Nɔɔɖɛyaa Ɛgbɛyɛ sɩnɩyaa, Ɛgbɛyɛ piliŋa kɔɔmiite taa ñɩma, egeetiye yɔɔ cɔnɩyaa, ɛgbɛyɛ sukulinaa taa wɩlɩyaa, ɛgbɛyɛ taa ɛzʋtʋyaa nɛ ɛgbɛyɛ taa tʋmlaɖaa. Fezuu kiɖeɖeu yebina nɛ palɩzɩ koobiya abalɩñɩma mba pa-tɩŋa se pɔcɔnɩ Yehowa ewiɖe yɔɔ nɛ pakpazɩ ɛgbɛyɛ ɖoŋ. (1 Pɩy. 5:2, 3) Fezuu kiɖeɖeu lɩzɩ koobiya abalɩñɩma nabɛyɛ se pala tʋma ndɩ ndɩ. Tomnaɣ pilinzi ndɩ ndɩ ɛzɩ nesi nɛ naataŋ mbʋ yɔ lakɩ tʋmɩyɛ se pɩwazɩ tomnaɣ kpeekpe; nɛ mbʋ ɖɔɖɔ koobiya mba fezuu kiɖeɖeu lɩzaa yɔ, palakɩ tʋmɩyɛ siŋŋ se pɩwazɩ ɛgbɛyɛ kpeekpe. Paañɩnɩɣ se lalaa ɩha-wɛ samtʋ. Ɛlɛ pañakɩ pana se pasɩnɩ po-koobiya nɛ pakpazɩ-wɛ ɖoŋ. (1 Tes. 2:6-8) Ðɩsɛɣ Yehowa koobiya abalɩñɩma mba pɔ-yɔɔ, mbʋ pʋyɔɔ yɔ paañɩnɩɣ pa-maɣmaɣ pɛ-kɛzɛɣa, nɛ papɩ fezuu taa! w20.08 21 § 5-6

Ðisusuu tɔm mbʋ pʋyɔɔ yɔ, ‘pawɩlɩ ɛyaa ñaŋ nɛ poyotuu’ nɛ pɩpɔzʋʋ siŋŋ se pɛkpɛlɩkɩ Kewiyaɣ yɔɔ toovenim tɔm. (Mat. 9:36) Yehowa sɔɔlaa se ɛyaa ndɩ ndɩ ɩwɛɛnɩ toovenim tɛ sɩmtʋ siŋŋ nɛ pehiɣ ñʋʋ yabʋ. (1 Tim. 2:4) Ye ɖɩmaɣzɩɣ ɛzɩma tɔm susuu pɩzɩɣ nɛ pɩsɩnɩ ɛyaa nɛ pɩya pa-ñʋʋ yɔ pɩ-yɔɔ yɔ, ɖɩkaɣ sɔɔlʋʋ se ɖisusi tɔm. Ðɩyakɩ ɛyaa ñʋʋ. (Roma 10:13-15; 1 Tim. 4:16) Pɩpɔzʋʋ-ɖʋ ɖɔɖɔ se ɖɩwɛɛnɩ tɔm susuu wondu ndʋ tɩmʋnaa yɔ. Nɛ pɩpɔzʋʋ se ɖɩtɩlɩ ɛzɩma pɩwɛɛ se ɖɩlabɩnɩ-tʋ tʋmɩyɛ yɔ. Yesu kaaheyi ɛ-tɔmkpɛlɩkɩyaa ɛzɩma pɩwɛɛ se posusi tɔm kɩbandʋ yɔ. Eheyi-wɛ mbʋ pɩwɛɛ se pɔɖɔkɩ yɔ, ɖenɖe pɩwɛɛ se posusi tɔm yɔ, nɛ tɔm ndʋ pɩwɛɛ se pɔyɔɔdɩ yɔ. (Mat. 10:5-7; Luka 10:1-11) Sɔnɔ, Yehowa ɛgbɛyɛ haɣ-ɖʋ Tɔm wɩlʋʋ wondu ndʋ tɩwɛ wazaɣ siŋŋ yɔ. Nɛ pawɩlɩɣ-ɖʋ ɛzɩma pɩwɛɛ se ɖɩlabɩnɩ wondu ndʋ tʋmɩyɛ yɔ. Falɩsʋʋ mbʋ, pɩsɩɣnɩ-ɖʋ se ɖisusi tɔm kaalɛyɩtʋ nɛ ɖɩkpɛlɩkɩ ɛzɩma ɖɩkɛ wɩlɩyaa kɩbama yɔ.—2 Tim. 2:15. w20.09 4 § 6-7, 10

Maɣzɩ nɛ ŋna ɛzɩma apostoloo Yohanɛɛsɩ taa kaalabɩ leleŋ alɩwaatʋ ndʋ ɛnɩwa se ɛyaa mba ɛɛsɩnaa nɛ pɛkpɛlɩkɩ toovenim yɔ, powobi pɩ-yɔɔ nɛ pɔɖɔkʋʋ pe-siɣsiɣ wɛtʋ Yehowa ɛsɩndaa yɔ. Paakatɩ kala sakɩyɛ, nɛ Yohanɛɛsɩ kaawɛɛ nɛ ɛñakɩ pana se ɛkpazɩ Krɩstʋ mba siɣsiɣ ñɩma mba pe-tisuu ɖoŋ. Ɛkpakaɣ-wɛ ɛzɩ pɛkɛ e-piya fezuu taa yɔ. Mbʋ ɖɔɖɔ alɩwaatʋ ndʋ ɖa-maɣmaɣ ɖe-piya yaa ɛyaa mba ɖɩsɩnaa nɛ patɩlɩ toovenim yɔ, pahaɣ pa-tɩ Yehowa nɛ powoki pɩ-yɔɔ nɛ pɛsɛɣ-ɩ yɔ, ɖa-taa lakɩ leleŋ. (3 Yohanɛɛsɩ 3) Pɩnaɣ 98 taa, Yehowa fezuu kiɖeɖeu seɣti Yohanɛɛsɩ nɛ ɛma takayɩsɩ naadozo. Takayɩsɩ nzɩ, sɩ-kaɖʋwa lɛ se siseɣti Krɩstʋ mba siɣsiɣ ñɩma nɛ pataalesi tisuu mbʋ pɛwɛnɩ Yesu yɔɔ yɔ, nɛ powolo pɩ-yɔɔ nɛ pɔɖɔŋ toovenim taa. Yohanɛɛsɩ nɩɣzaɣ ɖoŋ kɩdɛkɛdɩŋ weyi cɛtɩm tɔm wɩlɩyaa kaawɛnɩ agbaa yɔɔ yɔ ɩ-yɔɔ. (1 Yoh. 2:18, 19, 26) Tisuu yebiyaa mba, pɔyɔɔdaɣ se pasɩm Ɛsɔ, ɛlɛ paataaɖɔŋ Yehowa paɣtʋ yɔɔ. w20.07 20 § 1-3

Ðɩwɛnɩ tisuu tɔm ndʋ ɖisusuu yɔ tɩ-yɔɔ; pʋyɔɔ lɛ, ɖɩsɔɔlaa se ɖisusi-tʋ ɛyaa sakɩyɛ ɛzɩma ɖɩpɩzɩɣ yɔ. Ðɩtaɣ liu tamasɩ nzɩ sɩwɛ Ɛsɔtɔm taa yɔ. (Keɣa 118:42; Iza. 40:8) Ðɩna Bibl taa natʋ ndɩ ndɩ labɩ ɖa-alɩwaatʋ taa. Ðɩna ɛzɩma ɛyaa wezuu caɣʋ ñɔɔzʋʋ alɩwaatʋ ndʋ papaɣzɩɣ ɖɔm Bibl lɔŋ tasʋʋ yɔɔ yɔ. Piyeki nɛ ɖa-taa tɛzɩɣ tɛm se Kewiyaɣ tɔm kɩbandʋ kɛnɩ tɔm ndʋ pɩpɔzʋʋ se paa weyi ɛnɩɩ yɔ. Pɩtasɩ lɛ, ɖɩwɛnɩ tisuu Yehowa, weyi ɛ-cɔlɔ tɔm ndʋ ɖisusuu yɔ tɩlɩnaa yɔ ɛ-yɔɔ, nɛ ɖɩwɛnɩ tisuu ɖɔɖɔ Yesu weyi ɛlɩzaa se ɛkɛ Kewiyaɣ Wiyaʋ yɔ ɛ-yɔɔ. Paa wɛtʋ ndʋ ɖɩkatɩɣ yɔ, paa ɛzɩmtaa lɛ, Yehowa kaɣ kɛʋ ɖo-ɖoŋ nɛ ɖa-kʋyʋʋ. (Keɣa 45:2-4) Pɩtasɩ lɛ, ɖa-taa tɛma se Yesu wɛɛ nɛ ɛlakɩnɩ tʋmɩyɛ ɖoŋ nɛ waɖɛ nɖɩ Yehowa ha-ɩ yɔ nɛ eɖiyiɣ tɔm susuu tʋmɩyɛ nɛ ɖooo ɛsɔdaa. (Mat. 28:18-20) Tisuu yeki se ɖa-taa ɛtɛ nɛ pɩkpaɖɩ se Yehowa kaɣ wazʋʋ ɖa-pana ñaɣʋ yɔɔ. w20.09 12 § 15-17

Nabʋyʋ taa, pɩpɩzɩɣ nɛ pɩpɔzɩ se nɔɔyʋ ɛlʋ koobiya halɩñɩma yɔɔ alɩwaatʋ ndʋ pakatɩɣ kaɖɛ naɖɩyɛ yɔ. (Iza. 1:17) Kɩɖaʋ nakʋyʋ yɔ: Lelu yaa halʋ weyi ɛcɛbɩ nesi yɔ, pɩpɩzɩɣ nɛ pɩpɔzɩ se nɔɔyʋ ɛsɩnɩ-ɩ nɛ pala tʋma wena ɛ-walʋ lakaɣ yɔ a-taa naayɛ. Koobu halɩñɩnʋ weyi ɛkpadɩyaa yɔ, pɩpɩzɩɣ nɛ pɩpɔzɩ se pasɩnɩ-ɩ nɛ ɛyɔɔdɩnɩ ɖɔkɔtɔnaa. Yaa koobu halɩñɩnʋ weyi ɛkɛ nʋmɔʋ lɩzɩyʋ nɛ ɛlakɩ teokrasɩ tʋma lɛɛna yɔ, pɩpɩzɩɣ nɛ pɩpɔzɩ se nɔɔyʋ ɛlʋ ɛ-yɔɔ ye lalaa ɩkʋʋ ɛ-tɔm se eesusuu tɔm sakɩyɛ ɛzɩ nʋmɔʋ lɩzɩyaa lalaa yɔ. Ɛzɩma ɖɔɖɔ ɖɩpɩzɩɣ nɛ ɖɩsɩnɩ ɖo-koobiya halɩñɩma? Ðɩna Yesu kɩɖaʋ. Yesu lʋkaɣ e-koobiya halɩñɩma yɔɔ faaa alɩwaatʋ ndʋ lalaa taanɩɣ pɔ-tɔm taa yɔ. Kɩɖaʋ nakʋyʋ yɔ: Ɛlʋbɩ Maarɩɩ yɔɔ alɩwaatʋ ndʋ Maarta kʋ ɛ-tɔm yɔ. (Luka 10:38-42) Nɛ ɛlʋbɩ Maarɩɩ yɔɔ nabʋlɛ ɖeɖe alɩwaatʋ ndʋ ɛyaa lalaa maɣzaa se ɛlɛ kpaɣ lɩmaɣzɩyɛ kɩdɛkɛdɩyɛ nɛ pakʋ ɛ-tɔm yɔ. (Mark. 14:3-9) Yesu na mbʋ piiseɣti Maarɩɩ yɔ nɛ ɛsamɩ-ɩ. Halɩ ɛyɔɔdɩ natʋ tɔm se Maarɩɩ lakasɩ kɩbanzɩ nzɩ, pakaɣ sɩ-tɔm kɛdʋʋ “paa le posusuu tɔm kɩbandʋ ɛjaɖɛ kpeekpe yɔɔ yɔ.” w20.09 24 § 15-16

Ninɖiɣyu kɩbanʋ nɩɣ pɩ-taa se heŋ pɩzɩɣ nɛ ile. Nɛ ye heu nɔɔyʋ eposini ewiɖe yɔ, ninɖiɣyu ɛɛlakɩ-ɩ kañatʋ. Iyele nɛ ɖɩna kɩɖaʋ ŋgʋ Ɛsɔ hawa alɩwaatʋ ndʋ ɛsɩɣaɣnɩ ɛ-sɛyaa nabɛyɛ yɔ. Ɛyaa mba, paaposini Yehowa alɩwaatʋ natʋyʋ. Nayʋ Yoonaa taaña Yehowa nɛ eekizaa se eewoki Niniivi. Paa mbʋ yɔ, Yehowa taalɔ Yoonaa lɛɛ lɛɛ. Ɛzɩ ninɖiɣyu kɩbanʋ yɔ, Yehowa kaaholi-i nɛ ɛsɩnɩ-ɩ nɛ ɛɖaɣnɩ hiɣu ɖoŋ weyi pɩpɔzaɣ-ɩ se ɛlabɩnɩ ɛ-tʋmɩyɛ yɔ. (Yon. 2:7; 3:1, 2) Pʋwayɩ, Ɛsɔ labɩnɩ tʋmɩyɛ pɔpɔʋ tɩʋ se ɛsɩnɩ Yoonaa nɛ ɛtɩlɩ ɛzɩma paa ɛyʋ weyi lɛ, e-wezuu mʋ ñɩm yɔ. (Yon. 4:10, 11) Lɔŋ weyi pɩkpɛlɩkɩɣ-ɖʋ? Pɩtɩpɔzɩ se ɛzʋtʋyaa ɩlɔ mba pɛhɛ fezuu taa yɔ lɛɛ lɛɛ. Ɛlɛ ɛzʋtʋyaa ñakɩ pana se patɩlɩ mbʋ piyeba nɛ heu nɔɔyʋ posini ewiɖe yɔ. Nɛ alɩwaatʋ ndʋ heu ɛnʋ ɛpɩsɩɣ Yehowa cɔlɔ yɔ, ɛzʋtʋyaa woki pɩ-yɔɔ nɛ pawɩlɩɣ-ɩ se pɔsɔɔlɩ-ɩ nɛ pamaɣzɩɣ ɛ-yɔɔ. w20.06 20-21 § 10-12

Iniyɔɔ Soviyetiiki kewiyaɣ lesi ko-ɖoŋ pɩnaɣ 1991 taa nɛ pɩtɛ lɛ, Ɛsɔ samaɣ ŋga kaawɛ egeetiye sɔsɔɖɛ nɖɩ ɖɩ-taa yɔ, kaahiɣ “sɩnʋʋ pazɩ” pʋ-tɔbʋʋ se kaawɛ ka-tɩ yɔɔ alɩwaatʋ natʋyʋ. Piyeba nɛ kapɩzɩ kosusi tɔm faaa, nɛ pitileɖi lɛ, tɔm susuyaa huu nɛ pɩtalɩ kudokiŋ mɩnɩŋ sakɩyɛ ajɛɛ wena aawɛ Iniyɔɔ Soviyetiiki taa yɔ a-taa. Pazɩ pazɩ lɛ, Rusii nɛ ajɛɛ wena aɖʋʋ-kʋ nesi yɔ, papɩsɩ hayo kiŋ wiyaʋ. Pʋcɔ nɛ payaa komina nakʋyʋ se hayo kiŋ wiyaʋ yaa hadɛ kiŋ wiyaʋ lɛ, pɩpɔzʋʋ se kɩwɛɛnɩ wɛtʋ tʋnɛ ti-naadozo: (1) pɩwɛɛ se kɩkaɖɩnɩ Ɛsɔ samaɣ kaɣlaa, (2) pɩwɛɛ se kɩwɩlɩ kɩ-lakasɩ taa se kɩkɛ Yehowa nɛ ɛ-samaɣ po-koyindu nɛ (3) pɩwɛɛ se kɩkaɖɩnɩ wiyaʋ lɛlʋ. Rusii nɛ ajɛɛ wena aɖʋʋ-kʋ nesi yɔ pakʋyɩ Ɛsɔ samaɣ yɔɔ mbʋ pʋyɔɔ yɔ paɖɩɣ nʋmɔʋ kɔ-tɔm susuu tʋmɩyɛ nɛ panazɩ ɖo-koobiya halaa nɛ abalaa mɩnɩŋ sakɩyɛ. Lakasɩ nzɩ, sɩwɩlɩɣ se papaɖɩɣ Yehowa nɛ ɛ-samaɣ. Nɛ pɛwɛɛ nɛ pañakɩ pana se pɛwɛɛ ɖoŋ nɛ pɩkpaɖɩ hadɛ kiŋ wiyaʋ, pʋ-tɔbʋʋ se Grandɩ Bretaañɩ nɛ Etaazuunii. w20.05 12-13 § 3-4

Nɔɔ kʋɖʋmaɣ nakɛyɛ wɛ tɔm wɩlʋʋ nɛ tɔmkpɛlɩkɩyaa labʋ pɛ-hɛkʋ taa, pʋyɔɔ lɛ ɖɩsɔɔlaa se ɖɔ-tɔm wɩlʋʋ ɛwɛɛ ɖeu nɛ pɩkpaɖɩ. Ðɩwɛɛ nɛ ɖɩwɩlɩɣ ɛyaa miiliyɔɔwaa sakɩyɛ toovenim tɔm ndʋ tɩwɛ Bibl taa yɔ. Ðɩsɔɔlɩ Bibl taa tɔm ndʋ ɖɩwɩlɩɣ ɛyaa yɔ. Pʋyɔɔ lɛ, pɩpɩzɩɣ nɛ pɩtakɩ-ɖʋ se ɖɩkpaɣ alɩwaatʋ sakɩyɛ nɛ ɖɩyɔɔdɩ mbʋ ɖɩsɔɔlaa yɔ pɩ-tɔm. Ɛlɛ, paa ɖɩtɩɩkɛ Feŋuu Tilimiye kpɛlɩkʋʋ yɔɔ cɔnɩyʋ, ɛgbɛyɛ taa Bibl kpɛlɩkʋʋ yɔɔ cɔnɩyʋ, yaa ɖɩkpɛlɩkɩɣnɩ nɔɔyʋ Bibl ɖɩɣa yɔ, pɩtɩpɔzɩ se ɖɩkɩlɩ yɔɔdʋʋ. Paa wɩlɩyʋ weyi lɛ, ɛsɔɔlaa se ɛlabɩnɩ Bibl tʋmɩyɛ camɩyɛ alɩwaatʋ ndʋ ɛwɩlɩɣ tɔm yɔ. Pʋyɔɔ lɛ, pɩcɛyaa se ɛkpa ɛ-tɩ nɛ ɛtaakɩlɩ yɔɔdʋʋ, nɛ ɛtaañaɣ pana se ɛlɩzɩ tɔm ndʋ payɩ ɛsɩm Bibl mayaɣ nakɛyɛ yɔɔ yaa tɔm natʋyʋ yɔɔ yɔ tɩ-taa. (Yoh. 16:12) Kpaɣ Bibl taa tɔm ndʋ ŋsɩm alɩwaatʋ ndʋ pamɩyɩsɩ-ŋ lɩm yɔ nɛ ŋmaɣzɩnɩ ndʋ ŋsɩm lɛɛlɛɛyɔ yɔ. Pɩtʋʋ fɛyɩ se alɩwaatʋ ndʋ pamɩyɩsɩ-ŋ lɩm yɔ, Bibl taa kajalaɣ wɩlɩtʋ ɖeke ŋŋsɩma. (Ebr. 6:1) Pʋcɔ nɛ ŋkpɛlɩkɩ tɔm ndʋ ŋsɩm sɔnɔ yɔ lɛ, pɩkpaɣ-ŋ pɩnzɩ sakɩyɛ. Ye mbʋ, taañaɣ pana se ŋwɩlɩ kpɛlɩkɩyʋ kɩfalʋ tɔm tɩŋa kpaagbaa. w20.10 14-15 § 2-4

Yehowa yeba se Yesu ɛwɛɛnɩ lʋlɩyaa kɩbama. (Mat. 1:18-23; Luka 1:26-38) Maarɩɩ yɔɔdɩ tɔm natʋyʋ nɛ ɛ-laŋɩyɛ pilim nɛ pama-tʋ Bibl taa. Nɛ tɩwɩlɩɣ se ɛwɛnɩ sɔɔlɩm sɔsɔm Yehowa nɛ ɛ-tɔm pɔ-yɔɔ. (Luka 1:46-55) Nɛ ɛzɩma Yosɛɛfʋ ñam Yehowa paɣtʋ yɔ, pɩwɩlɩɣ se ɛsɔɔlɩ Ɛsɔ nɛ ɛsɔɔlɩ se ɛ-tɔm ɛkɛdɩnɩ-ɩ. (Mat. 1:24) Yehowa tɩlɩzɩ mba pɛkɛ ñɩm tɩnaa yɔ se palʋlɩ Yesu. Yosɛɛfʋ nɛ Maarɩɩ palʋlɩ Yesu lɛ, kɩlaʋ ŋgʋ palaba yɔ, kɩwɩlɩɣ se pɛkɛ kʋñɔndɩnaa. (Luka 2:24) Pɩtɩla pacakaɣ wezuu kɛlɛʋ, kɔzɩ kɔzɩ alɩwaatʋ ndʋ pe-piya talɩ lʋbɛ yaa sɩcɛzɩ mbʋ yɔ. (Mat. 13:55, 56) Yehowa kandɩyɩ Yesu yɔɔ se kala naayɛ ɩtaatalɩ-ɩ, ɛlɛ ɛtɩɖɩɣ kala tɩŋa nʋmɔʋ. (Mat. 2:13-15) Kɩɖaʋ nakʋyʋ yɔ: Yesu hɔʋ taa ñɩma nabɛyɛ taatisiɣ ɛ-yɔɔ. Yesu maɣmaɣ hɔʋ taa ñɩma nabɛyɛ taatisi ɛ-yɔɔ kiɖe tɛɛ se ɛnʋ lɛ Mesiya. (Mark. 3:21; Yoh. 7:5) Pɩtasɩ lɛ, pɩtɩla Yosɛɛfʋ sɩba alɩwaatʋ ndʋ Yesu kaakɛ pɩɣa evelaɣ yɔ; nɛ piyeba nɛ ɛnɩɩ siziŋ. w20.10 26-27 § 4-6

Wiɖiyi pɩtɛmɩ-ŋ labʋ ɛzɩ ŋwɛ ñe-ɖeke, nɛ ŋfɛyɩnɩ nɔɔyʋ se ɛsɩnɩ-ŋ nɛ ŋlʋbɩnɩ kaɖɛ nɖɩ ŋwɛɛ nɛ ŋkatɩɣ yɔ? Pɩlabɩ ɛyaa sakɩyɛ mbʋ, pɩkpɛndɩnɩ Yehowa sɛyaa siɣsiɣ ñɩma. (1 Aw. 19:14) Ye wiɖiyi pɩtalɩ-ŋ mbʋ yɔ, tɔzɩ se Yehowa labɩ tamaɣ se: “Maakaɣ-ŋ yebu kaaʋ, nɛ maakaɣ-ŋ siɣye haʋ kaaʋ.” Pʋyɔɔ lɛ, ɖɩpɩzɩɣ nɛ ɖɩyɔɔdɩnɩ lidaʋ se: “Yehowa kɛnɩ man-sɩnɩyʋ; sɔɔndʋ ɛɛkaɣ-m kpaʋ.” (Ebr. 13:5, 6) Pɩnaɣ 61 taa mbʋ yɔ, apostoloo Pɔɔlɩ kaama tɔm ndʋ e-koobiya Krɩstʋ ñɩma mba paawɛ Yuudee yɔ. Ɛ-tɔm ndʋ, tɩtɔzʋʋ-ɖʋ tɔm ndʋ keɣa maɖʋ nɔɔyʋ yɔɔdɩ Keɣa 117:5-7 taa yɔ tɩ-yɔɔ. Ɛzɩ keɣa maɖʋ yɔ, Pɔɔlɩ ɖiɣzinaa se Yehowa kɛnɩ ɛ-Sɩnɩyʋ mbʋ pʋyɔɔ yɔ, ɛsɩnɩ-ɩ tam sakɩyɛ. Kɩɖaʋ nakʋyʋ yɔ: Pɩcɛzɩ pɩnzɩ naalɛ mbʋ yɔ, pʋcɔ nɛ Pɔɔlɩ maɣ ɛ-takayaɣ Ebree mba lɛ, ehiɣ ñʋʋ yabʋ alɩwaatʋ ndʋ ɛɖɔŋaɣ nʋmɔʋ nɛ helim sɔsɔm nabʋyʋ ma teŋgu yɔɔ yɔ. (Tʋma 27:4, 15, 20) Alɩwaatʋ ndʋ Pɔɔlɩ ɖɔŋaɣ nʋmɔʋ ŋgʋ yɔ, nɛ alɩwaatʋ pazɩ pʋcɔ nɛ pɩtalɩɣ mbʋ lɛ, Yehowa tɩŋnɩ nʋmɔŋ ndɩ ndɩ yɔɔ nɛ ɛwɩlɩ se ɛkɛ ɛ-Sɩnɩyʋ. w20.11 12 § 1-2

Ɛbɛ yɔɔ pɩtɩkɛnɩ lɔŋsɩnɖɛ se ɖɩwɛɛ nɛ ɖɩmaɣzɩɣ se ɖooo lɛ ɖe-wezuu caɣʋ kaakpaɖɩ ɖeu lɛɛlɛɛyɔ? Wɛtʋ ndʋ, tɩpɩzɩɣ tiyele nɛ ɖɩwɛɛ ɖɩmaɣzɩɣ kɩbam mbʋ pɩlaba nɛ pɩɖɛɛ yɔ, pi-ɖeke pɩ-yɔɔ na. Maɣzɩ caanaʋ taa Izrayɛɛlɩ mba kɩɖaʋ yɔɔ nɛ ŋna. Palɩ Ejipiti nɛ pitileɖi lɛ, pɔsɔɔ ɛzɩma pe-wezuu caɣʋ kaawɛ kaɖɛ peeɖe yɔ pɩ-yɔɔ. Ɛlɛ, paakam pa-lɩmaɣza tɔɔnaɣ kɩbaŋa ŋga pɔtɔkaɣ peeɖe yɔ kɔ-yɔɔ. Pɔyɔɔdaa se: “Ðɩtɔzʋʋ kpakpasɩ nzɩ ɖɩtɔkaɣ falaa Ejipiti ɛjaɖɛ taa yɔ sɩ-yɔɔ, ɖɩtɔzʋʋ kama, anasaayɩ somola, caasɩ, kaabʋnaa yɔɔ!” (Kɩg. 11:5) Ɛlɛ toovenim taa lɛ, pɔtɔkaɣ tɔɔnaɣ ŋga “falaa” yaa we? Aayɩ. Izrayɛɛlɩ mba kaatɔɔ kʋñɔŋ siŋŋ; alɩwaatʋ ndʋ tɩ-taa, paakɛ yomaa Ejipiti nɛ panazaɣ-wɛ siŋŋ. (Ejl. 1:13, 14; 3:6-9) Ɛlɛ, pʋwayɩ pɔsɔ kʋñɔmɩŋ ɛnɩ ɩ-yɔɔ nɛ pɔsɔɔlɩ siŋŋ se papɩsɩ peeɖe. Mbʋ ɛzɩ paakam pa-lɩmaɣza kɩbam ndɩ ndɩ mbʋ Yehowa labɩ-wɛ pitileɖita yɔ pɩ-yɔɔ lɛ, palɩzaa se pɔtɔzʋʋ alɩwaatʋ kɩbandʋ ndʋ tɩɖɛwa yɔ tɩ-yɔɔ. Pa-lakasɩ nzɩ sɩtaakɛdɩnɩ Yehowa.—Kɩg. 11:10. w20.11 25 § 5-6

Nabʋyʋ taa, ɖɩpɩzɩɣ nɛ ɖɩmaɣzɩ nɛ ɖiɖiɣzina se ɛyʋ wezuu caɣʋ tɩɖaɣlɩ nɛ kɩ-taa lɛ “kʋñɔŋ kɩlɩna.” (Yɔɔb 14:1) Nabʋyʋ taa piyeki nɛ pitiki-ɖʋ yɔɔɔ. Piitibi caanaʋ taa Yehowa sɛyaa nabɛyɛ yɔɔɔ ɖɔɖɔ. Halɩ pa-taa nabɛyɛ kaasɔɔlaa se pasɩ. (1 Aw. 19:2-4; Yɔɔb 3:1-3, 11; 7:15, 16) Ɛlɛ, Yehowa hɛzaɣ pa-laŋa nɛ ɛkpazɩɣ-wɛ ɖoŋ paa ɛzɩmtaa. Pama pɔ-tɔm Bibl taa se pɩsa nɛ ɖɩkalɩɣ-tʋ lɛ, pɩhɛzɩ ɖa-laŋa nɛ ɖɩkpɛlɩkɩ lɔŋ pɔ-cɔlɔ. (Roma 15:4) Ðɩna Yakɔɔb pɩyalʋ Yosɛɛfʋ kɩɖaʋ. Yosɛɛfʋ wezuu caɣʋ lɛɣzɩ siŋŋ alɩwaatʋ pazɩ taa. Ɛ nɛ ɛ-caa weyi ɛsɔɔlɩ-ɩ siŋŋ yɔ patɩtasɩ wɛʋ ɖɩɣa kʋɖʋmaɣ taa. Ɛpɩsɩ yom weyi ɛtɩlɩɩ pʋyʋ yɔ Ejipiti, nɛ ɛlakɩ tʋmɩyɛ abalʋ weyi ɛɛsɩŋ Yehowa yɔ ɛ-tɛ. (Kiɖe 37:3, 4, 21-28; 39:1) Potifaarɩ halʋ cɛtɩnɩ Yosɛɛfʋ taa se ɛcaɣ se ɛsʋʋnɩ-ɩ. Potifaarɩ tɩtazɩ se ɛna se pɩkɛ toovenim yaa cɛtɩm, ɛlɛ ɛkpa Yosɛɛfʋ nɛ ɛɖʋ salaka taa nɛ ɛlɛ wɛɛ kpasɩ taa peeɖe. (Kiɖe 39:14-20; Keɣa 104:17, 18) Pɩtʋʋ fɛyɩ se Yosɛɛfʋ kaawɛnɩ toovenim se pitibi-i yɔɔɔ! w20.12 16-17 § 1-4

Yesu yɔɔdaa se mbʋ pɩ-tɔm kɩlɩ cɛyʋʋ nɛ pɩwɛɛ se ɖɩpɔzɩ-pʋ ɖa-adɩma taa yɔ pɩ-taa nabʋyʋ lɛ se Ɛsɔ hɩɖɛ yɔɔ ɛñalɩ. Ɛlɛ, Yesu tɔm ndʋ tɩ-tɔbʋʋ lɛ suwe? Ye pɔtɔm se pañalɩ nabʋyʋ yɔɔ yɔ, pʋ-tɔbʋʋ lɛ se pala nɛ pɩwɛɛ kele kele yaa cɩɖɩ cɩɖɩ. Ɛlɛ, nabɛyɛ pɩzɩɣ nɛ pɔpɔzɩ se ‘Yehowa hɩɖɛ tɩtɛ wɛʋ kele kele yaa cɩɖɩ cɩɖɩ yaa we?’ Pɩsa nɛ ɖicosi tɔm ndʋ tɩ-yɔɔ lɛ, pɩwɛɛ se ɖɩmaɣzɩ mbʋ payɩ pitukuuni hɩɖɛ yɔ pɩ-yɔɔ. Hɩɖɛ ɛɛsɩɣnɩ masɩ nzɩ pamaɣnɩ-ɖɩ takayaɣ yɔɔ yaa ɛzɩma payaɣ-ɖɩ yɔ. Yʋsɩ ndʋ Bibl yɔɔdʋʋ yɔ: “Hɩɖɛ sɛʋ camɩyɛ kɩlɩ ñɩm sakɩyɛ.” (Adu. 22:1; Ekl. 7:1) Ɛbɛ yɔɔ hɩɖɛ tɔm cɛyɩ mbʋ? Mbʋ pʋyɔɔ yɔ, pitukuuni mbʋ nɔɔyʋ kɛnaa yɔ, ndʋ lalaa maɣzɩɣ weyi payaɣ-ɩ hɩɖɛ nɖɩ yɔ ɛ-yɔɔ yɔ. Ye mbʋ, pɩtɩkɛ ɛzɩma pamaɣ hɩɖɛ naɖɩyɛ takayaɣ yɔɔ yaa ɛzɩma payaɣ-ɖɩ yɔ pɩ-tɔm kɩlɩnɩ cɛyʋʋ; ɛlɛ mbʋ pɩ-tɔm kɩlɩ cɛyʋʋ yɔ, mbʋ lɛ lɩmaɣza wena ɛyaa lalaa wɛɣnɩ alɩwaatʋ ndʋ panaɣ hɩɖɛ nɖɩ yaa panɩɣ-ɖɩ yɔ. Alɩwaatʋ ndʋ ɛyaa yɔɔdʋʋ cɛtɩm tɔm Yehowa yɔɔ yɔ, pɛwɛɛ nɛ pañakɩ pana se peyele nɛ ɛyaa maɣzɩ tɔm kɩdɛkɛdɩtʋ ɛ-yɔɔ. Alɩwaatʋ ndʋ ɛyaa nɩɣ tɔm kɩdɛkɛdɩtʋ ndʋ lɛ, piyeki nɛ pakʋʋ Ɛsɔ tɔm yaa pɔyɔɔdʋʋ cɛtɩm tɔm ɛ-hɩɖɛ yɔɔ. w20.06 3 § 5-7

Ðɩpɩzɩɣ nɛ ɖɩpaɣzɩ nɩɣzʋʋ kala wena ɖɩkatɩɣ yɔ a-yɔɔ siŋŋ nɛ piyele nɛ ɖɩɩtasɩɣ maɣzʋʋ nabʋyʋ yɔɔ. Ðɩpɩzɩɣ nɛ ɖɩnɩɣzɩɣ se ɖɩɩkaɣ hiɣu liidiye sakɩyɛ nɛ ɖɩcɔnɩ ɖa-kɩcɛyɩm ɖeɖe, yaa se ɖɩkaɣ tɔlʋʋ kʋdɔŋ nɛ piyele nɛ ɖɩɩtasɩɣ pɩzʋʋ se ɖɩla tʋmɩyɛ yaa halɩ ɖilesi ɖa-tʋmɩyɛ. Ðɩpɩzɩɣ ɖɔɖɔ nɛ ɖɩnɩɣzɩɣ se ɖɩɩkaɣ pɩzʋʋ nɛ ɖɩɖɔkɩ ɖe-siɣsiɣ wɛtʋ alɩwaatʋ ndʋ pɩtakɩɣ-ɖʋ se ɖɩmaanɩ Ɛsɔ paɣtʋ yɔɔ yɔ. Piileɖiɣ lɛ, Sataŋ kaɣ tuyuu mba eɖiyiɣ yɔ se pakʋyɩ Ɛsɔ samaɣ yɔɔ, pʋyɔɔ lɛ, ɖɩpɩzɩɣ nɛ ɖɩnɩɣzɩɣ ɛzɩma ɖɩkaɣ labʋ alɩwaatʋ ndʋ tɩ-taa yɔ pɩ-yɔɔ. Pɩtɩla ɖɩpɔzʋʋ ɖa-tɩ se: ‘Ɛzɩ pɩwɛɛkaa se manɩɣzɩɣ tɔm ndʋ tɩ-yɔɔ?’ Ðɩnawa se Yesu heyi ɛ-wayɩ tɩŋɩyaa se: “Iyele nɩɣzʋʋ.” (Mat. 6:25) Ɛzɩ Yesu ñɩnaɣ se ɛyɔɔdɩ se pɩtɩpɔzɩ se ɖɩnɩɣzɩ nabʋyʋ yɔɔ? Pɩtʋʋ fɛyɩ se pɩtɩkɛ mbʋ ɛñɩnaɣ yɔɔdʋʋ! Tɔzɩ se caanaʋ taa Yehowa sɛyaa nabɛyɛ kaawɛ nɩɣzɛ taa ɖɔɖɔ. Paa mbʋ yɔ, pɔ-tɔm kaakɛdɩnɩ Yehowa. (1 Aw. 19:4) Toovenim taa lɛ, Yesu kaawɛɛ nɛ ɛhɛzɩɣ ɖa-laŋɩyɛ na. Ɛtaasɔɔlɩ se ɖɩkɩlɩɣ nɩɣzʋʋ wezuu caɣʋ taa kɩcɛyɩm yɔɔ, nɛ piyele nɛ pɩwɛɛnɩ ɖoŋ kɩdɛkɛdɩŋ ɖɛ-Ɛsɔ sɛtʋ yɔɔ. w21.01 3 § 4-5

Ɛzɩma abalʋ lakɩnɩ ɛ-ɖoŋ tʋmɩyɛ ɛ-hɔʋ taa yɔ, ɛkaɣ Yehowa nɛ Yesu labʋ akɔnta pɩ-yɔɔ. (1 Pɩy. 3:7) Yehowa kɛnɩ kedeŋa kpeekpe hɔʋ Ñʋʋdʋ; pʋyɔɔ lɛ, ɛwɛnɩ waɖɛ se ɛɖʋ e-piya paɣtʋ pɩlɩɩnɩ ɛzɩma pɩpɔzʋʋ se sɩcaɣ wezuu yɔ pɩ-yɔɔ, nɛ ɛwɛnɩ waɖɛ ɖɔɖɔ se ɛla nɛ sɩña ɛ-paɣtʋ. (Iza. 33:22) Yesu kɛnɩ Krɩstʋ ɛgbɛyɛ ñʋʋdʋ nɛ ɛwɛnɩ waɖɛ ɖɔɖɔ se ɛɖʋ paɣtʋ nɛ ɛla nɛ pañam-tʋ. (Gal. 6:2; Kol. 1:18-20) Ɛzɩ Yehowa nɛ Yesu yɔ, paa Krɩstʋ mba hɔʋ ñʋʋdʋ weyi lɛ, ɛwɛnɩ waɖɛ ɖɔɖɔ se ɛkpaɣ lɩmaɣza ɛ-hɔʋ taa. (Roma 7:2; Efɛz. 6:4) Ɛlɛ, waɖɛ nɖɩ ɖɩwɛnɩ kamaɣ. Pɩpɔzʋʋ se lɩmaɣza wena ɛkpakɩɣ yɔ, ala nɔɔ kʋɖʋmaɣ nɛ paɣtʋ kila wena awɛ Ɛsɔtɔm taa yɔ. (Adu. 3:5, 6) Nɛ hɔʋ ñʋʋdʋ nɔɔyʋ fɛyɩnɩ waɖɛ se ɛɖʋ paɣtʋ ɛyaa mba pɛfɛyɩ ɛ-hɔʋ taa yɔ. (Roma 14:4) Pɩtasɩ lɛ, alɩwaatʋ ndʋ ɛ-pɩyalaa yaa ɛ-pɛlaa paɣlɩɣ nɛ palɩɩ ɖɩɣa lɛ, powoki pɩ-yɔɔ nɛ pañaŋɩ-ɩ, ɛlɛ ɛtɩtasɩ kɛʋ pa-ñʋʋdʋ.—Mat. 19:5. w21.02 2-3 § 3-5

Nʋmɔʋ sɔsɔʋ ŋgʋ kɩ-yɔɔ hɔʋ ñʋʋdʋ nɔɔyʋ pɩzɩɣ ɛtɩŋna nɛ ɛwɩlɩ se ɛsɔɔlɩ ɛ-hɔʋ taa ñɩma yɔ, ŋgʋ lɛ se ɛcɔnɩ po-tomnaɣ yɔɔ kɩcɛyɩm ɖeɖe. Ɛlɛ pɩwɛɛ se ɛtɔzɩ se pɩcɛyaa nɛ pɩkpaɖɩ se ɛsɩnɩ ɛ-hɔʋ taa ñɩma nɛ taabalɩyɛ kɩbanɖɛ wɛɛ pa nɛ Yehowa pɛ-hɛkʋ taa. (Mat. 5:3) Yesu sɩkaɣ nazɩm sizika yɔɔ lɛ, ɛñɩnaɣ se pɔcɔnɩ Maarɩɩ kɩcɛyɩm ɖeɖe camɩyɛ. Paa Yesu kaawɛɛ nɛ ɛnɩɣ siziŋ siŋŋ yɔ, ɛpɔzɩ apostoloo Yohanɛɛsɩ se ɛcɔnɩ Maarɩɩ yɔɔ. (Yoh. 19:26, 27) Koobu abalɩñɩnʋ weyi ɛkɛ hɔʋ ñʋʋdʋ yɔ, ɛpɩzɩɣ nɛ ɛwɛɛnɩ tʋma sakɩyɛ se ɛlakɩ. Pɩpɔzʋʋ se ɛwɛɛ kpekpeka tomnaɣ yɔɔ tʋmɩyɛ nɖɩ ɛlakɩ yɔ ɖɩ-taa nɛ ɛ-wɛtʋ ɖʋ Yehowa hɩɖɛ. (Efɛz. 6:5, 6; Tiiti 2:9, 10) Nɛ ɛpɩzɩɣ nɛ ɛwɛɛnɩ tʋma ɛgbɛyɛ taa. A-taa naayɛ lɛ se ɛkpazɩ e-koobiya ɖoŋ nɛ ɛwɩlɩ se ɛmaɣzɩɣ pɔ-yɔɔ nɛ ɛɖɛɛ nɔɔ tɔm susuu taa ɖɔɖɔ. Alɩwaatʋ kʋɖʋmtʋ ndʋ tɩ-taa lɛ, pɩcɛyaa se ɛ nɛ ɛ-halʋ nɛ pe-piya pɛkpɛlɩkɩɣ Bibl ɖoŋ ɖoŋ. Pakaɣ wɛnʋʋ ɛsɩmɩyɛ siŋŋ mbʋ payɩ ɛlakɩ nɛ ɛcɔŋnɩ po-tomnaɣ taa alaafɩya ɖeɖe, nɛ eyeki se pɛwɛɛ taa leleŋ taa, nɛ ɛsɩɣnɩ-wɛ se powolo pɩ-yɔɔ nɛ pɛsɛɣ Yehowa yɔ pɩ-yɔɔ.—Efɛz. 5:28, 29; 6:4. w21.01 12 § 15, 17

Bibl yɔɔdʋʋ mbʋ mbʋ halʋ weyi ɛwɛ niye yɔ, ɛpɩzɩɣ nɛ ɛla yɔ pɩ-tɔm. Kɩyɔɔdʋʋ se ɛcɔŋnɩ ɛ-ɖɩɣa yɔɔ camɩyɛ, ɛyakɩ hayɩm nɛ ɛcɔŋnɩ pɩ-yɔɔ camɩyɛ nɛ ɛlakɩ tadɩyɛ. (Adu. 31:15, 16, 18) Ɛtɩkɛ yom weyi ɛfɛyɩnɩ waɖɛ se ɛyɔɔdɩ ɛ-lɩmaɣza yɔ. Ɛlɛ, ɛ-walʋ taɣ-ɩ liu nɛ ewelisiɣ ɛ-lɩmaɣza. (Adu. 31:11, 26, 27) Ye abalʋ nɔɔyʋ ɛñaŋ ɛ-halʋ mbʋ yɔ, ɛlɛ taa kaɣ labʋ leleŋ nɛ eluzi ɛ-tɩ ɛ-tɛɛ. Paa Yesu kaalabɩ tʋma sɔsɔna yɔ, ɛtɩmaɣzɩ se ye eluzuu ɛ-tɩ Yehowa tɛɛ yɔ, pɩwɩlɩɣ se ɛtɩlɩɩ pʋyʋ. (1 Kɔr. 15:28; Fil. 2:5, 6) Mbʋ ɖɔɖɔ halʋ kpekpeka tʋ weyi ɛmaɣzɩɣnɩ Yesu kɩɖaʋ yɔ, ɛɛkaɣ maɣzʋʋ se ye eluzuu ɛ-tɩ ɛ-walʋ tɛɛ yɔ, pɩwɩlɩɣ se ɛtɩlɩɩ pʋyʋ. Ɛkaɣ ɛ-walʋ ɖʋʋ nesi mbʋ pʋyɔɔ yɔ ɛsɔɔlɩ-ɩ. Ɛlɛ kɔzɩ kɔzɩ lɛ, ɛkaɣ labʋ mbʋ, mbʋ pʋyɔɔ yɔ ɛsɔɔlɩ Yehowa nɛ ɛñaŋɩ-ɩ. Halʋ Krɩstʋ tʋ weyi eluzuu ɛ-tɩ yɔ, ɛɛkaɣ ɖʋʋ ɛ-walʋ nesi ye ɛlɛ ɛpɔzʋʋ-ɩ se ɛmaanɩ Bibl paɣtʋ yaa kɩ-paɣtʋ kila yɔɔ yɔ. w21.02 11 § 14-15; 12 § 19

Sɔɔlɩm mbʋ Yehowa sɛyaa wɛnɩ ɛ-yɔɔ yɔ, pɩsɩɣnɩ-wɛ paa ɛzɩmtaa se pɔɖɔkɩ pa-tɩ nazɩm taa. Kɩɖaʋ nakʋyʋ yɔ: Alɩwaatʋ ndʋ Yuuda tɔm ɖɩhʋyɛ sɔsɔɖɛ taa ñɩma ɖʋ paɣtʋ apostoloowaa se peyele tɔm susuu yɔ, sɔɔlɩm mbʋ paawɛnɩ Ɛsɔ yɔɔ yɔ piseɣti-wɛ nɛ “paña Ɛsɔ ɛzɩ pa-ñʋʋdʋ yɔ, nɛ pɩtɩkɛ ɛyaa.” (Tʋma 5:29; 1 Yoh. 5:3) Sɔnɔ, sɔɔlɩm sɔsɔm mbʋ ɖo-koobiya wɛnɩ Yehowa yɔɔ yɔ, pɩsɩɣnɩ pa-taa sakɩyɛ se pɔɖɔkɩ pa-tɩ kpam alɩwaatʋ ndʋ kominawaa mba pɛwɛ ɖoŋ nɛ pɛwɛɛ kañatʋ yɔ panazɩɣ-wɛ yɔ. Alɩwaatʋ ndʋ ɛjaɖɛ paɖɩɣ-ɖʋ yɔ, ɖiiyeki se pitibi-ɖʋ yɔɔɔ ɛlɛ ɖa-taa lakɩ leleŋ. (Tʋma 5:41; Roma mba 5:3-5) Alɩwaatʋ ndʋ ɖɔ-hɔʋ taa ñɩma maɣmaɣ kaɖɩɣnɩ-ɖʋ yɔ, pɩpɩzɩɣ nɛ pɩwɛɛ-ɖʋ kaɖɛ siŋŋ se ɖɩɖɔkɩ ɖa-tɩ. Ðɔ-hɔʋ taa ñɩma kɔŋ nɛ peɖiɣzina se ɖɩsɔɔlaa se ɖɩkpɛlɩkɩ Yehowa yɔɔ tɔm lɛ, pa-taa nabɛyɛ pɩzɩɣ nɛ pamaɣzɩ se pɛwɛɛ nɛ pepeɣziɣ-ɖʋ. Lalaa pɩzɩɣ nɛ pamaɣzɩ se ɖa-ñʋʋ taa cɔwa. (Kpaɣ-tʋ nɛ ŋmaɣzɩnɩ Maarkɩ 3:21.) Halɩ papɩzɩɣ nɛ pakaɖɩnɩ-ɖʋ siŋŋ. Alɩwaatʋ ndʋ pakaɖɩɣnɩ-ɖʋ yɔ, pɩtɩpɔzɩ se pɩɖɩɣzɩ-ɖʋ. Yesu kaayɔɔdaa se: “Ɛyʋ koyindinaa kaɣ kɛʋ ɛ-maɣmaɣ ɛ-ɖɩɣa taa mba.”—Mat. 10:36. w21.03 21 § 6-7

Ye ŋsɩ koobu nɔɔyʋ se iwolo nɛ ɩkpɛlɩkɩnɩ Bibl yɔ, welisi camɩyɛ alɩwaatʋ ndʋ wɩlɩyʋ nɛ Bibl kpɛlɩkɩyʋ pɔyɔɔdʋʋ yɔ. Ye ŋlabɩ mbʋ yɔ, ŋkaɣ pɩzʋʋ nɛ ŋɖʋ nesi alɩwaatʋ kɩbandʋ yɔɔ. Ɛlɛ pɩwɛɛ se ŋmaɣzɩ camɩyɛ pʋcɔ nɛ ŋyɔɔdɩ. Pɩtɩpɔzɩ se ŋkɩlɩ yɔɔdʋʋ nɛ pɩtɩpɔzɩ se ŋcɛ wɩlɩyʋ nɔɔ alɩwaatʋ ndʋ ɛlɛ kaacɔlʋʋ kpɛlɩkɩyʋ lɩmaɣza yɔ, nɛ pɩtɩpɔzɩ ɖɔɖɔ se ŋyɔɔdɩ tɔm ndʋ tɩwɛ ndɩ nɛ ndʋ ɩwɛɛ nɛ ɩkpɛlɩkɩɣ yɔ. Ɛlɛ ŋpɩzɩɣ nɛ ŋyɔɔdɩ tɔm natʋyʋ pazɩ, ŋha kɩɖaʋ nakʋyʋ yaa ŋpɔzɩ tɔm natʋyʋ nɛ pɩsa nɛ tɔm ndʋ ɩwɛɛ nɛ ɩkpɛlɩkɩɣ yɔ, tɩ-taa tʋ kpayɩ kpayɩ. Nabʋyʋ taa, pɩpɩzɩɣ nɛ pɩlabɩ-ŋ ɛzɩ ŋfɛyɩnɩ tɔm sakɩyɛ se ŋyɔɔdɩ yɔ. Ɛlɛ ye ŋsam kpɛlɩkɩyʋ nɛ ŋwɩlɩ se ŋmaɣzɩɣ ɛ-yɔɔ yɔ, ŋkaɣ-ɩ sɩnʋʋ se ɛɖɛɛnɩ ɛsɩndaa. Ŋpɩzɩɣ nɛ ŋkɛdɩ kpɛlɩkɩyʋ ɛzɩma ŋlaba nɛ ŋtɩlɩ toovenim yɔ, ɛzɩma ŋlʋbɩnɩ kaɖɛ naɖɩyɛ nɛ ŋwa yɔ, yaa ɛzɩma Yehowa sɩnɩ-ŋ yɔ pɩ-tɔm, ye ŋnawa se pɩpɩzɩɣ nɛ pɩsɩnɩ-ɩ yɔ. (Keɣa 77:4, 7) Pɩtɩla, tɔm ndʋ ɖeyi ɖeyi pɩpɔzʋʋ se kpɛlɩkɩyʋ ɛnɩɩ. Tɔm ndʋ tɩpɩzɩɣ nɛ tɩkpazɩ e-tisuu ɖoŋ, yaa tiseɣti-i se ɛɖɛɛnɩ ɛsɩndaa nɛ pamɩyɩsɩ-ɩ lɩm. w21.03 10 § 9-10

Toovenim taa lɛ, anɩ pɩwɛɛ se paɖʋ hɩɖɛ alɩwaatʋ ndʋ ɖɔ-tɔm susuu lʋlʋʋ pee kɩbana yɔ? Pɔɔlɩ cosi tɔm ndʋ tɩ-yɔɔ alɩwaatʋ ndʋ ɛma tɔm tʋnɛ Kɔrɛntɩ ɛgbɛyɛ yɔɔ yɔ. Ɛmawa se: “Mɔnsɔwa, Apoloosi mɩzɩ lɩm, ɛlɛ Ɛsɔ lakaɣna nɛ pɩpaɣlɩɣ, mbʋ yebina nɛ weyi ɛsɔʋ yɔ ɛtɩkɛ pʋyʋ nɛ weyi ɛmɩzɩɣ lɩm yɔ ɛtɩkɛ pʋyʋ ɖɔɖɔ, ɛlɛ Ɛsɔ weyi ɛlakɩ nɛ pɩpaɣlɩɣ yɔ.” (1 Kɔr. 3:6, 7) Ɛzɩ Pɔɔlɩ yɔ, alɩwaatʋ ndʋ ɖɔ-tɔm susuu lʋlʋʋ pee kɩbana yɔ, Yehowa pɩwɛɛ se ɖɩɖʋ hɩɖɛ paa ɛzɩmtaa. Waɖɛ nɖɩ ɖɩwɛna se ɖa nɛ Ɛsɔ, Krɩstʋ nɛ Ɛsɔ tiyiyaa “ɖɩkpɛndaa nɛ ɖɩlakɩ tʋmɩyɛ” yɔ, ɛzɩma ɖɩpɩzɩɣ nɛ ɖɩwɩlɩ ɛsɩmɩyɛ ɖɩ-yɔɔ? (2 Kɔr. 6:1) Ðɩpɩzɩɣ nɛ ɖɩla mbʋ ye ɖɩñɩnɩɣ nʋmɔŋ weyi ɩ-yɔɔ ɖɩtɩŋna nɛ ɖisusi lalaa laŋhɛzɩyɛ tɔm nɛ kpekpeka yɔ. Ðɩpɩzɩɣ nɛ ɖɩtɩŋnɩ nʋmɔŋ sakɩyɛ yɔɔ nɛ ɖɩla mbʋ. Pɩtasɩnɩ se pɩpɔzʋʋ se ɖiɖuu toovenim ɖomaɣ lɛ, pɩwɛɛ se ɖɩmɩzɩ kɔ-yɔɔ lɩm ɖɔɖɔ. Alɩwaatʋ ndʋ ɛyʋ nɔɔyʋ wɩlɩɣ se toovenim tɔm kɛdɩnɩ-ɩ yɔ, ɖɩsɔɔlaa se ɖɩla mbʋ payɩ ɖɩpɩzɩɣ yɔ nɛ ɖɩpɩsɩ nɛ ɖɩyɔɔdɩnɩ-ɩ nɛ ɖa nɛ ɩ ɖɩpaɣzɩ Bibl kpɛlɩkʋʋ. Alɩwaatʋ ndʋ ɖɩnaɣ se Yehowa wɛɛ nɛ ɛsɩɣnɩ Bibl kpɛlɩkɩyʋ ɛnʋ se ɛlɛɣzɩ ɛ-maɣzɩm nɛ ɛzɩma pɩlakɩ-ɩ yɔ lɛ, ɖa-taa lakɩ leleŋ. w20.05 30 § 14, 16-18